Jowǎ̤ni̤ 11 - Kawyaw RC

Lǎ̤surǔ si

¹ Kòyòmi̤ ta Lǎ̤surǔ htǒotapwa̤nu asha. A ta a wè̤mamǔ Marǐa ta Mǎ̤rita mî̌ a ǒ lǒkho dě Betanǐdo.

² Marǐa htǒotapwa̤ mî̌ mî̌pwǎ a lò̌lò̤ shinṳmû̌ dě Běcǎ a khò̌lopo̤lo̤nu dě a htǔbò nû̌ûta akhû̌lṳnu tapwa̤ hǒ. Lǎ̤surǔ htě asha htǒotapwa̤ numî̌ a pṳmakhû hǒ.

³ A wè̤mamǔ htǒosò̌gini̤ nocû̌ pwe̤ǐ kò ta Ye̤shǔ, dě asî cû̌ hî̌ Ye̤shǔ, “Běcǎ, na khobǒsû̌ Lǎ̤surǔ shǐsha.”

⁴ Bǎ Ye̤shǔ gana̤de ta̤wi̤ta̤kè̌ htǒo akhanu, a hî̌, “Dě ta̤shahtǒo akhû̌akhî, kò kè̌shǐ Cǒmara a sîrîdû̌sîrîhtû pě. Htohǒtò̤ ta̤shahtǒo akhû̌akhî, Cǒmara aphû̌khû nî̤bǎ ta̤sîrîdû̌sîrîhtû pě.”

⁵ Ye̤shǔ mo̤ǐbò Mǎ̤rita ta apṳmamǔ, ta a pṳmakhû Lǎ̤surǔ sò̌subò.

⁶ Dě a gana̤de ta Lǎ̤surǔ sha hǐnudě a ǒ sělěpe bǎnu ginǐ̤ni̤.

⁷ Htodě a hî̌ akhophijaû̌ toǒ, “Pa ge dě Yṳ̌daga hò꤮.”

⁸ Pwǎ̤tadě akhophijaû̌ toǒ hî̌ nû̌û, “Sara, dě bǒpo̤no̤ Yṳ̌daphû̌ toǒ sò̌yṳ kè̌lǎ wî na ta lo̤ dě na glè geshǔsǒ asî bǎnu ya?”

⁹ Ye̤shǔ hî̌shǔ asî, “Ti̤ni̤ mî̌ a ǒ shǐginǐ̤narî̤ yahî̌? Kòyò tapwa̤pwa̤ a cû̌klè̌ bǎ lṳmṳsha htǒonu, a htò̌tukhu lòkhǔpo̤ nǒtò̤, ma̤tè̤hî̌dě a kè̌shǐ hǎkhû̌ ata̤lînu.

¹⁰ Pwǎ̤tadě kòyò tapwa̤pwa̤nu a dè cû̌ lṳmṳkhǐ hî̌nu, a htò̌tukhu lòkhǔ pě, ma̤tè̤hî̌dě a khǐnǔ.”

¹¹ A hî̌hto pwǐhè̌o dě, a hî̌ sělěpo̤ asî, “Pa khobǒsû̌ Lǎ̤surǔ hǎmoǒ shope̤ hǒ, Pwǎ̤ta he glè cû̌ htû̌wè̤ ihtǒ yǎ.” A hî̌ asî hǐnu.

¹² “A dè hǎmoǒshope̤ pwǎ hî̌dě, a ǒmo̤ǒwǒ hège tû̌ pě kò̌,” akhophijaû̌ hî̌shǔ nû̌û hǐnu.

¹³ Ye̤shǔ sò̌yṳ hî̌ amûasǎ ta Lǎ̤surǔ si pwǎ̤tadě asî gènè̤pwǎ ta a hǎmoǒ hǐnupwǎ.

¹⁴ Htǒotaplǎdě a hî̌lṳlî bǎ asî, “Lǎ̤surǔ sihǒ,

¹⁵ Pwǎ̤ta, he ǒkû̌ ta Lǎ̤surǔ bǎnu tò̤ dě he sò̌le̤sò̌lò̤ pwǎ, ma̤tè̤hî̌dě a htûhtò̌ htǒo akhû̌akhî, sî ta̤yṳǎ henu sǔ a dû̌htò̌ pě. Ta̤htǒotoǒ htûhtò̌ pwǐhè̌o numî̌, a htûhtò̌ dě a glè htûbwǐhtûsîrî ta sîya pwǎ. Hǐnudě cû̌꤮, pa cû̌ dě a ǒ hò꤮.”

¹⁶ To̤mǎ̤jo htě kò kaǎpo̤ nû̌ûmi̤ ta Dǐdimǔ Htǒotapwa̤ hî̌ Ye̤shǔ akhophijaû̌ toǒ, “Pa cû̌si plǒkû̌ ta pa Běcǎ hò̌!” A hî̌ hǐnu.

Běcǎ Ye̤shǔ ǒ dě Betanǐdo

¹⁷ Bǎ Běcǎ Ye̤shǔ cû̌to̤ dě Betanǐdo akhanu, kò lǔ Lǎ̤surǔnu a ǒ lǐ̤ni̤ hǒ.

¹⁸ Betanǐdo htǒo a yî̤ ta Ye̤rǔshèlèwî̤nu a phǔ ǒ ginǐ̤mè̤.

¹⁹ Mǎ̤rita ta Marǐa htǒo a pṳmakhû si akhû̌akhî, kò hè ma̤lè asî, kò hè ǒlè plṳ̂kû̌ asî.

²⁰ Bǎ Mǎ̤rita gana̤de ta Běcǎ Ye̤shǔ hè akhanu, a hǎhtò̌cû̌ kè̌shǔ nû̌û. Pwǎ̤ta, Marǐa dě a ǒkèpwǎ dě hǐ.

²¹ Mǎ̤rita hî̌ Běcǎ Ye̤shǔkhrî̌stu, “Běcǎ, na dè ǒkû̌ ta pa bǎo hî̌numî̌, he pṳmakhû sijò hî̌tè.

²² Pò̤̌ta, khònò̤htǒo bǎbǎ, he sî̌ya ta na kwi Cǒmara titètè̌nu, a glè ǐ pwǎ na.”

²³ Ye̤shǔ hî̌shǔ yǎ, “Napṳ htûpwa̤gesǒ pě.”

²⁴ Dě Mǎ̤rita hî̌shǔ nû̌û, “Bǎ kò pṳ̂̌꤮ tapwa̤ htûpwa̤gebò ta ta̤si dě nǒkògutṳ̌ ti̤ni̤ pěnu, a si htûpwa̤ge pěnu he sî̌ya pwǎ,” a hî̌shǔ nû̌û hǐnu.

²⁵ Běcǎ Ye̤shǔ hî̌ yǎ, “He mî̌ pwa̤htě a ma̤htûpwa̤gesǒ kòyòsi toǒ. He mî̌ pwa̤htě a ǐ kò ta̤htûpwa̤. Kòyò htě a yṳǎ he toǒnu, a si hǐnudě a htûpwa̤gesǒ pě.

²⁶ Ma̤tè̤hî̌dě kòyò htě a yṳǎ he toǒnu, a nî̤bǎ ta̤htûpwa̤ tûjûpwa̤ pě, a sipe dǐkhò̌꤮ tò̤. He hî̌htǒo na yṳǎ ya, Mǎ̤rita?”

²⁷ “O, he yṳǎ kǎ, Běcǎ,” a hî̌shǔ hǐnu. “He yṳǎ mè̤mè̤̌ ta na mî̌ Mè̤shǐa Cǒmara a phû̌makhû htě a glè hè dě hǎkhû̌ bǎotapwa̤nu.”

Ye̤shǔ hǎ

²⁸ Mǎ̤rita hî̌hto hǐnudě a ge apṳ Marǐa ǒ dě a ge hî̌bǎhǔ nû̌û, “Sara hèto̤ bǎo hǒ, dě a gwèlǎ na.”

²⁹ Marǐa gana̤de dě a tṳplṳtî̤wî̤ hǎhtò̌cû̌shǔ Běcǎ Ye̤shǔ.

³⁰ Pwǎ̤tadě bǎnuakhanu, Ye̤shǔ nṳ dě dokû hǒtò̤. A ǒpepwǎ bǎ Mǎ̤rita la̤cû̌ kè̌shǐ glashǔ nû̌ûnu tò̤glò pwǎ.

³¹ Bǎ Yṳ̌daphû̌ htě a hè ǒlè, a hè ma̤lè Marǐa sîtoǒ, kè̌shǐ ta Marǐa ihtǒ hǎhtò̌cû̌ tṳplṳtî̤wî̤ akha, asî gûcû̌kû̌ nû̌ûkò. Asî gènè̤ ta a glè̌ hèhǎ dě lṳkhû̌.

³² Bǎ Marǐa cû̌kè̌shǐ ta Ye̤shǔ akhanu, a hègene̤lò̤ nû̌ûkhò̌lopo̤ kòshî̌ dě a hî̌ nû̌û, “Běcǎ na dè ǒkû̌ ta pa bǎo hî̌numî̌, he pṳmakhû sijò hî̌tè?”

³³ Bǎ Ye̤shǔ kè̌shǐ Marǐa ta Yṳ̌daphû̌ htě a gû hèkû̌ nû̌û toǒ hǎ akhanu, a sǎpla̤, a sǎhtò̌ dě a sò̌phlǒmo̤tò̤.

³⁴ A gwè asî, “Sî cû̌ lǔyǎ bǎtè?” Dě asî hî̌shǔ nû̌û, “Běcǎ, hèkè̌mò̌.”

³⁵ Dě Ye̤shǔ hǎ.

³⁶ Dě Yṳ̌daphû̌ toǒ hî̌ lǒkho, “Kè̌mò̌ta, a mo̤ǐ nû̌û pwî̌꤮ tènu.”

³⁷ Pwǎ̤tadě toǒǒ dě a hî̌, “A ma̤lîjò kòmi̤sǎ he hî̌ dě a cû̌ nositǒ̤ kòyò htǒotapwa̤ hî̌tè?”

Běcǎ Ye̤shǔ ma̤htûpwa̤gesǒ Lǎ̤surǔ ta ta̤si

³⁸ Ye̤shǔ sǎpla̤ sǎhtò̌ gesǒ dě a cû̌ kò la̤lǔnṳ nû̌û dě lo̤kû htǒonu a ǒ. Lṳkû htǒonu kò htû̌toklobǐ yǎta lo̤bědû̌ tama.

³⁹ Dě a hî̌ kòyò, “Htû̌toklo tephekè lo̤bědû̌ htǒonu.” Pwǎ̤tadě kòyòsi htǒotapwa̤ a wè̤mamǔ Mǎ̤rita hî̌shǔ nû̌û, “Běcǎ, tǒ̤lò̤khònò̤ htǒonu, a sibe lǐ̤ni̤hǒ. A glè nṳsonṳhabòkè hǒ,” a hî̌ nû̌û hǐnu.

⁴⁰ “He hî̌hto na ta, na dè yṳǎ dě na kè̌shǐ Cǒmara a sîrîdû̌sîrîhtû pě, amè̤tò̤ya?” Běcǎ Ye̤shǔ hî̌ asî hǐnu.

⁴¹ Hǐnudě asî htû̌toklo tephekè lo̤bědû̌nu tama. Dě Ye̤shǔ ò̌tò̤mò̤htò̌ mǒla̤ dě a hî̌, “Kǒ꤮ pha, na gana̤de he ta̤kwisaba akhû̌akhî, he hî̌bwǐhî̌sîrî na.

⁴² He sî̌ya ta na gana̤de he ta̤kwisaba pṳ̂̌꤮ plǎ. Pwǎ̤ta he kè̌ ta a glè htûbwǐhtûsîrî bǎ kòyò htě a ihtǒ bǎo toǒ aya, dě ma̤pûhǐ asî yṳǎ ta na nohè he ayanudě, he hî̌ pwǎhè̌o.”

⁴³ Bǎ Běcǎ Ye̤shǔ kwisaba htonu, a yi̤kǒhtò̌ ta, “Lǎ̤surǔ! hǎhtò̌mò̌!”

⁴⁴ Dě kòyò si htǒotapwa̤ hǎhtò̌. Acǔde khò̌lopo̤ toǒnu a tûlûměbòpe ta hǔgòpwî̌ bǎplo̤ dě ami̤sǎnu a bǒ te̤we̤bǐbòpe ta hǔgòpwî̌. Dě Ye̤shǔ hî̌ asî, “Bòphlǔkè bǎ yǎdě nocû̌ yǎnu.”

Kò shokhû̌ye̤yo̤ Ye̤shǔ

⁴⁵ Yṳ̌daphû̌ htě a hè ǒlèkû̌ Marǐa toǒ kè̌shǐ Ye̤shǔ ma̤htǒo akhû̌akhî, a yṳǎna̤ǎ plṳ̂ Ye̤shǔ.

⁴⁶ Pwǎ̤tadě toǒǒnu a cû̌ Pharisè̌phû̌ toǒ a ǒ dě a cû̌ pwe̤ǐlṳ asî ta Ye̤shǔ ma̤ta̤htǒo.

⁴⁷ Hǐnudě pwa̤tòlûhtò̌ hǐkǒdû̌ toǒ ta Pharisè̌phû̌ toǒ kaǎplǒ Yṳ̌daphû̌ hǐkǒdû̌ ahǔwa̤ toǒ dě ǒplǒhî̌bǎhtu nû̌û. Dě asî hî̌, “Pa bǎ ma̤hî̌tè? Kòyò htǒotapwa̤ ma̤lṳplṳ̂ bǎ kò ta̤cǒklî̌kî̌ya hǒ.

⁴⁸ Pa dè bè̌ǒ sělě yǎ bǎo hî̌numî̌, kò yṳǎ kû̌bò nû̌û pě. Htopědě Rò̌mǎ kliphû̌ toǒ hè pě dě hè ma̤lòte̤jabò pa ta̤lṳhtò̌hoho, pa khlilèphû̌phû̌ ginǐ̤cǎbò pě.”

⁴⁹ Htǒotaplǎdě asî klanu, kòyòmi̤ ta Kaǐpha ǒtapwa̤. Bǎnu taně mî̌ a htû pwa̤tòlûhtò̌ hǐkǒdû̌gutṳ̌. Dě a hî̌htò̌, “Sî sî̌ya lǒkho dǐcǎ꤮ tò̤.

⁵⁰ Dě Yṳ̌daphû̌ khlilè htǒotṳmṳ tacǎbò glèpî̌glèlṳ̂bò ayanu, kòyò htǒotapwa̤ glè sikè ta Yṳ̌daphû̌ htǒotoǒ ayanu awǒkhlo numî̌, sî sî̌yatò̤ ya?”

⁵¹ A hî̌ htǒo numî̌ a hî̌ tû̌ta a ta̤sî̌ta̤jònu mè̤tò̤. Cǒmara nohî̌bǎ pwǎ nû̌û. Bǎnu taně akûnu, a htû pwa̤tòlûhtò̌ hǐkǒdû̌gutṳ̌ dě a hî̌po̤phǎnǎwǐ ta Ye̤shǔ si ta Yṳ̌da khlilèphû̌ toǒ aya pě, hǐnupwǎ.

⁵² Htodě a ta̤hî̌po̤phǎ htǒonu, a topwǎpǒ̤ Ye̤shǔ si bǎ Yṳ̌daphû̌ toǒ ayanu mè̤tò̤, a sibǎdǒ Cǒmara aphû̌ali̤ htě a ǒ lǒkho dě shiga ahǔwa̤ toǒ ayaya. Ma̤pûhǐ a ma̤htûhtò̌ kòyò htǒotoǒ tṳmṳpa pě ayanu, kò bǎ ma̤si yǎ pě.

⁵³ Hǐnudě, tèhtò̌ sělě bǎnu ti̤ni̤ dě kòyò htû Yṳ̌daphû̌ hǐkǒdû̌ toǒnu, a shokhû̌ye̤yo̤ lǒkho Ye̤shǔ.

⁵⁴ Hǐnudě, Ye̤shǔ cû̌ nṳlîtîklî̌pe dě Yṳ̌daphû̌ toǒ akla tò̤. A cû̌ ǒkhǒkè dě lo̤měshǒkla akòshî̌ gûla̤ tò̤glò. A cû̌ ǒ do htǒotado numî̌ kò kaǎ nû̌ûta Epharedo, a cû̌ ǒplǒdǒ kû̌ta akhophijaû̌ toǒ bǎnu.

⁵⁵ Yṳ̌daphû̌ pwè htě kò kaǎ yǎta ta̤cû̌tûlû̌pwèdû̌htǒo a phǔhè dě, kòyò dophû̌shǒphû̌ ǒte̤we̤lṳ̂ bǎnu toǒ, htò̌plṳ̂ lǒkho dě Ye̤rǔshèlèwî̤. Bǎ pwè bǎhǒtò̤ akhanu, ma̤pûhǐ asî ma̤mṳ̂plîwǐ lǒkho asò̌phlǒ pwǐ ta̤saba la̤klo ǒnu dě a cû̌wǐ lǒkho Ye̤rǔshèlèwî̤.

⁵⁶ Asî kè̌lǎ lǒkho Ye̤shǔ. Dě bǎ asî ǒplǒ nû̌û dě ta̤lṳhtò̌hokû akhanu, a gwè kè̌khînû̌û tapwa̤ ta tapwa̤ dě a hî̌, “Sî gènè̤ hî̌tè? A hè pwè pě yahî̌?”

⁵⁷ Bǎnuakha pwa̤tòlûhtò̌ hǐkǒdû̌ toǒ ta Pharisè̌phû̌ toǒnu a hî̌lò̤ lǒkho ayo̤, ma̤pûhǐ pa pṳ̂nṳ Ye̤shǔnu dě, kòyò htě a kè̌shǐ nû̌û tapwa̤pwa̤nu, a tobǎ pwe̤ǐlṳ bǎ pa.