Lǔka 20 - Kawyaw RC

Kò gwè Ye̤shǔ a ta̤sîrîshû̌sho awi̤akè̌

¹ Ti̤ni̤kha, Ye̤shǔ ǒ ta̤lṳhtò̌hokû dě a sû̌ǐtòwòǐlò̤ kòyò saprṳ̂saho, dě a dǒhtû̌ bǎ kò ta ta̤sò̌le̤sò̌lò̤ awi̤akè̌. Dě bǎnuakha, pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ, ta Yṳ̌daphû̌ aprṳ̂aho hǐkǒdû̌ toǒ hè nû̌ûǒ.

² Dě a hî̌ nû̌û, “Pwe̤ǐlṳ bǎ kè̌ pa, na ma̤ta̤ htǒotoǒ numî̌ na cû̌ma̤ yǎta ûpè a sîrîshû̌sho pè? Ûpè noma̤ na pè?”

³ Dě Ye̤shǔ hî̌shû̌ asî, “Dè hî̌hǐnudě, he gwè sî ta̤hî̌bǎ tûmû, dě pwe̤ǐlṳ bǎ he.

⁴ Pwa̤ploshi Jowǎ̤ni̤ plobǎ kò shi htǒonumî̌ Cǒmara ǐ nû̌û sîrîshû̌sho ya? Mè̤tò̤mî̌ kòyòhǎkhû̌phû̌ ǐ nû̌û ya?”

⁵ Asî hî̌ kè̌khînû̌û, “Pa to hî̌shǔ yǎ hî̌tè? Pa dè hî̌ ta, ‘Cǒmara ǐ nû̌û’ dèhî̌mî̌, a gwèlòtṳ̌ pa ta, ‘Dèhî̌hǐnudě sî yṳǎ yǎtò̤ ma̤tè?’ A hî̌lòtṳ̌ hǒ.

⁶ Mè̤tò̤mî̌, ‘Kòyòhǎkhû̌phû̌ ǐ yǎ,’ pa dè hî̌ dě kòyò saprṳ̂ lǒ̤꤮ bò bǎo toǒ yṳǎ ta Jowǎ̤ni̤ mî̌ pwa̤po̤ tapwa̤ akhû̌akhî, asî wîsi pa ta lo̤ pě.”

⁷ Hǐnudě asî hî̌shǔ, “Ûpè ǐ Jowǎ̤ni̤ sîrîshû̌sho htě a glè plo bǎ kò shi htǒonu, pa sî̌yatò̤.”

⁸ Dě Ye̤shǔ hî̌shǔ asî, “Dèhî̌hǐnudě he ma̤ta̤ htǒotoǒ ta ûpè sîrîshû̌sho pènu he pwe̤ǐlṳ bǎ sî tò̤tò̤.”

Hî̌ khěkhǒ ta pwa̤khò̌ǎ sobîphǎ toǒ awi̤akè̌

⁹ Dě Ye̤shǔ pwe̤ǐlṳ kòyò saprṳ̂saho ta yo̤sǎkhěkhǒ tûmû dě a hî̌, “Bǎtaplǎ kòyò ǒ tapwa̤, a we̤kûnu ashǒǐplṳ̂ nû̌ûta sobîmṳ toǒnu a ǒ tala̤ dě anokhò̌ǎkè nû̌ûta pwa̤khò̌ǎ toǒ. Htodě a hǎhtò̌cû̌ ǒyî̤kè gaahǔwa̤ taga.

¹⁰ Bǎ sobîsǎ mihǒ akhanu, ma̤pûhǐ a nî̤bǎ sobîsǎ htě a to nî̤bǎnu toǒdě sobîphǎběcǎ htǒo nohè jûphû̌ tapwa̤ dě pwa̤khò̌ǎnu toǒ a ǒ. Pwǎ̤tadě pwa̤khò̌ǎ htǒotoǒnu, aphlěapo̤sha nû̌ûjûphû̌ htǒotapwa̤ dě a plûge koyoklî̌kè pwǎ nû̌û.

¹¹ Hǐnu akhû̌akhî, a nohè tèplè̌lè̌ ajûphû̌ ahǔwa̤ tapwa̤ hǐnudě pwa̤khò̌a htǒotoǒ phlěpo̤sǒ nû̌û, a ma̤sòwò̤hto nû̌û dě a plûge koyoklî̌ po̤sǒ nû̌û.

¹² Htodě a plûhèpo̤ ajûphû̌ supwa̤ tapwa̤, dě pwa̤khò̌ǎ sobîphǎ htǒotoǒnu, a po̤lǒsopo̤pṳ, po̤htòbò nû̌û dě wîhtò̌kè nû̌û dě we̤khlo.

¹³ “Dě sobîphǎběcǎ hî̌, ‘He tobǎ ma̤ hî̌tè? He nohè ta he phû̌makhû htě he mo̤ǐ htǒotapwa̤ mî̌ asî bè̌dubè̌na̤khlo nû̌û pě kǎlè,’ a hî̌ hǐnu.

¹⁴ “Pò̤̌ta bǎ pwa̤khò̌ǎ htǒotoǒ kè̌shǐ nû̌û phû̌makhû hè akhanu, asî hî̌ kè̌khînû̌û, ‘Htǒotapwa̤ mî̌ sobîphǎběcǎ aphû̌khû htě a to nî̤bǎ û̌cata̤bî̌nu tapwa̤ hǒ. Cû̌! cû̌ma̤sikè yǎ hò̌꤮! Dě a û̌cata̤bî̌ htǒotoǒnu a htûbò pata pě!’

¹⁵ Hǐnu akhû̌akhî, asî cǐjûgrû hǎhtò̌kè nû̌û we̤khlo dě ma̤sikè nû̌û. “Dè ma̤hǐnudě sobîphǎběcǎ ma̤ pwa̤khò̌ǎ htǒotoǒ hî̌tè pě?

¹⁶ A bǎ hè ma̤sikè kòyò lǒ̤꤮ bònu toǒ dě a nokhò̌ǎ tèplè̌lè̌ sobîphǎ htǒonu ta kòyò ahǔwa̤ toǒ pě.” Bǎ kòyò saprṳ̂saho gana̤de ta̤hî̌bǎhtǒo akhanu, asî hî̌ lǒkho, “Pa sò̌yṳ nohtûhtò̌ yǎ hǐnu tò̤!”

¹⁷ Ye̤shǔ kè̌cû̌ asî dě a gwè asî, “Dèhî̌hǐnu dě lî̤cahtǐ hî̌nǎ hewi̤hekè̌ ta, ‘Kòyò ma̤htò̌ hǐ dě, lo̤ htě asî wîkè nû̌û nutamanu, a htûhtò̌ lo̤ htě a tûhtû̌měbò hǐ tama,’ a hî̌ hǐnu dě amûasǎ mî̌ titè?” a gwè kò hǐnu.

¹⁸ “Kòyò lǒ̤꤮ bò htě alò̤te̤ lo̤nu tama akhû̌ toǒnu, akhwǐ la̤gapwǎ pě, pò̤̌ta lo̤nu tama lò̤te̤ dě asîkhû̌ pěnu, akhwǐakhû̌ bǎ mǔpwî̌bò pě.”

¹⁹ Pwa̤sû̌ǐ ta̤sû̌ta̤tòwò asara toǒ ta pwa̤tòlûhtò̌ hǐkǒdû̌ toǒ sî̌ya ta Ye̤shǔ hî̌khǒ asî akhû̌akhî, taplǎpa a sò̌yṳ pṳ̂ Ye̤shǔ bǎnu hǒ. Pwǎ̤ta asî ǐsha kòyò saprṳ̂nu toǒ ala̤.

Kò gwè Ye̤shǔ ta tobǎ ǐ Rò̌mǎkhwǐ ta̤kûta̤cî̌ ya? Mî̌ tò̤ ya?

²⁰ Hǐnu akhû̌akhî, ma̤pûhǐ asî pṳ̂nṳ Ye̤shǔ hî̌bǎsǔ ta̤hî̌bǎ toǒ, htohǒtò̤ ma̤pûhǐ asî pṳ̂sûcû̌kè nû̌û dě Rò̌mǎkhwǐ htě a ǒ ta a ta̤sîrîshû̌sho ta a ta̤po̤ta̤phǎ htǒotapwa̤ a cǔdekû ayanu, asî ǒpo̤kè̌ khîkha te̤bǎte̤to dě a nocû̌ pwa̤kè̌sû̌kè̌joǐ toǒ glè jîma̤khǒ ana̤ pwǐ kòyòcǒtè̤ toǒnu dě asî glè gwè khǒ lǒkho Ye̤shǔ yo̤sǎ toǒ.

²¹ Pwa̤kè̌sû̌kè̌joǐ htǒotoǒ gwè Ye̤shǔ, “Sara꤮, pa sî̌ya ta na ta̤hî̌bǎhî̌sho toǒ ta na ta̤sû̌ǐtòwòǐ toǒ numî̌ acǒatè̤, htohǒtò̤ na kè̌dû̌kè̌pî̌tî̌ kû̌kò tò̤. Na sû̌ǐtòwòǐ kò pwǐ ato ta Cǒmara aklè̌aklò a ta̤te̤ta̤mǎnu toǒ pwǎ.

²² Hǐnudě pwe̤ǐ bǎkè̌ pa, mî̌ pa tobǎ ǐ Rò̌mǎkhwǐ ta̤kûta̤cî̌ ya? Mî̌ tò̤ ya?”

²³ Pwǎ̤tadě Ye̤shǔ sî̌ya ta asî kè̌lǎpṳ̂ nû̌û hî̌bǎsǔ ta̤hî̌bǎ akhû̌akhî, a hî̌shǔ asî,

²⁴ “Dǔlṳ bǎ kè̌ he ta sî wûyî̌ tabǎ. Dě wûyî̌lo̤ htǒonumî̌ ûpè hǐkǒyola ta ûpè mi̤ ǒpè?”

²⁵ Dě asî hî̌shǔ nû̌û, “Rò̌mǎkhwǐkèsa ayola ta ami̤ ǒ.” Dě a hî̌shǔ asî, “Dè ma̤hǐnudě, Khwǐdû̌kèsa ata hî̌dě ǐ yǎta Khwǐdû̌nu, Cǒmara ata dèhî̌dě ǐ yǎta Cǒmaranu.”

²⁶ Dě asî pṳ̂nṳ ta̤hî̌bǎsǔ dě kò saprṳ̂saho alo̤mo̤ dǐmû̌꤮ tò̤. Ye̤shǔ hî̌shǔ asî pwǐhè̌o akhû̌akhî, a te̤pe̤bòkè asî dě a ǒ sî̌tukǔbò pwǎ.

Kò gwè Ye̤shǔ ta ta̤si htûpwa̤ge awi̤akè̌

²⁷ Sadugè̌phû̌ htě a yṳǎ ta kòyò si htûpwa̤gesǒ tò̤nu toǒ hè dě Ye̤shǔ ǒ dě hè gwè nû̌û ta̤hî̌bǎ tûmû,

²⁸ “Saradû̌꤮, Mǒ̤jè khwè̌lò̤ ta̤mǎlò̤ tûmû ta paya dě ahî̌, kòyò tapwa̤pwa̤ dè sikè amala̤, dě aphû̌ dè ǒkè dǐpwǎ̤꤮ tò̤ hî̌nu, ma̤pûhǐ akhlialè ǒkè nudě, a pṳmakhû bǎ phî̌sǒ akhi ǒkèhtǒo, a hî̌ hǐnu.

²⁹ Khònò̤dě pṳ ta wè̤ makhû ǒ susǒtapwa̤. A wè̤pwa̤gutṳ̌ tapwa̤ phî̌ ama dě anǒkònu a sikè ama la̤, dě aphû̌ ǒkè dǐpwǎ̤꤮ tò̤ akhû̌akhî, apṳ hǒla̤ tapwa̤ bǎphî̌sǒ akhi ǒkè htǒotapwa̤.

³⁰ Dě a pṳmakhû ginǐ̤pwa̤tapwa̤ phî̌gesǒ akhi.

³¹ Htodě apṳmakhû supwa̤tapwa̤ to̤htû̌ susǒtapwa̤ htǒonu sikè sǒsǒta hǐnu, dě aphû̌ ǒkè lǒkho dǐpwǎ̤꤮ tò̤.

³² Anǒkò dě mamǔ htǒotapwa̤ sikè dǒ.

³³ Hǐnudě htû̌꤮ si htûpwa̤gesǒ amṳni̤ pě ti̤ni̤nu, mamǔ htǒotapwa̤ htû bǎtè tapwa̤ ama pěpè? Ma̤tè̤hî̌dě asî pṳtawè̤ susǒtapwa̤ nî̤jûbò nû̌û mamǔ htǒotapwa̤ nǔ꤮.”

³⁴ Ye̤shǔ hî̌shǔ asî, “Htǒotuhtunu, kò phî̌phû̌phî̌ma lǒkho lè.

³⁵ Pwǎ̤tadě kòyò htě Cǒmara bè̌ asî ta a gwa ta a sihtûpwa̤gesǒ htû̌꤮ anǒkò tuhtu pě toǒnu, ta̤phî̌phû̌phî̌ma ǒpetò̤ hǒ.

³⁶ Asî sǒsǒta mǒkhû̌tanaphû̌nu toǒ pě dě a sijò pě tò̤. Asî htûpwa̤gesǒ ta ta̤si pě akhû̌akhî, asî mî̌ Cǒmara aphû̌mǔphû̌khû toǒ hǒ.

³⁷ Dě Mǒ̤jè khòlṳ lîhtò̌phlohtò̌ asò̌ ta kòyò htě a sihto toǒnu, a htûpwa̤gesǒ pě, ma̤tè̤hî̌dě Abraham ta Isǎko ta Yǎ̤kò htǒotoǒnu, a sihto yî̤hǒ pò̤̌ta lî̤cahtǐkû hî̌ to̤to̤ ta bǎ mî̌gèhtò̌ joji akhanu, Mǒ̤jè kaǎ Běcǎ htǒonu ta, ‘Abraham a Cǒmara, Isǎko a Cǒmara, ta Yǎ̤kò a Cǒmara,’ hǐnu.

³⁸ Kòyò pṳ̂̌꤮ tapwa̤ ǒhtûpwa̤bò tûjûpwa̤ dě Cǒmara alo̤mo̤ akhû̌akhî, a mî̌ kòyòsi toǒ acǒmara mè̤tò̤, kòyò htûpwa̤ toǒ acǒmara.”

³⁹ Pwa̤sû̌ǐ ta̤sû̌ta̤tòwò asara toǒ hî̌po̤ yǎ, “Sara꤮ na hî̌shǔjò mè̤mè̤̌.”

⁴⁰ Dě asî gwè hèbǔpe nû̌û dǐcǎ꤮ tò̤.

Kò gwè Khrî̌stu awi̤akè̌

⁴¹ Ye̤shǔ gwè asî, “Kò cû̌ hî̌tǒ̤ ta Khrî̌stu mî̌ Dǎ̤wi̤ akhlialè mî̌ hî̌tè?

⁴² Ma̤tè̤hî̌dě bǎ ta̤htû̌sò̌ǐlî̤ akûnu, Dǎ̤wi̤ sana̤ cû̌ khwè̌tǒ̤ ta, ‘Běcǎ hî̌ he Běcǎ ta, “Hǎnòò̌ dě he cǔdemû htǒotokho.

⁴³ Hǎnòò̌ sělě to̤htû̌ he ma̤pè̤ bòmṳ̂sîglî kòyò htě a sò̌khě nanu toǒ pěnî̌꤮. He noihtǒ ǒ kòyò htě a sò̌khě nanu toǒ sǒsǒta na khǎlǎ la̤yî̤ htě na hǎnòò̌ dě na yî̤lò̤ ǐyǎ htǒonu pě.”’

⁴⁴ Khwǐdǎ̤wi̤ kaǎ Khrî̌stu ta ‘Běcǎ’ akhû̌akhî, a cû̌ htûjò Khwǐdǎ̤wi̤ aphû̌khû hî̌tè?”

Ye̤shǔ hî̌ kò ta ǒsè̌rè̌ lǒkho pwa̤sû̌ǐ ta̤sû̌ta̤tòwò asara toǒ

⁴⁵ Bǎ kòyò saprṳ̂ gana̤de Ye̤shǔ a ta̤hî̌bǎ akhanu, a hî̌ akhophijaû̌ toǒ,

⁴⁶ “Ǒsè̌rè̌ lǒkho sîna̤ ta pwa̤sû̌ǐ ta̤sû̌ta̤tòwò asaranu toǒ nî̌꤮. Asînu toǒmî̌ a sò̌yṳ sǒ lǒkho hǐdopo̤to̤ dě a cû̌gecû̌hè klǎkû ta a sò̌yṳ nohî̌bǎ bè̌dubè̌na̤ kò ta ana̤. Dě ta̤sabahǐkûnu bǎbǎ, dě pwèkûnu bǎbǎ, asî sò̌yṳ hǎnòò̌lò̤ lǒkho gûla̤ htě kò bè̌dubè̌na̤ yǎnu toǒ pwǎ.

⁴⁷ Asî cû̌lòhoǎ lòhoobò mamǔǒkhwè̌ ta̤ pṳ̂̌꤮ tacǎ. Ma̤pûhǐ kò gènè̤ asî ta asî mî̌ kòyòcahtǐ toǒ nudě, asî kwisaba htûgipi̤ bǎ kò. Kòyò hǐnu toǒnu, ta̤cèrò bǎ jîkhlo nû̌ûta kòahǔwa̤ toǒ pě.”