Mǎ̤riko 8 - Kawyaw RC

Ye̤shǔ ǐǎǐo kòyò lǐ̤rî̌

¹ Bǎnuakha kòyò saprṳ̂dû̌ ahǔwa̤ tṳ̂prṳ̂ hèǒhtuǒplǒ kû̌bò lè̌ nû̌û dě asî la̤ǎla̤o hǎbòkè dě Ye̤shǔ kaǎhè akhophijaû̌ toǒ a ǒ dě a hî̌ asî,

² “He gwèbǎǐ mè̤mè̤̌ kòyò htǒotoǒ, a ǒkû̌ lǒkho ta he bǎo mî̌ a besuni̤ hǒ. Asî la̤ǎla̤o ǒ lǒkho dǐcǎ꤮ tò̤.

³ He dè plûge ti̤wi̤kè asî dě ahǐ hî̌dě, a ǎnṳonṳ lǒkho tò̤ dě a sǎǎlòdǒlòde gebò klè̌lo̤ hè̌, ma̤tè̤hî̌dě kòyò toǒǒ mî̌ a ǒ lǒkho dě ayî̤ hè.”

⁴ Dě akhophijaû̌ toǒ hî̌shǔ nû̌û, “Pa tobǎ ǐǎ asî la̤ǎ mî̌ amè̤pwǎ, mî̌tadě lo̤semě lò̤rṳ̂khû̌ htǒonu, pa cû̌kè̌lǎ ǐǎjò asî hî̌tè?”

⁵ Ye̤shǔ gwè asî, “Sîmû̌ ǒ bematè?” “A ǒ susǒtama” asî hî̌shǔ nû̌û hǐnu.

⁶ Ye̤shǔ nohǎnòò̌lò̤bò kòyò saprṳ̂saphǎ htǒotoǒ hǎkhû̌ dě a phî̌htò̌ mû̌ htǒosusǒtama a hî̌bwǐhî̌sîrî htû̌sò̌ǐ Cǒmara, dě abî̌phò̌hto mû̌ htǒotoǒdě a ǐ nû̌ûta akhophijaû̌ toǒ, dě a nocû̌yṳ̂ asî dě akhophijaû̌ toǒ cû̌yṳ̂lò̤ tṳtṳ nû̌ûta kòyò saprṳ̂saphǎ toǒ.

⁷ Asî phî̌hè dǒ tò̤mǔprî̌ tîkî̌ dě Ye̤shǔ hî̌bwǐhî̌sîrî htû̌sò̌ǐ Cǒmara htodě a noyṳ̂lò̤ ǎ nû̌ûta kòyò saprṳ̂saphǎ htǒotoǒ.

⁸ Asî ǎkǒobe pǒǎpǒo lǒ̤bò. Dě akhophijaû̌ phî̌wǒge mû̌ ǒkèpe htǒotoǒnu a bepe ta phǒběnu susǒtophǒbě.

⁹ Kòyò ǎshǎ htǒotoǒnu aphǔ ǒ kòyò lǐ̤rî̌.

¹⁰ Ye̤shǔ plûgehtokè kòyò saprṳ̂saphǎ htǒotoǒ dě taplǎpa a ta akhophijaû̌ toǒ cû̌nṳ sǒkhlikû dě hǎhtò̌cû̌ Dalamanǔtaga.

Pharisè̌phû̌ toǒ kwikè̌ ta̤cǒklî̌kî̌ya

¹¹ Pharisè̌phû̌ toǒ hè Ye̤shǔ ǒ dě a hè sahtò̌ htè̌ nû̌û. Ye̤shǔ htǒonumî̌ a ǒ dě Cǒmara a ǒ hè mè̤ya, mè̤tò̤ yanu, Asî hèkwi kî̌yatakǎkǎ nû̌û ta a glè dǔlṳbǎ asî ta̤cǒklî̌kî̌ya tacǎ.

¹² Ye̤shǔ sǎbò̌htò̌ dě a hî̌ asî, “Kòyò htǒotuhtu toǒ cû̌kwikè̌ tǒ̤ he ta̤ma̤ cǒklî̌kî̌ya ma̤tè? He hî̌ mè̤mè̤̌ sî, he dǔlṳbǎ sî ta̤ma̤ cǒklî̌kî̌ya dǐcǎ꤮ tò̤.”

¹³ A hî̌ dě a hǎhtò̌cû̌ tephekè ta Pharisè̌phû̌nu toǒ, dě a ge ginṳsǒ sǒkhlikû dě hǎhtò̌cû̌kè shikoǒbò̌kho tokho.

Pharisè̌phû̌ toǒ ta Khwǐherǒ ata̤bû

¹⁴ Ye̤shǔ akhophijaû̌ toǒ shope̤ phî̌cû̌nṳ lǒkho mû̌ dě sǒkhlikû htǒonu asî phî̌cû̌nṳ pwǎ mû̌ tamaphû̌ pwǎ.

¹⁵ Ye̤shǔ mǎnǎ te̤mǎ akhophijaû̌ toǒ, “Ǒsè̌rè̌ lǒkho sîna̤ ta Pharisè̌phû̌ toǒ ata̤bû ta Khwǐherǒ ata̤bû htǒonu nî̌꤮.”

¹⁶ Asî hî̌ kè̌khînû̌û ta, “Běcǎ hî̌ pa pwǐhè̌o numî̌ mî̌htě pa mû̌ ǒbǎ yǎtò̤nu hǒ.”

¹⁷ Běcǎ Ye̤shǔ sî̌ya ta asî hî̌bǎ kè̌khînû̌û ta mû̌ awi̤akè̌ akhû̌akhî, a gwè asî, “Mî̌ma̤tè̤dě sî cû̌pwe̤ǐ kè̌khînû̌û ta sî mû̌ ǒtò̤ awi̤akè̌ ma̤tè? Mî̌ sî kè̌shǐ sî̌yaphlo kû̌nǒ kò hǒtò̤ ya? Sî cû̌sî̌yaphlo kû̌kò tò̤ hî̌tètè?

¹⁸ Sî mi̤sǎphlǒ ǒ dě sî kè̌shǐ kû̌kò tò̤, sînò̌ku ǒ dě sî gana̤de kû̌kò tò̤.

¹⁹ Bǎ he bî̌phò̌ mû̌ yè̤̌ma dě he bǔǎ yǎta kòyò yè̤̌rî̌ akhanu, sî phî̌wǒge a ǒkwèkhlonu toǒ dě a ǒpe bephǒbětè numî̌ sî to̤ǐpe tò̤ ya?” Asî hî̌shǔ nû̌û, “A ǒkwèkhlo shǐginǐ̤phǒbě.

²⁰ “Bǎ he bî̌phò̌ mû̌ susǒtama dě he bǔǎ yǎta kòyò lǐ̤rî̌ akha, sî phî̌wǒge mû̌ htě he bî̌phò̌ toǒnu, a ǒkwèkhlope bephǒbětè?” Asî hî̌shǔ nû̌û, “A ǒkwèkhlope susǒ tophǒbě.”

²¹ Dě a hî̌ asî, “Sî sî̌ya bǎkû̌nǒ kò hǒtò̤ ya?”

Ye̤shǔ ma̤bǎ kòyòmakhû mi̤sǎkhǐ tapwa̤ dě Betasè̌dawî̤

²² Ye̤shǔ ta akhophijaû̌ toǒ cû̌to̤ Betasè̌dawî̤, dě kòyò toǒ kaǎhènṳ kò mi̤sǎkhǐ tapwa̤ dě a hè kwigwèbǎǐ Ye̤shǔ ta a glè tè̌bǎ kòyò htǒotapwa̤.

²³ Ye̤shǔ pṳ̂ kòyò mi̤sǎkhǐ htǒotapwa̤ acǔde dě a kaǎhǎhtò̌ nû̌û dokhlo a htû̌phlěwa̤ nû̌û mi̤sǎphlǒkû dě Ye̤shǔ tè̌wa̤ acǔde ginǐ̤kho ta kòyò htǒotapwa̤ a mi̤sǎ ginǐ̤kho dě a gwè nû̌û, “Na kè̌shǐ ta̤ tacǎcǎ ya?”

²⁴ A kè̌htokè̌lò̤ dě a hî̌, “He kè̌shǐ kòyò toǒ mî̌tadě alò̤ta sǒmṳ dě a cû̌gecû̌le̤ hǐnu pwǎ.”

²⁵ Ye̤shǔ tè̌wa̤ gesǒ kòyòmakhû mi̤sǎkhǐ htǒotapwa̤ a mi̤sǎphlǒ dě kòyònu tapwa̤ jipwi̤ kè̌htò̌sǒ ta ami̤sǎphlǒ lîhtò̌ dě a kè̌shǐ wǒbò ta̤pṳ̂̌tacǎ.

²⁶ Dě Ye̤shǔ hî̌ nû̌û, “Ge sělě dě hǐ nî̌꤮, geginṳ ma̤ dě dokû ma̤ nî̌꤮.”

Petru hî̌lṳhtò̌ ta Ye̤shǔ mî̌ pwa̤ma̤lû̌htò̌ge htě Cǒmara wû̌lǎ yǎ tapwa̤

²⁷ Ye̤shǔ ta akhophijaû̌ toǒ cû̌ lǒkho bǎ do ǒ Kèsarǐwî̤ Phǐlǐpia akòshukòshî̌ toǒ dě bǎ a cû̌ klè̌lo̤ akhanu, Ye̤shǔ gwè asî, “Kòyò toǒ hî̌kwè̌꤮ he ta he mî̌ kòyò hî̌tè tapwa̤ pè?”

²⁸ Asî hî̌shǔ nû̌û, “Toǒǒmî̌ a hî̌ ta pwa̤ploshi Jowǎ̤ni̤, toǒǒmî̌ a hî̌ ta pwa̤po̤ Èlî̌a, toǒǒmî̌ a hî̌lè̌ ta pwa̤po̤ tò̤mî̌ pwa̤po̤ ahǔwa̤ khǒtû̌ toǒ akla tapwa̤pwa̤ pwǎ,” a hî̌ lǒkho hǐnu.

²⁹ Dě a gwè asî, “Sî lè̌lè꤮, sî glè hî̌lè̌ he ta ûpè?” A hî̌ dě Petru hî̌shǔ nû̌û, “Na mî̌ pwa̤ma̤lû̌htò̌ge kò htě Cǒmara wû̌lǎ yǎnu tapwa̤ hǒ.”

³⁰ Hǐnudě Ye̤shǔ mǎnǎ asî, “He mî̌ pwa̤ma̤lû̌htò̌ge kò htě Cǒmara wû̌lǎ yǎnu tapwa̤ hǒ, sî bǎ cû̌ pwe̤ǐlṳ bǎ kò hǐnu dǐpwǎ̤꤮ tò̤ nî̌꤮.”

Ye̤shǔ pwe̤ǐnǎ wǐ a bǎ khòjîkhòjû ta a bǎ sipě awi̤akè̌

³¹ Dě Ye̤shǔ bòhtò̌ sû̌ǐ akhophijaû̌ toǒ, “He mî̌ kòyòphû̌khû dě he tobǎ khòbǎplṳ̂ ta̤jîta̤jû pě, dě Yṳ̌daphû̌ hǐkǒdû̌ toǒ, pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ sǒtephekè he pě dě asî ma̤sikè he pě. Dě he sihtopě suni̤ pěnu, he htûpwa̤gesǒ ta ta̤si pě.”

³² A pwe̤ǐlṳhtò̌ lîtîklî̌bò bǎ asî ta lǒ̤꤮ bò ta̤htǒotoǒ akhû̌akhî, Petru kaǎcû̌ tûcûkè Běcǎ tîkî̌phû̌ dě a sǎhtǎ nû̌û.

³³ Pwǎ̤tadě Ye̤shǔ htû̌tiwǐ dě a kè̌wa̤hto akhophijaû̌ toǒ dě a sǎhtǎ geshǔ Petru, “Kǒ khînǎmo̤pha hǐkǒdû̌, hǎhtò̌cû̌ tephekè ta he, ma̤tè̤hî̌dě na ta̤gènè̤ toǒnu alò̤ta kòyòhǎkhû̌phû̌ a ta̤gènè̤nu pwǎ, alò̤ta Cǒmara a ta̤gènè̤ toǒnu mè̤tò̤.”

³⁴ Htodě Ye̤shǔ kaǎhèplǒhtubò kòyò saprṳ̂saphǎ toǒ ta akhophijaû̌ toǒ a ǒ dě a hî̌ asî, “Kòyò tapwa̤pwa̤ dè sò̌yṳ gû hekò hî̌nu, a tobǎ ma̤ pwǐ he sò̌yṳnoma̤ yǎnu toǒ, jǔ꤮ ama̤ tû̌ asò̌phlǒ mî̌ anî̤ tò̤. A bǎ ò̌htò̌ tû̌ a nò̌dòhtǔ dě a bǎ gû hekò.

³⁵ Ma̤tè̤hî̌dě kòyò htě a sò̌yṳ ma̤lû̌htò̌ge a ta̤htûpwa̤ tapwa̤pwa̤nu, a yola hǎmǎkè pě. Pwǎ̤ta hekhû̌hekhî, kòyò tapwa̤pwa̤ dè ǐlò̤kè a ta̤htûpwa̤ ta ta̤sò̌le̤sò̌lò̤ awi̤akè̌ htǒonu ta heya hî̌nu, a nî̤bǎ yolahtûpwa̤ tûjûpwa̤ pě.

³⁶ Kòyò toǒ glè nî̤bǎ lǒ̤bò hǎkhû̌tebě a ta̤dû̌yò̤htò̌sa toǒ dě a dè lò̤jûkè a yolahtûpwa̤ tûjûpwa̤ htǒo hî̌nu abwǐǒ nû̌ûya hî̌tè?

³⁷ Kòyò htě a sò̌yṳ nî̤bǎ gesǒ a ta̤htûpwa̤ tûjûpwa̤ htǒo tapwa̤pwa̤nu ta̤dû̌yò̤htò̌sa htě a glè pwî̤bò̌ nû̌ûta a ta̤htûpwa̤ htǒonu a ǒ dǐcǎ꤮ tò̤.

³⁸ Htukha htě ama̤còcè̌pwǎ ta̤sǔta̤plě khònò̤htukhanu, kòyò htě a gûma̤tope Cǒmara asò̌phlǒ tò̤ htǒotuhtu akûnu, kòyò tapwa̤pwa̤ dě a sòwò̤ he htohǒtò̤ a sòwò̤ hele̤heyo̤ htǒotoǒ tapwa̤pwa̤nu, Htû̌꤮ kòyòphû̌khû mî̌ hehtǒo hè ta hepha a ta̤sîrîdû̌sîrîhtû pě, dě he hèdǒ ta mǒkhû̌tanaphû̌ cahtǐ toǒ pě akhanu, he sòwò̤ lè̌ a pě.”