Htû̌sò̌htò̌ 96 - Kawyaw RC

Cǒmara mî̌ khwǐ htě ata̤sîrîdû̌sîrîhtû

¹ Sò̌po̤htò̌ Cǒmara tûjûpwa̤ ta ta̤sò̌po̤ asa. Kǒ hǎkhû̌phû̌ lǒ̤bò sî, sò̌po̤htò̌bòmò̌ Cǒmara tûjûpwa̤.

² Sò̌po̤htò̌ Cǒmara tûjûpwa̤, htû̌sò̌ǐmò̌ ami̤. Pṳ̂̌ni̤ni̤ pwe̤ǐlṳmò̌ ata̤ma̤lû̌htò̌ge.

³ Pwe̤ǐlṳbòmò̌ ata̤sîrîdû̌sîrîhtû ta khlilèphû̌ toǒ. Pwe̤ǐlṳbòmò̌ ata̤ma̤ cǒklî̌kî̌ya htǒotoǒ ta kòyòlǒ̤bò.

⁴ Cǒmara tûjûpwa̤ mî̌ adû̌ayǒ, agwa htû̌sò̌ǐ. Kò to ǐsha bè̌dubè̌na̤khlo yǎta Cǒmara ahǔwa̤ lǒ̤꤮ bò.

⁵ Khlilèphû̌hǔwa̤ toǒ acǒmara mî̌ pwa̤yo̤pwa̤gî lǒ̤bò pwǎ. Cǒmara tûjûpwa̤ lè̌dě a bǒlò̤ mǒkhû̌.

⁶ Ta̤lîta̤rakha ta ta̤sîrîpo̤phǎ toǒnu aǒbò dě alo̤mo̤. Ta̤shû̌ta̤sho ta ta̤sîrîdû̌sîrîhtû toǒ ǒbò dě ta̤lṳhtò̌ho cahtǐ akû.

⁷ Kǒ khlilèphû̌ ǒ dě hǎkhû̌ toǒ lǒ̤bò sî꤮, htû̌sò̌ǐ lǒkho Cǒmara tûjûpwa̤. Htû̌sò̌ǐ lǒkho Cǒmara tûjûpwa̤ ata̤sîrîdû̌sîrîhtû ta ata̤po̤ta̤phǎshû̌sho.

⁸ Htû̌sò̌ǐmò̌ Cǒmara tûjûpwa̤ htě a sîrîdû̌sîrîhtû htǒotapwa̤ ami̤. Phî̌hèǐmò̌ ta̤lṳtòhtò̌, hènṳmò̌ dě ata̤lṳhtò̌ho we̤kû.

⁹ Gene̤lò̤ sabahtò̌mò̌ Cǒmara tûjûpwa̤ htě a ǒ ta acahtǐ, ata̤lîta̤rakha. Kǒ hǎkhû̌phû̌ lǒ̤꤮ bò toǒ, ǐsha gònò̤gèglèbò lǒkho.

¹⁰ Pwe̤ǐlṳmò̌ khlilèphû̌toǒ akla ta, “Cǒmara tûjûpwa̤ pǒ ta̤.” A bǒlò̤ měglewǒ hǎkhû̌ akhû̌akhî, a guyṳjòpe tò̤. A glè cèròtocèròbǎ kòyò lǒ̤꤮ bò.

¹¹ Kǒ mǒkhû̌ sò̌le̤sò̌lò̤ mò̌, hǎkhû̌ mo̤sû̌mo̤sò̌ mò̌. No kaǎgu htû̌sò̌ǐbòmò̌ shidû̌shite̤we̤ ta lǒ̤꤮ bò ta̤phû̌ta̤li̤ ǒ bǎ shiklanu toǒ.

¹² Noyi̤kǒ mo̤sû̌mo̤sò̌bò mò̌ ya̤dakhû̌ ta lǒ̤꤮ bò ta̤ htě a ǒ bǎ ya̤dakhû̌nu toǒ. Nosò̌le̤sò̌lò̤ sò̌po̤htò̌bò mò̌ sǒmṳwû̌bo lǒ̤꤮ bò ǒ dě mi̤klanu toǒ.

¹³ Cǒmara tûjûpwa̤ hè akhû̌akhî, asî glè sò̌po̤ htû̌sò̌ǐbò nû̌ûlo̤mo̤. A glè hècèròto cèròbǎ hǎkhû̌. A glè hèlò̤ pǒ ǐtû̌ kòyò toǒ ta ata̤cǒta̤tè̤.