Kòlòtè̌ 3 - Kawyaw RC

Ta̤ǒhtûpwa̤ ali̤ ta asa

¹ Pwǐ Cǒmara ma̤htûpwa̤ge Khrî̌stu ta ta̤sinu, Cǒmara ma̤ htûpwa̤gesǒ sî ta ta̤si dě a ǐ sî ta̤htûpwa̤ asa htǒonu ta Khrî̌stu hǒ. Hǐnudě sî sò̌phlǒ a ta̤sò̌yṳ lǒ̤꤮ bò toǒnu, bè̌ǒ lǒkho yǎdě mǒkhû̌ bǎ Khrî̌stu la̤hǎnòò̌ ǐ agûla̤ Cǒmara acǔdemûnu tokho nî̌꤮.

² Gènè̤ lǒkho mǒkhû̌ a ta̤le̤dû̌pwî̤htû nî̌꤮. Hǎkhû̌ ata̤kî̌ta̤kû̌ toǒnu, gènè̤ lǒkho pûma̤.

³ Ma̤tè̤hî̌dě, sî sikû̌hto ta Khrî̌stu dě khònò̤htǒo sî nî̤bǎkû̌ ta̤htûpwa̤ asa ta Khrî̌stu hǒ. Htohǒtò̤ sî htûhtò̌ kû̌ta Cǒmara tacǎnǔ꤮ pa hǒ. Kòyò toǒnu a sî̌yaphlo kû̌kò ta̤htûpwa̤ asahtǒo hǒtò̤.

⁴ Khrî̌stu mî̌ pwa̤ htě a ǐ sî ta̤htûpwa̤ tapwa̤ dě htû̌꤮ a hèlò̤ gesǒ pěnu, a ǒ ta a sîrîdû̌sîrîhtû pě. Bǎnu akhapěnu, sî ǒlṳhtò̌ kû̌dǒ ta a sîrîdû̌sîrîhtû htǒonu pě.

⁵ Hǐnu akhû̌akhî, wîkè sî ta̤ǒhtûpwa̤ li̤ a ta̤sò̌yṳ, ta̤cû̌sǔnṳ mamǔmakhû, ta̤ǒhtûpwa̤ htě a mṳ̂plî tò̤ toǒ, sò̌phlǒ putupatǎ, ta̤sò̌yṳ phû̌mò̤shî̌hto, ta sò̌yṳ nî̤bǎ dû̌htò̌po̤ ta̤dû̌yò̤htò̌sa toǒ. Ta̤sò̌yṳnî̤bǎ dû̌htò̌po̤ ta̤dû̌yò̤htò̌sa mî̌ asǒsǒta saba pwa̤yo̤ hǒ.

⁶ Kòyò htě a ma̤ phû̌mò̤shî̌hto ta̤hǐnu toǒnu, a shěto̤bǎ ta Cǒmara a ta̤sò̌dû̌ pě.

⁷ Taplǎkhanu, sî ǒhtûpwa̤ sǔhtobò pwǐ sî sò̌phlǒ a ta̤sò̌yṳ nosînu toǒ hǒ.

⁸ Pwǎ̤ta khònò̤htǒo wîkè ta̤sò̌dû̌, ta̤sò̌phlǒhtò̌, ta̤sò̌khě, ta̤hî̌pi̤ kòmi̤, htodě ta̤hî̌bǎ phû̌mò̤ htě a gwa hî̌tò̤ toǒnu.

⁹ Hî̌bǎ lòhǎlòhope pûma̤ nû̌û tapwa̤ ta tapwa̤ ma̤, ma̤tè̤hî̌dě sî wîkè sî ta̤ǒhtûpwa̤ ali̤ htě sî la̤klo ma̤nu toǒhǒ.

¹⁰ Sî kûsǒhtò̌ ta̤ǒhtûpwa̤ asa htě Cǒmara bǒtèplè̌sa htǒonu hǒ. Ma̤pûhǐ sî sî̌ya te̤mǎwǒ pûnu, Cǒmara ma̤htûhtò̌ sǒsǒhè sî ta ana̤ hǒ.

¹¹ Dě ta̤ǒhtûpwa̤ asakûnu, Yṳ̌daphû̌ toǒ ta Yṳ̌daphû̌ mè̤tò̤ toǒnu bǎbǎ, kòyò dǔtṳphě ta dǔtṳphětò̤ toǒnu bǎbǎ, shigahǔwa̤phû̌ toǒ bǎbǎ, kòyò mi̤ toǒ bǎbǎ, jûphû̌ ta kòyò pelephû̌ toǒnu bǎbǎ, pa tobǎ gènè̤pe ta a khǒnû̌û dî̌kî̌꤮ tò̤. Kòyò htě a yṳǎ Khrî̌stu pṳ̂̌꤮ tapwa̤nu, Khrî̌stu ǒhtûpwa̤ nû̌ûkû hǒ. Hǐnu akhû̌akhî, Khrî̌stu mî̌ ta̤ htě a lo̤bǎdû̌khlo kònu hǒ.

¹² Sî mî̌ Cǒmara akòyò htě a mṳ̂plî dě a mo̤ǐ sînu toǒ, dě a wû̌lǎ sî hǒ. Hǐnudě kûsǒhtò̌ lǒkho ta̤sò̌yṳgwèbǎǐ, ta̤ma̤wǒta̤, ta̤shò̌lò̤ sò̌phlǒ, ta̤sò̌dohobî̌ ta ta̤khòsò̌do sînu toǒ nî̌꤮.

¹³ Khòsò̌do ǐ kòyò htě a ma̤jî na sò̌phlǒnu toǒ nî̌꤮. Kòyò tapwa̤pwa̤ dè ma̤sǔ na hî̌dě bòlû̌kè ata̤sǔ nî̌꤮. Bòlû̌ kè̌khînû̌û ta̤sǔ tapwa̤ ta tapwa̤ pwǐ Běcǎ bòlû̌kè sî ta̤sǔ htǒonu nî̌꤮.

¹⁴ Dě ta̤lǒ̤꤮ bò htǒotoǒ aklanu, ta̤ htě a lo̤dû̌khlo kò tacǎmî̌, mo̤ǐ kè̌khînû̌û tapwa̤ ta tapwa̤ htǒonuhǒ. Sî dè ma̤mò̌hǐnu mî̌, sî ǒhtuǒplǒ wo̤wǒ̤nû̌û ta ta̤tacǎ꤮ pa akû hǒ.

¹⁵ Bò꤮ sîhtǒo toǒ numî̌ sî htûbò Khrî̌stu ana̤klû dě Cǒmara wû̌lǎ sî ta sî mo̤klaǐ kè̌khînû̌û tapwa̤ ta tapwa̤ hǒ. Ma̤hǐnudě nopǒǐ sî sò̌phlǒ ta Khrî̌stu a ta̤pè̤ta̤dû, dě hî̌bwǐhî̌sîrî lǒkho Cǒmara nî̌꤮.

¹⁶ No ǒměǒgle lǒbe Khrî̌stu ale̤ayo̤ dě sî sò̌phlǒkû nî̌꤮. Sî sû̌ǐtòwòǐ kè̌khînû̌û tapwa̤ ta tapwa̤, dě sî ǐsè̌rè̌ kè̌khînû̌û tapwa̤ ta tapwa̤ pwî̌ ta̤sî̌jò ǒ ta sînu nî̌꤮. Sò̌po̤htû̌sò̌ǐ lǒkho Cǒmara ta sî ta̤hî̌bwǐhî̌sîrî nû̌û dě sî sò̌phlǒkû nî̌꤮. Sò̌po̤htû̌sò̌ǐ lǒkho Cǒmara ta alî̤sò̌po̤nu toǒ lǒ̤꤮ bò nî̌꤮.

¹⁷ Sî hî̌bǎ bǎbǎ, sî ma̤ta̤ hî̌tètè̌꤮ bǎbǎ, kè̌ Běcǎ Ye̤shǔkhrî̌stu ami̤sǎ dě ma̤ lǒkho nî̌꤮. Běcǎ Ye̤shǔkhrî̌stu akhû̌akhî, hî̌bwǐhî̌sîrî htû̌sò̌ǐ lǒkho Cǒmara nî̌꤮.

Pò̌lu yṳ̂klè̌nè̌klò hǐphû̌phòphû̌ toǒ

¹⁸ Ma toǒ꤮ jûle̤phî̌yo̤ sîwṳ̂ ayo̤, ma̤tè̤hî̌dě sî mî̌ pwa̤yṳǎphû̌ toǒ akhû̌akhî, sî to ma̤ lǒkho hǐnu.

¹⁹ Wṳ̂ toǒ꤮ mo̤ǐ lǒkho sîma dě sǎhtǎdû̌da, ma̤pò̤ma̤sha pûma̤ asî ma̤.

²⁰ Phû̌ sî꤮ gana̤de lǒkho mo̤pha ayo̤ dě ta̤pṳ̂̌꤮ tacǎ akû nî̌꤮, ma̤tè̤hî̌dě, gana̤de mo̤phayo̤ mî̌ atoabǎ ta Běcǎ asò̌phlǒ.

²¹ Pha sî꤮ ma̤sha pûma̤ sîphû̌sîli̤ asò̌phlǒ ma̤ nî̌꤮, ma̤tè̤hî̌dě htû̌pěmî̌ asî sò̌phlǒpî̌ hè̌.

²² Jû sî꤮ gana̤de lǒkho sîběcǎ toǒ ayo̤ dě ta̤lǒ̤꤮ bò akû nî̌꤮. Sî sò̌yṳ nî̤bǎ a ta̤htû̌sò̌ǐ sî dě sî ma̤wǒ lǒkho pwǎpǒ̤ a lo̤mo̤ pwǎ. Ma̤ lǒkho pûma̤ hǐnu ma̤ nî̌꤮. Ma̤wǒ lǒkho pṳ̂̌꤮ taplǎ ta ta̤sò̌phlǒcǒ sò̌phlǒtè̤ akû nî̌꤮. Ma̤tè̤hî̌dě sî bè̌dubè̌na̤ lǒkho Cǒmara akhû̌akhî, tûrû̌ ma̤wǒ lǒkho nî̌꤮.

²³ Sî ma̤ ta̤hî̌tètè̌꤮ bǎbǎ, bè̌ lǒkho sî sò̌phlǒ pwǐ sî ma̤ Běcǎ ata̤ma̤nu, dě ma̤ sapwa̤ lǒkho. Gènè̤ lǒkho pûma̤ pwǐ sî ma̤ bǎ kòyòhǎkhû̌phû̌ ata̤ma̤nu ma̤ nî̌꤮.

²⁴ Ma̤wǒ lǒkho sî ta̤ma̤ nî̌꤮, ma̤tè̤hî̌dě sî sî̌ya ta Běcǎ ǐ sî û̌cata̤bî̌ pwǐ sî ma̤nu pě. Běcǎ htě sî ma̤ bǎ yǎ htǒotapwa̤ numî̌ Běcǎ Khrî̌stu htǒonuhǒ.

²⁵ Cǒmara cèrò kòyò htě a ma̤sǔta̤nu toǒ pě. Cǒmara cèrò ta̤nu a kè̌dû̌ kè̌pî̌tî̌ tò̤.