Jowǎ̤ni̤ 3 - Kawyaw RC

Ye̤shǔ ta Nikòdě̤mo̤

¹ Yṳ̌daphû̌ hǐkǒdû̌ htě ami̤ ta Nikòdě̤mo̤ ǒ tapwa̤. A mî̌ a ǒkû̌dǒ ta Pharisè̌phû̌ aprṳ̂aho toǒ akû.

² Tana̤khanu Nikòdě̤mo̤ hè dě Ye̤shǔ ǒ dě a hî̌ nû̌û, “Sara, pa sî̌ya ta na mî̌ sara htě a ǒ dě Cǒmara a ǒhè tapwa̤. Pa sî̌ya ta Cǒmara dè ǒkû̌ ta kòyò tapwa̤pwa̤ tò̤ hî̌numî̌ a ma̤jò ta̤cǒklî̌ pwǐ na ma̤ htǒonu dǐpwǎ̤tò̤.”

³ Ye̤shǔ hî̌shǔ yǎ, “He hî̌ mè̤mè̤̌ na, kòyò htě a ǒphijaû̌lò̤ gesǒ taplǎpe tò̤ toǒnu, a kè̌shǐbò̌ Cǒmara ashiaga dǐpwǎ̤tò̤.”

⁴ Nikòdě̤mo̤ gwè nû̌û, “Kòyò dû̌pwa̤ tapwa̤nu a cû̌ ǒphijaû̌lò̤jòsǒ hî̌tè? A ge ginṳ gesǒ a mo̤phukû dě a ǒlò̤ ginǐ̤plǎtaplǎ mî̌ a nî̤jòpe ya?”

⁵ Ye̤shǔ hî̌shǔ yǎ, “He hî̌ mè̤mè̤̌ na, kòyò htě a ǒphijaû̌lò̤ gesǒ ta shi ta Běcǎ sǎcahtǐ tò̤ toǒnu a nṳjò dě Cǒmara ashiagakû tò̤.

⁶ Kòyòhǎkhû̌phû̌ ǒlò̤sǒ tû̌pwǎ kòyòhǎkhû̌phû̌ pwǎ. Pwǎ̤tadě ta̤ǒlò̤ ta Běcǎ sǎcahtǐnu, a ǐ htûhtò̌ tèplè̌ kò sû̌sò̌ tokho.

⁷ Dě he hî̌ bǎ na, ‘Sî tobǎ ǒphijaû̌lò̤ gesǒ taplǎ,’ pwǐhè̌onu akhû̌akhî, sû̌pi̤sò̌pi̤ pûma̤.

⁸ Gili̤sǎnu jǔ꤮ a sǎcû̌ tû̌pwǎ ata. Na gana̤de apo̤ hǐnudě a ǒ bǎtèhè mè̤tò̤mî̌ a glè̌ cû̌ bǎtènu na sî̌yatò̤. Kòyò lǒ̤꤮ bò ǒlò̤ ta Běcǎ sǎcahtǐ toǒ numî̌ a sǒsǒta hǐnuhǒ.”

⁹ Nikòdě̤mo̤ gwè nû̌û, “A cû̌ htûhtò̌jò hî̌tè?”

¹⁰ Ye̤shǔ hî̌shǔ yǎ, “Na htû ta Israel a saradû̌ tapwa̤ amè̤tò̤ya, pwǐhè̌opwǎ dě na cû̌ sî̌yatò̤ ma̤tè?

¹¹ He hî̌ mè̤mè̤̌ na, pa hî̌ bǎ kò ta̤htě pa sî̌ya toǒ, pa dǒhtû̌ǐ bǎ kò ta̤htě pa kè̌shǐ toǒ pwǎ̤tadě sî phî̌shǔ pa ta̤hî̌bǎ htǒonu dǐpwǎ̤tò̤.

¹² He pwe̤ǐhto bǎ sî ta hǎkhû̌ awi̤akè̌ htǒotoǒ hǐnudě sî yṳǎ he tò̤. He dè pwe̤ǐpo̤ bǎ sî ta mǒkhû̌ awi̤akè̌ toǒ hǐnumî̌ sî glè̌ yṳǎjò he hî̌tè?

¹³ Kòyò htò̌to̤bǎ dě mǒkhû̌nu a ǒ dǐpwǎ̤tò̤. Kòyòphû̌khû htě a ǒ dě mǒkhû̌ hèlò̤ htǒotapwa̤ htò̌to̤ tû̌ pwǎ.

¹⁴ Pwǐ Mǒ̤jè děwǐnukha bè̌htò̌ wṳ̂tîlîbò ayo̤ dě hǐtṳlo̤nu, kòyòphû̌khû mî̌ he htǒo kò bè̌htò̌dǒ he pě.

¹⁵ Ma̤pûhǐ kòyò lǒ̤꤮ bò htě a yṳǎna̤ǎ he toǒnu, a nî̤bǎ yolahtûpwa̤ tûjûpwa̤ pě.

¹⁶ “Cǒmara mo̤ǐ lǒ̤꤮ bò kòyòhǎkhû̌phû̌. Kòyò lǒ̤꤮ bò htě a yṳǎ aphû̌khû toǒnu, ma̤pûhǐ a nî̤bǎ yolahtûpwa̤ tûjûpwa̤ dě a to̤ pûma̤ ta ta̤pî̌ta̤lṳ̂ tò̤nu, a ǐlò̤kè aphû̌khû htǒo tapwa̤nu ta kòyòhǎkhû̌phû̌ toǒ aya.

¹⁷ Ma̤tè̤hî̌dě, Cǒmara nohèlò̤ aphû̌khû dě a glè cèrò kòyòhǎkhû̌phû̌ ayanu mè̤tò̤. Mî̌tanu a nohè nû̌û dě a hè ma̤lû̌htò̌ge kòyòhǎkhû̌phû̌ aya nupwǎ.

¹⁸ Kòyò htě a yṳǎ phû̌khû toǒnu, Cǒmara cèrò asî tò̤. Kòyò htě a yṳǎ phû̌khû tò̤ toǒnu, Cǒmara cèrò asî pě, ma̤tè̤hî̌dě, a yṳǎ kû̌kò Cǒmara aphû̌khû htě a ǒ tû̌ tapwǎ̤pa htǒotapwa̤ tò̤ akhû̌akhî, a cèrò asî.

¹⁹ Ma̤tèdě asî khòbǎ ta̤cèrò hǐnumî̌, Cǒmara ata̤lî hènṳ dě hǎkhû̌bǎo hǐnudě kòyòhǎkhû̌phû̌ toǒ sò̌yṳ ta̤lî htǒonu tò̤ ma̤tè̤hî̌dě asî ma̤ ta̤phû̌mò̤shî̌hto toǒ akhû̌akhî, a mo̤ǐkhlo ta̤khǐ.

²⁰ Lǒ̤꤮ bò kòyò htě a ma̤ ta̤phû̌mò̤shî̌hto toǒnu, a sò̌khě ta̤lî dě a hè ta̤lî a ǒ tò̤, ma̤tè̤hî̌dě kòyò htě a ma̤ ta̤phû̌mò̤shî̌hto toǒnu, a ǐsha ta a ta̤sǔta̤plě toǒ ǒlṳhtò̌ dě a hè tò̤.

²¹ Pwǎ̤tadě kòyò htě a ma̤ ta̤cǒta̤tè̤ toǒnu, a hè dě ta̤lî a ǒ, ma̤tè̤hî̌dě ma̤pûhǐ kò pṳ̂̌꤮ tapwa̤ kè̌shǐ lṳwǒ ta a ma̤ta̤ toǒnu, ato ta Cǒmara asò̌phlǒ ayanu, a hè dě ta̤lî ǒ.”

Ye̤shǔ ta pwa̤ploshi Jowǎ̤ni̤

²² A hî̌hto nû̌û dě, Ye̤shǔ ta akhophijaû̌ toǒ hǎhtò̌cû̌ Yṳ̌daga. Dě a cû̌ǒ yî̤wò̌wè̌ kû̌ta akhophijaû̌ toǒ bǎnu dě a cû̌plo bǎ kò shi.

²³ Jowǎ̤ni̤ plopo̤ bǎ kò shi bǎ gûla̤ htě kò kaǎ yǎta Èno nutò̤glò. Èno mî̌ a ǒphǔ ta Shaledo htodě shi ǒplṳ̂. Kòyò hè aǒ dě a plo bǎ asî shi.

²⁴ (Htǒomî̌ bǎ kò dǒlò̤te̤ Jowǎ̤ni̤ apo̤kû hǒtò̤ akhanu)

²⁵ Bǎnuakha Jowǎ̤ni̤ akhophijaû̌ toǒ ta Yṳ̌daphû̌ tapwa̤ gègo kè̌khînû̌û ta la̤bò̌la̤klo ǒta ta̤ma̤mṳ̂plî hî̌tènu awi̤akè̌.

²⁶ Asî cû̌ Jowǎ̤ni̤ a ǒ dě a hî̌ nû̌û, “Sara kòyò htě a ǒkû̌ ta na bǎ Jòda shilo̤ bò̌kho dě na khòlṳ bǎ kò ta a awi̤akè̌nu tapwa̤ nî̌꤮, khònò̤htǒo a cû̌plo bǎtǒ̤ kò shi dě kò cû̌bò dě aǒ hǒ.”

²⁷ Dě Jowǎ̤ni̤ hî̌shǔ nû̌û, “Ûpè bǎbǎ Cǒmara dè ǐlò̤ nû̌û tò̤nu, a nî̤bǎjò ta̤ dǐcǎ꤮ tò̤.

²⁸ He hî̌hto sî ta, ‘He mî̌ Khrî̌stu mè̤tò̤ hǐnudě Cǒmara nohè wǐpwǎ he dě alo̤mo̤.’ He hî̌htohǒ akhû̌akhî, sî htû he pwa̤lò̤sasî̌ toǒ hǒ.

²⁹ He mî̌ alò̤ta pwa̤gûkû̌ khòmò̤ makhû tapwa̤nu. Khòmò̤ mamǔ mî̌ khòmò̤ makhû ata. Pwǎ̤tadě pwa̤gûkû̌nu tapwa̤ ihtǒ gana̤de khòmò̤ makhû hî̌bǎ. A gana̤de nû̌yo̤ akhû̌akhî, a sò̌le̤sò̌lò̤ mè̤mè̤̌. Hǐnudě he ta̤sò̌le̤sò̌lò̤ htǒonu a lǒhtò̌behtò̌ hǒ.

³⁰ A mî̌ a tobǎ lo̤bǎdû̌khlo, he mî̌ a tobǎ lo̤bǎpî̌tî̌khlo.

³¹ “Kòyò ǒ dě mǒkhû̌ hè htǒotapwa̤nu, adû̌khlobò ta kò. Kòyò ǒ dě hǎkhû̌ bǎotapwa̤nu a sî̌ya hî̌bǎ pwǎpǒ̤ hǎkhû̌ awi̤akè̌ pwǎ. Kòyò ǒ dě mǒkhû̌ hè htǒotapwa̤nu adû̌khlobò ta kò.

³² A pwe̤ǐlṳ bǎ kò ta lǒ̤꤮ bò a kè̌shǐnu toǒ ta lǒ̤꤮ bò a gana̤denu toǒ. Pwǎ̤tadě a pwe̤ǐlṳ bǎ kònu, kò gana̤de phî̌le̤phî̌yo̤ nû̌ûta dǐpwǎ̤tò̤.

³³ Kòyò htě a gana̤de phî̌le̤phî̌yo̤ nû̌û ta̤pwe̤ǐlṳ toǒnu, a yṳǎ te̤mǎ lǒkho ta Cǒmara mî̌ atoamè̤.

³⁴ Kòyò htě Cǒmara nolò̤ yǎ tapwa̤nu, Cǒmara ǐ lǒbe a Běcǎ sǎcahtǐ akhû̌akhî, a hî̌bǎpwǎ Cǒmara ale̤ayo̤ toǒ pwǎ.

³⁵ Pha Cǒmara mo̤ǐ aphû̌khû dě a ǐlò̤bò nû̌û ta̤pṳ̂̌꤮ tacǎ a cǔdekû hǒ.

³⁶ Kòyò htě a yṳǎna̤ǎ phû̌khû htǒotapwa̤ toǒnu, a nî̤bǎ yolahtûpwa̤ tûjûpwa̤. Dě kòyò htě a gana̤de kû̌kò tò̤ dě a yṳǎna̤ǎ kû̌kò phû̌khûhtǒo tò̤ toǒnu, a nî̤bǎ kû̌kò ta̤htûpwa̤ tò̤. Cǒmara a ta̤cèrò lò̤ǒ dě kòyònu toǒ alo̤.”