Matěo 15 - Kawyaw RC

Cǒmara a ta̤mǎlò̤ ta phiphu ala̤klo

¹ Pharisè̌phû̌ ta pwa̤sû̌ǐ ta̤sû̌ta̤tòwò asara akla toǒǒnu, a ǒ Ye̤rǔshèlèwî̤ dě a hè gwè Běcǎ Ye̤shǔ,

² “Na khophijaû̌ htǒotoǒ numî̌ ma̤tè̤dě a gûma̤kû̌kò pwǐ ta̤subusaba ala̤klo ǒnu toǒ tò̤ ma̤tè? Asî glè̌ ǎshǎ dě a shǔbò kû̌kò acǔde tò̤.”

³ Běcǎ Ye̤shǔ hî̌shǔ asî, “Sî wîkè Cǒmara ta̤mǎlò̤ toǒ dě sî cû̌gûma̤ tǒ̤ sî phiphu ala̤klo ma̤tè?

⁴ Ma̤tè̤hî̌dě, Cǒmara hî̌, ‘Bè̌dubè̌na̤ namo̤napha nî̌,’ dě ‘Kòyò htě a ǐsho amo̤apha tapwa̤pwa̤nu bǎ ma̤sikè yǎ.’

⁵ Pwǎ̤ta sî nohî̌ kòmo̤kòpha, ‘Kǒ mo̤, kǒ pha, wûhta htě he tobǎ kè̌ǐkhwè̌ǐ ma̤jè yǎta sînu aǒ lè, pò̤̌ta he bè̌lò̤hto he sò̌phlǒ ta he tobǎ ǐ yǎta Cǒmara,’ sî nohî̌ kò ta kòmo̤kòpha hǐnu.

⁶ Kòyò tapwa̤pwa̤ dè ge hî̌ amo̤apha hǐnu hî̌dě sî nobè̌dubè̌na̤pe kò ta kòmo̤kòpha tò̤. Sî lṳ̂kû̌ sî phiphu ala̤klo akhû̌akhî, sî ma̤phèkèbò Cǒmara a ta̤mǎlò̤ htǒotûmû hǒ.

⁷ Kòyò jîcǒjîtè̤ ana̤ sî꤮, pwa̤po̤ Isaǐa pwe̤ǐnǎ sîwi̤sîkè̌ numî̌ a totǐ.

⁸ ‘Kòyò htǒotoǒ bè̌dubè̌na̤ lǒkho he ta akhû̌phě pwǎ̤ta a sò̌phlǒ numî̌ a ǒtepheyî̤pwǎ ta he.

⁹ Asî sabahtò̌ he htǒonu amûasǎ ǒ dǐcǎ꤮ tò̤. Asî sû̌ǐtòwòǐ pwǎ kò ta kòyòhǎkhû̌phû̌ ala̤klo toǒ pwǎ̤tadě a hî̌ lǒkho ta a sû̌ǐtòwòǐ kò ta Cǒmara a ta̤mǎlò̤ toǒ.’”

Ta̤ htě a ma̤ phû̌mò̤ kòyò toǒ

¹⁰ Běcǎ Ye̤shǔ kaǎhèphǔ kòyò saprṳ̂ akòshî̌ dě a hî̌ asî, “Gana̤de dě jipwi̤ kè̌lǎsî̌ya te̤mǎ lǒkho.

¹¹ Ta̤htě a nṳ dě kòyò gokû toǒnu, a ma̤ phû̌mò̤ nû̌û dě Cǒmara alo̤mo̤ tò̤. Pwǎ̤ta ta̤htě a hǎhtò̌ kòyò gokû toǒnu, a ma̤ phû̌mò̤ nû̌û.”

¹² Bǎnuakha akhophijaû̌ toǒ hè aǒ dě a hî̌ nû̌û, “Na hî̌bǎ yo̤sǎ toǒnu, Pharisè̌phû̌ toǒ sò̌phlǒshabò na numî̌ na sî̌ya nana̤ ya?”

¹³ Dě a hî̌shǔ asî, “Hepha dě mǒkhû̌ tapwa̤ yò̌htò̌bòkè sǒmṳ htě a shǒ mè̤tò̤nu toǒ pě.

¹⁴ Gènè̤ tǒ̤ pûma̤ asî ma̤, noǒkètû̌ asî hǐnu hǒ. Asî mî̌ kòyò mi̤sǎkhǐ toǒ dě a sûpwǎbǎ kòyò mi̤sǎkhǐ toǒ aklè̌. Kòyò mi̤sǎkhǐ tapwa̤ dè sûbǎ kòyò mi̤sǎkhǐ ahǔwa̤tapwa̤ klè̌ hî̌numî̌ asî lò̤te̤bò hǎkû sò̌gini̤ pě.”

¹⁵ Htodě Petru hî̌ nû̌û, “Hî̌phlo bǎ pa yo̤sǎkhěkhǒ htǒo amûasǎnu.”

¹⁶ Běcǎ Ye̤shǔ hî̌shǔ asî, “Sî gènè̤phlo kû̌nò kò hǒtò̤ ya?

¹⁷ Ta̤lǒ̤꤮ bò htě a nṳ gokû toǒ numî̌, a nṳ phukû, a nṳhto phukû dě a bǎ hǎhtò̌cû̌kèpwǎ dokhlo numî̌ sî sî̌ya tò̤ ya?

¹⁸ Pwǎ̤ta ta̤htě a ǒ gokû hǎhtò̌ toǒ numî̌ a ǒ sò̌phlǒkû hè, dě ama̤ phû̌mò̤ kòyò.

¹⁹ Ma̤tè̤hî̌dě ta̤ma̤si kòyòhǎkhû̌phû̌, cû̌sǔnṳ kòphû̌kòma, cû̌sǔnṳ mamǔmakhû, ǎhǔhǎkě, khòlòho lǒkho ta̤, dǒmi̤shǐyo̤ kò, ta ta̤gènè̤ phû̌mò̤ toǒ, ta̤ lǒ̤꤮ bò htǒotoǒ numî̌ a hèhǎhtò̌bò dě kòyò a sò̌phlǒkû.

²⁰ Ta̤htǒo toǒ mî̌ ama̤ phû̌mò̤ kòyò. Shǔbò cǔde tò̤ dě ǎshǎ numî̌ ama̤ phû̌mò̤ kòyò tò̤.”

Khana̤ khlilèmo̤ tapwa̤ ata̤yṳ

²¹ Běcǎ Ye̤shǔ hǎhtò̌cû̌kè ta gûla̤ bǎ a ǒphǔ te̤we̤lṳ̂ ta Turǔwî̤ ta Sidowî̤nu tò̤glò.

²² Dě Khana̤ khlilèmo̤ htě a ǒ gabǎnu tapwa̤ hè Běcǎ Ye̤shǔ ǒ dě a hè yi̤kǒ kwigwèbǎǐhtò̌ nû̌û, “Kǒ꤮ Běcǎ, Khwǐdǎ̤wi̤ aphû̌khû, gwèbǎǐ pû he nî̌꤮ khînǎ ma̤sha hephû̌mǔ dě a ma̤shû̌ mè̤mè̤̌.”

²³ Pwǎ̤ta Běcǎ Ye̤shǔ hî̌shǔ nû̌û dǐmû̌꤮ tò̤. Dě akhophijaû̌ toǒ hè kwigwèbǎǐ nû̌û, “No gekè mamǔnu tapwa̤, a yi̤kǒ cû̌kû̌ pa kò nǔ.”

²⁴ Dě Běcǎ Ye̤shǔ hî̌shǔ mamǔ htǒotapwa̤, “Cǒmara nohè tû̌pwǎ he ta Israelphû̌ htě asǒsǒta sophû̌ hǎmǎ toǒ aya pwǎ.”

²⁵ Dě mamǔ htǒotapwa̤ hè gene̤lò̤ Běcǎ Ye̤shǔ lo̤mo̤ dě a hî̌ nû̌û, “Kǒ꤮ Běcǎ, khòsò̌do ma̤jè pû he nî̌꤮.”

²⁶ Dě Běcǎ hî̌shǔ yǎ, “Pa phî̌phû̌ htǒotoǒ ashǎǎ dě bǔǎkè yǎta Chyǐ toǒ numî̌ a gwatò̤.”

²⁷ Dě a hî̌shǔ, “Amè̤, Běcǎ꤮ pwǎ̤tadě Chyǐ toǒ numî̌ a bǎ ǎnòpwǎ aběcǎ ashǎǎ lò̤gulò̤wṳ̂ dě dîjowa̤la̤nu toǒ pwǎ.”

²⁸ Htǒotaplǎdě Běcǎ Ye̤shǔ hî̌shǔ yǎ, “Mamǔ, na ta̤yṳta̤nǎ shomè̤mè̤̌! Pwǐ na kwinu a htû bǎtû̌ta na nî̌꤮.” A phû̌mamǔ ǒbǎǒmo̤ge taplǎpa bǎ Běcǎ hî̌ nû̌û akhanu.

Běcǎ Ye̤shǔ ma̤bǎplṳ̂ kòyò ta̤sha

²⁹ Běcǎ hǎhtò̌cû̌kè bǎnu a cû̌sayè̤yû Galilî̌a shikoǒdû̌htunu dě a cû̌htò̌ hǎnòò̌lò̤ bǎ khopa̤lo̤ tò̤glò.

³⁰ Kòyò toǒ hèplṳ̂hèphǎ kû̌bò nû̌û. Dě asî kaǎhènṳ, ò̌hènṳ lǒkho kòyò khò̌lopo̤tṳ̂rṳ̂ toǒ, kòyò mi̤sǎkhǐ toǒ, kòyò děkhò̌ toǒ, kòyò pè̌ toǒ ta ahǔwa̤ toǒ ǒplṳ̂ dě asî hèbè̌lò̤ nû̌û Běcǎ khò̌lopo̤kòshî̌ dě a ma̤bǎbò bǎ asî.

³¹ Bǎ kòyò toǒ kè̌shǐ ta kòyò pè̌ toǒ hî̌bǎjò gesǒ, kòyò khò̌lopo̤tṳ̂rṳ̂ toǒ wǒgesǒ, kòyò děkhò̌ toǒ cû̌jògesǒ, kòyò mi̤sǎkhǐ toǒ mi̤sǎlîgesǒ akhanu, asî sû̌pi̤sò̌pi̤ dě htû̌sò̌ǐ Israel a Cǒmara.

Běcǎ Ye̤shǔ bǔǎ kòyò lǐ̤rî̌

³² Běcǎ Ye̤shǔ kaǎhè akhophijaû̌ toǒ a ǒ dě a hî̌ asî, “He gwèbǎǐ mè̤mè̤̌ kòyò htǒotoǒ, a ǒkû̌ lǒkho ta he bǎo mî̌ a besuni̤ hǒ. Asî la̤ǎla̤o ǒ lǒkho dǐcǎ꤮ tò̤. He sò̌yṳ plûge ti̤wi̤kè asî tò̤, pěmî̌ asî lòdǒǎlòdǒo dě lòkhǔpo̤gebò lǒkho dě klè̌lo̤ hè̌.”

³³ Dě akhophijaû̌ toǒ hî̌shǔ nû̌û, “Gûla̤ bǎo tò̤glòmî̌ doshǒ ǒphǔ dǐdǒ꤮ tò̤. Pa glè̌ bǔǎ kòyò htǒo tûprṳ̂taphǎ ayanu, pa cû̌pwî̤ ǎ shǎǎ bǎtè?”

³⁴ Dě Běcǎ Ye̤shǔ gwè asî, “Sîmû̌ ǒ bematè?” Dě asî hî̌shǔ nû̌û, “A ǒ susǒtama ta tò̤mǔprî̌ tîkî̌phû̌꤮ pwǎ.”

³⁵ Dě Ye̤shǔ nohǎnòò̌lò̤bò kòyò saprṳ̂ htǒotoǒ hǎkhû̌.

³⁶ A phî̌htò̌ mû̌htǒo susǒtama ta tò̤mǔprî̌ htǒotoǒ dě a hî̌bwǐhî̌sîrî htû̌sò̌ǐ Cǒmara, dě a bî̌phò̌ mû̌ htǒotoǒ, htodě a ǐlò̤ nû̌ûta akhophijaû̌ toǒ. Akhophijaû̌ toǒ cû̌yṳ̂ǎlò̤bò tṳtṳ nû̌ûta kòyò saprṳ̂nu toǒ.

³⁷ Asî ǎkǒobebò pṳ̂̌꤮ tapwa̤, dě a ǎkǒobe pǒǎpǒo lǒ̤bò. Akhophijaû̌ phî̌wǒge mû̌ ǒkèpe htǒotoǒnu a bepe ta phǒběnu susǒtophǒbě.

³⁸ Dǒbǎ còcè̌pwǎ makhûdû̌ htě a ǎshǎ htǒonu, aǒ lǐ̤rî̌. Mamǔ ta phijaû̌nu kò dǒyǎ tò̤.

³⁹ Bǎ Běcǎ plûgehtokè kòyò saprṳ̂ akhanu, a cû̌nṳ sǒkhlikû dě a hǎhtò̌cû̌ Madalě̤naga.