Kòlòtè̌ 1 - Kawyaw RC

¹ He mî̌ Pò̌lu, he ta pa pṳwè̤ Khrî̌stuphû̌ Timò̤̌te khwè̌ bǎ sî lî̤ htǒotabǎ. Cǒmara sò̌phlǒǒ he ta he glè htûhtò̌ Ye̤shǔkhrî̌stu a pwa̤nophû̌ tapwa̤.

² He khwè̌ cû̌nṳ bǎ pa pṳwè̤ Khrî̌stuphû̌ htě a cahtǐ dě acǒtè̤ ta ayo̤ dě a ǒ lǒkho Kòlò̌shiawî̤kûnu toǒ a ǒ. Papha Cǒmara abwǐasîrî ta a ta̤pè̤ta̤dû ǒkû̌ tû̌ta sî nî̌꤮.

Ta̤hî̌bwǐhî̌sîrî ta ta̤kwisaba

³ Bǎ pa kwisaba sîya akhanu, pa hî̌bwǐhî̌sîrî pa Běcǎ Ye̤shǔkhrî̌stu apha Cǒmara pṳ̂̌꤮ taplǎ.

⁴ Ma̤tè̤ pa hî̌bwǐhî̌sîrî hî̌numî̌, sî yṳǎ Ye̤shǔkhrî̌stu dě sî mo̤ǐ Cǒmara akòyò cahtǐ lǒ̤꤮ bò toǒnumî̌, pa gana̤dehtobò hǒ.

⁵ Bǎ sî gana̤de sakhû̌lû̌ ta̤sò̌le̤sò̌lò̤ awi̤akè̌ htě atoamè̤ htǒo akhanu, sî gana̤dehto tû̌ ta̤kè̌shuǐ htě ta̤sò̌le̤sò̌lò̤ awi̤akè̌ ǐ sî htǒonu hǒ. Dě ta̤kè̌shuǐ htǒo akhû̌akhî, sî yṳǎ Cǒmara, htodě sî mo̤ǐ kòhǔwa̤. Cǒmara bè̌htubè̌plǒ bǎ sî ta̤kè̌shuǐ htǒonu dě mǒkhû̌ hǒ.

⁶ Ta̤sò̌le̤sò̌lò̤ awi̤akè̌ htǒo a phî̌hènṳ ta̤howi̤ dě a lṳpîshîcû̌bò hǎkhû̌tebě hǒ. A lṳpîshîcû̌ dě a phî̌hènṳ ta̤howi̤ sǒsǒta a phî̌hènṳ bǎ sî ta sî gana̤de dě sî sî̌yaphlohè ta̤te̤ta̤mǎ numî̌ Cǒmara abwǐasîrî awi̤akè̌ htǒonu hǒ.

⁷ Ěpaphra mî̌ kòyò htě a dǒhtû̌ǐlṳ wǐgutṳ̌ bǎ sî ta Cǒmara a ta̤bwǐta̤sîrî tapwa̤ hǒ. A mî̌ Ye̤shǔkhrî̌stu apwa̤ma̤ta̤ htě a ma̤kû̌dǒ ta̤ ta pa dě pa mo̤ǐ yǎ tapwa̤. A mî̌ Khrî̌stu apwa̤ma̤ta̤ htě acǒatè̤ ta ayo̤ tapwa̤. Dě a ma̤ hǐnumî̌ a ma̤bǎ pa gûla̤ hǒ.

⁸ A pwe̤ǐlṳ bǎ pa ta Běcǎ sǎcahtǐ htû̌wè̤ sî dě sî glè mo̤ǐ kòyò.

⁹ Hǐnudě, sahtò̌ bǎ pa gana̤de sîwi̤sîkè̌ ti̤ni̤nu, pa bè̌ǒkǔkènǒ pa ta̤kwisaba ta sîya dǐkhò̌꤮ tò̤. Pa kwisaba Cǒmara htě a glè ǐlò̤ lǒbebò sî ta̤sî̌ta̤jò sû̌sò̌ tokho ta ta̤sî̌khû̌sî̌ya sû̌sò̌ tokho htǒotoǒ akhû̌akhî, pa kwisaba Cǒmara ta a glè ǐsî̌ya lǒbe bǎ sî ta sî ma̤ta̤ pwǐ ato nû̌ûsò̌phlǒnu toǒ.

¹⁰ Ma̤pûhǐ sî ǒhtûpwa̤ kû̌lè̌ ta Běcǎ htodě ma̤pûhǐ sî ma̤mo̤ yǎ sò̌phlǒ ayanu, pa kwisaba Cǒmara hǐnu. Htohǒtò̤ ma̤pûhǐ sî ma̤ta̤wǒ pṳ̂̌tacǎ, dě sî sǎhtò̌wǒ dě sî dû̌htò̌pû ta ta̤sî̌ya Cǒmara akû ayanu, pa kwisabapo̤ bǎ sîya.

¹¹ Ma̤pûhǐ sî sò̌le̤sò̌lò̤ khòjîkhòjûbò̌ khòsò̌dobò̌ ta̤pò̤ta̤sha htǒonu dě, pa kwisaba ta Cǒmara a ta̤po̤ta̤phǎ shû̌sho lǒ̤꤮ bò toǒ ǐkhû̌ǐǎbò tû̌ sî sò̌phlǒ.

¹² Sî hî̌bwǐhî̌sîrî tû̌ pha Cǒmara htě a ǐhtûhtò̌hto sî ta akòyò dě sî glè nî̤bǎdǒ a û̌cata̤bî̌ htǒotoǒnu, ta akòyò cahtǐ toǒ dě ashiaga alîrakha akû htǒonu pě nî̌꤮.

¹³ A ma̤lû̌htò̌ge pa dě khînǎmo̤pha hǐkǒdû̌ a ta̤shû̌ta̤sho htě a pǒǐ ta̤khǐta̤lo̤ htǒotado ala̤ dě a sûnṳ pa dě aphû̌khû htě a mo̤ǐ htǒotapwa̤ ashigakû hǒ.

¹⁴ Dě phû̌khûhtǒo akhû̌akhî, Cǒmara htè̌ge pa, htohǒtò̤ a bòlû̌bò pa ta̤sǔ toǒ.

Khrî̌stu ta ata̤ma̤

¹⁵ Ye̤shǔkhrî̌stu htě pa kè̌shǐjò yǎ htǒotapwa̤nu, a dǔlṳ te̤mǎ pa ta Cǒmara htě pa kè̌shǐjò yǎtò̤ htǒotapwa̤ hǒ. A mî̌ Cǒmara aphû̌khû wè̤pwa̤ htě apo̤aphǎ, ashû̌asho a dû̌htûkhlo ta ta̤bǒlò̤ pṳ̂̌꤮ tacǎ tapwa̤.

¹⁶ Ma̤tè̤hî̌dě, ta̤ lǒ̤bò htě a ǒ dě mǒkhû̌nu toǒ bǎbǎ, dě hǎkhû̌ toǒ bǎbǎ, ta̤ htě pa kè̌shǐjò yǎ toǒ ta pa kè̌shǐjò yǎtò̤ toǒ bǎbǎ, kòyò htě a ǒ ta a ta̤po̤ta̤phǎ toǒ bǎbǎ, a ǒ ta a ta̤shû̌ta̤sho toǒ bǎbǎ, pwa̤pǒta̤ lǒ̤꤮ bònu toǒ bǎbǎ, Cǒmara nobǒlò̤ tṳtṳ ta Khrî̌stu pwǎ. Htodě ta̤ lǒ̤꤮ bò htǒotoǒnu a bǒlò̤ tû̌ta ana̤ dě a bǒlò̤ ta aya pwǎ.

¹⁷ Khrî̌stu ǒnǎwǐhto ta ta̤ lǒ̤꤮ bò, dě ma̤pûhǐ ta̤htǒotoǒ te̤tote̤bǎ ayanu, a pṳ̂gleměǐ lǒ̤bò.

¹⁸ Kòyò lǒ̤꤮ bò htě a yṳǎ Khrî̌stu toǒnu, Khrî̌stu pǒǐ asî dě a yṳ̂klè̌nè̌klò asî sǒsǒta hǐkǒ yṳ̂klè̌nè̌klò na̤klûnu, dě kòyò htě a yṳǎ nû̌û toǒnu asǒsǒta na̤klû htǒonu hǒ. Htohǒtò̤ a mî̌ a ǐpa̤ pwa̤ htě a yṳǎna̤ǎta̤ toǒ a ta̤htûpwa̤ tapwa̤ hǒ. Htodě ma̤pûhǐ a htûhtò̌ ta̤lǒ̤꤮ bò ahǐkǒ ayanu, Cǒmara ma̤ htûpwa̤ge wǐgutṳ̌ a hǒ.

¹⁹ Ma̤tè̤hî̌dě, Cǒmara ǒ ta a ta̤lǒbe lǒ̤꤮ bò toǒnu, a sò̌yṳ noǒkû̌ dě Khrî̌stu akû.

²⁰ Ta̤ lǒ̤꤮ bò htě a ǒ dě mǒkhû̌nu toǒ bǎbǎ, dě hǎkhû̌htǒonu toǒ bǎbǎ, Cǒmara noma̤klaǐ gebò tṳtṳ nû̌ûta Khrî̌stu hǒ. A nohè khòsi aphû̌khû nò̌dòhtǔ alo̤ dě asǐ bǎ mèlò̤kè paya akhû̌akhî, a ma̤pè̤ma̤dû gebòsǒ ta̤pṳ̂̌꤮ tacǎ hǐnu.

²¹ Dě wǐkha bǎ sî yṳǎ Ye̤shǔkhrî̌stu hǒtò̤ akhanu, sî mî̌ kòyò htě a cû̌ khǒkè ta Cǒmara. Sî ta̤gènè̤ toǒnu a khlè̌khǒ ta Cǒmara, htohǒtò̤ sî ma̤ta̤ toǒnu a phû̌mò̤shî̌hto.

²² Pwǎ̤tadě khònò̤htǒo, Khrî̌stu sana̤ hè khòsi asò̌ akhû̌akhî, Cǒmara ma̤klaǐgesǒ sî ta ana̤klû hǒ. Dě Cǒmara a lo̤mo̤ pěnu, ma̤pûhǐ sî cahtǐ dě sî lû̌pû ta ta̤sǔ, htohǒtò̤ kò ǐjòpe pû ta̤sǔ dě sîlo̤ dǐpwǎ̤꤮ tò̤nu, Cǒmara ma̤klaǐ gesǒ sî hǐnu hǒ.

²³ Ma̤pûhǐ sîmi̤sǎ ǒkû̌ dě Cǒmara a lo̤mo̤nu, tûrû̌ yṳǎ sělěpo̤ lǒkho hǐnu. Yṳǎshû̌ yṳǎsho ta ǒměǒgle lǒkhopû dě sî ta̤yṳ akû nî̌꤮. Bǎ sî gana̤de a ta̤sò̌le̤sò̌lò̤ awi̤akè̌ akhanu, sî nî̤bǎhto ta̤kè̌shuǐ hǒ. Dě sò̌phlǒ nûhtonûlò̤ lǒkho pûma̤ dě sî ta̤kè̌shuǐ htǒo akûnu ma̤ nî̌꤮. Ta̤sò̌le̤sò̌lò̤ awi̤akè̌ htě Cǒmara ma̤wǒ gesǒ kòyò toǒ ta ana̤ htǒonu, kò dǒhtû̌ǐ cû̌ nû̌û dě kòyò pṳ̂̌꤮ tapwa̤ a ǒ, ta dě hǎkhû̌ tebě a ǒ hǒ. He mî̌ Pò̌lu, he dǒhtû̌ǐ ta̤sò̌le̤sò̌lò̤ awi̤akè̌ htǒonu hǒ.

Pò̌lu ma̤ta̤ pwǐ pwa̤ma̤ta̤ tapwa̤ dě pwa̤yṳǎta̤ aprṳ̂aho akû

²⁴ Ma̤pûhǐ sî nî̤bwǐnî̤sîrî ayanu, khònò̤htǒo he khòbǎta̤ ta sîya hǐnumî̌ he sò̌le̤sò̌lò̤ pwǎ. Pwǐ Khrî̌stu khò bǎ kòyò htě a yṳǎ nû̌û dě asǒsǒta ana̤klû toǒnu, he sò̌phlosho dě he na̤klûphěyî̌ htǒo khòbǎdǒbò kòyò lǒ̤꤮ bò htě a yṳǎ nû̌ûnu toǒ ayaya.

²⁵ Ma̤pûhǐ he dǒhtû̌ǐ lǒbe bǎ sî ta Cǒmara a ta̤wi̤ta̤kè̌ ayanu, Cǒmara ǐlò̤ he ta̤phî̌ta̤ma̤ htǒo ta sîyahǒ. Htohǒtò̤ a nohtûhtò̌ he ta bò꤮ pwa̤yṳǎ Khrî̌stunu toǒ apwa̤ma̤ta̤ tapwa̤ hǒ.

²⁶ Kòyò ǒhtûpwa̤ dě awǐtuhtu toǒ lǒ̤꤮ bònu, Cǒmara nogènè̤phlo asî ta ta̤sò̌le̤sò̌lò̤ awi̤akè̌ htǒo hǒtò̤. Ta̤sò̌le̤sò̌lò̤ awi̤akè̌ htǒonu, Cǒmara bǎ bè̌hǔpepwǎ nû̌û, pwǎ̤tadě khònò̤htǒo a dǔlṳhtò̌ bǎ akòyò toǒ a ǒ hǒ.

²⁷ Cǒmara ta̤sò̌yṳǒ dě a glè bè̌lṳhtò̌ bǎ akòyò toǒ ta a ta̤bè̌hǔ htǒotacǎ. A ta̤bè̌hǔ htǒonumî̌ Yṳ̌daphû̌ mè̤tò̤ toǒ aya numî̌ amè̤mè̤. Ta̤bè̌hǔ htǒonumî̌ a le̤dû̌pwî̤htû, asîrîdû̌sîrîhtû mè̤mè̤̌. Ta̤bè̌hǔ htǒonumî̌ Khrî̌stu htě a ǒ dě sîkû htǒonuhǒ, dě amûasǎ mî̌ sî nî̤bǎ Cǒmara a sîrîdû̌sîrîhtû pě, htǒonuhǒ.

²⁸ Ma̤pûhǐ pa sûnṳ kòyò pṳ̂̌꤮ tapwa̤ dě Cǒmara lo̤mo̤ pwǐ kòyò htě a htûhtò̌ Khrî̌stu ta̤tacǎ꤮ pa dě a dû̌pwa̤ te̤mǎ sû̌sò̌ tokho toǒ ayanu, pa dǒhtû̌ǐ bǎ kò pṳ̂̌꤮ tapwa̤ ta Khrî̌stu awi̤akè̌ hǒ. Htohǒtò̤ pa ǐsè̌rè̌ kò pṳ̂̌꤮ tapwa̤, dě pa sû̌ǐtòwòǐ kò pṳ̂̌꤮ tapwa̤ ta ta̤sî̌ta̤jò lǒ̤꤮ bò htǒotoǒ hǒ.

²⁹ Khrî̌stu a ta̤po̤ta̤phǎ htǒo a ma̤shû̌ma̤sho mè̤mè̤̌ dě hekû. He nǎla̤ǐ a ta̤po̤ta̤phǎ shû̌sho htǒo dě he htǒkhû̌htǒǎ ta he goma̤ Cǒmara ata̤ma̤ htǒotoǒ hǒ.