Mǎ̤riko 2 - Kawyaw RC

Ye̤shǔ ma̤bǎ bǎ kòyòna̤ sitokho

¹ Anǒ ginǐ̤suni̤nu Ye̤shǔ gesǒ Kaperanòwî̤kû dě kòyò toǒ gana̤de lǒkho ta a ǒ dě hǐ.

² Hǐnudě kòyò hè tîdî̌tûshû̌ plṳ̂ tûlû̌shû̌nû̌û, bǎ takhakhlo pwǎnu agûla̤ ǒjòpe dǐglò̌꤮ tò̤. Ye̤shǔ dǒhtû̌ sû̌ǐtòwòǐlò̤ bǎ asî ta Cǒmara ale̤ayo̤ toǒ.

³ Bǎnuakha makhû sò̌li̤ ò̌hènṳ kòyòna̤ sitokhonu tapwa̤ dě Ye̤shǔ ǒ.

⁴ Pwǎ̤ta kòyò ǒwo̤ǒphǎ tûlû̌shû̌ akhû̌akhî, asî hènṳphǔjòpe Ye̤shǔ ǒ tò̤ dě ahtò̌ ma̤phlo gukhětadǎkhû̌ bǎ Ye̤shǔ ǒnû̌û akhû̌nu dě a jèlò̤te̤ kòyò sitokhonu tapwa̤ ta hǔjo.

⁵ Bǎ Ye̤shǔ kè̌shǐ asî ta̤yṳta̤nǎ ǒ hǐnu dě a hî̌ kòyò sha sitokhonu tapwa̤, “Hephû̌khû꤮ he bòlû̌kè na ta̤sǔ hǒ,” a hî̌ nû̌û.

⁶ Bǎnuakha pwa̤sû̌ǐ ta̤sû̌ta̤tòwò asara toǒ hǎnòò̌ lǒkho bǎnu dě asî gènè̤ lǒkho dě a sò̌phlǒkû,

⁷ “Kòyò htǒotapwa̤ a cû̌ hî̌tǒ̤ hǐnu ma̤tè? A hî̌bǎsǔ Cǒmara hǒ. Ûpè tapwa̤ glè bòlû̌jò ta̤sǔ pè? Pwa̤ bòlû̌jò ta̤sǔ mî̌ pwǎpǒ̤ Cǒmara tapwǎ̤ pa.”

⁸ Taplǎpa Ye̤shǔ sî̌ya asî ta̤gènè̤ sò̌phlǒkû dě a hî̌ asî, “Sî cû̌gènè̤ tǒ̤ lǒkho sî sò̌phlǒkû hǐnu ma̤tè?

⁹ He dè hî̌ kòyò sitokho htǒotapwa̤ ta, ‘He bòlû̌kè na ta̤sǔ hǒ’ Mè̤tò̤dě ‘Ihtǒ phî̌nṳ na la̤mi̤ dě cû̌mò̌’ hî̌mî̌ ayûkhlo bǎtè tacǎtè?

¹⁰ Pò̤̌ta kòyòphû̌khû mî̌ hehtǒo, ma̤pûhǐ sî sî̌ya lǒkho ta dě hǎkhû̌ bǎonu, he ǒ ta ta̤shû̌ta̤sho dě he bòlû̌bò̌ kò ta̤sǔta̤plě toǒnu, he glè dǔlṳ bǎ sî,” a hî̌hto hǐnudě, a hî̌ pwa̤sitokho htǒotapwa̤,

¹¹ “He hî̌ na, ihtǒ tûlûnṳ na khlǒla̤mi̤ dě gedě na hǐ.”

¹² Dě taplǎpa a ihtǒ tûlûnṳ a khlǒla̤mi̤ a hǎhtò̌cû̌ dě kòyò lǒ̤꤮ bò a lo̤mo̤. Kòyò pṳ̂̌꤮ pwa̤ sû̌pi̤sò̌pi̤ lǒ̤bò ta htû̌sò̌ǐ lǒkho Cǒmara dě a hî̌ lǒkho, “Ta̤ma̤ana̤ pwǐhè̌onu, pa kè̌shǐnǒ dǐkhò̌꤮ tò̤,” a hî̌ lǒkho hǐnu.

Ye̤shǔ kaǎ Lě̤wǐ

¹³ Ye̤shǔ hǎhtò̌cû̌ gesǒ Galilî̌a shikoǒ kòshî̌ dě kòyò saprṳ̂saphǎ hè ǒte̤we̤bò nû̌û dě a bòhtò̌ sû̌ǐtòwòǐ bǎ gesǒ asî bǎnu.

¹⁴ Bǎ a cû̌ akhanu, a kè̌shǐ Alphěo aphû̌ Lě̤wǐ. A mî̌ pwa̤kwi ta̤kûta̤cî̌ tapwa̤. A kè̌shǐ Lě̤wǐ hǎnòò̌ bǎ la̤kwi ta̤kûta̤cî̌ hǐkû dě Běcǎ Ye̤shǔ hî̌ yǎ, “Gûkû̌ hekò,” dě Lě̤wǐ ihtǒ gûcû̌kû̌ nû̌ûkò.

¹⁵ Bǎ Ye̤shǔ ta akhophijaû̌ ǎdî lṳmṳhǎ ta̤ǎ dě Lě̤wǐ hǐ akha, pwa̤kwi ta̤kûta̤cî̌ toǒ ta ta̤ma̤sǔphû̌ toǒ ǎhtuoplǒ ta asî, ma̤tè̤hî̌dě kòyò htě a gû Ye̤shǔ akò toǒnu, a sǒsǒpwǎta asînu a ǒpaplṳ̂pe.

¹⁶ Bǎ Pharisè̌phû̌ htě asû̌ǐ ta̤sû̌ta̤tòwò asaranu toǒ kè̌shǐ Ye̤shǔ ǎhtuoplǒ ta ta̤ma̤sǔphû̌ toǒ ta pwa̤kwi ta̤kûta̤cî̌ toǒ akhanu, a gwè Ye̤shǔ akhophijaû̌ toǒ, “Ma̤titèdě a cû̌ ǎhtuohtu kû̌tǒ̤ ta kòyò kwi ta̤kûta̤cî̌nu toǒ ta ta̤ma̤sǔphû̌nu toǒ ma̤tè?” A gwè lǒkho hǐnu.

¹⁷ Bǎ Ye̤shǔ gana̤de asî gwè hǐnu akha, a hî̌geshǔsǒ asî, “Kòyò htě a ǒmo̤ǒbǎ toǒnu, a lo̤bǎ ta ta̤khû̌saradû̌ tò̤, kòyò htě ashǐasha toǒnu a lo̤bǎ ta ta̤khû̌saradû̌. He hè kaǎ kòyò htě acǒatè̤nu toǒ mè̤tò̤. He hè kaǎpwǎ kòyò htě a ta̤sǔta̤plě ǒnu toǒ pwǎ.”

Kò gwè Ye̤shǔ dǔǎshǎ awi̤akè̌

¹⁸ Bǎnu akha Jowǎ̤ni̤ akhophijaû̌ ta Pharisè̌phû̌ toǒ a dǔǎdǔo lǒkho. Dě kòyò toǒǒ hè gwè Ye̤shǔ, “Jowǎ̤ni̤ akhophijaû̌ ta Pharisè̌phû̌ akhophijaû̌ toǒ dǔǎ shǎǎshǎo, pwǎ̤tadě nakhophijaû̌ toǒnu a dǔǎ kû̌kò shǎǎshǎo tò̤ ma̤tè?” A hè gwè nû̌û hǐnu.

¹⁹ Běcǎ Ye̤shǔ hî̌shǔ asî ta yo̤sǎkhěkhǒ tûmû dě a hî̌, “Bǎ khòmò̤makhû ǒhtukû̌pe ta akho shǐpwa̤shǐmè̤ akhanu, a khoshǐpwa̤shǐmè̤ htǒotoǒ cû̌ dǔǎdǔojò hî̌tè? Bǎ khòmò̤makhû cû̌kè hǒtò̤, a dè ǒhtukû̌pe ta asû̌akho toǒ hî̌nu, asî dǔǎjò shǎǎshǎo tò̤.

²⁰ Htû̌꤮ kò kaǎcû̌ tephekè khòmò̤makhû pě akhanu, asî dǔǎdǔo lǒkho pě.

²¹ “Kò shò̌phabǐ hǔgòpwî̌li̤ ta hǔgòpwî̌sa dě a sutǔ hǒtò̤ toǒnu a ǒ dǐpwǎ̤꤮ tò̤. Dè shò̌phabǐ hî̌nu hǔgòpwî̌sahtǒo a cǐsutǔkè dě atǐ̤ htò̌lè̌lè̤po̤ hǔgòpwî̌li̤htǒo pě.

²² Kòyò yṳnṳ sobîshisî̌yo̤sa dě shiophěko li̤kûnu a ǒ dǐpwǎ̤꤮ tò̤. Kò dè yṳnṳ hǐnu hî̌dě sobîshisî̌yo̤ htǒonu a saphò̌kè shiophěkoli̤ hǐnutama pě, dě sobîshisî̌yo̤ lò̤gukèbò pě. Sobîshisî̌yo̤ asa htǒonu kò tobǎ yṳnṳpwǎ yǎ dě shiosa akû pwǎ.”

Ye̤shǔ mî̌ mṳni̤dǔ a Běcǎ

²³ Bǎ mṳni̤dǔ ti̤ni̤ akhanu, Ye̤shǔ ta akhophijaû̌ toǒ cû̌nṳkǎbò̌ kò bǔkû̌lǎ hǔklakhû̌ toǒ, dě akhophijaû̌ toǒ phwěǎ cû̌ kò bǔkû̌lǎsǎ.

²⁴ Dě Pharisè̌phû̌ toǒ hî̌ Ye̤shǔ, “Kè̌mò̌, ta̤ma̤ htě asî tobǎ ma̤yǎ mṳni̤dǔ tò̤nu toǒ, asî cû̌ma̤ lǒkho aya hǐnu ma̤tè?”

²⁵ A hî̌shǔ asî, “Dě awǐkha bǎ Dǎ̤wi̤ ta asû̌kho toǒ lòdǒǎlòdǒo dě a lo̤bǎ la̤ǎla̤o akhanu, a ma̤kwè̌꤮ titè numî̌ sî dǒnǒ kû̌kò tò̤ ya?

²⁶ Asî cû̌nṳ lǒkho Cǒmara ahǐkû dě mû̌ htě kò lṳhtò̌ yǎta Cǒmara toǒ numî̌ a ǒ bǎnu, dě a ǎnṳ pwǎpǒ̤ pwa̤lṳhtò̌ta̤ toǒ pwǎ pò̤̌ta Dǎ̤wi̤ ta akhophijaû̌ toǒ cû̌nṳphî̌ǎ mè̤tò̤ya? Bǎnukha mî̌ Abiata htû ta pwa̤tòlûhtò̌ hǐkǒdû̌gutṳ̌.”

²⁷ Běcǎ Ye̤shǔ hî̌po̤ asî, “Kòyò numî̌ mṳni̤dǔ aya mè̤tò̤, mṳni̤dǔ numî̌ kòyò lǒ̤꤮ bò aya.

²⁸ Kòyòphû̌khû mî̌ he htǒo a mî̌ mṳni̤dǔ a Běcǎ tapwa̤hǒ,” a hî̌shǔ asî hǐnu.