Htû̌sò̌htò̌ 92 - Kawyaw RC

Ta̤htû̌sò̌ǐ lî̤sò̌po̤

Sò̌po̤ ta̤sò̌po̤ htǒoto̤to̤ bǎ mṳni̤dǔ akhanu.

¹ Hî̌bwǐhî̌sîrîhtò̌ Cǒmara tûjûpwa̤, sò̌po̤ htû̌sò̌ǐ Cǒmara htě adû̌ahtûkhlo kò numî̌ awǒ mè̤mè̤̌.

² Lṳmṳlî dě pwe̤ǐlṳ nata̤mo̤ǐ htě ahǎbòjò tò̤. Lṳmṳhǎ dě dǒhtû̌ǐlṳ nata̤cǒtè̤tayo̤ numî̌ awǒ mè̤mè̤̌.

³ Sò̌po̤htû̌sò̌ǐ yǎta ta̤dǒta̤ǔ htě apli̤ǒ aboshǐ, tǐtute̤gwe htě apo̤nî̤wǒ꤮ numî̌ awǒ mè̤mè̤̌.

⁴ Kǒ Cǒmara tûjûpwa̤, na ma̤ sò̌le̤sò̌lò̤ he ta nata̤ma̤. Nacǔde ata̤ma̤ toǒ akhû̌akhî, he sò̌le̤sò̌lò̤ sò̌po̤ htû̌sò̌ǐ na.

⁵ Kǒ Cǒmara tûjûpwa̤, nata̤ma̤ toǒnu adû̌ayǒ mè̤mè̤̌. Nata̤gènè̤ toǒnu꤮ mî̌ adû̌ahtû mè̤mè̤̌.

⁶ Ta̤htě kòyòtûû toǒ sî̌ya kû̌ tò̤, Kòyòpè̌ǒò̌ toǒ mèpa̤jò kû̌ tò̤ numî̌,

⁷ Kòyòphû̌mò̤ toǒ dǒhtò̌ lò̤kèta mi̤, Kòyòjîkòjû lǒ̤꤮ bò toǒ phohtò̌ lò̤kèta ta̤pho toǒ pwǎ̤ta, Cǒmara ma̤pî̌kèbò asî tûjûpwa̤ pěnu hǒ.

⁸ Kǒ Cǒmara tûjûpwa̤, na lè̌dě, kò glè bè̌dû̌bè̌htûtû̌ na tûjûpwa̤.

⁹ Kǒ Cǒmara tûjûpwa̤, kè̌mò̌ pwa̤sò̌khě nanu toǒ. Asî pè̤kè mè̤mè̤̌. Bò pwa̤ ma̤ ta̤phû̌mò̤shî̌hto toǒnu, a nûpò̌nûshîbò hǒhǒ.

¹⁰ Na ǐshû̌ǐshohtò̌ he lò̤ta pṳ̂mi̤. Na plṳ he ta htǒshi acè̌.

¹¹ He kè̌shǐ ta pwa̤sò̌khě he toǒ lò̤jûkèbò. He gana̤de kòyòphû̌mò̤ htě a hèshě he toǒ a yi̤kǒ ta a lò̤jûhǒ.

¹² Pwǎ̤tadě kòyòcǒkòyòtè̤ toǒ dû̌htò̌ sǒsǒta sǒmṳ htě a sǎhtò̌phohtò̌ wǒnu pě. A dû̌htò̌ lò̤kèta sǒmṳdû̌mṳtònò dě Lebanokhololo̤nu pě.

¹³ Kò cû̌shǒ asî dě Cǒmara tûjûpwa̤ ahǐwe̤kû. Asî glè mṳwî̤mṳwǒ mṳdû̌mṳhtû bǎ Cǒmara we̤kû.

¹⁴ Asî mo̤pwa̤hǒ pwǎ̤tadě a sǎhtò̌phohtò̌bò̌pe. Asî mṳdû̌mṳtònò sǐsodǒjasǎhtò̌ pě.

¹⁵ Asî glè hî̌lṳhtò̌ ta Cǒmara tûjûpwa̤ mî̌ acǒatè̤. A mî̌ helo̤dû̌, a ma̤toma̤bǎbò.