Htû̌sò̌htò̌ 94 - Kawyaw RC

Cǒmara tûjûpwa̤ mî̌ pwa̤cèrò ta̤ lǒ̤꤮ bò

¹ Kǒ Cǒmara tûjûpwa̤, na mî̌ Cǒmara htě ama̤gekhîshǔ kò, kǒ Cǒmaradû̌ htě a ma̤geshǔ ta̤. Ǐ lṳhtò̌mò̌ na ta̤sîrîdû̌sîrîhtû.

² Kǒ pwa̤ htě acèrò hǎkhû̌, ma̤mò̌. Ma̤ geshǔ mò̌ kòyò htě a phî̌dû̌phî̌htû ana̤nu toǒ pwǐ asî to khòbǎnu.

³ Kǒ Cǒmara tûjûpwa̤, kòyòphû̌mò̤ htǒotoǒ sò̌le̤sò̌lò̤ yî̤pe pwî̌tè? Kǒ Cǒmara, a glè yî̤pe pwî̌tè?

⁴ Asî bè̌dû̌bè̌htû ana̤nu a yî̤pe pwî̌tè? Lǒ̤꤮ bò kòyòphû̌mò̤ toǒ hî̌bǎ htû̌sò̌ yî̤pe pwî̌tè?

⁵ Kǒ Cǒmara tûjûpwa̤, asî ma̤jîma̤jû, ma̤nûma̤cě mè̤mè̤̌ nakòyò.

⁶ Asî ma̤sima̤hǎmǎbò mamǔǒkhwè̌, phû̌ htě shodopha, shiphû̌gaphû̌nu toǒ.

⁷ Asî hî̌ ta, “Cǒmara tûjûpwa̤ kè̌shǐ nǒtò̤. “Yǎ̤kò acǒmara sî̌ya nǒtò̤tò̤.”

⁸ Kǒ kòyòǒlû̌ǒkhlo sî, sî̌yaphlophǎ mò̌ lǒkho ta̤ tò̤ya. Kòyòǒò̌ toǒ, sî glè̌ sî̌yaphlophǎ kû̌kò htû̌꤮ bò̌hòtè pě?

⁹ Cǒmara mî̌ a bǒlò̤ nò̌kulǎ, a gana̤dejò tò̤ sî gènè̤ ya? A mî̌ pwa̤bǒlò̤ mi̤sǎphlǒ, a kè̌shǐjò tò̤ sî gènè̤ ya?

¹⁰ A mî̌ pwa̤sû̌ǐwǒge khlilèphû̌ toǒ, sî gènè̤ ta a plèjò kò tò̤ya? A mî̌ pwa̤ htě a sû̌ǐ bǎ kò ta̤sî̌ta̤jò, sî gènè̤ ta ata̤sî̌khû̌sî̌ya ǒnǒ tò̤ya?

¹¹ Cǒmara tûjûpwa̤ sî̌ya kòyòhǎkhû̌phû̌ ata̤gènè̤ toǒ. A sî̌ya ta asî ta̤gènè̤ toǒnu anòdû̌ pwǎ.

¹² Kǒ Cǒmara tûjûpwa̤, kòyò htě na sû̌ǐwǒge yǎ dě na sû̌ǐ bǎ asî ta nata̤sû̌ǐnu toǒ mî̌ a nî̤bǎ ta̤howi̤.

¹³ Na ma̤kwaǐ asî dě ata̤pò̤ta̤sha akû to̤htû̌ kò phoyo̤hto hǎkû ta kòyòphû̌mò̤ la̤lòte̤si ayanu pě.

¹⁴ Cǒmara tûjûpwa̤ wîkè nǒ akòyò toǒ tò̤. A bè̌kè nǒ kòyò htě a wû̌lǎnu toǒ dî̌kî̌꤮ tò̤.

¹⁵ Ta̤cèrònu atoabǎ gesǒ pě. Lǒ̤꤮ bò kòyòcǒkòyòtè̤ toǒ jûle̤phî̌yo̤kû̌bòtû̌ pě.

¹⁶ Ûpè tapwa̤ glè ihtǒ ma̤kwadǐdòshǔ bǎ he ta kòyòphû̌mò̤nu toǒ pè? Ûpè tapwa̤ glè ihtǒ shěshǔ bǎ he ta kòyò ma̤ ta̤phû̌mò̤shî̌htonu toǒ pè?

¹⁷ Cǒmara tûjûpwa̤ dè ma̤jè he tò̤ hî̌mî̌, he sikèhtohǒ.

¹⁸ Kǒ Cǒmara tûjûpwa̤, bǎ he hî̌ ta, “He glè̌ si hǒ” akhanu, nata̤mo̤ǐ htě ahǎbòjò tò̤ htǒo a ma̤jè he.

¹⁹ Bǎ he bǎgubǎgè mè̤mè̤̌ akhanu, na ma̤mo̤ǐ hesò̌phlǒ, na ma̤sò̌le̤sò̌lò̤ he.

²⁰ Pwa̤ pǒ ta̤ htě aphû̌mò̤shî̌hto toǒnu, a htûjò nakhobǒsû̌ tò̤. Asî htû̌tèplè̌ noǎtonoǎbǎ kû̌kò ta̤sû̌ta̤tòwò tò̤.

²¹ Asî shokhû̌ye̤yo̤ ma̤si kòyòcǒkòyòtè̤ toǒ. Asî cèròsi kòyò htě ata̤sǔ ǒtò̤ toǒ.

²² Pwǎ̤tadě Cǒmara tûjûpwa̤ mî̌ hewî̤we̤dû̌ atònò. Hecǒmara mî̌ a htû lo̤dû̌ hela̤ǒtûdû.

²³ Cǒmara ma̤ geshǔ kòyòphû̌mò̤nu toǒ pwǐ asîta̤sǔ ǒnu pě. Asî ta̤sǔ akhû̌akhî, Cǒmara ma̤sikèbò asî pě. Cǒmara tûjûpwa̤, pacǒmara ma̤hǎmǎkèbò asî pě.