Jǎgomo̤ 2 - Kawyaw RC

¹ He pṳwè̤ sî꤮, sî mî̌ kòyò htě a yṳǎna̤ǎ Běcǎ Ye̤shǔkhrî̌stu dě a ǒ ta ta̤sîrîdû̌sîrîhtû tapwa̤ toǒ. Hǐnu akhû̌akhî, sî tobǎ kè̌dû̌kè̌pî̌tî̌ kò dǐpwǎ̤꤮ tò̤.

² Hî̌kû̌nǎ bǎ sî hè subusabaplǒ nû̌û akha, kòyò sò̌gini̤ dè hènṳ sîkla, dě tapwa̤ mî̌ a kûsǒ hǐdohǐyò̤ htě ale̤dû̌pwî̤htû, a tûplû̌wû tûplû̌hta toǒ, ahǔwa̤ tapwa̤ lè̌dě a hǒwi̤shèwè dě a kûsǒ pwǎ hǐdohǐyò̤htò̌yè̌ pwǎ.

³ Kòyò dû̌yò̤ tapwa̤ dě sî bè̌dubè̌na̤ kaǎshǔ yǎ, htohǒtò̤ sîkla tapwa̤nu a hî̌ nû̌û, “Hǎnòò̌ bǎ gògohtò̌yî̤wǒ akhû̌bǎo” dě a hî̌lè̌ kòyò hǒwi̤shèwènu tapwa̤ ta, “Ihtǒ ǒbǎnu,” mètò̤mî̌ “Hǎnòò̌ bǎ jûkhû̌ bǎ he khò̌lopo̤ kòshî̌bǎo,” a hî̌ hǐnu.

⁴ Sî ma̤kwè̌꤮ titè numî̌ sî sî̌ya tò̤ ya? Kòyò dě sîkla htǒotoǒnu, sî kè̌shǐkhǒ asî dě sî htûhtò̌ pwa̤cèrò kòyò htě a ǒ ta ta̤gènè̤ phû̌mò̤shî̌hto sîtoǒ hǒ.

⁵ Pṳwè̤mo̤pha sî꤮, gana̤de lǒkho. Kòyò htě a hǒwi̤shèwè dě hǎkhû̌ bǎotoǒ numî̌, ma̤pûhǐ asî ta̤yṳta̤nǎ shû̌shohtò̌ dě asî glè ma̤nṳ shiga htě Cǒmara olò̤nǎ bǎ kòyò ta a mo̤ǐ nû̌ûnu toǒ ayanudě, Cǒmara wû̌lǎ asî numî̌ sî sî̌ya te̤mǎtû̌ hǒ.

⁶ Pwǎ̤tadě kòyò shuphǔshèwèphû̌ toǒnu sî bè̌dubè̌na̤ asî tò̤. Kòyò htě a pè̤ǎpè̤o ma̤jîma̤jû sî numî̌ kòyò dû̌yò̤htò̌saphû̌ toǒnu pwǎ. Pwa̤ htě a cǐhè sî dě pwa̤cèròta̤phû̌ toǒ a lo̤mo̤ numî̌ asînu toǒ hǒ.

⁷ Kòyò htě a pi̤jishǐcǒ pî̌bò Khrî̌stu mi̤wî̤mi̤wǒ toǒnu mî̌ asî hǐnu toǒ hǒ.

⁸ Lî̤cahtǐkû hî̌, “Mo̤ǐ kòhǔwa̤ pwǐ na mo̤ǐlò̤ nana̤nu,” a hî̌ hǐnu. Sî dè jûle̤phî̌yo̤ mè̤mè̤̌ Cǒmara ashiga ata̤sû̌ta̤tòwò htǒo hî̌numî̌ sî ma̤to ta̤ hǒ.

⁹ Pwǎ̤ta sî dè kè̌dû̌kè̌pî̌tî̌ kò hî̌mò̌nu, sî ma̤ ta̤sǔ dě ta̤sû̌ta̤tòwò cèrò sî pwǐ kòyò ma̤sǔ ta̤sû̌ta̤tòwò tapwa̤nu hǒ.

¹⁰ Ûpè꤮ tapwa̤ bǎbǎ a dè ma̤sǔ ta̤sû̌ta̤tòwò tûmû hî̌nu, a ma̤sǔbò ta̤sû̌ta̤tòwò lǒ̤꤮ bò hǒ.

¹¹ Cǒmara hî̌, “Cû̌sǔnṳ ma̤ mamǔmakhû ma̤” a hî̌ hǐnu. Htodě a hî̌po̤, “Ma̤si ma̤ kòyò ma̤” a hî̌po̤ hǐnu. Hǐnudě sî dè cû̌sǔnṳ kòphû̌kòma tò̤ pwǎ̤tadě sî dè ma̤si kòyò hî̌mò̌nu, sî htûhtò̌ kòyò htě a ma̤sǔ ta̤sû̌ta̤tòwò tapwa̤ hǒ.

¹² Sè̌rè̌ǐ lǒkho sî ta̤hî̌bǎ ta sî ta̤ma̤ toǒnu, ma̤tè̤hî̌dě ta̤sû̌ta̤tòwò htě a ǐ kòyò ta̤pelesesǎ htǒo cèrò sî pě.

¹³ Ma̤tè̤hî̌dě kòyò tapwa̤pwa̤ a gwèbǎǐ kò tò̤nu, htû̌꤮ Cǒmara cèrò kòyònu tapwa̤ akhapěnu, a gwèbǎǐ nû̌û pě tò̤. Ta̤gwèbǎǐ kònu a ma̤pè̤ ta̤cèrò.

Ta̤yṳta̤nǎ ta ta̤ma̤

¹⁴ He pṳwè̤ sî꤮, kòyò tapwa̤pwa̤ dè hî̌ ta he ta̤yṳta̤nǎ ǒ a hî̌ pwǎ̤ta a dǔlṳ a ta̤yṳhtǒo ta a ma̤ ta̤wǒ toǒ tò̤ hî̌mò̌nu, abwǐasîrî ǒ dǐcǎ꤮ tò̤. A ta̤yṳta̤nǎ htǒonu a ma̤lû̌htò̌jò nû̌û tò̤.

¹⁵ Hî̌kû̌nǎ sî pṳwè̤ makhû mètò̤mî̌ sî pṳwè̤ mamǔ tapwa̤pwa̤nu a la̤kûla̤sǒ, a la̤ǎla̤o ti̤ni̤ ta ti̤ni̤ aya dè ǒlǒǒbe tò̤ hî̌phǒphǒmò̌nu,

¹⁶ Dě sîkla tapwa̤pwa̤nu a dè hî̌ nû̌û ta, “Gemo̤ gewǒ nî̌꤮, Cǒmara ǒkû̌ tû̌ta na pě, ma̤la̤wǒ nana̤ nî̌, dě ǎkǒobe tû̌ lǒkho nî̌꤮,” a hî̌ hǐnu pwǎ̤tadě sî dè ǐ asî la̤kûla̤sǒ, la̤ǎla̤o dǐcǎ꤮ tò̤ hî̌nu, abwǐasîrî ǒ dǐcǎ꤮ tò̤.

¹⁷ Ta̤yṳta̤nǎ numî̌ alò̤ta hǐnuhǒ. A dè ǒpwǎpǒ̤ ta̤yṳ tacǎpa, ta̤ma̤ dè ǒlṳ tò̤ hî̌numî̌ mî̌pwǎ ta̤yṳ htě a si pwǎ.

¹⁸ Hî̌kû̌nǎ kòyò tapwa̤ dè hî̌ ta, “Kòyò toǒǒnu a ǒ ta ta̤yṳ, toǒǒ mî̌ a ǒ ta ta̤ma̤wǒ ta̤.” Dè hî̌ dě he glè hî̌shǔ yǎta, dǔlṳ bǎ he ta na ta̤yṳ htě a shodo ta ta̤ma̤ htǒonu, dě he dǔlṳ bǎlè̌ na ta he ta̤yṳ htě a ǒ ta ta̤ma̤htǒo pě he glè hî̌shǔ yǎ hǐnu.

¹⁹ Na yṳǎ ta Běcǎ Cǒmara ǒtû̌ tapwǎ̤꤮ pa. Awǒhǒ. Khînǎkhîno toǒnu a yṳǎ sǒsǒta hǐnunu, htohǒtò̤ asî yṳǎ dě a ǐsha gònò̤gèglè.

²⁰ Kòyò ǒlû̌ǒkhlo, ta̤yṳta̤nǎ htě a ǒ ta ta̤ma̤ tò̤ toǒ numî̌ a ǒlû̌ǒkhlo pwǎ numî̌, na sò̌yṳ kè̌shǐ ya?

²¹ Papha Abraham dě꤮ wǐnu tapwa̤nu Cǒmara bè̌cǒbè̌tè̤ yǎ hî̌tè? A gana̤de Cǒmara ayo̤ dě bǎ a lṳhtò̌ aphû̌khû Isǎko ta̤lṳhtò̌wa̤khû̌ akhanu, Cǒmara bè̌cǒbè̌tè̤ nû̌û ta a ta̤ma̤htǒo akhû̌akhî pwǎ.

²² Na kè̌shǐ ata̤yṳ ta a ta̤ma̤htǒo ma̤plǒnû̌û ta̤hǒ. A ta̤ma̤htǒo a ma̤lǒbe bǎ nû̌û ta̤yṳ hǒ.

²³ Dě lî̤cahtǐ hî̌nǎ htǒonu a lǒbehè dě a hî̌, “Abraham yṳǎ Cǒmara ta ata̤yṳ akhû̌akhî, Cǒmara bè̌yǎ pwǐ kòcǒkòtè̤ tapwa̤nu hǒ,” a hî̌ hǐnu. Hǐnudě Abrahamnu kò kaǎ nû̌û ta Cǒmara a khobǒsû̌.

²⁴ Hǐnudě, sî kè̌shǐ ta Cǒmara bè̌cǒbè̌tè̤ kòyò tapwa̤pwa̤nu, a bè̌cǒbè̌tè̤ tû̌pwǎ nû̌û ta a ta̤yṳta̤nǎ htǒotacǎ pwǎnu mè̤tò̤. A bè̌cǒbè̌tè̤ nû̌û ta ata̤ma̤ htě a dǔlṳ ta a ǒ ta a ta̤yṳta̤nǎ htǒonu pwǎ.

²⁵ Mamǔpò̤lò̤ Rakhǎ numî̌ a lò̤tahǐnu hǒ. Ma̤pûhǐ Israelphû̌ htě a nṳkè̌sû̌ǐhǔ ta̤nu toǒ hǎhtò̌cû̌ lû̌htò̌bò̌kè ta klè̌ ahǔwa̤ tabo ayanu, a dǒshuǐ asî dě a ma̤jè asî akhû̌akhî, Cǒmara bè̌cǒbè̌tè̤ nû̌û ta a ta̤phî̌ta̤ma̤ htǒo akhû̌akhî hǒ.

²⁶ Hǐnuakho, ta̤yṳ htě a ǒ ta ta̤ma̤ tò̤nu, alò̤ta na̤klû htě ta̤htûpwa̤ ǒ nû̌ûlo̤ tò̤ dě a sikènu hǒ.