Htû̌sò̌htò̌ 89 - Kawyaw RCCǒmara tûjûpwa̤ ata̤olò̤ ta Khwǐdǎ̤wi̤ Esarǎhǐ khlilèphû̌ Etana ata̤sò̌po̤ htǒoto̤to̤ mî̌ Ebrephû̌yo̤nu, a kaǎ nû̌û ta Masakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ. 1 Kǒ Cǒmara tûjûpwa̤, nata̤mo̤ǐ htě ahǎbòjò tò̤ htǒonu, he glè sò̌po̤htò̌tû̌ tûjûpwa̤. Nata̤cǒtè̤tayo̤ htǒonu, he glè pwe̤ǐlṳ bǎ kòyò anǒkò tuhtu hto tuhtu. 2 Nata̤mo̤ǐ htě ahǎbòjò tò̤ htǒo aǒměǒgle tûjûpwa̤ awi̤akè̌nu, he glè pwe̤ǐlṳ bǎ kòyò. Nata̤cǒtè̤tayo̤ htǒonu aměagle lò̤ta mǒla̤. 3 Na hî̌ ta, “He wṳ̂dò hele̤yo̤ ta he wû̌lǎ kòyònu tapwa̤. “He bèlò̤hto heyo̤ ta hepwa̤ma̤ta̤phû̌ Dǎwi̤. 4 “‘Nakhlinalè glè htû Khwǐ tûjûpwa̤. “‘He glè nopǒǐ nakhlinalè anǒkò tûjûpwa̤.’” 5 Kǒ Cǒmara tûjûpwa̤, mǒkhû̌phû̌ toǒ htû̌sò̌ǐ nata̤ma̤ cǒklî̌kî̌ya. Lǒ̤꤮ bò tanaphû̌ toǒ hèhtû̌sò̌ǐ plǒnû̌û nata̤cǒtè̤tayo̤. 6 Kǒ Cǒmara tûjûpwa̤, dě mǒkhû̌nu, kò ta̤bò̌ ta nanu aǒ dǐpwǎ̤꤮ tò̤. Dě mǒkhû̌ tanaphû̌ aklanu, kò lò̤ta nanu aǒ dǐpwǎ̤꤮ tò̤tò̤. 7 Mǒkhû̌tanaphû̌ aprṳ̂ htě asîrîshû̌sho toǒ ǐsha lǒkho Cǒmara. Lǒ̤꤮ bò mǒkhû̌phû̌ htě a ǒ te̤we̤phǔ nakòshî̌ toǒ, ǐsha bè̌dubè̌na̤ mè̤mè̤̌ na. 8 Kǒ Cǒmara tûjûpwa̤, Cǒmaradû̌ htě a pǒ ta̤ lǒ̤꤮ bò, ûpè tapwa̤ shû̌sho lò̤ta na pè? Kǒ Cǒmara tûjûpwa̤, nata̤cǒtè̤tayo̤ htǒonu a ǒte̤we̤bò ta na. 9 Na pǒǐ shidû̌shite̤we̤ ashipěpǒdû̌ toǒ. Bǎ shipěpǒ hèdû̌ akhanu, na noǒkǔkè asî. 10 Na ma̤sima̤hǎmǎ phlǔkè pwa̤ htě aphî̌dû̌phî̌htû ana̤nu. tapwa̤. Na ma̤nûpò̤nûshîkèbò pwa̤sò̌khě nanu toǒ ta nacǔde ashû̌asho. 11 Mǒkhû̌ bǎbǎ, hǎkhû̌ bǎbǎ, nata lǒ̤bò. Hǎkhû̌ bǎbǎ, ta̤ ǒ dě akû pṳ̂̌꤮ tacǎ bǎbǎ, na bǒlò̤bò. 12 Cǔcî̌ bǎbǎ, cǔmṳ bǎbǎ, na bǒlò̤bò. Taborkholo bǎbǎ, Heramokholo bǎbǎ, a sò̌le̤sò̌lò̤ htû̌sò̌ǐ lǒkho nami̤. 13 Nacǔgo mî̌ apo̤phǎ. Nacǔde mî̌ asho. Nata̤khû̌ta̤ǎshû̌sho ma̤pè̤bò ta̤. 14 Nashinaga htǒo na ma̤htò̌ yǎta ta̤cǒta̤tè̤, ta̤tota̤bǎ. Napǒnasû yǎta ta̤mo̤ǐ htě ahǎbòjò tò̤ ta ta̤cǒtè̤tayo̤. 15 Kǒ Cǒmara tûjûpwa̤, kòyò htě a sò̌po̤htû̌sò̌ǐ subusabahtò̌ na, kòyò ǒhtûpwa̤ dě nalo̤mo̤ ata̤lîkû toǒnu, a nî̤bǎ ta̤howi̤. 16 Nakhû̌nakhî, asî sò̌le̤sò̌lò̤ ti̤nǐ̤ mṳhǎ. Nata̤cǒta̤tè̤ akhû̌akhî, asî htû̌sò̌ǐ na. 17 Na mî̌ pwa̤ htě a ǐ pa ta̤sîrîdû̌sîrîhtû ta ta̤khû̌ta̤ǎ. Na ta̤sò̌yṳǒ pa akhû̌akhî, pa nî̤bǎ ta̤ma̤pè̤. 18 Pwa̤ma̤kwaǐ pa mî̌ Cǒmara tûjûpwa̤. Pakhwǐ mî̌ Israel acǒmara htě acahtǐ htǒotapwa̤. 19 Dě꤮ wǐkha, na dǔlṳhtò̌ nana̤, na hî̌bǎlò̤ nakòyò ta a cǒtè̤taayo̤. Na hî̌ ta, “He ǐ shû̌htò̌shohtò̌ pwa̤htò̌shě ta̤shěta̤pe̤ htǒotapwa̤. “He wû̌lǎ, bè̌htò̌yî̤ pwa̤nějaphû̌ tapwa̤ dě kòyò htǒotoǒ akla. 20 “He kè̌shǐ he pwa̤ma̤ta̤ma̤phû̌ Dǎwi̤. “He plṳ yǎta hehtǒshi cahtǐ, he wû̌htò̌ yǎta Khwǐ. 21 “Hecǔde glè ma̤jè mè̤mè̤̌ yǎ. “Hecǔde bè̌sho, hecǔgo bè̌shû̌ mè̤mè̤̌ yǎ. 22 “Pwa̤sò̌khě yǎ toǒ ma̤pè̤jò nû̌û tò̤. “Kòyòphû̌mò̤ pè̤ǎpè̤ojò nû̌û tò̤tò̤. 23 “He glè ma̤pî̌ma̤lṳ̂phlǔkèbò pwa̤sò̌khě a toǒ dě alo̤mo̤. “He glè ma̤sikèbò kòyò htě a sò̌khě nû̌ûnu toǒ. 24 “He glè cǒtè̤ ta heyo̤, he mo̤ǐ yǎta ta̤mo̤ǐ htě ahǎbòpè̤jò tò̤. “He noma̤pè̤ yǎ pṳ̂̌꤮ taplǎ. 25 “He nopǒto̤ yǎ dě shidû̌shite̤we̤kû. “A glè pǒto̤ dě shikhî̌dû̌ toǒ aǒnu. 26 “A glè hî̌ he ta, ‘Na mî̌ hepha, hecǒmaradû̌, lo̤dû̌ htě a ma̤lû̌htò̌ge he.’ 27 “He glè nohtûhtò̌ yǎta hephû̌wè̤pwa̤, Khwǐ htě asîrîdû̌sîrîhtûkhlo kòyò bǎ hǎkhû̌. 28 “Heta̤mo̤ǐ htě ahǎbòjò tò̤ htǒo a glè ǒkû̌ nû̌û tûjûpwa̤. “He ta̤wṳ̂dò glè ǒměǒgle ta aya. 29 “Akhlialè toǒ glè htò̌htû khwǐ ta agûla̤ tûjûpwa̤. “Mǒkhû̌ dè ǒ sayè̤pe hî̌mî̌, ashiaga gu ǒměǒgle sayè̤. 30 “Akhlialè dè wîkè heta̤sû̌ta̤tòwò, a dè gana̤de gûǒhtûpwa̤ heta̤mǎlò̤ tò̤, 31 A dè cû̌tûlû̌khatî̤lî̤ heta̤sû̌ǐtòwòǐ, a dè jûle̤phî̌yo̤ heta̤mǎlò̤ toǒ tò̤ hî̌mî̌, 32 A cû̌tûlû̌khatî̤lî̤, ma̤ta̤sǔta̤plě akhû̌akhî, he bǎ po̤ asî ta nò̌po̤, he bǎ phlě asî ta sǒpli̤wî̤. 33 “Pwǎ̤tadě he mo̤ǐ sayè̤ yǎ. “He glè cǒtè̤tû̌ ta heyo̤. 34 “He ma̤pî̌kè nǒ heta̤wṳ̂dò tò̤. “He hî̌tèplè̌ nǒ heyo̤ tò̤tò̤. 35 “He bèlò̤ heyo̤ ta hemi̤ cahtǐ taplǎ mî̌ ahtokè. “He lòho nǒ Dǎwi̤ tò̤. 36 “Akhlialè bǎ htû sayè̤ khwǐ tûjûpwa̤. “He noǒměǒgle sayè̤ ashiaga lò̤ta lṳmṳ. 37 “Ashiaga bǎ ǒměǒgle tûjûpwa̤ sǒsǒta la. “La numî̌ takhòlṳ acǒatè̤ dě mǒla̤,” Cǒmara hî̌ hǐnu. 38 Kǒ Cǒmaradû̌, khònò̤htǒo na sò̌phlǒdû̌ khwǐ htě na wû̌lǎ yǎnu tapwa̤. Na wîkè a dě la̤kè yǎ hǒ. 39 Na ma̤pî̌kè nata̤wṳ̂dòyo̤ ta napwa̤ma̤ta̤phû̌. Na wîlòte̤kè yǎ khû̌shǒhta, a mî̌ asîrîshû̌shonu dě lo̤hǎkla. 40 Na po̤lòte̤jakèbò yǎ wî̤we̤dû̌. Na delòte̤jabò yǎ wî̤we̤dû̌ htě atònò. 41 Lǒ̤꤮ bò kòyò htě a cû̌ nû̌û kòshî̌ toǒnu, a phî̌sigwibò nû̌û. Khlilèphû̌ ǒ nû̌û kòshî̌ toǒ mî̌ a pi̤jishǐcǒbò nû̌û. 42 Na noshû̌htò̌shohtò̌ pwa̤sò̌khě a toǒ akhû̌aǎ. Na ma̤sò̌le̤sò̌lò̤bò pwa̤sò̌khě a toǒ. 43 Na nodukèbò anò̌she htě a noǎ nû̌ûta ta̤shěta̤pe̤. Na shějèkû̌pe yǎ ta̤shěta̤pe̤ tò̤. 44 Na phî̌kè yǎ ta̤htûkhwǐ asîrîshû̌sho. Na wîlò̤te̤kè yǎ gògohtahtò̌yî̤ dě hǎkhû̌. 45 Na nomo̤pwa̤yû yǎ. Na ma̤ sòwò̤sikè nû̌û. 46 Kǒ Cǒmara tûjûpwa̤, na bè̌hǔ yî̤ nana̤ to̤꤮ bò̌khòtè pě? Tûjûpwa̤ pěya? Na sò̌phlǒdû̌ lî̤pi̤sǐ lò̤ta mî̌klû̌ htǒonu a yî̤pe pwî̌꤮ tè? 47 Gènè̤htò̌ to̤kû̌ he, heta̤ǒhtûpwa̤htǒo aphǒ mè̤mè̤̌. Lǒ̤꤮ bò kòyò htě nabǒlò̤ yǎ htǒotoǒ asihǎmǎjòbò. 48 Kòyò htě a ǒhtûpwa̤ sayè̤ dě asijò tò̤nu aǒ dǐpwǎ̤꤮ tò̤. Pwa̤ htě a ma̤lû̌htò̌jò ana̤ ta lṳnǎkhwǎdo asîrîshû̌sho htǒonu aǒ dǐpwǎ̤꤮ tò̤tò̤. 49 Kǒ Běcǎ ta̤adû̌, nata̤mo̤ǐ htě ahǎbòjò tò̤ dě na dǔlṳ awǐkhanu, aǒ bǎtè? Nata̤mo̤ǐ htě na bè nayo̤ ta Dǎwi̤ dě acǒtè̤ htǒo aǒ bǎtè? 50 Kǒ Běcǎ ta̤adû̌, gènè̤htò̌ to̤kû̌ najû khòbǎ ta̤pi̤jishǐcǒ htǒo. Lǒ̤꤮ bò kòyò htě a subusabahtò̌ na tò̤ toǒ hî̌khǒhî̌wa̤ ma̤shabò hesò̌phlǒ. 51 Kǒ Cǒmara tûjûpwa̤, pwa̤sò̌khě na toǒ pi̤jishǐcǒbò he. Khwǐ htě na wû̌lǎ htǒotapwa̤ a cû̌ bǎtètè̌꤮ bǎbǎ, asî pi̤jishǐcǒbò nû̌û hǒ. 52 Cǒmara tûjûpwa̤ htǒo, kò htû̌sò̌ǐ tû̌ta yǎ tûjûpwa̤ talakhǎ nî̌. Amè̤, Amè̤. |
Wycliffe USA
The Seed Company