Jǎgomo̤ 1 - Kawyaw RC

¹ He mî̌ Jǎgomo̤, he htû Cǒmara ta Běcǎ Ye̤shǔkhrî̌stu ajûphû̌ tapwa̤. He hî̌mo̤hî̌wǒ cû̌ bǎ Cǒmara akòyò khlilè shǐginǐ̤mṳ htě a cû̌ǒpîshîpò̤wò̤ lǒkho gûla̤ pṳ̂̌꤮ tò̤glò toǒ aǒ.

Ta̤yṳta̤nǎ ta ta̤sî̌ta̤jò

² He pṳwè̤ sî꤮, bǎ sî kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ pṳ̂̌꤮ tacǎ hèbǎ sî akhanu, bè̌ yǎ pwǐ ta̤sò̌le̤sò̌lò̤ adû̌ tacǎ ta sîyanu nî̌꤮.

³ Ma̤tè̤hî̌dě, bǎ sî kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ sèlèkè̌ sî ta̤yṳta̤nǎ htǒoakhanu, a ǐǒhtò̌ dû̌khlopo̤ sî ta̤khòsò̌do toǒ pwǎnu sî sî̌yatû̌ hǒ.

⁴ Ma̤pûhǐ sî ta̤ǒhtûpwa̤hǎnòò̌ htǒotoǒ yû̌gilò̤to̤ pû dî̌kî̌꤮ tò̤, ma̤pûhǐ a tobǎ ta Cǒmara asò̌phlǒ, htohǒtò̤ sî dû̌htò̌ lǒbekû̌ tû̌ta ta̤pṳ̂̌꤮ tacǎ ayanu, sî tobǎ jipwi̤ khòsò̌do to̤ lǒkho dě a gutṳ nî̌꤮.

⁵ Pwǎ̤tadě sîklanu, kòyò tapwa̤pwa̤ dè lo̤bǎ ta̤sî̌khû̌sî̌ya dèhî̌dě, a tobǎ kwihtò̌ Cǒmara ǒ dě Cǒmara ǐlò̤tû̌ yǎ pě. Ma̤tè̤hî̌dě, Cǒmara sǎhtǎshǔ kòyò htě a kwihtò̌ nû̌ûnu a ǒdǐpwǎ̤꤮ tò̤. A gwèbǎǐ kò pṳ̂̌꤮ tapwa̤, dě a sò̌yṳ ǐ kò pṳ̂̌꤮ tapwa̤.

⁶ Pò̤̌ta, bǎ sî kwisaba akhanu, sî bǎ ǒ ta ta̤yṳ, sî tobǎ sò̌phlǒwò̌wè̌ dî̌kî̌꤮ tò̤. Kòyò htě a sò̌phlǒwò̌wè̌ toǒnu, alò̤ta gili̤sǎ hèpěpǒshi dě shidû̌shite̤we̤ akûnu toǒ pwǎ.

^7-8 Kòyò htě alò̤ta shipěpǒ htǒotoǒnu, a nî̤bǎ ta̤ tacǎcǎ dě Běcǎ a ǒ pěnu, a to gènè̤ tò̤, ma̤tè̤hî̌dě a ma̤ta̤ titètè̌꤮ nu, asò̌phlǒ ǒplṳ̂ dě asò̌phlǒ nûhtonûlò̤ akhû̌akhî, a nî̤bǎ ta̤ dǐcǎ꤮ tò̤.

Kòyò hǒwi̤shèwè ta kòyò dû̌yò̤htò̌sa

⁹ Khrî̌stuphû̌ htě a hǒwi̤shèwè tapwa̤nu, Cǒmara bè̌htò̌yî̤ yǎ pě, hǐnudě a bǎ sò̌le̤sò̌lò̤.

¹⁰ Kòyò dû̌yò̤htò̌sa htě Cǒmara bè̌phǔlò̤ yǎ tapwa̤nu, a tobǎ sò̌le̤sò̌lò̤ pwǎ, ma̤tè̤hî̌dě kòyò dû̌yò̤htò̌sa toǒnu a nolòte̤sikè sǒsǒta mi̤sǎwû̌phonu toǒ pě.

¹¹ Lṳmṳhtò̌ dě agûnokhwekè mi̤ toǒ akhû̌akhî, apho toǒ lòte̤sikèbò, dě a ta̤wî̤ta̤tè̤ toǒ hǎmǎkèbò pwǎ. Hǐnuakho bǎ kòyò dû̌yò̤htò̌sa toǒ cû̌ ma̤guma̤khè̌ ta̤ akhapěnu, a sikè dǒ hǐnu pě.

Ta̤sèlèkè̌ ta ta̤lǒǎplò̤ǎ

¹² Kòyò htě a khòsò̌do toǒnu, htû̌꤮ a kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ akhapěnu, a nî̤bǎ ta̤howi̤ pě. Ma̤tè̤hî̌dě bǎ asî ma̤pî̌htokè ta̤pò̤ta̤sha ta̤lǒǎplò̤ǎ pwǐhè̌o akhanu, Cǒmara ǐ asî ta̤htûpwa̤ tûjûpwa̤ asû htě a olò̤ ta a ǐ kòyò htě a mo̤ǐ nû̌ûnu toǒ pě.

¹³ Kòyò htě a kè̌shǐ shěto̤bǎ ta̤lǒǎplò̤ǎ pwǐhè̌o toǒnu, a tobǎ hî̌ ta, “Ta̤htǒomî̌ a ǒ dě Cǒmara a ǒ hè pwǎ,” a bǎ hî̌ hǐnu tò̤. Ta̤lǒǎplò̤ǎ phû̌mò̤shî̌htonu a lǒhtěcǐbò̌ ta Cǒmara tò̤. Htohǒtò̤ Cǒmara sana̤ tû̌nu, a htû̌sǒbǎ phû̌mò̤ nǒ kò dǐpwǎ̤꤮ tò̤.

¹⁴ Pwǎ̤tadě bǎ kòyò pṳ̂̌꤮ tapwa̤ kè̌shǐ shěto̤bǎ ta ta̤lǒǎplò̤ǎ akhanu, ana̤klû a ta̤sò̌yṳ phû̌mò̤ tû̌nu toǒ cǐnṳhtěnṳ dǒpwǎ nû̌û.

¹⁵ Nǒkòdě bǎ kòyò htǒotapwa̤ ma̤ a ta̤sò̌yṳ phû̌mò̤ htǒoakhanu, a dǔlṳhtò̌ nû̌û ta̤sǔ, htotaplǎdě ta̤sǔ htǒo pǒǐbò nû̌ûsò̌phlǒ dě aphû̌ǒlò̤ tû̌ ta̤si tûjûpwa̤ hǒ.

¹⁶ He pṳwè̤ he mo̤ǐ sî꤮, ta̤ htě a totò̤ toǒnu, cû̌yṳǎ lǒkho pûyǎ ma̤ nî̌꤮.

¹⁷ Sû htě awǒ dě a lǒbebò numî̌ Cǒmara htě a bǒlò̤ lṳmṳ, la ta shǎ htǒotoǒ tapwa̤ ǐlò̤ pwǎ. Cǒmara ala̤klo htû̌lè̌ tèplè̌khǒkè pwǐ ta̤lî yo̤ǔ htû̌lè̌khǒkènu tò̤.

¹⁸ Dě pa gana̤de ta̤sò̌le̤sò̌lò̤ awi̤akè̌ ta̤te̤ta̤mǎ akhû̌akhî, Cǒmara ǐhtûhtò̌ pa ta aphû̌ jǔ꤮ tû̌ pwǐ asò̌phlǒnu hǒ. Ma̤pûhǐ pa htûhtò̌ sǒsǎ htě asǎwǐgutṳ̌ toǒ dě ta̤bǒlò̤ lǒ̤꤮ bò htǒotoǒ aklanu, a ǐhtûhtò̌pwǎ pa ta aphû̌.

Ta̤gana̤de ta ta̤jûle̤phî̌yo̤

¹⁹ He pṳwè̤ he mo̤ǐ sî꤮, to̤ǐ lǒkho yo̤sǎ htǒotûmû nî̌꤮. Kòyò pṳ̂̌꤮ tapwa̤ tobǎ gana̤de te̤mǎ, a tobǎ gènè̤hî̌bǎ lǒkho dě a tobǎ sò̌phlǒdû̌htò̌phwè tò̤.

²⁰ Ma̤tè̤hî̌dě, kòyò htě sò̌phlǒdû̌ toǒnu, a dǔlṳhtò̌jò ta̤ǒhtûpwa̤ acǒatè̤ htě Cǒmara sò̌yṳ noǒhtûpwa̤ htǒonu dǐkhò̌꤮ tò̤.

²¹ Hǐnudě wîkèbò ta̤wi̤japhǎkò htě sî ma̤ sala̤ yǎnu toǒ ta sî la̤klo lǒ̤꤮ bò htě a phû̌mò̤shî̌htonu toǒ. Dě shò̌lò̤ lǒkho sî sò̌phlǒ dě gana̤de yṳǎ lǒkho Cǒmara ale̤ayo̤ htě a shǒlò̤ nû̌ûdě sî sò̌phlǒkû htǒonu toǒ. Ale̤ayo̤ htǒonumî̌ a ma̤lû̌htò̌ge bò̌jò sî.

²² Sî gana̤de pwǎpǒ̤ Cǒmara ale̤ayo̤ dě sî dè jûle̤phî̌yo̤ gûma̤kû̌ pwǐ a hî̌nu tò̤ hî̌numî̌ sî lòho lò̤tû̌ sîna̤ hǒ. Sî tobǎ gana̤de gûma̤kû̌ pwǐ Cǒmara ale̤ayo̤ hî̌nu.

²³ Kòyò htě a gana̤de cè̌cè̌pwǎ Cǒmara ayo̤ dě a gûma̤ kû̌kò tò̤ toǒ numî̌ alò̤ta kòyò htě a kè̌ ami̤sǎ ta me̤dǔ toǒnu pwǎ.

²⁴ A kè̌hto ana̤ ta me̤dǔ dě a hǎhtò̌cû̌ tephekè akha, a kè̌shǐ lǒ̤꤮ bò dě me̤dǔkûnu toǒ, a shope̤nǎkèpwǎ taplǎ pa.

²⁵ Ta̤sò̌le̤sò̌lò̤ awi̤akè̌ mî̌ Cǒmara a ta̤sû̌ta̤tòwò htě alǒabe ta a ma̤lû̌htò̌ge kòyò dě ta̤sǔta̤plě akû. Kòyò tapwa̤pwa̤ a sî̌ya te̤mǎwǒ ta̤sû̌ta̤tòwò htǒo dě a shope̤nǎkè ta̤sû̌ta̤tòwò htǒo tò̤ toǒ, htohǒtò̤ a gana̤de gûma̤ ta̤sû̌ta̤tòwò htǒotapwa̤nu, Cǒmara howi̤ ata̤ma̤ htǒonu pě.

²⁶ Kòyò tapwa̤pwa̤ dě a gènè̤lò̤ ana̤ ta a mî̌ kòyò subusabawǒ mè̤mè̤̌ ta̤ tapwa̤ pwǎ̤tadě a dè sè̌rè̌ǐ a ta̤hî̌bǎ tò̤ hî̌nu, a subusabawǒ ta̤ htǒonu, ale̤dû̌pwî̤htûpe dǐcǎ꤮ tò̤, dě a htûpwǎ kòyò htě a lòhǎlòho lò̤tû̌ ana̤ tapwa̤ pwǎ.

²⁷ Ta̤subusaba htě pha Cǒmara bè̌ yǎta ta̤ htě a mṳ̂plî lǒbe toǒ numî̌ mî̌pwǎ ta̤kè̌ǐkhwè̌ǐ phû̌ǒkwè̌ toǒ ta mamǔǒkhwè̌ htě a to̤bǎ ta ta̤pò̤ta̤sha toǒ, htohǒtò̤ kòyò htě a khòǐpè̤ ana̤ dě a ǒtepheyî̤bò̌ ta hǎkhû̌ a ta̤phû̌mò̤shî̌hto sînu toǒ hǒ.