Lǔka 5 - Kawyaw RC

Ye̤shǔ akhophijaû̌ htě awǐgutṳ̌ toǒ

¹ Ti̤ni̤kha bǎ Ye̤shǔ ihtǒ ǒ dě Gena̤sarè̌ shikoǒdû̌htu akhanu, kòyò toǒ sò̌yṳ gana̤de lǒkho Cǒmara ale̤ayo̤ dě a hè tîdî̌tûshû̌ ǒwo̤ Ye̤shǔ ǒ.

² Ye̤shǔ kè̌shǐ sǒkhli htě kò gebè̌ yǎ dě shihtu ginǐ̤bǎ. Pwa̤ma̤ǎtò̤phû̌ toǒ hǎhtò̌cû̌kè sǒkhlikû dě asî cû̌ shǔbò tû̌ lǒkho a ji.

³ Ye̤shǔ cû̌htò̌nṳ dě Shîmǒ̤nè̤ a sǒkhlikû dě anokhlò sǒsǔnṳ sǒkhli htǒonu dě shiyo̤ tîkî̌, htodě Ye̤shǔ hǎnòò̌lò̤ sǒkhlikû dě a sû̌ǐlò̤ kòyò saprṳ̂nu toǒ.

⁴ Bǎ a sû̌ǐ htohǒnu, a hî̌ Shîmǒ̤nè̤, “Khlònṳyo̤ na sǒkhlihtǒo bǎ shiyo̤nu. Ma̤pûhǐ sî pṳ̂nṳ lǒkho tò̤phû̌ ayanudě, shî̌lò̤te̤ lǒkho sî jinu toǒ.”

⁵ Shîmǒ̤nè̤ hî̌shǔ yǎ, “Sara, pa shî̌hto ta̤nǎ̤mṳshě hǒ dě tò̤phû̌nî̤ dǐplṳ̂̌꤮ tò̤, pwǎ̤ta pwǐ na hî̌nu he shî̌lò̤te̤ ji pě.”

⁶ Asî shî̌lò̤te̤ ji dě tò̤phû̌ nî̤plṳ̂, a to̤kè ta ji phǔ htò̌lè̌kè hǒ.

⁷ Hǐnu akhû̌akhî, asî kaǎhèpo̤ lǒkho akho ǒ bǎ sǒkhlikû ahǔwa̤ tabǎ toǒ dě a glè hè ma̤jè asî. Akho toǒ hè ma̤jèdǒ asî dě a pṳ̂nṳ lǒkho tò̤phû̌ sǒkhlikû dě a bekè ta sǒkhli ginǐ̤bǎ, dě a to̤ hèphǔta sǒkhli htǒoginǐ̤bǎ phǔlòcǔkè.

⁸ Bǎ Shîmǒ̤nè̤ Petru kè̌shǐ ta̤ma̤ana̤ pwǐhè̌o akha, ahè û̌gene̤lò̤ Ye̤shǔ a khò̌lopo̤kòshî̌ dě ahî̌, “Běcǎ, hǎhtò̌cû̌ tephekè ta he, he mî̌ kòyò ta̤ma̤sǔphû̌ pwǎ.”

⁹ A ta akho htě a ǒ kû̌ nû̌û toǒ pṳ̂nṳplṳ̂ tò̤phû̌ akhû̌akhî, asî sû̌pi̤sò̌pi̤bò lǒkhokè.

¹⁰ Pwa̤ma̤ǎplǒ Shîmǒ̤nè̤ tò̤phû̌ toǒmî̌ Sebedè̌o aphû̌khû, Jǎgomo̤ ta Jowǎ̤ni̤ pwǎ. Asî mî̌ a sû̌pi̤sò̌pi̤ kû̌ mè̤mè̤̌ nû̌û. Ye̤shǔ hî̌ Shîmǒ̤nè̤, “Ǐsha pûma̤, tèhtò̌ khò̌ti̤ni̤ tǒ̤hè, na glè htûhtò̌ kòyò htě a cû̌kaǎhè kò dě Cǒmara ǒ sǒsǒta na pṳ̂ǎtò̤phû̌ htǒonu pě.”

¹¹ Asî bè̌ǒkè sǒkhli htǒo dě shihtu, bè̌kè ta̤ lǒ̤꤮ bò htě a ǒ kû̌ ta asînu toǒ htodě asî gûcû̌kû̌ Ye̤shǔ akò. Dě asî htûhtò̌kû̌ Běcǎ Ye̤shǔkhrî̌stu akhophijaû̌ toǒ.

Ye̤shǔ ma̤bǎ kòmakhû kroǎ tapwa̤

¹² Taplǎkha bǎ Ye̤shǔ ǒ wî̤tî̤wî̤ akhanu, kò kroǎ phělo̤ ǒ tapwa̤. Bǎ a kè̌shǐ Ye̤shǔ akhanu, a û̌gene̤lò̤ dě Ye̤shǔ a khò̌lopo̤kòshî̌, dě a kwigwèbǎǐ nû̌û, “Běcǎ꤮, na dè ta̤sò̌yṳǒnu ma̤bǎ bǎ he ta̤shahtǒo hî̌numî̌ na ma̤bǎjò pwǎ.”

¹³ Ye̤shǔ yṳ̂hè acǔde a tè̌bǎhto nû̌û dě a hî̌ nû̌û, “He ta̤sò̌yṳǒ pwǎ,” a hî̌ htodě “Ta̤sha꤮! hǎmǎkè mò̌,” a hî̌po̤ hǐnu, dě taplǎpa ta̤sha hǎmǎkè.

¹⁴ Ye̤shǔ mǎnǎ nû̌û yo̤ ta, “Pwe̤ǐlṳ ma̤ kò dǐpwǎ̤꤮ ma̤ nî̌꤮. Cû̌ dǔlṳkè̌ nana̤ dě pwa̤lṳhtò̌ta̤nu tapwa̤ a ǒnu nî̌꤮. Htodě na ta̤sha hǎmǎ htǒonu, ma̤pûhǐ a khòlṳ bǎ kòyò saprṳ̂ a lo̤mo̤ nudě lṳhtò̌pû pwǐ Mǒ̤jè a ta̤mǎlò̤ ǒnu nî̌꤮.”

¹⁵ A nopwe̤ǐlṳ kò dǐpwǎ̤꤮ tò̤ hǐnudě Běcǎ Ye̤shǔ awi̤akè̌ htǒonu, kòyò tǐ̤ pwe̤ǐlṳ pîshîcû̌ yî̤khlo nû̌ûta a gûla̤li̤nu, dě kòyò toǒ sò̌yṳ gana̤de lǒkho a ta̤hî̌bǎ, htodě a sò̌yṳ nohè ma̤hǎmǎ lǒkho a ta̤shǐta̤sha dě a hèplṳ̂hèphǎ nû̌ûǒ.

¹⁶ Pwǎ̤tadě Ye̤shǔ hǎhtò̌cû̌ sala̤ lo̤semě lò̤rṳ̂khû̌ dě cû̌ kwisaba bǎnu.

Ye̤shǔ ma̤bǎ kòyò sitokho

¹⁷ Ti̤ni̤akha bǎ Ye̤shǔ sû̌ǐtòwòǐlò̤ kò akhanu, Pharisè̌phû̌ toǒ ta pwa̤sû̌ǐ ta̤sû̌ta̤tòwò asara toǒ hǎnòò̌ kû̌ lǒkho bǎnu. Asî htǒo toǒ numî̌ a ǒbò lǒkho do ǒ bǎ Galilî̌agakû ta Yṳ̌dagakûnu toǒ ta dě Ye̤rǔshèlèwî̤kûnu hè. Ma̤pûhǐ Ye̤shǔ ma̤bǎ bǎ kòyòshǐkòyòsha htǒotoǒnudě Běcǎ Cǒmara a ta̤po̤ta̤phǎ ǒkû̌ nû̌û.

¹⁸ Kòyò toǒ ò̌hè kòyò sitokho tapwa̤, asî ò̌hè sada nû̌ûta la̤mi̤. Dě ma̤pûhǐ a dò̌lò̤nṳ nû̌û dě Ye̤shǔ a lo̤mo̤ nudě, a jipwi̤ jonṳ nû̌û dě hǐdǒkû.

¹⁹ Pwǎ̤tadě kòyò ǒplṳ̂ tûlû̌shû̌ akhû̌akhî, asî ò̌nṳjòpe tò̤. Hǐnudě asî ò̌htò̌ nû̌û gukhětadǎkhû̌ dě htò̌ma̤phlo lǒkho gukhětadǎkhû̌ dě jèlò̤te̤ sada la̤mi̤ nû̌û kòyò tṳ̂prṳ̂taphǎ akǎmakû bǎ Ye̤shǔ alo̤mo̤.

²⁰ Bǎ Ye̤shǔ kè̌shǐ asî ta̤yṳta̤nǎ ǒ mè̤mè̤̌ akhanu, a hî̌ kòyò shanu tapwa̤, “Sû̌kho꤮ he bòlû̌kè na ta̤sǔ hǒ.”

²¹ Pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒ hî̌ kè̌khînû̌û, “Kòyò htǒotapwa̤ hî̌bǎsǔkè Cǒmara hǒ. Ûpè tapwa̤ glè bòlû̌jò ta̤sǔ pè? Pwa̤ bòlû̌jò ta̤sǔ mî̌ pwǎpǒ̤ Cǒmara tapwǎ̤ pa.”

²² Ye̤shǔ sî̌ya asî hî̌ kè̌khînû̌û htǒo toǒ dě a gwè asî, “Sî cû̌gènè̤ tǒ̤ lǒkho dě sî sò̌phlǒkû hǐnu ma̤tè?

²³ Dè hî̌ ta, ‘Bòlû̌kè na ta̤sǔ hǒ,’ mè̤tò̤dě ‘Ihtǒ dě cû̌mò̌,’ hî̌mî̌ ayûkhlo bǎtè tacǎtè?

²⁴ Pò̤̌ta kòyòphû̌khû mî̌ hehtǒo, ma̤pûhǐ sî sî̌ya lǒkho ta, dě hǎkhû̌ bǎonu, he ǒ ta ta̤shû̌ta̤sho dě he bòlû̌bò̌ kò ta̤sǔta̤plě toǒnudě, he bǎ dǔlṳ bǎ sî,” a hî̌hto hǐnu dě a hî̌ pwa̤sitokho htǒotapwa̤, “He hî̌ na, ihtǒ tûlûnṳ na khlǒla̤mi̤ dě gemò̌ na hǐnu.”

²⁵ Taplǎpa kòmakhûnu tapwa̤ ihtǒ tûlûnṳ a khlǒla̤mi̤ kòyò tṳ̂prṳ̂taphǎ alo̤mo̤ dě hǎhtò̌gekè ahǐ dě a htû̌sò̌ǐ Cǒmara.

²⁶ Kòyò sû̌pi̤sò̌pi̤ lǒ̤bò pṳ̂̌꤮ pwa̤. Dě asî htû̌sò̌ǐ lǒkho Cǒmara dě a hî̌ lǒkho, “Khò̌ti̤ni̤, pa kè̌shǐ ta̤cǒklî̌kî̌ya toǒ hǒ!”

Ye̤shǔ kaǎ Lě̤wǐ

²⁷ A ma̤hto hǐnu dě, Ye̤shǔ hǎhtò̌cû̌kè, dě a cû̌kè̌shǐ ta pwa̤kwiǎ ta̤kûta̤cî̌ tapwa̤ ami̤ mî̌ Lě̤wǐ. Dě a hǎnòò̌ bǎ la̤kwi ta̤kûta̤cî̌ hǐkû. Dě Ye̤shǔ hî̌ yǎ, “Gûkû̌ hekò dě htûkû̌ he khophijaû̌.”

²⁸ Lě̤wǐ bè̌kèbò ta̤ pṳ̂̌tacǎ dě a ihtǒ gûcû̌kû̌ Ye̤shǔ akò.

²⁹ Htǒotaplǎdě, Lě̤wǐ ma̤ pwèdû̌ tèpwè dě ahǐ, a ma̤bǎ Ye̤shǔ aya. Dě a mǎhènṳ asû̌akho htě a kwi ta̤kûta̤cî̌ toǒ ta shǐpwa̤shǐmè̤ ahǔwa̤toǒ, dě a hèǎplṳ̂ǎphǎ kû̌bò nû̌û.

³⁰ Pharisè̌phû̌ toǒ ta pwa̤sû̌ǐ ta̤sû̌ta̤tòwò asara sî aprṳ̂kla toǒǒ bè̌bò ta̤sǔ dě Běcǎ Ye̤shǔ akhophijaû̌ toǒ akhû̌ dě a hî̌, “Sî cû̌ ǎhtuohtukû̌ ta pwa̤kwi ta̤kûta̤cî̌ toǒ ta ta̤ma̤sǔphû̌nu toǒ ma̤tè?” Asî gwè lǒkho hǐnu.

³¹ Ye̤shǔ hî̌shǔ asî, “Kòyò htě a ǒmo̤ǒbǎ toǒnu a lo̤bǎ ta ta̤khû̌saradû̌ tò̤. Kòyò htě ashǐasha toǒnu mî̌ a lo̤bǎ ta ta̤khû̌saradû̌.

³² He hè kaǎ kòyò htě acǒatè̤nu toǒ mè̤tò̤. Ma̤pûhǐ ta̤ma̤sǔphû̌ toǒ yò̤lò̤ge lǒkho asò̌ nudě, he hè kaǎ pwǎ asî.”

Kò gwè ta̤dǔǎshǎ awi̤akè̌

³³ Pharisè̌phû̌ toǒ ta pwa̤sû̌ǐ ta̤sû̌ta̤tòwò asara toǒ hî̌ Ye̤shǔ, “Jowǎ̤ni̤ akhophijaû̌ toǒ ta Pharisè̌phû̌ akhophijaû̌ toǒ dǔǎ shǎǎshǎo dě kwisaba sala̤ pwǎ̤tadě nakhophijaû̌ toǒnu a dǔǎdǔo kû̌kò tò̤ lè.”

³⁴ Běcǎ Ye̤shǔ hî̌shǔ asî ta yo̤sǎkhěkhǒ tûmû dě a hî̌, “Bǎ khòmò̤makhû ǒhtukû̌pe ta akho shǐpwa̤shǐmè̤ akhanu, kò nodǔǎdǔo mò̌ shǐpwa̤shǐmè̤ toǒ mî̌ anî̤jò ya?

³⁵ Ti̤ni̤ni̤ pěnu kò kaǎcû̌ tephekè khòmò̤makhû pě. Bǎnuakha pěmî̌ asî dǔǎdǔo lǒkho pě.”

³⁶ Ye̤shǔ hî̌po̤ asî ta yo̤sǎkhěkhǒ to̤to̤ dě a hî̌, “Kò cǐhtò̌lè̌ hǐdosa dě kò shò̌phabǐ yǎta hǐdoli̤nu a ǒ dǐpwǎ̤꤮ tò̤. Dè ma̤hǐnu hî̌dě hǐdosahtǒonu a htò̌lè̌kè pě, htohǒtò̤ hǔgòpwî̌sa ta hǔgòpwî̌li̤ htǒonu agwape nû̌û tò̤.

³⁷ Kòyò yṳnṳ sobîshisî̌yo̤sa dě shiophěko li̤kûnu a ǒ dǐpwǎ̤꤮ tò̤. Kò dè yṳnṳ hǐnu hî̌dě sobîshisî̌yo̤sa htǒonu a saphò̌kè shiophěkoli̤ hǐnutama pě, dě sobîshisî̌yo̤ lò̤gukèbò pě, dě shiophěko htò̌phò̌kè pě.

³⁸ Kò tobǎ yṳnṳpwǎ yǎ dě shiosa akû pwǎ꤮.

³⁹ Htodě kòyò htě a obǎhto sobîshisî̌yo̤li̤ toǒnu a sò̌yṳ ope sobîshisî̌yo̤sa dǐpwǎ̤꤮ tò̤. ‘Sobîshisî̌yo̤li̤nu a wǐkhlo ta asa,’ a hî̌ bǎ asî hǐnu.”