Htû̌sò̌htò̌ 86 - Kawyaw RC

Kwisabahtò̌ ta̤ma̤jè

Khwǐdǎ̤wi̤ ata̤kwisaba

¹ Kǒ Cǒmara tûjûpwa̤, kò ma̤jîma̤jûbò he, he shodo pwa̤ma̤jè akhû̌akhî, gana̤depû he kwihtò̌ nahtǒo dě ma̤jè he nî̌.

² He cǒtè̤ ta heyo̤ akhû̌akhî, ma̤kwaǐpû he. Kǒ hecǒmaradû̌, ma̤lû̌htò̌ge napwa̤ma̤ta̤phû̌ htě a yṳǎnǎla̤ǐ nahtǒo nî̌.

³ Kǒ Běcǎ ta̤adû̌, he kwigwèbǎǐ na ti̤nǐ̤ mṳhǎ akhû̌akhî, gwèbǎǐ he nî̌.

⁴ Kǒ Běcǎ ta̤adû̌, he kwisabahtò̌ na akhû̌akhî, ma̤ sò̌le̤sò̌lò̤ napwa̤ma̤ta̤phû̌ htǒo nî̌.

⁵ Kǒ Běcǎ ta̤adû̌, na wǒ mè̤mè̤̌, na bòlû̌ kòta̤sǔ. Nata̤mo̤ǐ htě a hǎbòjò tò̤ htǒo, na dǔlṳ bǎ yǎta kòyò lǒ̤꤮ bò htě a kwigwèbǎǐ nanu toǒ.

⁶ Kǒ Cǒmara tûjûpwa̤, khòsò̌do gana̤depû he ta̤kwisabahtò̌ na htǒo. He kwigwèbǎǐ nahtǒo, khòsò̌do dò̌ bǎ he ta nanò̌ku nî̌.

⁷ Na gana̤de he ta̤kwisaba pě akhû̌akhî, bǎ he khòbǎ ta̤pò̤ta̤sha akhanu, he kwigwèbǎhtò̌ na.

⁸ Kǒ Běcǎ ta̤adû̌, Cǒmara htě alò̤ta nanu aǒ dǐpwǎ̤꤮ tò̤. Pwa̤ htě a ma̤jò sǒsǒta nanu aǒ dǐpwǎ̤꤮ tò̤tò̤.

⁹ Kǒ Běcǎ ta̤adû̌, khlilèphû̌ lǒ̤꤮ bò htě na bǒlò̤ toǒnu, asî hèsubusabahtò̌bò dě nalo̤mo̤ pě. Asî htû̌sò̌ǐ lǒkho nata̤sîrîdû̌sîrîhtû pě.

¹⁰ Nasîrî mî̌ ashû̌asho. Nata̤ma̤ mî̌ acǒklî̌kî̌ya. Cǒmara mî̌ pǒ̤꤮ natapwǎ̤pa.

¹¹ Kǒ Cǒmara tûjûpwa̤, ma̤pûhǐ he ǒhtûpwa̤ kû̌ pwǐ nata̤te̤ta̤mǎ ayanu, sû̌ǐtòwòǐ pû he ta naklè̌naklò. Ma̤pûhǐ he ǐsha bè̌dubè̌na̤ nami̤ ayanu, ǐ he sò̌phlǒ samabò htě a jûle̤phî̌yo̤ na htǒonu nî̌.

¹² Kǒ Běcǎ ta̤adû̌, hecǒmaradû̌, he glè htû̌sò̌ǐ na ta hesò̌phlǒ samabò. He pwe̤ǐlṳ bǎ kò ta na wǒ꤮ mè̤mè̤̌ htǒonu tûjûpwa̤ pě.

¹³ Na mo̤ǐ he ta nata̤mo̤ǐ htě ahǎbòjò tò̤ htǒo awǒ jòjî̌꤮ ta heya tò̤. He glè̌ to̤ phǔtînî̌ ta lṳnǎkhwǎdo akha na ma̤lû̌htò̌ge he.

¹⁴ Kǒ Cǒmaradû̌, kòyòphî̌dû̌ phî̌htû ana̤ toǒ hèshě lǒkho he. Kòyòkhu kòyòhî htě a bè̌dubè̌na̤ kû̌kò Cǒmara tò̤ toǒ kè̌lǎ ma̤si lǒkho he.

¹⁵ Pwǎ̤tadě kǒ Běcǎ ta̤adû̌, na mî̌ Cǒmara htě a gwèbǎǐ kòyò, a ma̤bwǐma̤sîrî kòyò, na sò̌phlǒhtû, na lǒbe ta ta̤mo̤ǐ htě a hǎbòpè̤ jòtò̤. Nalǒbe ta nata̤cǒtè̤ ta yo̤.

¹⁶ Htû̌tiwǐ kè̌getîkhî he, gwèbǎǐpû he. Ǐmò̌ napwa̤ma̤ta̤phû̌ ta nakhû̌naǎnu. Ma̤lû̌htò̌ge mò̌ napwa̤ma̤ta̤phû̌ aphû̌makhû htǒo.

¹⁷ Kǒ Cǒmara tûjûpwa̤, na ma̤jè he, na ma̤mo̤ǐ he akhû̌akhî, pwa̤sò̌khě he toǒ sòwò̤kèbò pě. Dǔlṳ bǎmò̌ he ta nata̤wǒ ta heya ata̤ma̤dòǐ tacǎcǎnu. Pědě asî kè̌shǐ nata̤ma̤dòǐ, dě a sòwò̤kèbò pě.