Mǎ̤riko 16 - Kawyaw RC

Ye̤shǔ htûpwa̤gesǒ

¹ Bǎ Yṳ̌daphû̌ a mṳni̤dǔ tûlû̌kèhto to̤wo̤nu, Madalě̤na dokûmo̤ Marǐa, Jǎgomo̤ amo̤ Marǐa ta Salo pwî̤nṳ shinṳmû̌ dě a glè̌ cû̌plṳ lǒkho nû̌ûta Běcǎ Ye̤shǔ ana̤.

² Toshodè akû awǐtocǒnu ti̤ni̤ bǎ lṳmṳlî wosò lṳmṳkhǐ pi̤pè̤pe akhanu, asî hè lǒkho dě lṳkhû̌.

³ Bǎ asî hè klè̌lo̤ akhanu, asî hî̌ kè̌khînû̌û, “Mî̌ûpè glè htû̌toklotephekè bǎ pa lo̤bědû̌ htě kò htû̌toklobǐ nû̌ûta lṳkûnu tama pě ya?” Ma̤tè̤hî̌dě lo̤běnu tama mî̌ adû̌mati̤.

⁴ Pwǎ̤tadě bǎ asî kè̌cû̌ akhanu, a kè̌shǐ kò htû̌toklo tephenǎhtokè lo̤bědû̌nu tama hǒ.

⁵ Bǎ asî nṳ dě lṳkû akhanu, a kè̌shǐ makhûphû̌sǎ sǒnṳ hǐdopo̤to̤bû tṳpṳ tapwa̤ hǎnòò̌lò̤ bǎ lṳkû cǔdemûnu tokho dě asî sò̌gònò̤bòkè.

⁶ Dě a hî̌ asî, “Sò̌gònò̤ lǒkho pûma̤꤮, sî kè̌lǎ Nǎ̤sèrèwî̤phû̌ Ye̤shǔ htě kò htǎwa̤si yǎ nò̌dòhtǔlo̤nu tapwa̤ numî̌ he sî̌ya. A htûpwa̤ gehtosǒhǒ. A ǒpe bǎo tò̤. Hèkè̌mò̌ lǒkho, htǒomî̌ agûla̤ htě kò bè̌nṳ nû̌û agûla̤nuhǒ.

⁷ Gepwe̤ǐ pû Petru ta Ye̤shǔ akhophijaû̌ ahǔwa̤nu toǒ ta Ye̤shǔ cû̌ ǒnǎwǐ sî dě Galilî̌a gakûnu hǒ. Pwǐ a hî̌nǎhto sînu sî glè kè̌shǐ tû̌ yǎ bǎnu pě.”

⁸ Asî sû̌pi̤sò̌pi̤ dě ana̤ gònò̤gèglè lǒ̤bò akhû̌akhî, asî khlè̌hǎhtò̌kè dě lṳkûkhlo. Asî ǐsha tûlû̌shû̌ dě bǎ a hǎhtò̌cû̌ akhanu, a hî̌bǎpe kò dǐpwǎ̤꤮ tò̤.

Ye̤shǔ ǒlṳhtò̌ bǎ ana̤ ta Madalě̤na dokûmo̤ Marǐa

⁹ Ye̤shǔ htûpwa̤gesǒ bǎ toshodè akû awǐgutṳ̌nu ti̤ni̤ lṳmṳlîwosònu to̤wo̤. Htodě nǒkònu a cû̌dǔlṳ wǐlǒ bǎ ana̤ ta Madalě̤na dokûmo̤ Marǐa. Dě Marǐa htǒotapwa̤ numî̌ a mî̌ mamǔ htě Ye̤shǔ wṳ̂hǎhtò̌kè bǎ nû̌û khînǎkhîno susǒtado dě alo̤nu tapwa̤ hǒ.

¹⁰ Hǐnudě, Marǐa cû̌pwe̤ǐlṳ bǎ kòyò htě a cû̌htukhahtu ta Ye̤shǔnu toǒ ta Ye̤shǔ ǒlṳhtò̌ bǎ nû̌û awi̤akè̌. Bǎnuakha asî sǎpla̤sǎyṳ dě ǒyi̤ǒhǎ pepwǎ lǒkho.

¹¹ Asî gana̤de Marǐa pwe̤ǐ bǎ asî ta, “Ye̤shǔ htûpwa̤ pwǎ, he kè̌shǐ sana̤ yǎ ta hena̤,” apwe̤ǐ bǎ asî hǐnu pò̤̌ta asî yṳǎ tò̤.

Ye̤shǔ ǒlṳhtò̌ bǎ akhophijaû̌ sò̌gini̤

¹² Děnǒkònu akhophijaû̌ sò̌gini̤ hǎhtò̌cû̌ doshǒ akha, asî kè̌shǐ Ye̤shǔ sûlûkhǒ bǎ nû̌û ana̤ dě a dǔlṳ asî.

¹³ Akhophijaû̌ htǒosò̌gini̤ ge pwe̤ǐ akhophijaû̌ ahǔwa̤toǒ pwǎ̤tadě asî yṳǎ lǒkho kòyò htǒosò̌gini̤ ayo̤ tò̤.

Ye̤shǔ ǒlṳhtò̌ bǎ akhophijaû̌ shǐtapwa̤

¹⁴ Anǒkò taplǎpe dě bǎ akhophijaû̌ shǐtapwa̤ ǎshǎ akhanu, a dǔlṳ bǎ gesǒ asî ta ana̤. Kòyò htě a kè̌shǐ Ye̤shǔ si htûpwa̤gesǒ htǒotoǒ pwe̤ǐ bǎ asî hǐnudě asî hǐkǒshò̌ dě a yṳǎ lǒkho kò yo̤tò̤ akhû̌akhî, Ye̤shǔ sǎhtǎ asî.

¹⁵ Dě a hî̌ asî, “Cû̌ hǎkhû̌ pṳ̂̌tebě dě cû̌shido dǒhtû̌ǐ dǒpû kò lǒ̤bò pṳ̂̌꤮ tapwa̤ ta ta̤sò̌le̤sò̌lò̤ awi̤akè̌ htǒonu nî̌꤮.

¹⁶ Kòyò htě a yṳǎ ta̤sò̌le̤sò̌lò̤ awi̤akè̌ htǒo dě a ploge ana̤ ta shi tapwa̤pwa̤nu a glè nî̤bǎ ta̤ma̤lû̌htò̌ge pě. Pwǎ̤ta kòyò htě a yṳǎ tò̤ toǒnu a khòbǎ ta̤cèrò pě.

¹⁷ Kòyò htě a yṳǎ toǒnu he ǐ asî sîrîpo̤phǎ dě a bǎ ma̤jò lǒkho ta̤cǒklî̌kî̌ya toǒ pě. Asî wṳ̂hǎhtò̌bò̌ lǒkho khînǎ toǒ ta hemi̤ pě, asî hî̌bǎjò yo̤sǎahǔwa̤nu toǒ pě.

¹⁸ Asî dè pṳ̂ wṳ̂phû̌mò̤ toǒ bǎbǎ, a dè cû̌ǎbǎobǎ ta̤wè̤ta̤htòshi htě asijò toǒ bǎbǎ, a ma̤pò̤ma̤sha nǒ asî dǐcǎ꤮ tò̤. Asî dè dò̌htò̌ acǔde dě kòyòshǐkòyòsha toǒ alo̤ hî̌nu, asî ta̤shǐta̤sha hǎmǎkèbò pě.”

Cǒmara kaǎ kihtò̌kè Ye̤shǔ dě mǒkhû̌

¹⁹ Běcǎ Ye̤shǔ hî̌bǎhto ta akhophijaû̌ toǒ dě Cǒmara kaǎ kihtò̌kè nû̌û mǒkhû̌ dě a hǎnòò̌ Cǒmara acǔdemû tokho.

²⁰ Ye̤shǔ akhophijaû̌ toǒ cû̌shido dǒhtû̌ǐ bǎ kò ta Cǒmara ale̤ayo̤ gûla̤ pṳ̂̌꤮ tò̤glò. Ma̤pûhǐ kòyò yṳǎna̤ǎ kû̌ lǒkho ta̤sò̌le̤sò̌lò̤ awi̤akè̌ htě asî pwe̤ǐ bǎ kò htǒonumî̌ a mè̤na̤cè̌ ayanu, Běcǎ ǐ asî htě a glè ma̤jò lǒkho ta̤ma̤ cǒklî̌kî̌ya toǒ pṳ̂̌tacǎ.