Jowǎ̤ni̤ 20 - Kawyaw RC

Lṳkû ǒkoyokè

¹ Yṳ̌daphû̌ a mṳni̤dǔhto anǒto̤wo̤ lṳmṳlî wosò lṳmṳkhǐ pi̤pè̤pe akhanu, Madalě̤na dokûmo̤ Marǐa hè lṳkhû̌ dě a kè̌shǐ lo̤bědû̌ htě kò htû̌toklobǐ nû̌ûta lṳkû tamanu kò htû̌toklotephe cû̌kè nû̌û.

² A khlè̌ge dě Shîmǒ̤nè̤ Petru ta Ye̤shǔ akhophijaû̌ htě a mo̤ǐ nû̌û ahǔwa̤ tapwa̤ ǒ dě a pwe̤ǐ bǎ asî, “Asî phî̌cû̌hǎmǎkè Běcǎ dě lṳkûnu hǒ. Asî cû̌bè̌ nû̌û bǎtènu pa sî̌ya tò̤.”

³ Htǒotaplǎdě Petru ta Běcǎ akhophijaû̌ ahǔwa̤ tapwa̤ khlè̌hè lǒkho dě lṳkû.

⁴ Asî khlè̌hè plǒpwǎ nû̌û pwǎ̤tadě Běcǎ akhophijaû̌ ahǔwa̤ htǒotapwa̤ khlè̌phwèkhlo ta Petru akhû̌akhî, a khlè̌hè to̤wǐkhlo nû̌û dě lṳkû.

⁵ A hè û̌lò̤kè̌jonṳ lṳkû dě a kè̌shǐ hǔgòpwî̌ bǎplo̤htû htǒo ǒkè bǎnu, pwǎ̤ta a nṳ dě akû tò̤.

⁶ Htǒotaplǎdě Shîmǒ̤nè̤ Petru htě a khlè̌hè nǒkò htǒotapwa̤ hèto̤ dě anṳ lṳkû. Dě a kè̌shǐ hǔgòpwî̌ bǎplo̤htûnu tṳpṳ ǒkè bǎnu.

⁷ Htodě a kè̌shǐ to̤dǒ khǔpho htě kò bǒbǐ yǎta Běcǎ Ye̤shǔ ahǐkǒnu tṳpṳpṳ. A khǔphophû̌ htǒotṳpṳnu a ǒkû̌dǒ ta hǔgòpwî̌ bǎplo̤htûnu tṳpṳ tò̤. A bǒtûlû ǒyòkètû̌ tò̤glò.

⁸ Htodě akhophijaû̌ htě a khlè̌hè to̤wǐ dě lṳkhû̌ htǒotapwa̤ hènṳ dě akû. A hè kè̌shǐ dě a yṳǎ ta Ye̤shǔ htûpwa̤gesǒ hǒ.

⁹ Pwǐ lî̤cahtǐ hî̌nǎ ta, Běcǎ Ye̤shǔ si htûpwa̤gesǒ pě hǐnudě, bǎ a si htûpwa̤gesǒ hǒtò̤nu, akhophijaû̌ toǒ sî̌yaphlo hǒtò̤.

¹⁰ Htodě asî htǒosò̌gini̤ getîkhî lǒkho dě ahǐ.

Běcǎ Ye̤shǔ ǒlṳhtò̌ bǎ Madalě̤na dokûmo̤ Marǐa

¹¹ Pwǎ̤ta Marǐa ǒkè dě ihtǒ hǎtû̌ bǎ lṳkûhtunu. Bǎ a hǎ akha, a û̌jogo kè̌jonṳ dě lṳkû.

¹² Dě a kè̌shǐ mǒkhû̌tanaphû̌ sǒnṳ hǐdobû sò̌gini̤ hǎnòò̌ bǎ Ye̤shǔ lṳto̤ la̤ǒnu. Tapwa̤ mî̌ a ǒ bǎ a hǐkǒkòshî̌ tokho, tapwa̤ mî̌ a ǒ bǎ a khò̌lopo̤kòshî̌ tokho.

¹³ Dě asî gwè Marǐa, “Phû̌mǔ, na hǎ ma̤titè?” Dě Marǐa hî̌ geshǔ asî, “Asî phî̌cû̌hǎmǎkè he Běcǎ hǒ, asî cû̌bè̌ nû̌û bǎtènu he sî̌yatò̤,” a hî̌shǔ hǐnu.

¹⁴ Bǎ a htû̌tiwǐ kè̌tîkhî akhanu, a kè̌shǐ Běcǎ Ye̤shǔ ǒihtǒ nû̌kòshî̌ pwǎ̤ta a sî̌yanû̌û ta Běcǎ Ye̤shǔ tò̤.

¹⁵ “Mamǔ, na hǎ ma̤titè? Na kè̌lǎ ûpè?” A gwè nû̌û hǐnu. Marǐa gènè̤tò̤ Běcǎ Ye̤shǔ ta pwa̤ǒpo̤ kè̌ǐkwè̌ǐ we̤ dě a hî̌ nû̌û, “Wè̤, na dè phî̌cû̌ yǎ hî̌dě na cû̌bè̌ yǎ bǎtè tò̤glònu, pwe̤ǐlṳ he dě he tò̤ cû̌phî̌ge yǎ,” a hî̌ nû̌û hǐnu.

¹⁶ “Marǐa,” Běcǎ Ye̤shǔ hî̌ nû̌û hǐnu. Dě a htû̌tiwǐ cû̌to nû̌û ǒ dě a hî̌shǔ nû̌û ta Ebrephû̌yo̤sǎ dě a hî̌, “Rabanǐ.” (Amûasǎ mî̌ sara)

¹⁷ Dě Běcǎ Ye̤shǔ hî̌ yǎ, “Tǒ bǎ pûma̤ he ma̤, ma̤tè̤hî̌dě he ge dě hepha ǒ hǒtò̤. Cû̌ dě he pṳwè̤nu toǒ a ǒ dě cû̌hî̌ asî, ‘He gekihtò̌ dě hepha ǒ mî̌ amè̤mè̤, asî pha mî̌ amè̤mè̤, he Cǒmara mî̌ amè̤mè̤, asî Cǒmara mî̌ amè̤mè̤ htǒotapwa̤ a ǒpě’” a hî̌ nû̌û hǐnu.

¹⁸ Marǐa Madalě̤na dokûmo̤ cû̌pwe̤ǐ akhophijaû̌ toǒ ta ta̤wi̤ta̤kè̌ htǒo dě a hî̌ asî, “He kè̌shǐ Běcǎ hǒ!” Dě a pwe̤ǐlṳ asî ta Běcǎ pwe̤ǐ bǎ nû̌ûnu toǒ.

Běcǎ Ye̤shǔ ǒlṳhtò̌ bǎ akhophijaû̌ toǒ

¹⁹ Bǎ Yṳ̌daphû̌ a mṳni̤dǔ mî̌ mṳgòtò̤nu ti̤ni̤hto htû̌pe̤wo̤ ti̤ni̤ lṳmṳkhǐpo̤lo̤ akhanu, akhophijaû̌ toǒ ǐsha lǒkho Yṳ̌daphû̌ a hǐkǒdû̌ toǒ ala̤ dě a ma̤mě lǒkho takha, bǎ asî ǒplǒhtunû̌û hǐdǒkû akhanu, Běcǎ Ye̤shǔ hèihtǒ ǒlṳsumṳ bǎ asî kǎmakû dě a hî̌ asî, “Sò̌phlǒ ta̤gûjûkabǎ ǒkû̌ tû̌ta sî nî̌,” a hî̌ asî hǐnu.

²⁰ A hî̌hto bǎ asî hǐnudě a dǔlṳ asî ta acǔde ta awe̤la̤. Bǎ akhophijaû̌ toǒ kè̌shǐ nû̌û akhanu, a sò̌le̤sò̌lò̤ sû̌pi̤sò̌pi̤ lǒkho.

²¹ Běcǎ Ye̤shǔ hî̌ gesǒ asî taplǎpe, “Sò̌phlǒ ta̤gûjûkabǎ ǒkû̌ tû̌ta sî nî̌꤮! Dě pwǐ hepha nohè henu, he nocû̌dǒ sîsî.”

²² A hî̌hto hǐnudě a uphǔcû̌ asîkhû̌ dě a hî̌ asî, “Phî̌nṳ lǒkho Běcǎ sǎcahtǐ htǒo.

²³ Sî dè bòlû̌kè kòta̤sǔ toǒ hî̌dě, Cǒmara bòlû̌kè asî ta̤sǔ pě. Sî dè bòlû̌kè kòta̤sǔ tò̤ hî̌dě, Cǒmara bòlû̌ asî ta̤sǔ tò̤.”

Běcǎ Ye̤shǔ ǒlṳhtò̌ bǎ To̤mǎ̤jo

²⁴ Bǎ Ye̤shǔ cû̌nṳ ǒlṳ bǎ akhophijaû̌ dě hǐkû akhanu, To̤mǎ̤jo htě kò kaǎpo̤ nû̌ûmi̤ ta Dǐdimǔ htǒotapwa̤ ǒkû̌ta asî bǎnu tò̤.

²⁵ Akhophijaû̌ htǒotoǒ hî̌ To̤mǎ̤jo, “Pa kè̌shǐ Běcǎ hǒ,” a hî̌ nû̌û hǐnu. Pwǎ̤tadě a hî̌shǔ asî, “He dè kè̌shǐ lo̤phû̌nǎ gûla̤ cèǒkè dě a cǔdekû tò̤, htodě he dè cîwînṳbǎ lo̤phû̌nǎ cègûla̤ ta he cǔmṳplo̤ tò̤, he dè sûphûnṳbǎ awe̤la̤ acè ta he cǔde tò̤ hî̌nu, he yṳǎtò̤.”

²⁶ Děnǒkò susǒti̤ni̤htonu, Běcǎ Ye̤shǔ akhophijaû̌ toǒ ǒplǒhtunû̌û bǎ hǐnu tama akû. Bǎnuakha To̤mǎ̤jo ǒkû̌dǒ ta asî bǎnu. Asî ma̤mě takha hǐnudě Běcǎ Ye̤shǔ hènṳ ǒihtǒ asî kǎmakû dě a hî̌ asî, “Sò̌phlǒ ta̤gûjûkabǎ ǒkû̌ tû̌ta sî nî̌꤮” hǐnu.

²⁷ Htǒotaplǎdě a hî̌ To̤mǎ̤jo, “Nakè̌mò̌ he cǔdekûhtǒo, dě cîwîkè̌tû̌ yǎta na cǔmṳplo̤nu. Yṳ̂wa̤ na cǔdenu dě sûphûtû̌ he we̤la̤ acèhtǒo. Sò̌phlǒ suǔsewe̤ pûma̤. Tûrû̌ yṳǎnu.” A hî̌ nû̌û hǐnu.

²⁸ “Kǒ he Běcǎ, kǒ he Cǒmara,” To̤mǎ̤jo hî̌shǔ nû̌û hǐnu.

²⁹ Htodě Běcǎ Ye̤shǔ hî̌ yǎ, “Na kè̌shǐ he khû̌khî dě na yṳǎ pwǎ. Kòyò htě a kè̌shǐ he tò̤ dě a yṳǎ toǒnu a glè nî̤bǎ ta̤howi̤,” a hî̌ nû̌û hǐnu.

Kò khwè̌ lî̤ htǒotabǎ a ta̤yè̤lò̤ kè̌shuǐ toǒ

³⁰ Běcǎ Ye̤shǔ dǔlṳ ta̤ma̤ cǒklî̌kî̌ya dě akhophijaû̌ toǒ alo̤mo̤ dě kò khwè̌mǎnǎǐ nû̌û lî̤cahtǐ htǒotabǎ akûtò̤ toǒnu a ǒdû̌pe.

³¹ Pwǎ̤tadě kò khwè̌lî̤ htǒotabǎ mî̌ ma̤pûhǐ sî yṳǎ ta Ye̤shǔ mî̌ Mè̤shǐa, a mî̌ Cǒmara aphû̌khû tapwa̤, dě sî yṳǎ yǎ akhû̌akhî, sî nî̤bǎ yolahtûpwa̤ ayanu, kò khwè̌ pwǎ bǎ sî.