Lǔka 14 - Kawyaw RC

Ye̤shǔ ma̤bǎ kòyòsha tapwa̤

¹ Bǎ Yṳ̌daphû̌ mṳni̤dǔ bǎ akha ti̤ni̤nu, Ye̤shǔ cû̌ Pharisè̌phû̌ hǐkǒdû̌ tapwa̤ ahǐ. Bǎ a glè ǎshǎ akhanu, kòyò bǎnu toǒ kè̌johǔ nû̌û.

² Dě Ye̤shǔ alo̤mo̤nu kòyò yǒbujushi ǒ tapwa̤.

³ Dě Ye̤shǔ gwè pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒ dě a hî̌ asî, “Dě pa lî̤cahtǐ ta̤sû̌ta̤tòwò akûnu, ma̤bǎ kòyò bǎ Yṳ̌daphû̌ a mṳni̤dǔ akha numî̌ anî̤ ya? Mî̌ anî̤ tò̤ ya?”

⁴ Pwǎ̤ta asî hî̌shǔ nû̌û dǐcǎ꤮ tò̤. Ye̤shǔ dò̌htò̌ acǔde dě kòyò htǒotapwa̤ alo̤ dě a ma̤bǎkè bǎ nû̌û, dě a plûgekè nû̌û.

⁵ Htodě Ye̤shǔ hî̌ asî, “Bǎ Yṳ̌daphû̌ a mṳni̤dǔ bǎ akhanu, sî phû̌khû tapwa̤pwa̤ dèmè̤tò̤dě sî pṳ̂ tadodo dè lò̤te̤ dě shiklokû hî̌nu, sî glè cû̌phî̌htò̌ yǎpě taplǎpa ya? Mî̌ tò̤ ya?”

⁶ Pwǎ̤tadě asî hî̌geshǔ nû̌û dǐcǎ꤮ tò̤.

Ta̤kaǎshǔ shǐtè̤mè̤ ta ta̤shò̌lò̤sò̌

⁷ Bǎ Pharisè̌phû̌ hǐkǒdû̌ htǒotapwa̤ kaǎhèǎ shǐtè̤mè̤ toǒ dî akhanu, a hèwû̌lǎphî̌ lǒkho agûla̤ wǒgutṳ̌. Ye̤shǔ kè̌shǐ asî ma̤hǐnudě a hî̌khǒ bǎ asî ta yo̤sǎkhěkhǒ to̤to̤.

⁸ “Bǎ kò mǎhèǎmǎhèo na dě kòyò tapwa̤pwa̤ a khòmò̤pwè akhanu, wû̌lǎ hǎnòò̌phî̌ ma̤ gûla̤ awǒgutṳ̌ ma̤, ǐshata pěmî̌ kòyò htě a htûdû̌khlo ta nanu, kò mǎhèǎojò hè̌.

⁹ Kò dè mǎhè dǒ yǎ hî̌dě hǐběcǎ glè hî̌ na ta, ‘Ǐhǎnòò̌ pûyǎ na gûla̤ htǒonu ta a nî̌,’ dě bǎnukha pě, na bǎ cû̌hǎnòò̌kè gûla̤ phǔlò̤gutṳ̌ tò̤glò pě dě na sòwò̤kè pě.

¹⁰ Awǒgutṳ̌mî̌, kò dè mǎhè na hî̌dě cû̌hǎnòò̌ gûla̤ phǔlò̤gutṳ̌nu tò̤glò. Na dè ma̤hǐnu hî̌dě, hǐběcǎ glè hè hî̌ na, ‘Sû̌kho, htò̌hǎnòò̌ dě akhû̌nu tò̤glò,’ dě bǎnukhapě, na mi̤sǎǒ dě kò pṳ̂̌tapwa̤ alo̤mo̤ pě.

¹¹ Ma̤tè̤hî̌dě kòyò tapwa̤pwa̤ a bè̌htò̌yî̤ ana̤nu, Cǒmara bè̌phǔlò̤ yǎ pě, dě kòyò tapwa̤pwa̤ a bè̌phǔlò̤ ana̤nu, Cǒmara bè̌htò̌yî̤ yǎ pě.”

¹² Htodě Ye̤shǔ hî̌lè̌ hǐběcǎ, “Bǎ na ma̤wǒnǎ lṳmṳbǎ shǎǎshǎo akha bǎbǎ, dèmè̤tò̤dě lṳmṳhǎ shǎǎshǎo akhanu bǎbǎ, na sû̌kho toǒ bǎbǎ, napṳnawè̤ toǒ bǎbǎ, nakhlinalè toǒ bǎbǎ, nahǐphòwò̤shî̌ htě a dû̌yò̤htò̌sa toǒnu bǎbǎ, kaǎ ma̤ asî ma̤. Na dè kaǎ ǎ asî hǐnu hî̌dě asî kaǎ ǎ geshǔlè̌ na pě dě sî ma̤dû̌ma̤kǎ ǐ pwǎ nû̌û.

¹³ Pwǎ̤tadě bǎ na ma̤pwè akhanu, ma̤wǒnǎ shǎǎshǎo dě kaǎ kòyò htě a shèwèphû̌nu toǒ, kòyòtṳ̂rṳ̂nu toǒ, kòyò khò̌lopo̤děnu toǒ ta kòyò mi̤sǎkhǐnu toǒ nî̌꤮.

¹⁴ Dě na dè kaǎ ǎ kòyò hǐnu toǒ hî̌nu, na nî̤bǎ ta̤howi̤ pě, ma̤tè̤hî̌dě asî kaǎ ǎ geshǔbò̌ na dǐcǎ꤮ tò̤. Bǎ kòyòcǒtè̤ toǒ htûpwa̤gesǒ ta ta̤si akha pěnu, Cǒmara ǐge na ta̤bwǐta̤sîrî pě.”

Ta̤dǒnè khěkhǒ ta ta̤ǎopwèdû̌

¹⁵ Kòyò hǎnòò̌ kû̌ ta Ye̤shǔ bǎ la̤ǎ dîjowa̤kòshî̌nu toǒ akla tapwa̤nu, a gana̤de ta̤hî̌bǎhtǒo dě a hî̌ Ye̤shǔ, “Kòyò htě a hǎnòò̌ ǎobǎ dě Cǒmara ashiaga pě toǒnu, a nî̤bǎ mè̤mè̤̌ ta̤howi̤ pě!”

¹⁶ Dě Ye̤shǔ hî̌ yǎ, “Bǎtaplǎ, kòyò tapwa̤ ma̤dû̌pwè dě a bǔǎbǔo kò, dě a mǎhèǎhèo plṳ̂ kòyò.

¹⁷ Dě ta̤ǎopwè akhîakha hèto̤hǒ akhanu, a nocû̌pwe̤ǐ ajûphû̌ tapwa̤ ta kòyò htě a mǎhèǎhèo nû̌ûnu toǒ, dě a jûphû̌ cû̌ hî̌, ‘Hèǎhèo lǒkho mò̌ bǎo, kò ma̤wǒnǎbò hǒ.’

¹⁸ “Pò̤̌ta tapwa̤ tacǎcǎ꤮ a hî̌htohî̌lò̤bò ta aǒko tò̤. Awǐgutṳ̌ tapwa̤mî̌ a hî̌ ajûphû̌ htǒonu ta, ‘He pwî̤ hǔkla ta̤la̤ dě he tobǎ cû̌kè̌ǐ yǎ. Dě khòsò̌do ǐpû he nî̌꤮.’

¹⁹ “Ahǔwa̤ tapwa̤ hî̌, ‘He pwî̤ pṳ̂ yè̤̌lo̤ dě he tobǎ cû̌ noǎkè̌bǎ yǎ khònò̤. Dě khòsò̌do ǐpû he nî̌꤮.’

²⁰ “Ahǔwa̤tapwa̤ dě a hî̌lè̌, ‘He khòmò̤htosa mǒ̤pepwǎ dě he hèbò̌ tò̤.’

²¹ “Jûphû̌ htǒotapwa̤ gesǒ dě a gepwe̤ǐ aběcǎ ta ta̤wi̤ta̤kè̌ lǒ̤꤮ bò htǒotoǒ. Dě hǐběcǎ htǒotapwa̤ sò̌phlǒdû̌ dě a hî̌ ajûphû̌, ‘Hǎhtò̌cû̌ phwèphwè klè̌dû̌kûnu ta klè̌phû̌nu toǒ akû, dě kaǎge lǒkho kòyò shuphǔshèwèphû̌, kòyòtṳ̂rṳ̂, kòyò mi̤sǎkhǐ ta kòyò khò̌lopo̤děnu toǒ nî̌꤮.’

²² “Ajûphû̌ geto̤sǒ dě a hî̌ aběcǎ, ‘Běcǎ he cû̌ma̤htobò pwǐ na hî̌lò̤ nayo̤nu toǒ hǒ, pwǎ̤ta gûla̤ ǒcû̌dǎpe toǒ.’

²³ “Hǐnu akhû̌akhî, ana̤běcǎ hî̌ jûphû̌, ‘Cû̌ lè̌ dophû̌shǒphû̌nu toǒ akû dě nohè ǒbebò yǎdě he hǐkûbǎo.

²⁴ He hî̌ sî, kòyò htě he mǎhè yǎ toǒnu, a hè ǎbǎ kû̌ he ta̤ǎopwèdû̌htǒo dǐpwǎ̤꤮ tò̤!’”

Htû akhophijaû̌ tapwa̤ akhû̌akǎ

²⁵ Ti̤ni̤ akhanu, kòyò gûcû̌plṳ̂ kû̌ Ye̤shǔ dě a htû̌tiwǐ kè̌tîkhî asî dě a hî̌,

²⁶ “Kòyò htě a sò̌yṳ htû he khophijaû̌ tapwa̤pwa̤nu, amo̤apha bǎbǎ, aphû̌ama bǎbǎ, apṳawè̤ ta asana̤nu tû̌ bǎbǎ, a dè mo̤ǐkhlo nû̌ûta a mo̤ǐ he hî̌numî̌ a htûhtò̌jò he khophijaû̌ tò̤.

²⁷ Ûpèpè̌ bǎbǎ aò̌ tûû̌ a nò̌dòhtǔ tò̤tò̤, agû hekò tò̤tò̤ dèhî̌mî̌ ahtûjò he khophijaû̌ tò̤.

²⁸ “Hî̌kû̌nǎ, dě sîkla tapwa̤pwa̤nu, a dè gènè̤nǎ ta a glè bǒhtò̌ hǐhtò̌yî̤ tama dèhî̌dě, a hǎbò pwî̌꤮ tè pěnu a bǎ hǎnòò̌ dǒkè̌ wǐ. To̤htû̌ a ma̤htoma̤phlǔbò hǐ htǐnutama numî̌, awû shûpě ya mî̌ a shûtò̤ yanu a bǎ sî̌ya wǐ.

²⁹ A dè ma̤wǐ hǐnutò̤, dě a dè bǒhtò̌wǐ ahǐ kòkho, dě a dè ma̤htò̌htophlǔbò̌ ahǐ htǒonu tò̤ hî̌nu, kòyò lǒ̤꤮ bò htě a kè̌shǐ ta a ma̤jèrè̤̌jòrò̤kè ahǐ htǒotoǒnu, a luya̤bò nû̌û pě.

³⁰ Asî glè hî̌ lǒkho ta, ‘Kòyò htǒotapwa̤ ma̤htò̌ tû̌ ahǐ dě a ma̤htoma̤phlǔbò̌ nû̌û tò̤ lè.’

³¹ “Dèmè̤tò̤dě, hî̌kû̌nǎ, Khwǐ tapwa̤ dè hǎhtò̌cû̌ kû̌ta akliphû̌ apwa̤ tòsò̌, dě a glè cû̌shěshǔ ta Khwǐ ahǔwa̤tapwa̤ htě a ǒ ta akliphû̌ apwa̤ ginǐ̤sò̌ tapwa̤nu, a dè shěshǔ ta Khwǐ htǒotapwa̤ numî̌, a pè̤pě ya, mî̌ apè̤tò̤ yanu, a bǎ hǎnòò̌ gènè̤ kè̌ kû̌nǎ.

³² A dè wǒpè̤ tò̤ dèhî̌dě, bǎ a ǒyî̤pe nû̌û akhanu, a bǎ nocû̌ wǐ akòyò toǒ dě a bǎ cû̌ hî̌pè̤hî̌dû wǐ.

³³ Hǐnu akhû̌akhî, ta̤ lǒ̤꤮ bò htě sî ǒǐ toǒnu, sî dè bè̌kè yǎtò̤ dèhî̌dě, sî htûhtò̌jò he khophijaû̌ dǐpwǎ̤꤮ tò̤.

Îsǎ htě ashodopwî̤

³⁴ “Îsǎ numî̌ awǒ pwǎ pò̤̌ta îsǎ dè shuhape tò̤ hî̌nu, kò cû̌ma̤ shuha gejòpe yǎ hî̌tè?

³⁵ Îsǎ htě ashuhape tò̤nu, hǎkhû̌ aya bǎbǎ, sǒmṳ la̤nî̤khû̌nî̤ǎ aya bǎbǎ, abwǐasîrî ǒpe dǐcǎ꤮ tò̤. Dě kò wîkè pwǎ yǎ.” “Kòyò htě a ǒ ta anò̌ku toǒnu, nogana̤de lǒkho asî.”