Jowǎ̤ni̤ 15 - Kawyaw RC

Ye̤shǔ mî̌ sobîmṳ mè̤mè̤̌ tṳmṳ

¹ “He mî̌ sobîmṳ mè̤mè̤̌ tṳmṳ, hepha mî̌ we̤běcǎ.

² Sobîphò htě a tucu ta he dě asǎapho htò̌tò̤ toǒnu, a pe̤kèbò nû̌ûpě. Aphò htě asǎaphohtò̌ toǒnu bǎbǎ, ma̤pûhǐ a bǎ sǎhtò̌ dû̌htò̌po̤ ayanu, a khlělîbòlè̌ nû̌ûphò toǒ.

³ Sî ma̤mṳ̂ma̤plî ta hele̤heyo̤ htě he hî̌ bǎ sî htǒo akhû̌akhî pwǎ.

⁴ He ǒměǒgle ta sî tacǎnǔpa, dě sî ǒměǒgle ta he tacǎnǔpa pě. Sobîphò tòphòphò htě a shǒtǒhtu ta he tò̤nu, a sǎhtò̌jò tû̌ ana̤ dǐphò̌꤮ tò̤. Hǐnudě sî glè ǒměǒgle ta he tacǎnǔpa tò̤ hî̌nu, sî sǎhtò̌bò̌jò sǒsǎ htě a mî̌ ama̤ta̤wǒ htǒonu dǐpwǎ̤꤮ tò̤.

⁵ “He mî̌ sobîmṳ, sî mî̌ aphò toǒ. Kòyò htě a ǒměǒgle kû̌ta he tacǎnǔpa, dě he ǒměǒgle kû̌ta asî tacǎnǔpanu, asî sǎhtò̌phohtò̌ plṳ̂ pě. Ma̤tè̤hî̌dě sî dè ǒ tucu ta he tò̤ hî̌nu, sî ma̤jò ta̤dǐcǎ꤮ tò̤.

⁶ Kòyò tapwa̤pwa̤ a ǒměǒgle kû̌ta he tacǎnǔpa tò̤nu, alò̤ta sǒphò htě kò wîhǎhtò̌kè yǎ dě akhlo, ta a nokhwekè pwǎ toǒnu. Sǒphò hǐnu toǒnu, kò htǔplǒ yǎ dě kò wînṳkè nû̌û mî̌kla dě kò shû̌gèkè pwǎ yǎ.

⁷ Sî dè ǒměǒgle kû̌ta he tacǎnǔpanu, dě hele̤heyo̤ dè ǒměǒgle kû̌ta sî tacǎnǔpa dèhî̌dě sî sò̌yṳkwi titètè̌ bǎbǎnu, he ǐ sî pě.

⁸ Dě sî sǎhtò̌phohtò̌ plṳ̂ sǒsǎ htě a mî̌ ama̤ta̤wǒ htǒotoǒ akhû̌akhî, hepha asîrîdû̌sîrîhtû ǒlṳhtò̌ pě. Dě sî sǎhtò̌plṳ̂ hǐnu akhû̌akhî, sî dǔlṳ ta sî htû he khophijaû̌ toǒ hǒ.

⁹ “He mo̤ǐ sî pwǐ hepha mo̤ǐ henu, khònò̤dě ǒměǒgle lǒkho dě he ta̤mo̤ǐ akû htǒonu nî̌꤮.

¹⁰ Sî dè gana̤de jûle̤phî̌yo̤ he ta̤mǎlò̤ htǒotoǒ hî̌numî̌ sî ǒměǒgle he ta̤mo̤ǐ akû hǒ. Sî dè ma̤ htǒo hî̌numî̌ a sǒsǒta he gana̤de hepha ayo̤ dě he ǒměǒgle a ta̤mo̤ǐkû htǒonu hǒ.

¹¹ Ma̤pûhǐ sî sò̌le̤sò̌lò̤ sǒsǒkû̌pû pwǐ he sò̌le̤sò̌lò̤ htǒo ayanu, he pwe̤ǐlṳ bǎ sî hǒ.

¹² Mo̤ǐ nû̌û tapwa̤ ta tapwa̤ pwǐ he mo̤ǐ sî htǒonu nî̌꤮, htǒomî̌ he ta̤mǎlò̤ hǒ.

¹³ Ta̤mo̤ǐ htě adû̌khlo ta kòyò tapwa̤pwa̤ dě a khòsikè asò̌ ta a khobǒsû̌ toǒ ayanu a ǒpetò̤ hǒ.

¹⁴ Sî dè ma̤kû̌ pwǐ he mǎnǎ sî yo̤sǎ htǒo hî̌numî̌, sî htû he khobǒsû̌ hǒ.

¹⁵ He kaǎpe sî ta jûphû̌ tò̤ hǒ, ma̤tè̤hî̌dě jûphû̌ hî̌numî̌ a sî̌ya kû̌ aběcǎ ata̤ma̤ awi̤akè̌ tò̤. He glè kaǎkhǒ sî ta sî mî̌ he khobǒsû̌ toǒ hǒ, ma̤tè̤hî̌dě he gana̤debò ta̤ dě hepha a ǒ toǒnu, he pwe̤ǐlṳbò bǎ sî hǒ.

¹⁶ Sî wû̌lǎhtò̌ he mè̤tò̤. He wû̌lǎhtò̌ sî, he bè̌htò̌ sî dě sî glè hǎhtò̌cû̌ lǒkho ta cû̌ sǎhtò̌phohtò̌ plṳ̂ lǒkho. He bè̌htò̌ sî ta sî glè sǎměhtuto̤ lǒkho dě agutṳ. Sî dè ma̤hǐnu hî̌mî̌ sî kwi titètè̌ bǎbǎ, sî dè kwi ta hemi̤ hî̌nu, pha ǐ sî pě.

¹⁷ He ta̤mǎlò̤ htǒonumî̌ mè̤hǒ mo̤ǐ nû̌û tapwa̤ ta tapwa̤nu hǒ.”

Kòyòhǎkhû̌phû̌ sò̌khě Běcǎ Yeshǔ akhophijaû̌ toǒ pě

¹⁸ “Kòyòhǎkhû̌phû̌ toǒ dè sò̌khě sî hî̌dě gènè̤htò̌ to̤bǎ lǒkho ta a sò̌khě wǐhto hehǒnu nî̌꤮.

¹⁹ Sî dè sǒsǒta kòyòhǎkhû̌phû̌ htǒotoǒ hî̌nu, a mo̤ǐ sî pwǐ asî kòyò tû̌nu toǒ pě. Pwǎ̤ta sî dě, sî khǒtû̌ta asî hǒ. He wû̌htò̌khǒkè sî dě kòyòhǎkhû̌phû̌ toǒ akla hǒ. Asî sò̌khě sî akòshî̌kòtṳ mî̌ mî̌pwǎ sî khǒtû̌ta asî hǒ. Htohǒtò̤ he wû̌htò̌khǒkè sî ta asî htǒo akhû̌akhî, asî sò̌khěkhû̌khwè sî hǒ.

²⁰ Sî̌yahtò̌bǎ lǒkho yo̤sǎ htě he hî̌ bǎ sî ta, ‘Jûphû̌ dû̌khlo ta aběcǎnu a ǒ dǐpwǎ̤꤮ tò̤,’ htǒonu nî̌꤮. Asî ma̤jîma̤jûhto he akhû̌akhî, a ma̤jîma̤jû dǒlè̌ sî pě. Asî dè gana̤de jûle̤phî̌yo̤hto heyo̤ hî̌nu, a gana̤de jûle̤phî̌yo̤ dǒtû̌ sîyo̤ pě.

²¹ Sî htû he khophijaû̌ akhû̌akhî, kòyòhǎkhû̌phû̌ toǒ ma̤jî sî pě, ma̤tè̤hî̌dě asî sî̌ya lǒkho pha htě a nohè he htǒonu tapwa̤ tò̤.

²² He dè hè dǒhtû̌ǐ bǎ asî tò̤ dèhî̌nu, Cǒmara bè̌ asî ta̤sǔ tò̤. Pwǎ̤tadě khònò̤htǒo he hè dǒhtû̌ǐ lṳbǎ asî akhû̌akhî, ala̤hî̌ lû̌htò̌ tû̌ ayo̤ ta ata̤sǔ ayanu, a ǒpe dǐmû̌꤮ tò̤ hǒ.

²³ Kòyò htě a sò̌khě henu a sò̌khědǒ hepha hǒ.

²⁴ Ta̤ma̤ cǒklî̌kî̌ya htě kò ma̤jò dǐpwǎ̤꤮ tò̤ htǒotoǒnu, he dè dǔlṳ yǎ asî kla tò̤ hî̌nu, asî ta̤sǔ ǒ dǐkhò̌꤮ tò̤. Pwǎ̤tadě, khònò̤htǒo, asî kè̌shǐ ta̤ma̤ cǒklî̌kî̌ya htǒotoǒ dě a sò̌khě he ta hepha hǒ.

²⁵ Pwǎ̤tadě htǒonumî̌, asî ma̤lǒma̤behtò̌ pwǐ lî̤cahtǐ hî̌hto ta, ‘He ma̤ta̤ htǒonu asî ta̤la̤sò̌khěkhû̌khwè he ǒ dǐcǎ꤮ tò̤ pwǎ̤ta asî sò̌khě he.’

²⁶ “He nohè pwa̤ma̤jèta̤ htě a ǒ dě phaǒ htǒonu tapwa̤ dě sî ǒ pě. A mî̌ ta̤te̤ta̤mǎ a Běcǎ sǎcahtǐ htě a ǒ dě pha a ǒ hè. Htû̌꤮ a hèto̤ pěnu, a pwe̤ǐlṳ bǎ sî ta hewi̤hekè̌ pě.

²⁷ Sî ǒkû̌dǒ ta he dě akòshî̌khape akhû̌akhî, sî bǎ pwe̤ǐ bǎ dǒkò ta hewi̤hekè̌ nî̌꤮.”