Mǎ̤riko 11 - Kawyaw RC

Ye̤shǔ cû̌nṳ dě Ye̤rǔshèlèwî̤kû

¹ Bǎ asî hèto̤phǔ ta Ye̤rǔshèlèwî̤ bǎ Betaphagedo ta Betanǐdo dohtu Olivekholo kòshî̌akhanu, Ye̤shǔ nohèwǐ akhophijaû̌ sò̌gini̤.

² Dě a hî̌ asî, “Hènṳ wǐ lǒkho do dě alo̤mo̤ tado, sî hè nṳnṳ ta sî kè̌shǐ mòû̌lǎpha tolo tado htě kò dò̌bǎnǒ yǎ dǐplǎ꤮ hǒtò̤ tado pě. Sî kè̌shǐ kò comě lò̤ǎ ashǎ bǎnu pě dě bòphlǔ yǎ dě cǐge yǎ bǎo nî̌꤮.

³ Kòyò tapwa̤pwa̤ dè gwè sî ta, ‘Sî cû̌ bòphlǔ tǒ̤ mòû̌lǎpha htǒo ma̤tè?’ Hî̌dě, ‘Běcǎ lo̤bǎ noyǎ, a nohto nû̌û pě dě a sûgephwè sǒ tû̌ pě,’ hî̌shǔ a hǐnu nî̌꤮.” Ye̤shǔ hî̌ asî hǐnu.

⁴ Bǎnuakha asî cû̌kè̌shǐ mòû̌lǎpha htě kò comě phǔ yǎ ta hǐtakha kòshî̌ dě a ihtǒ ǒ klè̌kû tado. Dě asî cû̌bòphlǔ nû̌ûpli̤.

⁵ Kòyò ihtǒ ǒ bǎ akòshî̌nu toǒ gwè asî, “Sî cû̌bòphlǔ tǒ̤ mòû̌lǎpha pli̤ ma̤tè?”

⁶ Dě asî hî̌shǔ pwǐ Ye̤shǔ nohî̌ asînu dě kòyònu toǒ nocǐkè asî.

⁷ Asî cǐgenṳ mòû̌lǎpha htǒo Ye̤shǔ ǒ dě asî dahtò̌ lǒkho ahǐdokhlo mòû̌lǎ wa̤te̤khû̌ dě Ye̤shǔ htò̌dò̌ yǎ.

⁸ Kòyò saprṳ̂saphǎ dalò̤ lǒkho ahǐdokhlo toǒ dě klè̌dakû htodě ahǔwa̤ toǒ lè̌dě a pe̤genṳ sǒphò alǎǒ toǒ dě khodûkhû̌ dě gedalò̤ nû̌û klè̌dakû.

⁹ Dě kòyò cû̌wǐ lǒkho alo̤mo̤ toǒ, toǒ dě a gûcû̌kû̌ lǒkho nû̌ûkò dě a yi̤kǒ lǒkho, “Htû̌sò̌ǐ lǒkho Cǒmara!” “Kòyò htě a hè ta Běcǎ ami̤akû htǒotapwa̤, Cǒmara howi̤tû̌ yǎ nî̌!”!

¹⁰ “Kòyò htě a glè hè pǒǐ pa lò̤ta papha Khwǐdǎ̤wi̤ dě꤮ wǐ htǒotapwa̤nu, Cǒmara howi̤ tû̌ta yǎ nî̌!” “Htû̌sò̌ǐ lǒkho Cǒmara htě a ǒ dě mǒkhû̌ agûla̤htò̌yî̤gutṳ̌ htǒotapwa̤!” Asî gòyò̤mò̤mṳshǔ lǒkho Ye̤shǔ hǐnu.

¹¹ Ye̤shǔ cû̌to̤ Ye̤rǔshèlèwî̤kû akhanu, a cû̌nṳ ta̤lṳhtò̌ho we̤kû dě a cû̌lèkè̌ te̤we̤bò ta̤pṳ̂̌tacǎ. Lṳmṳ glè lò̤hǒ akhû̌akhî, a ta akhophijaû̌ shǐsò̌gini̤ hǎhtò̌cû̌kè Betanǐdo.

Ye̤shǔ ǐshokè dǐshimṳ tṳmṳ

¹² Dě anǒkò ti̤ni̤nu bǎ Ye̤shǔ ta akhophijaû̌ ǒ dě Betanǐdo hǎhtò̌ge klè̌lo̤ akha, Ye̤shǔ sǎǎdî.

¹³ Dě a kè̌shǐcû̌tûcû dǐshimṳ alǎ tophǒ tṳmṳ. Mî̌ asǎ ǒ ya a gènè̤ dě a cû̌to dǐshimṳ ǒ, pwǎ̤ta bǎ a cû̌to̤ dǐshimṳ ǒ akhanu, a kè̌shǐ nû̌û sǎ dǐma꤮ tò̤, akhîakha tosǎ hǒtò̤ akhû̌akhî, a ǒ còcè̌pwǎ alǎ pwǎ.

¹⁴ Ye̤shǔ hî̌ dǐshimṳnu tṳmṳ, “Tapwǎ̤꤮ bǎ ǎnṳpe pûma̤ nasǎ ma̤ nî̌꤮,” a hî̌ hǐnu akhophijaû̌ toǒ gana̤de lǒkho.

Ye̤shǔ cû̌ dě ta̤lṳhtò̌ho

¹⁵ Bǎ asî cû̌to̤ Ye̤rǔshèlèwî̤ akhanu, Ye̤shǔ cû̌nṳ ta̤lṳhtò̌hokû dě a cû̌nṳ sahtò̌ wṳ̂hǎhtò̌kè kòyò shaǎpwî̤ǎta̤kî̌ta̤kû̌ bǎnu toǒ dě a nṳshò̌ lò̤glokè kò la̤htû̌lè̌ wû a dîjowa̤nu toǒ ta gògohtò̌yî̤ htě kò la̤hǎnòò̌ shaǎ nû̌ûta htû̌li̤cò̌nu toǒ.

¹⁶ Kò ǒbǎ ta̤lṳhtò̌ho we̤kû nudě kò glè jocû̌khǒ kòta̤kî̌ta̤kû̌ ahǔwa̤ tò̤glò akha, Ye̤shǔ ǐjo cû̌khǒkò dǐpwǎ̤꤮ tò̤.

¹⁷ Htodě a sû̌ǐtòwòǐ asî, “Dě lî̤cahtǐkûnu, Cǒmara hî̌, ‘Hehǐ mî̌ kò bǎ kaǎ yǎta kòyò pṳ̂̌꤮ tacǎ la̤subusaba ahǐ’ Pwǎ̤tadě sî cû̌ nohtûhtò̌bò yǎta ‘Pwa̤ǎhǔǎkě la̤ǒhǔhǐ agûla̤ hǒ.’”

¹⁸ Pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ gana̤de Ye̤shǔ hî̌ hǐnu dě asî kè̌lǎ klè̌klò dě a glè ma̤si Ye̤shǔ. Kòyò saprṳ̂ toǒ sû̌pi̤sò̌pi̤ lǒ̤bò Ye̤shǔ a ta̤sû̌ta̤tòwò akhû̌akhî, asî htû hǐkǒdû̌nu toǒ ǐsha lǒkho Ye̤shǔ ala̤.

¹⁹ Bǎ lṳmṳlò̤ akhanu, Ye̤shǔ ta akhophijaû̌ toǒ hǎhtò̌gekè dě wî̤khlo.

Phî̌nṳ ta̤sû̌ǐ tacǎ dě dǐshimṳ tṳmṳ a ǒ

²⁰ Nǒkòti̤ni̤ lṳmṳwosò akhanu, asî hǎhtò̌cû̌sǒ klè̌nu tabo bǎ dǐshimṳ htě Ye̤shǔ ǐshokè nû̌û tṳmṳnu asî kè̌shǐ ta akhwesi sabo to̤kè dě akhò̌wi̤.

²¹ Dě Petru gènè̤htò̌nṳsǒ Ye̤shǔ ǐshokè sǒmṳ htǒonu dě a hî̌ nû̌û, “Sara꤮ kè̌mò̌ děnu lè, dǐshimṳ htě na ǐshokè nû̌û tosǒnu a khwesikè hǒ.”

²² Dě Ye̤shǔ hî̌shǔ asî, “Yṳǎ Cǒmaranu.

²³ He hî̌ mè̤mè̤̌ sî, kòyò tapwa̤pwa̤ a dè hî̌ kholo htǒotama ta, ‘Sǒsǔcû̌ tephekè dě shidû̌shite̤we̤ akûnu,’ dě a dè sò̌phlǒwò̌wè̌ tò̤ dě a dè yṳǎ na̤cè̌ hî̌nu, a htûhtò̌ bǎ nû̌û pwǐ a hî̌nu pě.

²⁴ Hǐnu akhû̌akhî he hî̌ sî, sî kwita̤ dě pha Cǒmara a ǒ titètè̌꤮ bǎbǎnu yṳǎpû ta sî nî̤bǎnu, dě sî nî̤bǎ mè̤mè̤̌ pě.

²⁵ Bǎ sî ihtǒ kwisaba akhanu, sî dè pṳ̂mě kòyò tapwa̤pwa̤ ata̤sǔ hî̌kǎlè̌ bòlû̌ ata̤sǔnu. Sî dè bòlû̌ mò̌mî̌ sîpha ǒ dě mǒkhû̌ htǒotapwa̤ bòlû̌kèdǒ sî ta̤sǔ hǐnu pě.”

²⁶ (“Pwǎ̤tadě sî dè bòlû̌kè kòta̤sǔ tò̤ dèhî̌mî̌, sîpha ǒ dě mǒkhû̌ htǒotapwa̤ bòlû̌kèdǒ sî ta̤sǔ tò̤tò̤.”)

Kò gwè Ye̤shǔ sîrîshû̌sho awi̤akè̌

²⁷ Ye̤shǔ ta akhophijaû̌ toǒ cû̌to̤ gesǒ Ye̤rǔshèlèwî̤ dě bǎ Ye̤shǔ lècû̌ ta̤lṳhtò̌hokû akhanu, pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ, ta Yṳ̌daphû̌ hǐkǒdû̌ toǒ hè nû̌ûǒ,

²⁸ Dě asî gwè Ye̤shǔ, “Na cû̌ma̤tǒ̤ ta̤htǒo toǒ numî̌, na cû̌ma̤ yǎta ûpè a sîrîshû̌sho pè? Na glè ma̤ta̤ htǒotoǒ ayanu ûpè noma̤ na pè?”

²⁹ Ye̤shǔ hî̌shǔ asî, “He gwè sî ta̤hî̌bǎ tûmû, dě hî̌shǔ bǎmò̌ he, he ma̤ ta̤htǒotoǒ ta ûpè a sîrîshû̌sho pènu he pwe̤ǐlṳdǒ bǎ sî pě.

³⁰ Pwa̤ploshi Jowǎ̤ni̤ plobǎ kò shi htǒonumî̌ Cǒmara ǐ nû̌û sîrîshû̌sho ya? Mè̤tò̤mî̌ kòyòhǎkhû̌phû̌ ǐ nû̌û ya? Pwe̤ǐbǎ kè̌ he.”

³¹ Dě asî htè̌ kè̌khînû̌û, “Pa dè hî̌ ta, ‘Cǒmara ǐ nû̌û’ dèhî̌mî̌, a gwèlòtṳ̌ pa ta, ‘Dèhî̌hǐnudě sî yṳǎ yǎtò̤ ma̤tè?’ hǐnu pě.

³² Dě pa dè hî̌ yǎta, ‘Kòyòhǎkhû̌phû̌ ǐ nû̌û’ dèhî̌mî̌, pa ǐsha kòyò saprṳ̂ htǒotoǒ ala̤la̤.” (Ma̤tè̤hî̌dě kòyò pṳ̂̌꤮ tapwa̤ yṳǎbò ta Jowǎ̤ni̤ mî̌ pwa̤po̤ mè̤mè̤̌ tapwa̤.)

³³ Hǐnu akhû̌akhî asî hî̌shǔ Ye̤shǔ, “Pa sî̌yatò̤.” Dě Ye̤shǔ hî̌shǔ asî, “Dèhî̌hǐnudě he ma̤ta̤ htǒotoǒ ta ûpè sîrîshû̌sho pènu he pwe̤ǐlṳ bǎ sî tò̤tò̤.”