Htû̌sò̌htò̌ 91 - Kawyaw RC

Cǒmara mî̌ pwa̤ma̤kwaǐ pa

¹ Kòyò hè ǒ dě Cǒmara htě adû̌ahtûkhlo kò ala̤ǒhǔ měgle akû toǒ꤮, asî glè hèǒkǔsǎbò̌ nǒ dě Cǒmara htě apo̤phǎshû̌sho htǒotapwa̤ ata̤ma̤kwaǐ ala̤ pě.

² He hî̌ Cǒmara tûjûpwa̤ ta, “Na mî̌ hela̤ǒhǔ aměgle, hewî̤we̤dû̌ dě atònò. “Na mî̌ hecǒmara htě he yṳǎnǎla̤ǐ.”

³ Cǒmara glè ma̤lû̌htò̌ge na dě kò dò̌hǔ htò̌glonu toǒ acǔdekû ta ta̤shasila̤ toǒ acǔdekû.

⁴ A glè hǔbǐ na ta aděge, Na ǒtûdûbǎ dě aděla̤. Ata̤cǒtè̤tayo̤nu asǒsǒta nagòtò̤, la̤ma̤kwaǐ na.

⁵ Ta̤sò̌gònò̤ ǐsha hè bǎ lṳmṳkhǐkhanu bǎbǎ, pla̤ htě kò khǎ yǎ bǎ lṳmṳshanu bǎbǎ, na la̤ǐsha ǒnǒ dǐcǎ꤮ tò̤.

⁶ Ta̤shasila̤ hè dě ta̤khǐklanu bǎbǎ, khînǎmo̤pha htě a ma̤si kò bǎ lṳmṳshanu bǎbǎ, na la̤ǐsha ǒnǒ dǐcǎ꤮ tò̤.

⁷ Kòyò lòkhǔsi apwa̤ tîrî̌ dě nacǔcocî̌ tokho bǎbǎ, kòyò lòkhǔsi apwa̤ tòsò̌ dě nacǔdemû tokho bǎbǎ, a hèbǎto̤ nǒ na tò̤.

⁸ Cǒmara cèrò kòyòphû̌mò̤ toǒnu na glè kè̌shǐ yǎta nami̤sǎ. Na glè sî̌yate̤mǎ ta nana̤.

⁹ Na nohtû Cǒmara tûjûpwa̤, Cǒmara htě adû̌ahtûkhlo kò ta nala̤ǒhǔ aměgle, la̤ma̤kwaǐ nagûla̤ akhû̌akhî,

¹⁰ Ta̤phû̌mò̤shî̌hto hèbǎ nǒ na dǐcǎ꤮ tò̤. Ta̤shasila̤ hèphǔ dě nahǐkòshî̌ dǐcǎ꤮ tò̤tò̤.

¹¹ Na cû̌ bǎtètè̌꤮ bǎbǎ, Cǒmara glè nokè̌ǐkhwè̌ǐ ma̤kwaǐ na ta amǒkhû̌tanaphû̌.

¹² Ma̤pûhǐ na khò̌lòpo̤ bǎsha ta lo̤ tò̤nu, asî phǒhtò̌shǔtû̌ na pě.

¹³ Na glè khayî̤cû̌bò̌ dě sî̌ò̌ ta wṳ̂phû̌mò̤ toǒ alo̤. Na glè yî̤pwî̌cû̌bò̌ sî̌ò̌dû̌ toǒ ta wṳ̂sapo̤pṳ sîtoǒ.

¹⁴ Cǒmara tûjûpwa̤ hî̌, he glè ma̤lû̌htò̌ge kòyò htě a mo̤ǐ he. He glè ma̤kwaǐ kòyò htě a sî̌yate̤mǎwǒ hemi̤.

¹⁵ Bǎ na kwigwèbǎǐ he akhanu, he glè gana̤deshǔ. Bǎ na shěto̤bǎ ta ta̤pò̤ta̤sha akhanu, he glè ǒkû̌ ta na. He glè ma̤lû̌htò̌ge na, he glè bè̌htò̌yî̤ na.

¹⁶ “He glè noǒhtûpwa̤ něhtûlahtû na ta ta̤sò̌phlǒmo̤. “He glè dǔlṳ sî̌ya na ta he mî̌ pwa̤ htě a ma̤lû̌htò̌ge na.”