Kòlòtè̌ 4 - Kawyaw RC

¹ Jû běcǎ sî꤮ ma̤wǒ lǒkho sîjû nî̌꤮, bè̌cǒbè̌tè̤ lǒkho sò̌phlǒ dě asî khû̌ nî̌꤮, kè̌dû̌kè̌pî̌tî̌ pûma̤ kò ma̤ nî̌꤮, ma̤tè̤hî̌dě sî sî̌ya ta sî Běcǎ ǒ dě mǒkhû̌ hǒ.

Ta̤sû̌ǐtòwòǐ toǒ

² Kwisaba sapwa̤ lǒkho Cǒmara dě gènè̤ kwisabahtò̌ yǎ nî̌꤮. Ǒsòklò lǒkho, dě ǒ lǒkho ta ta̤hî̌bwǐhî̌sîrîhtò̌ a nî̌꤮.

³ Dě wǐkhamî̌ kòyò toǒ sî̌ya Khrî̌stu awi̤akè̌ tò̤. Cǒmara bè̌hǔ Khrî̌stu awi̤akè̌htǒo. Pwǎ̤tadě khònò̤ ta̤bè̌hǔ htǒonu a ǒlṳhtò̌ hǒ. Ma̤pûhǐ Cǒmara bòmo bǎ paklè̌ dě pa dǒhtû̌ǐ nṳbǎ kò ta Khrî̌stu awi̤akè̌ htǒonu, kwisabadǒ bǎ lǒkho paya nî̌꤮. Dě꤮ wǐkhamî̌ ta̤dǒhǔ htǒonu, a ǒlṳhtò̌ hǒtò̤, pwǎ̤tadě khònò̤htǒo a ǒlṳhtò̌ hǒ. Dě he dǒhtû̌ǐ kò ta Khrî̌stu awi̤akè̌ akhû̌akhî, kò dǒlò̤te̤pwǎ he dě apo̤kû.

⁴ Pwǐ he to dǒhtû̌ǐ bǎ kònu, ma̤pûhǐ he dǒhtû̌ǐ phlophǎ bǎ kò ayanu dě, kwisabadǒ lǒkho heya nî̌꤮.

⁵ Gènè̤ lîmò lǒkho dě jîsarawǒ sîna̤ ta kòyò htě a yṳǎ Khrî̌stu hǒtò̤ toǒ alo̤mo̤ nî̌꤮. Bò̌khòtè꤮ bǎbǎ, bǎ sî nî̤bǎ akhîakhawǒ dě sî glè ma̤ ta̤wǒ akhanu, tûrû̌ ma̤wǒ lǒkho pṳ̂̌꤮ taplǎ nî̌꤮.

⁶ Ma̤pûhǐ sî sî̌yakû̌ lǒkho ta sî to hî̌shǔgejò bǎ kò pṳ̂̌꤮ tapwa̤ hî̌tèhî̌tè ayanu, hî̌bǎbî̌hî̌bǎyṳ, hî̌bǎ cǐnṳ lǒkho kò sò̌phlǒ nî̌꤮.

Ta̤hî̌mo̤hî̌wǒ gutṳ̌lò̤

⁷ Tǔkǐkǔ pwe̤ǐbò bǎ sî ta hewi̤hekè̌ pě. A mî̌ pṳwè̤ htě kò mo̤ǐ nû̌û tapwa̤, htohǒtò̤ a mî̌ kòyò tapwa̤ htě acǒatè̤ ta Cǒmara ata̤ma̤, a ma̤ Běcǎ ata̤ma̤ dě a ma̤ kû̌dǒ ta̤ ta pa tapwa̤.

⁸ Ma̤pûhǐ a pwe̤ǐlṳ bǎ sî ta pawi̤pakè̌ lǒ̤꤮ bò, htohǒtò̤ ma̤pûhǐ a ǐkhû̌ǐǎ ma̤mo̤ sî sò̌phlǒ ayanu, he sûlò̤ yǎ dě sî ǒ hǒ.

⁹ Ò̌nesimǔ hèlò̤ kû̌dǒ ta a pě. A mî̌ kòyò htě acǒatè̤ ta ayo̤ dě kò mo̤ǐ nû̌û tapwa̤. A mî̌ sî dokûphû̌ tû̌ pwǎ. Asî pwe̤ǐbò sî ta ta̤htûhtò̌ lǒ̤꤮ bò ana̤ bǎonu toǒ pě.

¹⁰ Arǐtakǔ htě kò dǒlò̤te̤ kû̌dǒ yǎta he htǒotapwa̤ sûhèdǒ bǎ sî ata̤hî̌mo̤hî̌wǒ, htodě Banabǎ sapṳbû Mǎ̤riko sûhèdǒ bǎ sî ata̤hî̌mo̤hî̌wǒ dě sî ǒǒ. (Sî nî̤bǎhto lî̤ dě kò khwè̌lṳ bǎ sî ta Mǎ̤riko awi̤akè̌ htǒonuhǒ. A dè hèto̤ dě sî ǒ pě dě kaǎshǔwǒ yǎ nî̌꤮.)

¹¹ Ye̤shǔ htě kò kaǎ yǎta Justus htǒotapwa̤ sûlò̤dǒ a ta̤hî̌mo̤hî̌wǒ dě sî ǒǒ. Yṳ̌daphû̌ htě a yṳǎ Khrî̌stu toǒ aklanu, pwa̤ htě a ma̤plǒkû̌ he ta Cǒmara ashiaga ayanu mî̌ a ǒpwǎ sò̌su pwǎ. Asî mî̌ a ma̤mo̤ mè̤mè̤̌ he sò̌phlǒ.

¹² Ěpaphra mî̌ sî dokûphû̌ tapwa̤pwa̤. A mî̌ a htû Khrî̌stu ajû tapwa̤. A hî̌mo̤hî̌wǒ hènṳ sî. A sò̌phlosho dě a kwisaba sala̤ bǎ sîya hǒ. Ma̤pûhǐ sî ǒměǒgle dě sî ta̤yṳta̤nǎ akû dě sî dû̌htò̌bò̌ lǒkho sû̌sò̌ tokho, htohǒtò̤ ma̤pûhǐ sî yṳǎ sî̌yahè te̤mǎpo̤ Cǒmara a ta̤sò̌yṳ pṳ̂̌꤮ tacǎ ayanudě, a kwisabadǒ sîya.

¹³ He khò hesò̌ ta aya dě a mî̌ kòyò tapwa̤ htě a jipwi̤ mè̤mè̤̌ sîya ta Lò̌dikiwî̤phû̌ toǒ aya ta Herapolǐwi̤phû̌ toǒ aya hǒ.

¹⁴ Ta̤khû̌saradû̌ Lǔka htě pa mo̤ǐ yǎ htǒotapwa̤ ta Demǎ htǒo, sûlò̤dǒ a ta̤hî̌mo̤hî̌wǒ dě sî ǒǒ.

¹⁵ Khòsò̌do sûcû̌bǎ pa ta̤hî̌mo̤hî̌wǒ htǒonu dě pa pṳwè̤ Lò̌dikiwî̤phû̌ toǒ ta pa pṳwè̤ Nuphǎ ta pwa̤yṳǎta̤ aprṳ̂ahophû̌ ǒ dě nû̌ûhǐkûnu toǒ nî̌꤮.

¹⁶ Htû̌꤮ sî Kòlò̌shiaphû̌ pwa̤yṳǎta̤ aprṳ̂ahophû̌ toǒ dǒhto palî̤htǒo pěnu, ǐ pa̤kû̌ Lò̌diki pwa̤yṳǎta̤ aprṳ̂ahophû̌nu toǒ pě nî̌꤮. Htodě dǒkû̌ lǒkho helî̤ htě he sûlò̤ bǎ asî htǒonu pě nî̌꤮.

¹⁷ Pwe̤ǐdǒ Akǐpǔ ta, “Ta̤phî̌ta̤ma̤ htě Běcǎ ǐlò̤ na htǒonu, ma̤htokè yǎ,” hî̌ a hǐnu nî̌꤮.

¹⁸ He mî̌ Pò̌lu dě ta̤hî̌mo̤hî̌wǒ htǒonumî̌, he khwè̌cû̌bǎtû̌ sî ta he cǔde pwǎ. He ǒ dě a po̤kûhtǒo akhû̌akhî, shope̤ǐ pûma̤ he ma̤ nî̌꤮. Cǒmara abwǐasîrî ǒkû̌ tû̌ta sî nî̌꤮.