Matěo 1 - Kawyaw RC

Ye̤shǔ akhlialè a ta̤khwè̌mǎnǎ

¹ Lî̤htǒomî̌ a khwè̌mǎnǎ Ye̤shǔkhrî̌stu akhlialè htě a tuculò̤ tṳtṳ nû̌û toǒ awi̤akè̌. A mî̌ akhlialè tuculò̤ Khwǐdǎ̤wi̤ ta Abraham.

² Abraham aphû̌lò̤ tṳtṳ Isǎko, Isǎko aphû̌lò̤ tṳtṳ Yǎ̤kò, Yǎ̤kò aphû̌lò̤ tṳtṳ Yṳ̌da ta apṳawè̤ toǒ.

³ Yṳ̌da aphû̌lò̤ tṳtṳ Perè̌ ta Serǎ, asî sò̌gini̤ amo̤ mî̌ ami̤ ta Tama. Perè̌ aphû̌lò̤ tṳtṳ Hesaro, Hesaro aphû̌lò̤ tṳtṳ Rama,

⁴ Rama aphû̌lò̤ tṳtṳ Amǐnadǎ, Amǐnadǎ aphû̌lò̤ tṳtṳ Na̤shû, Na̤shû aphû̌lò̤ tṳtṳ Salomo,

⁵ Salomo aphû̌lò̤ tṳtṳ Bò̌sǎ htě amo̤ mi̤ ta Rakhǎ, Bò̌sǎ aphû̌lò̤ tṳtṳ Ò̌bè̌ htě amo̤ mi̤ ta Rǔtǎ, Ò̌bè̌ aphû̌lò̤ tṳtṳ Yeshè̌.

⁶ Yeshè̌ mî̌ Khwǐdǎ̤wi̤ aphanu hǒ. Khwǐdǎ̤wi̤nu aphû̌lò̤ tṳtṳ Shòlomo htě amo̤ mî̌ Urǐya ama nuhǒ.

⁷ Shòlomo aphû̌lò̤ tṳtṳ Rehobo, Rehobo aphû̌lò̤ tṳtṳ Abǐya, Abǐya aphû̌lò̤ tṳtṳ Asa,

⁸ Asa aphû̌lò̤ tṳtṳ Yahò̌shaphǎ, Yahò̌shaphǎ aphû̌lò̤ tṳtṳ Jòra, Jòra aphû̌lò̤ tṳtṳ Usǐya,

⁹ Usǐya aphû̌lò̤ tṳtṳ Yò̌ta, Yò̌ta aphû̌lò̤ tṳtṳ Akha, Akha aphû̌lò̤ tṳtṳ Hesakǐa,

¹⁰ Hesakǐa aphû̌lò̤ tṳtṳ Manǎshe, Manǎshe aphû̌lò̤ tṳtṳ Amǒs, Amǒs aphû̌lò̤ tṳtṳ Joshǐa,

¹¹ Joshǐa aphû̌lò̤ tṳtṳ Yekhò̌niya ta apṳwè̤ tṳgumṳ. Khîkha htǒonu atotǐ bǎ kòyò glè̌pṳ̂kè Israelphû̌ cû̌htû jû dě Babuloga hǒtò̤ akhanu.

¹² Bǎ a cû̌ ǒ dě Babuloga akhanu, Yekhò̌niya aphû̌lò̤ Shelatiělè, Shelatiělè aphû̌lò̤ tṳtṳ Serǔbabělè.

¹³ Serǔbabělè aphû̌lò̤ tṳtṳ Abǐǔ, Abǐǔ aphû̌lò̤ tṳtṳ Elǐakǐ, Elǐakǐ aphû̌lò̤ tṳtṳ Asò,

¹⁴ Asò aphû̌lò̤ Sadǒ, Sadǒ aphû̌lò̤ tṳtṳ Akhe, Akhe aphû̌lò̤ tṳtṳ Elǐǔ,

¹⁵ Elǐǔ aphû̌lò̤ tṳtṳ Eliyasa, Eliyasa aphû̌lò̤ tṳtṳ Mǎta, Mǎta aphû̌lò̤ tṳtṳ Yǎ̤kò,

¹⁶ Yǎ̤kò aphû̌lò̤ tṳtṳ Jǒjè htě a mî̌ Marǐa awṳ̂nu hǒ. Marǐa phû̌ǒnṳ Ye̤shǔ htě kò kaǎ yǎta Khrî̌stu htǒonu.

¹⁷ Ma̤hǐnudě dǒkhli bǎ Abraham ahtukha tǒ̤hè dě Dǎ̤wi̤ ahtukha numî̌ a ǒ shǐlǐ̤htu. Dǒkhli bǎ Dǎ̤wi̤ ahtukha tǒ̤hè dě kò pṳ̂cû̌kè Israelphû̌ bǎ Babuloga numî̌ a ǒ shǐlǐ̤htu. Dǒkhli bǎ kò pṳ̂cû̌kè Israelphû̌ dě Babuloga tǒ̤hè dě Khrî̌stu ahtukha numî̌ a ǒ shǐlǐ̤htu.

Běcǎ Ye̤shǔkhrî̌stu ǒlò̤ awi̤akè̌

¹⁸ Ye̤shǔkhrî̌stu hè ǒlò̤ hî̌tè hî̌numî̌, Jǒjè hè gwè htû̌dèhto Ye̤shǔkhrî̌stu amo̤ Marǐa dě a bǎ phî̌ nû̌û. Pwǎ̤ta bǎ a phî̌ nû̌û hǒtò̤ akhanu, Cǒmara nomo̤dohtò̌ nû̌û ta Běcǎ sǎcahtǐ.

¹⁹ Jǒjè mî̌ kòyò htě acǒatè̤ tapwa̤, htohǒtò̤ pěmî̌ kò sî̌ya dě Marǐa sòwò̤hè̌ a gènè̤ akhû̌akhî, a glè bè̌hǔbè̌sè̌kè nû̌û.

²⁰ A gènè̤ hǐnu pwǎ̤ta, bǎ a hǎmoǒ akha, a hǎmoǒmi̤mò̤ kè̌shǐ Běcǎ Cǒmara a mǒkhû̌tanaphû̌ tapwa̤ hèǒlṳhtò̌ bǎ nû̌û dě a hî̌ nû̌û, “Dǎ̤wi̤ aphû̌khû Jǒjè, bǎgubǎgè pûma̤ ta na bǎ phî̌ Marǐa htǒonu ma̤, ma̤tè̤hî̌dě, a mo̤do htǒonumî̌ Běcǎ sǎcahtǐ nomo̤dohtò̌ pwǎ nû̌û.

²¹ A phû̌makhû pě dě na bǎ kaǎ ami̤ ta Ye̤shǔ nî̌꤮, ma̤tè̤hî̌dě a ma̤lû̌htò̌ge akòyò toǒ dě a ta̤sǔta̤plě akû pě.”

²² Ta̤ lǒ̤꤮ bò htǒo toǒ glè ma̤lǒma̤behtò̌ Cǒmara pwe̤ǐnǎ pwa̤po̤ tapwa̤ hî̌ ta,

²³ “Mamǔphû̌sǎ tapwa̤ bǎ mo̤do dě a phû̌ǒ a phû̌makhû pě, dě kòyò kaǎ nû̌ûmi̤ ta Emmanuel pě,” Emmanuel amûasǎ mî̌, “Cǒmara ǒkû̌ ta pa.”

²⁴ Bǎ Jǒjè hǎmoǒ shî̌nǎhtò̌ akha, a ma̤pwǐ Běcǎ a mǒkhû̌tanaphû̌ mǎnǎ nû̌ûnu. A geshodè̌ ta Marǐa dě a kaǎge nû̌û ahǐ.

²⁵ Pò̤̌ta bǎ Marǐa phû̌ǒlò̤ aphû̌makhû htǒotapwa̤ hǒtò̤nu, a hǎmoǒplǒ nû̌û hǒtò̤. Jǒjè kaǎ nû̌mi̤ ta Ye̤shǔ.