Kòlòtè̌ 2 - Kawyaw RC

¹ He sò̌yṳ ǐsî̌ya sî ta he jipwi̤ ma̤ lǒ̤sû̌lǒ̤sò̌ bǎ mè̤mè̤̌ sîya, ta kòyò ǒ dě Lò̌dikiwî̤kûnu toǒ aya, ta kòyò htě a sî̌ya kè̌shǐnǒ he hǒtò̤nu toǒ aya hǐnu pwǎ.

² Ma̤pûhǐ he ǐkhû̌ǐǎ asî dě he ma̤pwǎ hè̌o. Ma̤pûhǐ asî sò̌phlǒ ǒhtu nû̌û tapwa̤ ta tapwa̤ dě ta̤mo̤ǐ akû, htohǒtò̤ ma̤pûhǐ asî nî̤bǎ mṳ̂tî̤glî te̤mǎbò ta̤sî̌ya, hǐnudě asî sî̌yaphlohè Cǒmara ata̤bè̌ǒhǔ Khrî̌stu htǒonu dě he jipwi̤ ma̤ lǒ̤sû̌lǒ̤sò̌pwǎ hǐnu.

³ Ta̤sî̌ta̤jò ta ta̤sî̌khû̌sî̌ya lǒ̤꤮ bò mî̌ ta̤howi̤ le̤dû̌pwî̤htû htǒonu, a ǒhǔ dě Khrî̌stu akû.

⁴ Ma̤pûhǐ kò lǒǎplò̤ǎ cû̌ pû sî ta kò ta̤sû̌ta̤tòwò htě asǔ toǒ tò̤nu, he hî̌pwǎ sî pwǐhè̌onu. Ta̤sû̌ta̤tòwò htǒotoǒnu, alò̤ta ato bǎbǎ, yṳǎ pûma̤ nî̌꤮.

⁵ Ma̤tè̤hî̌dě, he na̤klû ǒplǒ ta sî tò̤ pò̤̌ta he sò̌phlǒ tǒhtu ta sî dě he gana̤de sî ǒnû̌û ta sò̌phlǒ tamapa, htohǒtò̤ sî pṳ̂gleměǐ ta̤yṳta̤nǎ dě Khrî̌stu akû akhû̌akhî, he sò̌le̤sò̌lò̤ mè̤mè̤̌.

⁶ Sî yṳǎhto Ye̤shǔkhrî̌stu pwǐ sî Běcǎ tapwa̤nu, ǒhtûpwa̤ sělě lǒkho pwǐ Běcǎ sò̌yṳ noǒhtûpwa̤ sînu.

⁷ Shǒlò̤ yo̤yo̤ lǒkho sî ta̤yṳ dě Ye̤shǔkhrî̌stu akû pwǐ sǒkhò̌wi̤ shǒlò̤yo̤nu. Dû̌htò̌ lǒkho dě Ye̤shǔkhrî̌stu akû nî̌꤮. Sî yṳǎ htǒonu sǔ a bǎ shû̌shohè sělě pwǐ kò sû̌ǐhto sînu, Cǒmara ma̤hto lǒ̤꤮ bò bǎ sî toǒnu, htû̌sò̌ǐ hî̌bwǐhî̌sîrîhtò̌ lǒkho yǎ nî̌꤮.

⁸ Ǒsè̌rè̌ lǒkho sîna̤ nî̌꤮. Nolǒǎplò̤ǎ pûma̤ sîna̤ ta kòyò htě a sû̌ǐtòwòǐsǔ ta̤nu toǒ dǐpwǎ̤꤮ ma̤ nî̌꤮. Ta̤hǐnu toǒ mî̌ a nòdû̌ pwǎ. Ta̤sû̌ta̤tòwò hǐnu toǒmî̌ mî̌pwǎ kòyòhǎkhû̌phû̌ ala̤klo ǐlò̤ tṳtṳ kè̌khînû̌û tuhtu hto tuhtunu toǒ pwǎ. Dě hǐnu toǒ mî̌ a hè dě khînǎkhîno phû̌mò̤ htě a pǒǐ hǎkhû̌teběnu toǒ a ǒ pwǎ. Ta̤sû̌ǐ hǐnu toǒmî̌ a hè dě Ye̤shǔkhrî̌stu a ǒ mè̤tò̤.

⁹ Ma̤tè̤hî̌dě Ye̤shǔkhrî̌stu hè sûlû ana̤ pwǐ kòyònu, pwǎ̤ta a lǒbebò ta Cǒmara ala̤klo lǒ̤꤮ bò toǒ.

¹⁰ Dě sî ta Khrî̌stu htû nû̌û tacǎnǔ꤮ pa akhû̌akhî, sû̌sò̌ tokho ata̤lo̤bǎ lǒ̤꤮ bò toǒnu, sî nî̤bǎ lǒbehtobò hǒ. Khrî̌stu mî̌ bò꤮ khînǎkhîno a ta̤shû̌ta̤sho toǒ ta hǎkhû̌ a ta̤sîrîshû̌sho toǒ ahǐkǒ hǒ.

¹¹ Sî ǒ dě Khrî̌stu akû akhû̌akhî, alò̤ta sî dǔtṳphě hǒ. Ta̤dǔtṳphě htǒonu kòyò dǔ sî mè̤tò̤. Bǎ Khrî̌stu phî̌htò̌kè sî sò̌phlǒ a ta̤sò̌yṳ phû̌mò̤shî̌hto toǒ akhanu, a dǔtṳ sîphě hǒ.

¹² Bǎ sî plo sîna̤ ta shi akha, sî la̤klo phû̌mò̤ toǒnu, sî lǔlò̤hto kû̌ yǎta Khrî̌stu hǒ. Dě sî la̤klowî̤ toǒnu, Cǒmara ma̤htûpwa̤gesǒ ta Khrî̌stu hǒ. Dě sî yṳǎ Cǒmara a ta̤po̤ta̤phǎ dě a ma̤ htûpwa̤gesǒ Khrî̌stu ta ta̤si htǒo akhû̌akhî, a htûhtò̌htobò hǐnu hǒ.

¹³ Bǎ sî yṳǎ Ye̤shǔkhrî̌stu hǒtò̤ akhanu, sî ta̤sǔ akhû̌akhî, sî sǒsǒta kòyò htě a si sû̌sò̌nu toǒ hǒ. Htohǒtò̤ sî lû̌htò̌bò̌ ta sî la̤klo ma̤ta̤sǔ a po̤phǎshû̌sho htǒonu tò̤. Pwǎ̤ta khònò̤htǒo Cǒmara ma̤ htûpwa̤kû̌sǒ sî ta Khrî̌stunu hǒ. Cǒmara bòlû̌bò pa ta̤sǔ lǒ̤꤮ bò hǒ.

¹⁴ A htǔpi̤kèbò ta̤khwè̌mǎnǎ htě a glè cèrò panu toǒ hǒ. Bǎ kò htǎwa̤si Khrî̌stu dě nò̌dòhtǔlo̤ akhanu, Cǒmara htěhtò̌yè̌mǔhtokèbò ta̤khwè̌mǎnǎnu toǒ hǒ.

¹⁵ Bǎ Ye̤shǔ si dě nò̌dòhtǔlo̤ akhanu, khînǎkhîno htě a ǒ ta a ta̤shû̌ta̤sho lǒ̤꤮ bò toǒnu, Cǒmara pṳ̂sigwikèbò asî ata̤shû̌ta̤shonu toǒ dě a dǔlṳhtò̌ bǎ kòyò pṳ̂̌꤮ tapwa̤ ta a ma̤pè̤kè asî hǒ.

¹⁶ Hǐnudě, kòyò htě a bè̌ sî ta̤sǔ ta sî ta̤ǎta̤o awi̤akè̌ toǒnu, gana̤de pûma̤ asîyo̤ ma̤ nî̌꤮. Pṳ̂̌něně꤮ sî dè ma̤pwèma̤lṳ̂ bǎ asî mṳni̤ cahtǐ tò̤, labe dě sî dè ma̤pwèma̤lûdǒ bǎ asî tò̤ hî̌nu, asî sò̌yṳ bè̌ sî ta̤sǔ. Pwǎ̤tadě gana̤de pûma̤ asî ayo̤ ma̤ nî̌꤮.

¹⁷ Ma̤tè̤hî̌dě, bǎ꤮ nukhanu, Cǒmara ǐlò̤ ta̤sû̌ta̤tòwò, ta̤ma̤pwèma̤lû htǒotoǒ ta ta̤ lǒ̤꤮ bò htǒotoǒ numî̌, asǒsǒta ta̤yo̤ǔ htě a dǔlṳ ta ta̤ glè̌ htûhtò̌ dě alo̤mo̤ hî̌tè pěnu pwǎ. Asana̤ mè̤mè̤̌ mî̌ Khrî̌stu pwǎ.

¹⁸ Kòyò htě a nosho sî ta sî bǎ shò̌lò̤ sî sò̌phlǒ dě a nosabahtò̌ sî ta mǒkhû̌tanaphû̌ toǒ pwǐ asî sabahtò̌ htǒo toǒnu, gûma̤kû̌ pûma̤ asî ma̤ nî̌꤮. Sî dè gûkû̌ asî ata̤sû̌ǐtòwòǐ toǒ hî̌numî̌, ta̤ma̤khû̌kǎ htě Cǒmara olò̤hto sî ta a ǐ sînu toǒ pěnu, sî nî̤bǎpe tò̤. Kòyò hǐnu toǒ mî̌ a hî̌ lǒkho ana̤ ta pa kè̌shǐ ta̤kè̌shǐlṳnǎ dě Cǒmara a ǒ akhû̌akhî, pa nî̤bǎ khǒtû̌ ta̤sî̌khû̌sî̌ya dě Cǒmara a ǒ, a hî̌ lǒkho hǐnu. Asî phî̌htò̌yî̤ mè̤mè̤̌ a ta̤gènè̤ htǒotoǒ ta a ta̤hî̌lǒhî̌khlo htǒotoǒ.

¹⁹ Kòyònu toǒ mî̌ a pṳ̂měpṳ̂glepe Khrî̌stu tò̤ hǒ. Khrî̌stu mî̌ asǒsǒta hǐkǒ dě kòyò lǒ̤꤮ bò htě a yṳǎ nû̌û toǒ numî̌ a htû nû̌û na̤klû. Hǐkǒ htǒonu a ǐkhû̌ǐǎ na̤klû dě a nopǒhtu me̤ ta wi̤htû̌ glè pṳ̂mě tǒhtu plǒnû̌û na̤klû dě a na̤klû htǒonu a dû̌htò̌ pwǐ Cǒmara nodû̌htò̌ nû̌ûnu pwǎ.

Si kû̌ ta Khrî̌stu, htûpwa̤ kû̌ ta Khrî̌stu

²⁰ Sî si kû̌ta Ye̤shǔkhrî̌stu htě a ma̤lû̌htò̌ge sî ta khînǎkhîno htě a pǒǐ hǎkhû̌tebě htǒotoǒ a cǔdekû hǒ. Sî cû̌ ǒhtûpwa̤pe lǒkho pwǐ kòyò htě a sǒsǒta hǎkhû̌phû̌ htǒotoǒnu hî̌tè? Dě sî cû̌ gana̤de gûma̤kû̌pe ta̤dǔta̤wî̤ toǒ ma̤tè?

²¹ Ta̤sû̌ta̤tòwò ta ta̤dǔta̤wî̤ htǒotoǒ hî̌ ta, “Htǒotacǎnu pṳ̂kè̌ pûma̤ yǎ ma̤,” “Děnu tacǎ dě lî̌kè̌ pûma̤ yǎ ma̤,” “Děnu tacǎ lè̌dě tè̌bǎ pûma̤ yǎ ma̤.”

²² Htǒotoǒ numî̌ a sû̌ǐtòwòǐ pwǎ ta̤htě a ǒlṳ teděsǎphû̌nu toǒ pwǎ. Pa noǎhto yǎ dě pa bǎ wîkèsǒpwǎ yǎ. Ta̤mǎlò̤ ta ta̤sû̌ǐtòwòǐ htǒotoǒ numî̌ kòyò ǐ htûhtò̌pwǎ yǎ.

²³ Dě ta̤sû̌ta̤tòwò htǒo akhû̌akhî, kòyò toǒǒnu a jî sabanòdû̌ pwǎ lǒkho Cǒmara, a jî shò̌lò̤ nòdû̌pwǎ lǒkho asò̌phlǒ dě a ma̤jîma̤jûlò̤ lǒkho ana̤. Ta̤sû̌ta̤tòwò htǒotoǒnu a lò̤kèta a ǒ mè̤mè̤̌ ta ta̤sî̌ta̤jò pwǎ̤ta amè̤ nǒtò̤. Ma̤pûhǐ kò khòbò̌ kòsò̌phlǒ a ta̤sò̌yṳ phû̌mò̤ toǒ ayanu, ta̤sû̌ta̤tòwò htǒotoǒ ma̤jèbò̌ kò tò̤.