Htû̌sò̌htò̌ 90 - Kawyaw RC

Ta̤htû̌sò̌ǐalî̤ lǐ̤bǎ tabǎ Cǒmara htě ahtûpwa̤ tûjûpwa̤ ta kòyòhǎkhû̌phû̌ htě ahtûpwa̤ teděsǎ awi̤akè̌

Cǒmaradû̌ akòyò Mǒ̤jè ata̤kwisaba

¹ Kǒ Běcǎ ta̤adû̌, na htûhtotû̌ pagûla̤ la̤ǒtûdû pṳ̂̌꤮ tuhtu.

² Dě kholo sîtoǒ ǒhtûhtò̌ hǒtò̤, na bǒlò̤ hǎkhû̌ hǒtò̤ akhanu, Na mî̌ Cǒmaradû̌ htě aǒhto tûjûpwa̤, aǒ sělěhèpo̤ tûjûpwa̤.

³ Na nohtûhtò̌ gesǒ kòyòhǎkhû̌phû̌ ta lo̤hǎ. Na hî̌ ta, “Kòyò htě asijò toǒ, gehtûsǒ lo̤hǎnu.”

⁴ Dě nayanu, aně tîrî̌ mî̌ asǒsǒpwǎ ta bǎhǎno dě a cû̌ tûlû̌phwèkè. Alò̤pwǎta tûkû̌wo̤ teděsǎ pwǎ.

⁵ Na nosisumṳbò kòyòhǎkhû̌phû̌ lò̤ta hǎmoǒmi̤mò̤nu. Asî sǒsǒpwǎta ta̤pho dě aphohtò̌ lṳmṳlî, anokè lṳmṳbǎ.

⁶ Lṳmṳlîdě phohtò̌wî̤wǒ, lṳmṳhǎdě anokhwesi.

⁷ Nata̤sò̌phlǒdû̌ akhû̌akhî, pa to̤bò ta ta̤pî̌ta̤lṳ̂. Nasǔshidû̌ akhû̌akhî, pa sò̌gònò̤ ǐshabò.

⁸ Na kè̌shǐ pǒ̤꤮ ta̤sǔta̤plě htě pa cû̌ma̤sǔma̤plěnu mè̤ tò̤. Na kè̌shǐ ta̤sǔta̤plě htě pa ma̤hǔma̤sè̌nu.

⁹ Na sò̌phlǒdû̌ pa akhû̌akhî, lǒ̤꤮ bò paněpala toǒ aphǒtǔ. Paněpala toǒnu, a hǎbòphwè lò̤ta sǎdǒ tuhu.

¹⁰ Paněpala mî̌ ahtû gutṳ̌pwǎ susǒ tishi. Pa dè khû̌ǎshû̌sho hî̌mî̌ paněpala mṳni̤ htûto̤ ashilǐ̤sǒ. Pwǎ̤tadě alǒbe còcè̌꤮ pwǎ ta ta̤bǎgubǎgè, ta̤jîta̤jû. Ǒyî̤tò̤ paněpala mṳni̤ phǔkè dě pasihǎmǎkèbò.

¹¹ Ûpè tapwa̤ sî̌ya lǒbebò̌ nata̤sò̌phlǒdû̌ asîrîshû̌sho htǒonu pè? Na sò̌phlǒdû̌ mè̤mè̤̌ htǒonu a htûhtò̌bò kò la̤ǐsha bè̌dubè̌na̤ na.

¹² Ma̤pûhǐ pa sî̌yaǐ paněpala phǒtǔ pwî̌꤮ tè ani̤nu, sû̌ǐtòwòǐ pa. Pě꤮ dě pa nî̤bǎ ta̤sî̌ta̤jò dě pasò̌phlǒkû.

¹³ Kǒ Cǒmara tûjûpwa̤, htû̌tiwǐ getosǒ mò̌ pa. Pa bǎ khòjîkhòjû yî̤po̤ pě pwî̌꤮ tè? Gwèbǎǐ napwa̤ma̤ta̤phû̌ htǒo toǒ tò̤ya.

¹⁴ Ma̤pûhǐ pa sò̌po̤htò̌ ta ta̤sò̌le̤sò̌lò̤ ta̤mo̤sû̌mo̤sò̌ pṳ̂̌꤮ ti̤ni̤ ayanu, lṳmṳlîlî꤮ ma̤mo̤ pasò̌phlǒ ta nata̤mo̤ǐ htě ahǎbòjò tò̤ htǒo.

¹⁵ Ma̤ sò̌le̤sò̌lò̤ mṳni̤mṳsa yî̤ bǎgesǒ pa pwî̌꤮ na nokhòbǎ pa ta̤jîta̤jû, ta̤pò̤ta̤sha aněala yî̤nu.

¹⁶ Dǔlṳ bǎ napwa̤ma̤ta̤phû̌ toǒ ta nata̤ma̤ cǒklî̌kî̌ya. Dǔlṳ bǎ nasîrîdû̌sîrîhtû ta asîphû̌asîli̤.

¹⁷ Pa glè nî̤bǎtû̌ Běcǎ ta̤adû̌, pacǒmara ata̤ma̤mo̤ma̤wǒ pa. Pa ma̤ hî̌tètè̌꤮ bǎbǎ, nodû̌htò̌htûhtò̌ bǎ pa. Pa ma̤ hî̌tètè̌꤮ bǎbǎ, nodû̌htò̌htûhtò̌ mè̤mè̤̌ bǎ pa nî̌.