Lǔka 1 - Kawyaw RC

Lǔka khwè̌cû̌ bǎ Sòphǐlǔ aya ta Ye̤shǔ awi̤akè̌

¹ Kòyò jipwi̤ khwè̌mǎnǎǐ lǒkho ta̤htě a htûhtò̌ bǎ pakla htǒotoǒ awi̤akè̌nu pwa̤khwè̌ ǒplṳ̂.

² Asî gûkhwè̌kû̌ pwǎ pwǐ kòyò htě a kè̌shǐ nû̌ûta ana̤ akhû̌lû̌kha dě a dǒhtû̌ǐlṳ bǎ kò ta ta̤wi̤ta̤kè̌nu toǒ dě a pwe̤ǐ tṳtṳ bǎ panu toǒ pwǎ.

³ Hǐnu akhû̌akhî, saradû̌ Sòphǐlǔ꤮, he kè̌lǎ sî̌ya te̤mǎhtobò ta̤htûhtò̌ dě a kòshî̌kòtṳ toǒhǒ akhû̌akhî, he ǐlò̤ he sò̌phlǒ ta he dè khwè̌ bǎ na pwǐ a htûhtò̌ to̤to̤ hto to̤to̤ hî̌numî̌ a wǒ lòtṳ̌pwǎ he gènè̤ hǐnu.

⁴ Ma̤pûhǐ na sî̌ya te̤mǎ bòmṳ̂sîglî mè̤mè̤̌ ta̤wi̤ta̤kè̌ pwǐ na sû̌ǐbǎhto toǒ ayanudě, he khwè̌ pwǎ hǐnu.

Mǒkhû̌tanaphû̌ ǐsî̌ya pwa̤ploshi Jowǎ̤ni̤ a ta̤ǒlò̤ awi̤akè̌

⁵ Bǎ Khwǐherǒ htû Khwǐ dě Yṳ̌dagakû akhanu, pwa̤tòlûhtò̌ htě ami̤ ta Sakharǐa ǒtapwa̤. Dě anu a ǒpadǒkû̌ ta pwa̤lṳhtò̌ aprṳ̂aho htě kò kaǎ nû̌mi̤ ta Abǐya dě꤮ wǐnukhanu tṳ̂prṳ̂ akû, dě ama mi̤ mî̌ Èlî̌sèbè̌. A ma mî̌ akhlialè tǒhtudǒ ta pwa̤tòlûhtò̌ toǒ.

⁶ Asî sò̌gini̤ ǒhtûpwa̤ cǒtè̤wǒbò dě Cǒmara a lo̤mo̤ pwǐ Běcǎ Cǒmara a ta̤mǎlò̤ ta a ta̤sû̌ta̤tòwò toǒ hî̌nǎnu asî jûle̤phî̌yo̤ ma̤lǒma̤be lǒ̤bò.

⁷ Èlî̌sèbè̌nu ashodophû̌ akhû̌akhî, asî phû̌ǒ kû̌ lǒkho kò tò̤, htohǒtò̤ asî sò̌gini̤bò a mo̤pwa̤kè hǒ.

⁸ Ti̤ni̤nu, khîkha hèto̤ ta Sakharǐa tobǎ phî̌nṳ ta̤ma̤ htě a lò̤bǎ nû̌û htǒo. A ma̤ ta̤ma̤ pwǐ pwa̤tòlûhtò̌ta̤ tapwa̤ bǎ ta̤lṳhtò̌hoakû.

⁹ Pwǐ pwa̤tòlûhtò̌ toǒ la̤klo ǒnu, kò wû̌lǎ yǎ ta a tobǎ shû̌uhtò̌ ta̤nṳmû̌ dě ta̤lṳhtò̌hokû bǎnu ti̤ni̤ akhû̌akhî, a cû̌nṳ dě ta̤lṳhtò̌hokû.

¹⁰ Bǎ a shû̌uhtò̌ ta̤nṳmû̌ akhanu, dě akhlonu, kòyò kwisabaplṳ̂phǎ lǒkho.

¹¹ Cǒmara mǒkhû̌tanaphû̌ tapwa̤ ǒlṳhtò̌ bǎ Sakharǐa alo̤mo̤ dě a ihtǒ ǒ bǎ ta̤lṳhtò̌ ta̤nṳmû̌ agûla̤ cǔdemûnu tokho.

¹² Bǎ Sakharǐa kè̌shǐ mǒkhû̌tanaphû̌ akhanu, a sò̌gònò̤ ǐsha.

¹³ Pwǎ̤ta mǒkhû̌tanaphû̌ hî̌ nû̌û, “Sakharǐa꤮ ǐsha pûma̤! Cǒmara gana̤de na ta̤kwisaba akhû̌akhî, nama Èlî̌sèbè̌ glè phû̌ǒ bǎ na phû̌makhû tapwa̤ dě na bǎ kaǎ ami̤ ta Jowǎ̤ni̤ pě.

¹⁴ Htû̌꤮ a ǒlò̤ pě mî̌ a ma̤ sò̌le̤sò̌lò̤ na pě dě kòyò sò̌le̤sò̌lò̤ kû̌bò ta na pě.

¹⁵ A mî̌ a htû hǐkǒdû̌ dě Cǒmara a lo̤mo̤ pě tapwa̤. Sobîshisî̌yo̤ bǎbǎ, shisî̌khǎ bǎbǎ a tobǎ ǎonû̌û dǐcǎ꤮ tò̤. A ǒlǒǒbe ta Běcǎ sǎcahtǐ dě a mo̤phukû akhanu pe.

¹⁶ Dě a sûgeplṳ̂sǒ Israelphû̌ toǒ dě asî Běcǎ Cǒmara ǒ pě.

¹⁷ A hè wǐ ta Běcǎ pě, dě a sò̌phlǒshû̌sho dě a ǒ ta sîrîshû̌sho pwǐ pwa̤po̤ Èlî̌anu pě. A ma̤klaǐ gesǒ phatoǒ ta phû̌toǒ pě. A bû̌tèplè̌ gesǒ kòyò htě a gana̤de kû̌kò yo̤ tò̤nu toǒ dě pwa̤cǒpwa̤tè̤ toǒ a klè̌klòkû pě. Ma̤pûhǐ kòyò toǒ ma̤wǒnǎshǔ Běcǎ ata̤hè htǒonu pě dě, a ma̤wǒnǎ bǎ kòyò tṳ̂prṳ̂ ta Běcǎ aya pě.”

¹⁸ Sakharǐa gwè mǒkhû̌tanaphû̌, “Htǒonumî̌ amè̤ ya, amè̤tò̤ yanu, he sî̌ya kè̌shǐlṳjò hî̌tè? He dě he mo̤pwa̤kè hǒ, hema mî̌ a mo̤pwa̤kè hǒhǒ.”

¹⁹ Dě mǒkhû̌tanaphû̌ hî̌shǔ nû̌û, “He mî̌ Gabrělè, he ihtǒ Cǒmara a lo̤mo̤ dě a nohèlò̤ he ta he glè hè pwe̤ǐbǎ na ta ta̤sò̌le̤sò̌lò̤ awi̤akè̌ htǒotukǔnu pwǎ.

²⁰ He hè pwe̤ǐ bǎ na dě na yṳǎtò̤ akhû̌akhî, na pè̌ to̤htû̌ a htûhtò̌ pwǐ he olò̤kè nanu ti̤ni̤ pě. Htû̌꤮ akhîakha bǎ pěnu, a bǎ lǒhtò̌behtò̌ tû̌ pwǐ he hî̌nu pě.”

²¹ Bǎnuakha dě akhlonu kòyò toǒ ǒpo̤ǐ Sakharǐa dě a cû̌nṳ ǒyî̤kè ta̤lṳhtò̌hokû mî̌ma̤tè asî gènè̤ lǒkho hî̌nu.

²² Bǎ a hǎhtò̌ to̤dě akhlo khanu a hî̌bǎjòpe asî tò̤ dě asî sî̌ya ta a bǎkè̌shǐlòtṳ̌ ta̤dǔlṳkè̌shǐnǎ tacǎcǎ dě ta̤lṳhtò̌hoakûnu hǒ. A hî̌bǎjòpe ta akhû̌phě dǐmû̌꤮ tò̤ dě a wî̌wòlṳ pwǎ acǔde pwǎ.

²³ Dě bǎ a ta̤phî̌ta̤ma̤ ta̤lṳhtò̌hokû htohǒ akhanu, Sakharǐa ge dě ahǐ.

²⁴ Mṳni̤mṳsa yî̤hǒtò̤ ama Èlî̌sèbè̌ mo̤do dě a ǒhǔkè hǐkû yè̤̌la gûla̤ hǒ.

²⁵ Dě a hî̌, “Khònò̤ Běcǎ ma̤jè he hǒ. A phî̌kè bǎ he ta̤sòwò̤ htě kò pi̤jishǐcǒ henu toǒ hǒ.”

Ǐsî̌ya ta Ye̤shǔ glè ǒlò̤ awi̤akè̌

²⁶ Bǎ Èlî̌sèbè̌ mo̤do behtò̌ lasusǒ akhanu, Cǒmara nohèlò̤ mǒkhû̌tanaphû̌ Gabrělè dě Nǎ̤sèrèwî̤ htě a ǒ bǎ Galilî̌aganu tî̤wî̤ akû.

²⁷ A phî̌hè nṳbǎ mamǔphû̌sǎ htě ami̤ mî̌ Marǐa htǒo tapwa̤ a ta̤wi̤ta̤kè̌. Marǐa htǒonu a olò̤hto dě a glè phî̌ ta makhû htě ami̤ ta Jǒjè htǒonu tapwa̤ hǒ. Jǒjè mî̌ Khwǐdǎ̤wi̤ akhlilè gilò̤ tṳtṳ tapwa̤.

²⁸ Mǒkhû̌tanaphû̌ hè a ǒ dě a hî̌ nû̌û, “Cǒmara kè̌dû̌kè̌htû khǒtû̌ na hǒ, dě Běcǎ ǒkû̌ tû̌ta na nî̌꤮.”

²⁹ Mǒkhû̌tanaphû̌ hè pwe̤ǐlṳ Marǐa ta̤wi̤ta̤kè̌ htǒonu, a gènè̤phlo nû̌û amûasǎ tò̤, a gènè̤pò̤gènè̤sha tû̌ ana̤.

³⁰ Mǒkhû̌tanaphû̌ hî̌ nû̌û, “Marǐa꤮ ǐsha pûma̤ nî̌! Cǒmara ma̤bwǐma̤sîrî na hǒ.

³¹ Na bǎ mo̤do pě dě na glè phû̌jaǐlò̤ phû̌makhû tapwa̤ pě, dě kaǎ ami̤ ta Ye̤shǔ nî̌꤮.

³² A mî̌ kòyò htě abwǐdû̌sîrîhtû tapwa̤ dě kò kaǎ yǎ ta ahtò̌yî̤gutṳ̌ Cǒmara aphû̌khû tapwa̤ pě. Běcǎ Cǒmara ǐhtû yǎ ta Khwǐcophǎ tapwa̤ pwǐ akhlialè Dǎ̤wi̤nu pě.

³³ Htodě a htûhtò̌ Israelphû̌ toǒ akhwǐcophǎ pṳ̂̌tuhtu pṳ̂̌taplǎ pě dě ashiaganu agutṳpè̤jò pě tò̤.”

³⁴ Dě Marǐa hî̌shǔ mǒkhû̌tanaphû̌, “He phû̌sǎ pwǎlè, he glè mo̤do dě phû̌ǒjò hî̌tè?”

³⁵ Dě mǒkhû̌tanaphû̌ hî̌shǔ yǎ, “Běcǎ sǎcahtǐ hèlò̤ tû̌ dě nalo̤ pě, ahtò̌yî̤gutṳ̌ Cǒmara a ta̤po̤ta̤phǎ akhû̌akhî, phijaû̌phû̌ tapwa̤ hèǒlò̤ pě. Dě ta̤wi̤ta̤kè̌ htǒo akhû̌akhî, phijaû̌cahtǐ htǒotapwa̤nu kò kaǎ nû̌û ta Cǒmara aphû̌khû pě.

³⁶ Gènè̤tû̌ na sawṳ̂bû Èlî̌sèbè̌nu, a mo̤pwa̤kè hǒ. Kò hî̌ nû̌û ta aphû̌ǒjòpe tò̤ pwǎ̤tadě, khònò̤nu a mo̤dobe lasusǒ hǒ.

³⁷ Cǒmara ma̤jò ta̤pṳ̂̌tacǎ.”

³⁸ Dě Marǐa hî̌shǔ, “He mî̌ Běcǎ a jûmo̤ tapwa̤ pwǎ. A htûhtò̌tû̌ pwǐ na hî̌nu pě nî̌꤮.” Dě mǒkhû̌tanaphû̌ hǎhtò̌cû̌ tephekè.

Marǐa cû̌ǒlèkû̌ Èlî̌sèbè̌

³⁹ Ǒyî̤hǒtò̤nu, Marǐa ma̤wǒnǎ ana̤ ta a tṳplṳtî̤wî̤ cû̌ dě wî̤ htě a ǒ kholokhû̌nu tî̤wî̤, bǎ Yṳ̌dagakûnu.

⁴⁰ A cû̌nṳ Sakharǐa a hǐdǒkû dě a hî̌mo̤hî̌wǒ awè̤ Èlî̌sèbè̌.

⁴¹ Bǎ Èlî̌sèbè̌ gana̤de Marǐa hî̌mo̤hî̌wǒ nû̌û akhanu, phijaphû̌ htě aphukû htǒotapwa̤nu, a pe̤sò̌le̤sò̌lò̤. Dě Èlî̌sèbè̌ htǒonu a ǒbehtò̌kè ta Běcǎ sǎcahtǐ.

⁴² Dě a hî̌bǎshû̌ ta, “Mamǔ lǒ̤꤮ bò aklanu na mî̌ mamǔ htě a nî̤bǎdû̌khlo kò ta̤howi̤ tapwa̤ dě phijaû̌phû̌ htě na glè phû̌ǒ yǎ htǒotapwa̤nu a nî̤bǎ tû̌ ta̤howi̤ hǒ.

⁴³ He Běcǎ amo̤ cû̌hètǒ̤ dě he ǒ ma̤tè? He cû̌ nî̤bǎ khǒtû̌ ta̤kè̌dû̌ ma̤tè?

⁴⁴ He gana̤de na hî̌mo̤hî̌wǒ hehe ta phijaû̌phû̌ ǒ dě hephukû htǒotapwa̤ pe̤sò̌le̤sò̌lò̤lò̤.

⁴⁵ Na yṳǎ ta Běcǎ a ta̤wi̤ta̤kè̌ htǒo glè hè lǒhtò̌behtò̌ na̤cè̌ ta naya akhû̌akhî, na nî̤bǎ ta̤howi̤ hǒ!”

Marǐa sò̌po̤htû̌sò̌ǐ Cǒmara

⁴⁶ Marǐa hî̌, “He sò̌phlǒ glè htû̌sò̌ǐ lǒ̤sû̌lǒ̤sò̌ he Běcǎ.

⁴⁷ Cǒmara mî̌ pwa̤ma̤lû̌htò̌ge he tapwa̤ htohǒtò̤ a mî̌ he Běcǎ tapwa̤ akhû̌akhî, he sò̌le̤sò̌lò̤ hǒ.

⁴⁸ He mî̌ a jûmo̤ htě ami̤sǎ pî̌tî̌ tapwa̤ pwǎ̤tadě a gènè̤htò̌bǎ to̤ he. Sahtò̌ khònò̤ tǒ̤hè kòyòkhlilè pṳ̂̌꤮ tacǎ kaǎ he ta mamǔ htě a nî̤bǎ ta̤howi̤ tapwa̤ pě.

⁴⁹ Ma̤tè̤hî̌dě Cǒmara htě ashû̌asho htǒotapwa̤ ǐ htûhtò̌ bǎ he ta̤adû̌ayǒgutṳ̌ htǒonu ta a ta̤po̤ta̤phǎ toǒ mî̌ heya hǒ. Ami̤ mî̌ a cahtǐ.

⁵⁰ Cǒmara aphû̌ali̤ htě a bè̌dubè̌na̤ nû̌û toǒnu, a gwèbǎǐ asî tuhtu hto tuhtu pě.

⁵¹ Bǎ Cǒmara yṳ̂htò̌ acǔde htě ashû̌asho htǒo akha, kòyò htě a gènè̤dû̌ ana̤ toǒnu, a nûpò̌nûshîbò pě.

⁵² A bè̌lò̤te̤kè Khwǐcophǎ shû̌sho toǒ bǎ asî agûla̤ dě a bè̌htò̌ tèplè̌lè̌ kòyò htě ami̤sǎ pî̌tî̌nu toǒ.

⁵³ A ǐǎkǒ ǐobe kòyò htě a ǒti̤wi̤ toǒ, htodě a plûge koyokè kòyò dû̌yò̤htò̌sa toǒ.

⁵⁴ A gènè̤htò̌ to̤bǎ ta̤htě a olò̤hto ta paphipaphu dě꤮ awǐnu toǒ dě a hèma̤jè ajû Israelphû̌ toǒ.

⁵⁵ Ma̤pûhǐ a gwèbǎǐ Abraham ta akhlialè htǒotoǒ tuhtu hto tuhtu ayanudě, a gènè̤htò̌ ǐtû̌ hǒ.”

⁵⁶ Marǐa cû̌ǒkǔkû̌ ta Èlî̌sèbè̌ htǒonu a phǔbe sula dě a genǒpwǎ dě ahǐ.

Pwa̤ploshi Jowǎ̤ni̤ a ta̤ǒlò̤

⁵⁷ Bǎ Èlî̌sèbè̌ labǎlato phû̌ǒ akhanu, aphû̌jaǐlò̤ phû̌makhû tapwa̤.

⁵⁸ Kòyò ǒphǔ nû̌û bǎnu toǒ ta akhlialè ǒphǔ toǒ gana̤de ta Běcǎ dǔlṳ mè̤mè̤̌ a ta̤gwèbǎǐ nû̌û akhanu, asî sò̌le̤sò̌lò̤ kû̌bò nû̌û pṳ̂̌꤮ tapwa̤.

⁵⁹ Asî la̤klo ǒta phijaû̌ dè be ani̤ lǐ̤sǒ hî̌nu, kò bǎ dǔtṳ bǎ nû̌phěkhi. Bǎ ato dǔtṳphěkhi akhanu, akhlialè toǒ hèkû̌ lǒkho nû̌dě asî sò̌yṳ htòsǒtû̌ lǒkho nû̌û mi̤ ta apha Sakharǐa ami̤.

⁶⁰ Pò̤̌ta amo̤ hî̌, “Mè̤tò̤! tobǎ htò ami̤ ta Jowǎ̤ni̤.”

⁶¹ Asî hî̌shǔ amo̤, “Dě sîkhlisîlè aklanu, ami̤ ta Jowǎ̤ni̤nu a ǒ dǐpwǎ̤꤮ tò̤.”

⁶² Apha sò̌yṳ kaǎ ami̤ ta ûpènu asî sò̌yṳ sî̌ya akhû̌akhî, asî hî̌bǎwî̌wò cû̌ apha ta cǔkhû̌khò̌de dě a gwè nû̌û.

⁶³ Apha kwi lo̤bě dě a khwè̌lò̤ nû̌û, “Ami̤ mî̌ Jowǎ̤ni̤.” Dě asî sû̌pi̤sò̌pi̤bòkè.

⁶⁴ Bǎnu taplǎpa Sakharǐa hî̌bǎjò gesǒ dě a htû̌sò̌ǐ Cǒmara.

⁶⁵ Kòyò ǒphǔ bǎnu toǒ sû̌pi̤sò̌pi̤ ǐshabòkè, dě ta̤htûhtò̌ pwǐhè̌onu a lṳpîshî cû̌bò Yṳ̌daga sagala̤.

⁶⁶ Běcǎ a ta̤po̤ta̤phǎ htǒo ǒkû̌ ta phijaû̌phû̌ htǒotapwa̤ akhû̌akhî, bò꤮ kòyò htě a gana̤de ta̤wi̤ta̤kè̌ htǒotoǒnu a sû̌pi̤sò̌pi̤ dě a hî̌ lǒkho, “Phijaû̌phû̌ htǒotapwa̤nu a htûhtò̌ hî̌tè pě ya?” hǐnu.

Sakharǐa a ta̤hî̌bǎpo̤phǎnǎ

⁶⁷ Jowǎ̤ni̤ apha Sakharǐa lǒbehtò̌ ta Běcǎ sǎcahtǐ dě a hî̌po̤phǎnǎ wǐ Cǒmara awi̤akè̌ ta,

⁶⁸ “Pa htû̌sò̌ǐ wo̤wǒ̤nû̌û Israelphû̌ a Běcǎ Cǒmara hò̌꤮. Ma̤tè̤hî̌dě a hè kè̌kòhò akòyò toǒ ta a hè htè̌ge nû̌û.

⁶⁹ Dě Cǒmara apwa̤ma̤ta̤ Dǎ̤wi̤ akhlialè akûnu, Cǒmara ǐhtûhtò̌ bǎ pa pwa̤htè̌ge Běcǎ htě a ǒ ta a ta̤shû̌ta̤sho htǒotapwa̤ hǒ.

⁷⁰ Cǒmara olò̤nǎhto ta a pwa̤po̤ cahtǐ děwǐkha toǒ ta,

⁷¹ A htè̌ge pa ta kòyò htě a sò̌khě, a khû̌khwè panu toǒ a cǔdekû pě.

⁷² A hî̌ ta a dǔlṳ a ta̤gwèbǎǐ dě paphipaphu toǒ alo̤ pě, htohǒtò̤ a gènè̤htò̌ bǎ gesǒ a ta̤olò̤ cahtǐnu toǒ pě.

^73-75 Dě pa ta̤ǒhtûpwa̤ lǒ̤bò akû, ma̤pûhǐ pa htûhtò̌ kòyòcahtǐ, kòcǒkòtè̤ dě Cǒmara alo̤mo̤nu, Cǒmara olò̤hto papha Abraham ta a htè̌ge pa dě a sò̌khě pa toǒ asîrîshû̌sho akû pě. Hǐnudě pa ma̤ na ta̤ma̤nu pa tobǎ sò̌gònò̤ ǐsha tò̤.”

⁷⁶ Sakharǐa hî̌ aphû̌, “Hephû̌makhû, kò kaǎ na ta ahtò̌yî̤gutṳ̌ Cǒmara a pwa̤po̤ pě tapwa̤, ma̤tè̤hî̌dě na hè ma̤wǒnǎwǐ bǎ Běcǎ la̤hèklè̌ aya pě.

⁷⁷ Na pwe̤ǐ bǎ Běcǎ akòyò saprṳ̂ ta Cǒmara bòlû̌ asî ta̤sǔta̤plě pě, dě asî nî̤bǎ ta̤htè̌ge pě.

⁷⁸ Ma̤tè̤hî̌dě pa Cǒmara htǒonu, a gwèbǎǐ na̤cè̌ kò dě a khòsò̌do. A nohèlò̤ kòyò ǒ dě mǒkhû̌ tapwa̤ glè hè htè̌ge pa, pwa̤htè̌ge pa htǒotapwa̤nu, a sǒsǒ ta lṳmṳlîhtò̌ dě mǒkhû̌ hè pa ǒ pě.

⁷⁹ Dě lṳmṳ htǒo ahtò̌ mǒla̤ dě a lîrakhalò̤ bǎ kòyò ǒ dě ta̤khǐta̤lo̤, ta̤si ayo̤ǔ akûnu toǒ lǒ̤꤮ bò pě, dě a yṳ̂klè̌nè̌klò cû̌nṳbǎtû̌ pa ta̤ǒhtûpwa̤ aklè̌aklò htě apè̤adû dě sò̌phlǒ gûjûkabǎ akla pě.”

⁸⁰ Bǎ Jowǎ̤ni̤ dû̌htò̌ akhanu, Běcǎ sǎcahtǐ ǐ nû̌û ta̤shû̌ta̤sho. Bǎ a tèhtò̌ ma̤lṳ ata̤ma̤ dě Israelphû̌ toǒ alo̤mo̤ hǒtò̤ akhanu, a cû̌ǒ pwǎ dě lo̤měshǒkla akû pwǎ.