Jowǎ̤ni̤ 9 - Kawyaw RC

Běcǎ Ye̤shǔ ma̤bǎ bǎkè kò makhûmi̤sǎkhǐ amo̤phukû tapwa̤

¹ Bǎ Běcǎ Ye̤shǔ cû̌ dě klè̌lo̤ akha, a kè̌shǐ kòyòmakhû mi̤sǎkhǐ dě a mo̤phukû tapwa̤.

² Akhophijaû̌ toǒ gwè nû̌û, “Sara, kòyòmakhû htǒotapwa̤ cû̌ mi̤sǎkhǐpe dě a amo̤phukû mî̌, ata̤sǔ khû̌khî ya, mè̤tò̤mî̌, amo̤pha ta̤sǔ khû̌khî ya?” Akhophijaû̌ toǒ gwè nû̌û hǐnu.

³ Dě a hî̌shǔ, “A ta̤sǔ mè̤tò̤tò̤, amo̤apha ta̤sǔ mè̤tò̤tò̤. Pwǎ̤tadě ma̤pûhǐ Cǒmara a ta̤po̤ta̤phǎ ǒlṳhtò̌ dě a ta̤ǒhtûpwa̤ akû dě a khǐ pwǎ.

⁴ Bǎ lṳmṳkhǐ hǒtò̤nu, pa bǎ ma̤ bǎ pwa̤htě a nohè he htǒotapwa̤ ata̤ma̤. Lṳmṳkhǐ dě kò ma̤jòpe dǐpwǎ̤꤮ tò̤ akhanu, a hèto̤ pě.

⁵ Bǎ he ǒpe bǎ hǎkhû̌bǎo akhanu, he mî̌ pwa̤htě a ǐ sî̌khû̌sî̌ya kò ta Cǒmara sǒsǒta ta̤lî dǔlṳhtò̌ hǎkhû̌,” A hî̌ asî hǐnu.

⁶ A hî̌hto hǐnu dě, a htû̌phlělò̤te̤ aplěshi hǎkhû̌ dě a ma̤cǎpǎ hǎmǔ ta aplěshi a kî̌wa̤ nû̌û kòyòmakhû htǒotapwa̤ a mi̤sǎphlǒlo̤.

⁷ Dě a hî̌ kòyòmakhû mi̤sǎkhǐ htǒotapwa̤, “Cû̌mò̌, cû̌ upla̤bòkè na mi̤sǎhtǒo dě Shǐlò shikoǒnu nî̌” (Shǐlò amûasǎ mî̌ nocû̌). Htǒotaplǎdě kòyòmakhû htǒotapwa̤ cû̌ upla̤bòhtokè ami̤sǎ, dě a ge akhanu, a mi̤sǎ lîhè.

⁸ Dě ahǐphòkòshî̌ toǒ ta kòyò htě a kè̌shǐ nû̌û kwiǎshǎ toǒnu, a gwè nû̌û tapwa̤ hto tapwa̤, “Kòyòmakhû mi̤sǎkhǐ hǎnòò̌ kwiǎshǎnu tapwa̤ mî̌ ahǒ ya?” A hî̌ lǒkho hǐnu.

⁹ Dě toǒǒnu, a hî̌ lǒkho, “A pwǎnǔ.” Toǒǒ dě a hî̌ lǒkho, “A mè̤tò̤, a lò̤ta a hǐnupwǎ,” kò hî̌ lǒkho hǐnu. Pwǎ̤ta asana̤ nudě, a hî̌ shû̌tuklǔ tû̌ ana̤, “A kwiǎshǎnu tapwa̤ mî̌ henu hǒ,” ahî̌ hǐnu.

¹⁰ “Dě na cû̌ mi̤sǎlî gejòsǒ hî̌tè?” Asî gwè nû̌û hǐnu.

¹¹ “Ye̤shǔnu tapwa̤ ma̤cǎpǎ hǎmǔ dě a kî̌wa̤ he mi̤sǎphlǒlo̤. Dě a nocû̌ upla̤bòkè he dě Shǐlò shikoǒkû. He cû̌ upla̤bòhtokè dě he ge akhanu, a lîhè bǎ he,” a hî̌ bǎ asî hǐnu.

¹² “Khònò̤dě kòyònu tapwa̤ ǒbǎtè?” Asî gwè nû̌û dě, “He sî̌yatò̤,” a hî̌shǔ asî hǐnu.

Pharisè̌phû̌ toǒ gwè kòyòmakhû mi̤sǎlî gesǒnu tapwa̤

¹³ Asî kaǎcû̌ kòyò mi̤sǎkhǐbǎ taplǎnu tapwa̤ dě Pharisè̌phû̌ toǒ a ǒ.

¹⁴ Bǎ Běcǎ Ye̤shǔ ma̤cǎpǎ hǎmǔ dě a ma̤lîge kòyòmakhû mi̤sǎkhǐnu tapwa̤ mî̌ a lò̤te̤to ta mṳni̤dǔnu ti̤ni̤.

¹⁵ Dě Pharisè̌phû̌ toǒ cû̌ gwè lǒkho a ta a cû̌ mi̤sǎlîge hî̌tènu awi̤akè̌. Dě a hî̌ Pharisè̌phû̌ toǒ, “A kî̌wa̤ hǎpèè̌ he mi̤sǎphlǒlo̤ dě bǎ he cû̌ upla̤bòhtokè yǎnu he mi̤sǎlî gesǒ,” a hî̌ hǐnu.

¹⁶ Pharisè̌phû̌ toǒ hî̌, “A mî̌ a ǒ dě Cǒmara a ǒ hè mè̤tò̤, ma̤tè̤hî̌dě a dǔ kû̌kò mṳni̤dǔ tò̤ nǔ꤮.” Pwǎ̤tadě toǒǒnu a hî̌ lǒkho, “Ta̤ma̤sǔphû̌ tapwa̤ cû̌ma̤jò tǒ̤ ta̤cǒklî̌kî̌ya htǒo toǒ hî̌tè?” Hǐnudě asî sò̌phlǒ nûkhǒbò kè̌khînû̌û tṳ̂prṳ̂ ta tṳ̂prṳ̂.

¹⁷ Nǒkòdě asî gwè gesǒ kòyòmakhû mi̤sǎkhǐbǎ taplǎ htǒotapwa̤, “Ama̤lîge nami̤sǎ hǒ, hǐnudě na bǎ hî̌ a ta a mî̌ a htû kòyò hî̌tè tapwa̤ tè?” Dě a hî̌shǔ asî, “A mî̌ pwa̤po̤ tapwa̤,” a hî̌shǔ hǐnu.

¹⁸ A mî̌ mi̤sǎkhǐbǎ htotaplǎ dě khònò̤htǒo a lîgesǒnu, Pharisè̌phû̌ toǒ yṳǎnò nû̌û hǒtò̤tò̤, dě a nocû̌ kaǎlè̌ kò ta amo̤apha.

¹⁹ Dě asî gwè amo̤apha, “Htǒomî̌ sîphû̌ htě sî hî̌ yǎ ta a mi̤sǎkhǐpe dě mo̤phukûnu tapwa̤ ya? Khònò̤dě a cû̌ mi̤sǎlî getîkhîjò hî̌tè?” A gwè amo̤apha hǐnu.

²⁰ “A mî̌ paphû̌ na̤cè̌ kǎlè. A mi̤sǎkhǐ mè̤mè̤̌pe dě mo̤phukû.

²¹ Pwǎ̤tadě khònò̤htǒo, a mi̤sǎ lîgesǒ hî̌tè, mî̌ûpè ma̤lîgesǒ bǎ nû̌û pènu pa sî̌yatò̤. Gwè kè̌tû̌ yǎnu. A dû̌htò̌sî̌ya hǒ. A hî̌shǔlîphlojò tû̌ ana̤hǒ,” asî hî̌shǔ hǐnu.

²² Bǎnukhanu, Yṳ̌daphû̌ hǐkǒdû̌ toǒ sò̌phlǒtobò nû̌û ta, kòyò tapwa̤pwa̤ hî̌ ta Ye̤shǔ mî̌ Mè̤shǐa hî̌numî̌, asî wṳ̂hǎhtò̌kè kòyò htě a hî̌ hǐnu tapwa̤ dě ta̤sabahǐkhlo akhû̌akhî, amo̤apha toǒ ǐsha Yṳ̌daphû̌ hǐkǒdû̌ toǒ ala̤ dě, a hî̌ lǒkho ta pa sî̌ya tò̤, a hî̌ pwǎ hǐnu.

²³ Mî̌tǎ amo̤apha hî̌, “Gwè tû̌ yǎnu, a dû̌htò̌sî̌ya hǒ,” a hî̌ hǐnumî̌ ta̤wi̤ta̤kè̌ htǒo akhû̌akhî hǒ.

²⁴ Pharisè̌phû̌ toǒ kaǎhè gesǒ kòyò mi̤sǎkhǐbǎ htǒotapwa̤ dě asî hî̌ nû̌û, “Olò̤cǒtè̤ dě Cǒmara alo̤mo̤nu, pa sî̌ya ta kòyò ma̤lîge na mi̤sǎnu tapwa̤ mî̌ ta̤ma̤sǔphû̌ pwǎ,” a hî̌ nû̌û hǐnu.

²⁵ Dě a hî̌shǔ asî, “Ta̤ma̤sǔphû̌ mè̤ ya, mî̌ mè̤tò̤ yanu he sî̌ya tò̤. He sî̌ya pwǎpǒ̤ dě awǐkha he mi̤sǎkhǐ, khònò̤dě he mi̤sǎlî htǒonu pwǎ.”

²⁶ Htodě “A ma̤kwè̌ bǎ na hî̌tè? A ma̤lîge bǎ na hî̌tè?” Asî gwè gesǒ nû̌û hǐnu.

²⁷ “He pwe̤ǐhto sî hǒ dě sî gana̤de tò̤. Sî sò̌yṳ gana̤de gesǒ ma̤tè? Sî sò̌yṳ htûgekû̌ akhophijaû̌ ya?” A hî̌shǔ asî hǐnu.

²⁸ Htǒotaplǎdě, asî sò̌phlǒdû̌, hî̌tukutakǎ nû̌û, “Na mî̌ akhophijaû̌. Pa mî̌ Mǒ̤jè akhophijaû̌ tû̌,” a hî̌ nû̌û hǐnu.

²⁹ “Cǒmara hî̌bǎ ta Mǒ̤jè dě꤮ wǐkha numî̌ pa sî̌ya. Pwǎ̤tadě kòyò htǒotapwa̤, a ǒ bǎtèhènu pa sî̌yanǒ dǐkhò̌꤮ tò̤.”

³⁰ Kòyòmakhû htǒotapwa̤ hî̌shǔgepo̤ asî, “Kòyò htǒotapwa̤ a ma̤lîgejò he mi̤sǎphlǒ, dě a ǒ bǎtèhènu pa sî̌yatò̤ sî cû̌hî̌ tûkûdě a te̤pe̤kè hehǒ.

³¹ Ta̤ma̤sǔphû̌ kwi ta̤ma̤jènu, Cǒmara gana̤de tò̤ numî̌ pa sî̌ya. A gana̤de pwǎpǒ̤ kòyò htě a yṳǎ nû̌û dě a ma̤to nû̌sò̌phlǒnu toǒ pwǎ.

³² Kò ma̤lîgejò kòyò mi̤sǎkhǐ amo̤phukûnu dě mǒhtûlû̌hǎhtûsa tǒ̤lò̤khònò̤nu pa gana̤denǒ dǐpwǎ̤꤮ tò̤.

³³ Kòyò htǒotapwa̤ a ǒ dě Cǒmara a ǒhè dèmè̤tò̤ hî̌numî̌, a ma̤jò dǐcǎ꤮ tò̤,” a hî̌ geshǔ asî hǐnu.

³⁴ Pharisè̌phû̌ toǒ hî̌gekhîshǔ nû̌û, “Na ta̤sǔta̤plě dû̌pe dě na ǒphijalò̤ akha dě na cû̌ sû̌ǐ gekhî bǎ pa hî̌tè?” A hî̌ nû̌û hǐnudě a wṳ̂hǎhtò̌kè nû̌û dě ta̤sabahǐkhlo.

Kòyò sû̌sò̌ mi̤sǎkhǐ toǒ

³⁵ Bǎ Ye̤shǔ gana̤de ta kò wṳ̂hǎhtò̌kè kòyò mi̤sǎkhǐ htǒotapwa̤ akhanu, Běcǎ Ye̤shǔ cû̌kè̌lǎ kè̌shǐ nû̌û dě a hî̌ nû̌û, “Na yṳǎ kòyòphû̌khû ya?”

³⁶ Dě a hî̌shǔ Ye̤shǔ, “Sara, a mî̌ ûpè? Ma̤pûhǐ he yṳǎ a dě pwe̤ǐlṳ bǎ he,” a hî̌ nû̌û hǐnu.

³⁷ Běcǎ Ye̤shǔ hî̌ yǎ, “Na kè̌shǐhto a hǒ. Na hî̌bǎ nû̌û khònò̤ htǒotapwa̤ numî̌ a hǒ.”

³⁸ Dě kòyò htǒotapwa̤ hî̌ nû̌û, “Běcǎ, he yṳǎ hǒ,” a hî̌ dě a gene̤lò̤ sabahtò̌ Běcǎ Ye̤shǔ.

³⁹ Dě Běcǎ Ye̤shǔ hî̌ nû̌û, “Ma̤pûhǐ kòyòhǎkhû̌phû̌ toǒ kè̌shǐlò̤ tû̌ ata̤sǔ ayanudě, he hèlò̤ hǎkhû̌bǎo hǒ. Kòyò htě alò̤ta kòyò mi̤sǎkhǐ dě a sî̌yakû̌ Cǒmara a ta̤te̤ta̤mǎ tò̤ toǒnu, he ma̤lîge asî mi̤sǎ pě. Pwǎ̤tadě kòyò htě a hî̌lò̤ tû̌ ana̤ ta he sî̌yahto Cǒmara a ta̤te̤ta̤mǎ toǒnu, a htû sǒsǒta kòyò mi̤sǎkhǐnu toǒ pě.”

⁴⁰ Pharisè̌phû̌ htě a ǒ lǒkho bǎnu toǒ gana̤de a hî̌ htǒo dě a gwè Ye̤shǔ, “Na sò̌le̤ hî̌ pa ta pa mi̤sǎkhǐ hǐnu ya?”

⁴¹ Dě Běcǎ Ye̤shǔ hî̌ asî, “Sî dè mi̤sǎkhǐ dèhî̌dě sî sî̌ya te̤mǎ ta̤te̤ta̤mǎ hǒtò̤ akhû̌akhî, sî ta̤sǔ ǒtò̤. Pwǎ̤tadě khònò̤htǒo sî hî̌ ta sî mi̤sǎlî akhû̌akhî, sî ta̤sǔǒ,” a hî̌ asî hǐnu.