Mǎ̤riko 12 - Kawyaw RC

Yo̤sǎkhěkhǒ htě kòyò hè khò̌ǎ sobîphǎ toǒ

¹ Ye̤shǔ bòhtò̌ dǒnè bǎ pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ ta Yṳ̌daphû̌ hǐkǒdû̌ toǒ ta yo̤sǎkhěkhǒ toǒ hè̌o, bǎtaplǎ, kòyò ǒ tapwa̤, a shǒǐ a sobîmṳ toǒ ahǔklakhû̌ htǒo dě a te̤we̤bǐbò a sobîphǎ htǒo, dě a khǔ ahǎkû tûkû ala̤yî̤htò̌ nû̌ûta sobîshi, dě a shǒhtò̌ gojohǐphû̌ kò la̤ǒpo̤kè̌ǐ yǎta sobîphǎ htǒonu tama. Htodě anokhò̌ǎ gûmṳ̂ nû̌ûta pwa̤khò̌ǎ toǒ dě a hǎhtò̌cû̌kè gaahǔwa̤ taga.

² Bǎ sobîsǎ mihǒ akhanu, sobîphǎběcǎ nohè a jûphû̌ tapwa̤ dě pwa̤khò̌ǎ htǒotoǒ a ǒ dě a nohè phî̌ge nû̌û sobîsǎ htě a to nî̤bǎnu toǒ.

³ Pwa̤khò̌ǎ hǔkla htǒotoǒ pṳ̂ nû̌û dě po̤plè nû̌û jûphû̌ htǒotapwa̤ dě a plûge koyoklî̌kè pwǎ nû̌û.

⁴ Htodě sobîphǎběcǎ nohè tèplè̌lè̌ ajûphû̌ ahǔwa̤ tapwa̤ asî ǒ dě asî po̤ nû̌ûhǐkǒ htodě ma̤sòwò̤bò nû̌û.

⁵ Sobîphǎběcǎ nohèpo̤ ajûphû̌ nǒkò tapwa̤, dě asî ma̤sikè nû̌û. Sobîphǎběcǎ plûhè plṳ̂pe ahǔwa̤ toǒ. Asî po̤plè kò toǒǒ, ma̤sikè kò toǒǒ.

⁶ Sobîphǎběcǎ la̤nohèpo̤ kònu a ǒkè pepwǎpǒ̤ aphû̌makhû htě a mo̤ǐ nû̌û htǒotapwa̤ pwǎ. Agutṳ̌lò̤ dě a gènè̤, he nohè he phû̌makhû mî̌ a bè̌dubè̌na̤ khlopě kǎlè, a gènè̤ dě a nohè nû̌û pwa̤khò̌ǎ htǒotoǒ a ǒ.

⁷ “Pò̤̌ta pwa̤khò̌ǎ htǒotoǒnu a pwe̤ǐ nû̌û tapwa̤ ta tapwa̤ dě a hî̌ lǒkho, ‘Kòyò htǒotapwa̤ mî̌ sobîphǎběcǎ aphû̌khû htě a glè̌ nî̤bǎ û̌cata̤bî̌nu tapwa̤ hǒ. Cû̌! cû̌ma̤sikè yǎ hò̌꤮! A û̌cata̤bî̌ toǒnu a htûbò pata pě.’

⁸ A hî̌ lǒkho dě asî pṳ̂ ma̤sikè sobîphǎběcǎ aphû̌khûhtǒo dě a wîhtò̌kè nû̌û sobîphǎwe̤khlo,” Ye̤shǔ hî̌khěkhǒ bǎ asî hǐnu.

⁹ Htodě Ye̤shǔ gwè asî, “Dè ma̤hǐnudě sobîphǎběcǎ htǒotapwa̤nu a ma̤ hî̌tè pě? A hè ma̤sikè pwa̤khò̌ǎ hǔklanu toǒ dě a nokhò̌ǎ tèplè̌lè̌ nû̌ûta kòyò ahǔwa̤ toǒ pě.”

¹⁰ Htodě Ye̤shǔ hî̌ gesǒ asî, “Lî̤cahtǐkû hî̌, ‘Kòyò ma̤htò̌ hǐ dě lo̤ htě asî wîkè nû̌û nutamanu a htûhtò̌ lo̤ htě a tûhtû̌měbò hǐ tama.

¹¹ Htǒonumî̌ Běcǎ Cǒmara ma̤ta̤ pwǎ, dě a ma̤ta̤ htǒonumî̌ a cǒklî̌kî̌ya mè̤mè̤̌.’ Lî̤cahtǐkû hî̌ hǐnumî̌ sî dǒnǒ kû̌kò dǐkhò̌꤮ tò̤ ya? Sî dǒnǒ lòtṳ̌ pwǎ.”

¹² Yṳ̌daphû̌ hǐkǒdû̌ toǒnu, a sî̌ya ta Ye̤shǔ dǒnèkhěkhǒ asî ta pwa̤wîkè lo̤nu tama mî̌ asî akhû̌akhî, a kè̌lǎ lǒkho klè̌klò dě a glè̌ pṳ̂ Ye̤shǔ, pwǎ̤ta asî ǐsha kòyò saprṳ̂ toǒ ala̤ dě asî hǎhtò̌cû̌ tephekè pwǎ Ye̤shǔ ala̤.

Kò gwè Ye̤shǔ ta tobǎ ǐ ta̤kûta̤cî̌ ya, mî̌ tobǎ ǐ tò̤ ya awi̤akè̌

¹³ Kò nohè Pharisè̌phû̌ toǒ ta Khwǐherǒ akòyò toǒ Ye̤shǔ a ǒ dě a glè hè kè̌lǎ pṳ̂ lǒkho Ye̤shǔ ata̤hî̌bǎsǔ toǒ.

¹⁴ Asî hè Ye̤shǔ a ǒ dě a hî̌ lǒkho nû̌û, “Saradû̌꤮ pa sî̌ya ta na mî̌ kòyòcǒkòyòtè̤ htě a hî̌bǎcǒtè̤pwǎ ta̤hî̌bǎ tapwa̤. Na ǐsha kû̌kòla̤ dǐpwǎ̤꤮ tò̤, na kè̌dû̌kè̌pî̌tî̌ kû̌kò dǐpwǎ̤꤮ tò̤. Na sû̌ǐtòwòǐ kò ta̤te̤ta̤mǎ hî̌numî̌, na sû̌ǐbǎ kò pwǐ Cǒmara sò̌yṳ nosû̌ǐ nanu hǒ. Hǐnudě paǐ ta̤kûta̤cî̌ dě Khwǐkèsa a ǒ numî̌ ato ya? Mî̌ ato tò̤ ya?

¹⁵ Pa toǐ a ya? Mî̌ pa toǐ tò̤ ya? Pwe̤ǐ bǎkè̌ pa.” Pwǎ̤tadě asî hè hî̌bǎ khǒ pwǎnu Ye̤shǔ sî̌ya dě a hî̌shǔ asî, “Ma̤pûhǐ sî kè̌lǎpṳ̂ he ta̤hî̌bǎsǔ toǒ dě sî hè gwèkhǒgwèwa̤cǎ he ma̤tè ya? Hèǐ bǎkè̌ he wûyî̌ Dina̤rinu tabǎ,” a hî̌ asî hǐnu.

¹⁶ Dě asî hèǐ nû̌û wûyî̌ Dina̤rinu tabǎ dě a gwè asî, “Htǒomî̌ ûpè hǐkǒ yo̤ pè? A khwè̌ nû̌ûta ûpè ami̤pè?” Dě asî hî̌shǔ nû̌û, “Rò̌mǎkhwǐdû̌ a hǐkǒyo̤ ta Khwǐ ami̤.”

¹⁷ Htodě Ye̤shǔ hî̌ asî, “Khwǐdû̌kèsa ata dèhî̌dě ǐyǎ ta Khwǐdû̌nu, Cǒmara ata dèhî̌dě ǐyǎ ta Cǒmaranu.” Ye̤shǔ hî̌ asî hǐnu dě asî sû̌pi̤sò̌pi̤bòkè Ye̤shǔ ala̤.

Kò gwè Ye̤shǔ ta ta̤si htûpwa̤gesǒ

¹⁸ Sadugè̌phû̌ sîtoǒ la̤klo hî̌ lǒkho ta kò sihtonu kò htûpwa̤gejòpe dǐkhò̌꤮ tò̤ hǐnu. Dě asî hè Ye̤shǔ ǒ dě gwè nû̌û,

¹⁹ “Saradû̌꤮, Mǒ̤jè khwè̌lò̤ ta̤mǎlò̤ tûmû ta paya dě a hî̌, kòyò tapwa̤pwa̤ dè sikè amala̤, dě aphû̌ dè ǒkè dǐpwǎ̤꤮ tò̤ hî̌nu, ma̤pûhǐ akhlialè ǒkè nudě, a pṳmakhû bǎ phî̌sǒ akhi ǒkèhtǒo, a hî̌ hǐnu.

²⁰ Taplǎnu pṳ ta wè̤ makhû ǒ susǒtapwa̤. A wè̤pwa̤lǒ tapwa̤ phî̌ ama dě, bǎ a sikè akhanu aphû̌ ǒkè dǐpwǎ̤꤮ tò̤.

²¹ Dě apṳ ahǒla̤ tapwa̤ phî̌ gesǒ akhihtǒonu a sikèpo̤ dě aphû̌ali̤ ǒkè dǐpwǎ̤꤮ tò̤. Apṳ supwa̤tapwa̤nu a htûhtò̌ sǒsǒbò hǐnu.

²² Pṳtawè̤ susǒtapwa̤ htǒonu, a htûhtò̌ sǒsǒbò nû̌û hǐnu, dě asî htǒo susǒtapwa̤ nî̤jûbò nû̌û ama dǐpwǎ̤꤮ tò̤ dě a sikèbò, aphû̌ǒkè lǒkho dǐpwǎ̤꤮ tò̤ dě gutṳ̌lò̤ mamǔ htǒtapwa̤ si kû̌po̤kè nû̌ûkò.

²³ Hǐnudě htû̌꤮ kò si htûpwa̤gesǒ amṳni̤ pě ti̤ni̤nu, Mamǔ htǒotapwa̤ glè htû bǎtè tapwa̤ ama pěpè. Ma̤tè̤hî̌dě asî pṳtawè̤ susǒtapwa̤ nî̤jûbò nû̌û mamǔ htǒotapwa̤ pwǎ꤮.”

²⁴ Ye̤shǔ hî̌shǔ asî, “Sî yṳǎsǔbòkè hǒ, sî sî̌ya te̤mǎ kû̌kò lî̤cahtǐ ta Cǒmara a ta̤po̤ta̤phǎ ma̤jòta̤ toǒ tò̤.

²⁵ Ma̤tè̤hî̌dě htû̌꤮ kò sihtûpwa̤gesǒ pěnu kò phî̌phû̌phî̌ma, kò phî̌phû̌phî̌wṳ̂ ǒpetò̤, asî sǒsǒbò pwǐ mǒkhû̌tanaphû̌nu toǒ pě.

²⁶ Mǒ̤jè khwè̌mǎnǎ ta̤htûpwa̤gesǒ awi̤akè̌ dě a lî̤běkû bǎ mî̌gè joji ta̤dǒnènu to̤to̤, he gènè̤ ta sî dǒbǎhto hǒ. Bǎ lî̤kûnu, Cǒmara hî̌ Mǒ̤jè hî̌tè dě, ‘He mî̌ Pha Abraham a Cǒmara, Isǎko a Cǒmara, ta Yǎ̤kò a Cǒmara,’ Mǒ̤jè khwè̌lò̤ hǐnu.

²⁷ Cǒmara mî̌ kòyòsi toǒ a Cǒmara mè̤tò̤, kòyò htûpwa̤ toǒ a Cǒmara. Sî yṳǎsǔbò mṳ̂tî̤glîkè hǒ,” a hî̌ Sadugè̌phû̌ sîtoǒ hǐnu.

Ta̤mǎlò̤ htě a lo̤bǎdû̌gutṳ̌ tûmû

²⁸ Bǎnuakha pwa̤sû̌ǐ ta̤sû̌ta̤tòwò asara ǒbǎnu tapwa̤ dě a gana̤de asî htè̌ nû̌û. A kè̌shǐ ta Ye̤shǔ hî̌ geshǔjò Sadugè̌sî akhû̌akhî, a gwè Ye̤shǔ, “Ta̤mǎlò̤ lǒ̤bò akla numî̌ a lo̤bǎdû̌khlo mî̌ bǎtè tûmûtè?”

²⁹ Dě Ye̤shǔ hî̌shǔ yǎ, “Ta̤mǎlò̤ htě a lo̤bǎdû̌gutṳ̌ mî̌ titè hî̌dě, ‘Kǒ Israelphû̌ sî꤮, gana̤de lǒkho Běcǎ ǒ pwǎpǒ̤ pa Běcǎ Cǒmara htǒotapwǎ̤ pa.

³⁰ Dě sî bǎ mo̤ǐ lǒ̤sû̌lǒ̤sò̌ sî Cǒmara ta sî sò̌phlǒ tamabò, mo̤ǐ lǒ̤sû̌lǒ̤sò̌ yǎ ta sî ta̤ǒhtûpwa̤ lǒ̤꤮ bò, mo̤ǐ lǒ̤sû̌lǒ̤sò̌ yǎ ta sî ta̤gènè̤ lǒ̤꤮ bò, mo̤ǐ lǒ̤sû̌lǒ̤sò̌ yǎ ta sî ta̤shû̌ta̤sho lǒ̤꤮ bò,’ htǒonumî̌ ta̤mǎlò̤ awǐgutṳ̌ tûmû dě a lo̤bǎdû̌gutṳ̌nu hǒ.

³¹ Ta̤mǎlò̤ ginǐ̤mûtûmû mî̌, ‘Sî bǎ mo̤ǐ sîhǐphòwò̤shî̌ toǒ pwǐ sî mo̤ǐlò̤ sîna̤nu.’ Ta̤mǎlò̤ htě a lo̤bǎdû̌khlo ta htǒonu ahǔwa̤ numî̌ a ǒpe tò̤.”

³² Pwa̤sû̌ǐ ta̤sû̌ta̤tòwò asara htǒotapwa̤ hî̌shǔ Ye̤shǔ, “Sara꤮ na hî̌ numî̌ a totǐ mè̤mè̤̌, na hî̌ ta Cǒmara ǒ pwǎpǒ̤ tapwǎ̤꤮ pa, Cǒmara ahǔwa̤nu a ǒpe dǐpwǎ̤꤮ tò̤ na hî̌ numî̌ a mè̤na̤cè̌ hǒ.

³³ Pa bǎ mo̤ǐ lǒ̤sû̌lǒ̤sò̌ pa Cǒmara ta pa sò̌phlǒ tamabò, ta pa ta̤gènè̤ lǒ̤꤮ bò, ta pa ta̤shû̌ta̤sho lǒ̤꤮ bò. Htohǒtò̤ pa bǎ mo̤ǐ kòyò ahǔwa̤toǒ sǒsǒta pa mo̤ǐ pana̤ numî̌ awǒkhlope ta lǒ̤꤮ bò pa tòlûhtò̌ sado ta̤phû̌ta̤li̤ toǒ ta mî̌, lǒ̤bò pa ma̤lṳhtò̌ ta̤ ahǔwa̤ toǒ numî̌ he sî̌ya,” a hî̌shǔ nû̌û hǐnu.

³⁴ Ye̤shǔ kè̌shǐ ta kòyò htǒotapwa̤ hî̌shǔjòge nû̌û dě a hî̌ nû̌û, “Na phǔnṳ tînî̌ dě Cǒmara a shila̤gakû hǒ,” a hî̌hto nû̌û dě anǒkònu kò gwèbǔpe Ye̤shǔ dǐpwǎ̤꤮ tò̤. Khrî̌stu mî̌ ûpè phû̌ ya

³⁵ Bǎ Ye̤shǔ sû̌ǐtòwòǐ kò dě ta̤lṳhtò̌hokû akhanu, a gwè kò, “Pwa̤sû̌ǐ ta̤sû̌ta̤tòwò asara toǒ hî̌ ta Khrî̌stu htě a ma̤lû̌htò̌ge kò htǒotapwa̤ numî̌ akhlialè gilò̤ ta Khwǐdǎ̤wi̤ a hî̌ hǐnu mè̤tò̤ya?

³⁶ Ma̤tè̤hî̌dě Khwǐdǎ̤wi̤ ana̤ sana̤nu Běcǎ sǎcahtǐ htû̌wè̤ nû̌sò̌phlǒ dě a nohî̌ nû̌û, ‘Běcǎ Cǒmara hî̌ he Běcǎ Mè̤shǐa ta, “Hǎnòò̌ he cǔdemû htǒotokho, hǎnòò̌ to̤htû̌꤮ he ma̤pè̤ bòmṳ̂sîglî kòyò htě a sò̌khě nanu toǒ hè olò̤mèlò̤bòkè dě na ǒ pěnu nî̌꤮.”’

³⁷ Dǎ̤wi̤ ana̤sana̤ kaǎ Khrî̌stu htě a ma̤lû̌htò̌ge kò htǒonu tapwa̤ ta, ‘Běcǎ’ kaǎ nû̌û akhû̌akhî, a cû̌ htûjò Khwǐdǎ̤wi̤ aphû̌khû hî̌tè?” Kòyò saprṳ̂saphǎ toǒ sò̌le̤sò̌lò̤ gana̤de lǒkho Ye̤shǔ a ta̤sû̌ǐtòwòǐ.

Ye̤shǔ ǐsè̌rè̌ kòyò saprṳ̂saphǎ toǒ ta pwa̤sû̌ǐ ta̤sû̌ta̤tòwò asaranu toǒ awi̤akè̌

³⁸ Bǎ Ye̤shǔ sû̌ǐtòwòǐ kò akhanu, a hî̌, “Ǒsè̌rè̌ lǒkho sîna̤ ta pwa̤sû̌ǐ ta̤sû̌ta̤tòwò asaranu toǒ nî̌꤮. Asînu toǒmî̌ a phî̌dû̌phî̌htû lǒkho ana̤ dě a sò̌yṳ sǒ lǒkho hǐdopo̤to̤ toǒ dě bǎ a kè̌shǐ glashǔ ta kò klǎkû akhanu, a sò̌yṳ nohî̌bǎ bè̌dubè̌na̤ kò ta ana̤.

³⁹ Htohǒtò̤ dě ta̤sabahǐkûnu bǎbǎ, pwèkûnu bǎbǎ, asî sò̌yṳ hǎnòò̌lò̤ lǒkho gûla̤ htě kò bè̌dubè̌na̤ yǎnu toǒ pwǎ.

⁴⁰ Ma̤pûhǐ asî phî̌sigwiwe̤saphǎ mamǔǒkhwè̌ toǒ ahǐ ta̤kî̌ta̤kû̌dě, asî lǒplò̤ kò, htohǒtò̤ ma̤pûhǐ kò gana̤de dě kò kè̌shǐpe pû asî ta̤sǔ tò̤ ayanu, a kwisaba htûgipi̤ bǎ kò. Dě asî ma̤hǐnu akhû̌akhî, asî khòbǎ jîkhlobò kò ta̤cèrò pě.”

Mamǔǒkhwè̌ tapwa̤ a ta̤ma̤lṳ

⁴¹ Ye̤shǔ hǎnòò̌phǔ bǎ kò la̤bè̌plǒ wûtǒ gûla̤ alo̤mo̤nu dě a kè̌ kòyò toǒ hè shû̌nṳ wû akha, kòyò dû̌yò̤htò̌sa saprṳ̂ hè shû̌nṳ plṳ̂ wû.

⁴² Pwǎ̤ta mamǔǒkhwè̌ shuphǔshèwè ǒ tapwa̤ dě a hè shû̌nṳdǒ wû tîlîlî̤ ginǐ̤bǎ htě apwî̤ gunò̤ pwǎ ta wû tabǎnu pwǎ.

⁴³ Dě Ye̤shǔ kaǎplǒ akhophijaû̌ toǒ a ǒ dě a hî̌ asî, “He hî̌ mè̤mè̤̌꤮ sî, kòyò lǒ̤꤮ bò htě a hèshû̌nṳ wû dě la̤shû̌nṳ wûtǒkû htǒonu mamǔǒkhwè̌nu tapwa̤ shû̌nṳ dû̌khlo kò hǒ.

⁴⁴ Ma̤tè̤hî̌dě lǒ̤꤮ bò a hèshû̌nṳ wûnu toǒmî̌, a taǒlǒǒbe shû̌lě dě a hèshû̌nṳ pwǎ lǒkho ata ǒ kashikashǎkènu toǒ. Pwǎ̤tadě mamǔǒkhwè̌ htǒotapwa̤ numî̌ a shuphǔshèwè, a taǒlǒǒbe tò̤ pò̤̌ta a hèshû̌nṳbòkè awû htě a la̤bǔǎ nû̌ûta a ta̤htûpwa̤ aya htǒonu hǒ.”