Htû̌sò̌htò̌ 88 - Kawyaw RC

Kwigwèbǎǐ ta̤ma̤jè

Kǒri akhlialè toǒ ata̤sò̌po̤ htû̌sò̌ǐ. Dě ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě tobǎ sò̌po̤ sǒsǒta mahalasa-le̤nosa ta̤sò̌po̤nu to̤to̤. Esarahǐ khlilèphû̌ Hema ata̤sò̌po̤ htǒoto̤to̤ mî̌ Ebrephû̌yo̤nu, a kaǎ nû̌û ta Masakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ.

¹ Kǒ Cǒmara tûjûpwa̤, Cǒmara htě pwa̤ma̤lû̌htò̌ge he. He hè dě nalo̤mo̤ dě he kwisabahtò̌ na lṳmṳkhǐkhǐ lṳmṳshasha.

² Gana̤depû he ta̤kwisabahtò̌na htǒonî̌꤮. Dò̌ nanò̌ku ta he kwihtò̌ nata̤ma̤jè htǒo.

³ Heta̤ǒhtûpwa̤htǒo a ǒ còcè̌꤮ ta̤pò̤ta̤sha. He hèto̤ phǔtînî̌꤮ ta lṳnǎkhwǎdo.

⁴ Kò dǒhtubò he dě kòyòsi toǒ akla. He sǒsǒkèta kòyò htě akhû̌aǎ ǒpe tò̤ tapwa̤.

⁵ Kò wîhtukè he ta kòyòsi, Kò dò̌hǎmoǒ lò̤kè he lò̤ta lṳto̤ dě lṳkû. Na shope̤nǎkè lṳto̤, na ma̤jèpe yǎ dǐcǎ꤮ tò̤.

⁶ Na bè̌lòte̤ he dě hǎkûyo̤ khǐsuwṳgutṳ̌nu tûkû.

⁷ Nata̤sò̌phlǒdû̌nu ashû̌mè̤mè̤̌ heya. Na sò̌phlǒdû̌ lò̤kèta shipěpǒ plû̌bǐbò he.

⁸ Na noǒtepheyî̤kèbò he ta hekhobǒsû̌bǒmo̤. Na nowi̤jabò he ta asî. He ǒtò̤ apo̤kû dě he hǎhtò̌bò̌pe tò̤.

⁹ He khòbǎ tûlû̌꤮ shû̌ ta̤pò̤ta̤sha akhû̌akhî, hemi̤sǎ sûprṳ̂bò. Kǒ Cǒmara tûjûpwa̤, he kwisabahtò̌ na pṳ̂̌ni̤pṳ̂̌sa. He yṳ̂htò̌ hecǔde naǒ dě he kwisabahtò̌ na.

¹⁰ Mî̌ na dǔlṳnǒ nata̤cǒklî̌kî̌ya ta kòyòsi toǒ ya? Kòyòsi toǒ mî̌ a ihtǒhtûpwa̤ gesǒ dě a htû̌sò̌ǐnǒ na ya?

¹¹ Dě lṳnǎkhwǎdo numî̌ kò dǒhtû̌ǐnǒ nata̤mo̤ǐ htě ahǎbòjò tò̤ htǒonu ya? Mè̤tò̤mî̌ ta̤pî̌ta̤lṳ̂ agûla̤nu kò dǒhtû̌ǐnǒ nacǒtè̤tanayo̤ htǒonu ya?

¹² Dě ta̤khǐta̤lo̤ aklanu, kò kè̌shǐjònǒ nata̤cǒklî̌kî̌ya ya? Gûla̤ htě kòyò sihtohǒ dě kò shope̤nǎkè yǎnu tò̤glò kò sî̌yajònǒ nata̤cǒta̤tè̤ ya?

¹³ Kǒ Cǒmara tûjûpwa̤, he lè̌dě, he kwigwèbǎǐ na ta̤ma̤jè. Pṳ̂̌ wo̤wo̤꤮ he kwihtò̌ na.

¹⁴ Kǒ Cǒmara tûjûpwa̤, na cû̌ wîkè he mî̌ ma̤tè? Na cû̌kè̌khǒkè he mî̌ ma̤tè?

¹⁵ He kè̌shǐshěto̤bǎ ta ta̤pò̤ta̤sha dě he glè̌ phǔsi cè̌cè̌ dě he phijaû̌khape. He khòbǎ nata̤ma̤sò̌gònò̤ ǐsha. Dě he yanu, ta̤ma̤jè ǒpe dǐcǎ꤮ tò̤.

¹⁶ Nata̤sò̌phlǒdû̌ htǒo a lò̤hǔbǐbò he. Nata̤ma̤sò̌gònò̤ ǐshanu toǒ ma̤pî̌ma̤lṳ̂bò he.

¹⁷ Asî ǒ te̤we̤bǐbò he sǒsǒta shidû̌bǐbò he ti̤nǐ̤ mṳhǎ. Asî ǒbǐ te̤we̤bò he pṳ̂̌tokho.

¹⁸ Na nocû̌ǒ te̤pheyî̤kèbò hekhomo̤, hehǐphòkòshî̌ toǒ ta he. He khobǒsû̌bǒmo̤ bè̌ǒkè tû̌ he dě ta̤khǐta̤lo̤ akla.