Htû̌sò̌htò̌ 85 - Kawyaw RC

Ta̤kwisaba ta shiphû̌gaphû̌ glè ǒmo̤ǒkwǐ aya

Kǒri akhlialè toǒ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.

¹ Kǒ Cǒmara tûjûpwa̤, na kè̌dû̌ǐ nashinaga. Na ǐ ǎbǎobǎ Israelkhlilèphû̌.

² Na bòlû̌kèbò nakòyò toǒ ata̤ma̤sǔma̤plě. Na phî̌tephekèbò bǎ asî ta̤sǔta̤plě.

³ Nasò̌phlǒdû̌ hǎmǎbò hǒ. Nata̤sò̌phlǒdû̌gûhî htǒonu, taplǎpa a gûjû gilò̤bò.

⁴ Kǒ Cǒmaradû̌ htě a ma̤lû̌htò̌ge pa, ǐǎbǎobǎ gesǒ pa. Sò̌phlǒdû̌ pûma̤ pa ma̤.

⁵ Na sò̌phlǒdû̌ pa tûjûpwa̤ pě ya? Na sò̌phlǒdû̌ sělěpo̤ pa tuhtu hto tuhtu pě ya?

⁶ Ma̤pûhǐ nakòyò toǒ sò̌le̤sò̌lò̤ ta na ma̤htobǎ panu toǒ ayanu, ǐshû̌htò̌shohtò̌ gesǒ pa.

⁷ Kǒ Cǒmara tûjûpwa̤, dǔlṳmò̌ pa ta nata̤mo̤ǐ htě a hǎbò jòtò̤ htǒo. Ma̤lû̌htò̌mò̌ pa.

⁸ Běcǎ Cǒmara tûjûpwa̤ hî̌ hî̌tènu, he glè gana̤de. Ma̤tè̤hî̌dě a olò̤ ta a glè ǐ akòyò htě a cǒtè̤tayo̤ toǒ ata̤ǒmo̤ǒkwǐ. Pwǎ̤tadě noma̤bǐaǒ gesǒ pûma̤ asî ma̤.

⁹ Ma̤pûhǐ kò kè̌shǐ Cǒmaradû̌ asîrîpo̤phǎ dě pagakû ayanu, kòyò htě a ǐsha bè̌dubè̌na̤ nû̌û toǒ nî̤bǎ mè̤mè̤̌ Cǒmara ata̤ma̤lû̌htò̌ge pě.

¹⁰ Ta̤mo̤ǐ ta ta̤cǒtè̤tayo̤ kè̌shǐglashǔ nû̌û. Ta̤cǒta̤tè̤ ta ta̤ǒmo̤ǒkwǐ gomo̤ kè̌khînû̌û.

¹¹ Kòyòhǎkhû̌phû̌ ata̤cǒtè̤tayo̤ ǒ lṳhtò̌ dě hǎkhû̌. Cǒmara ata̤cǒta̤tè̤ ǒ dě mǒkhû̌ kè̌lò̤ pa.

¹² Cǒmara tûjûpwa̤ glolò̤lò̌lò̤ mè̤mè̤̌ ata̤howi̤ pě. Sǒmṳwû̌bo sǎhtò̌phohtò̌ plṳ̂ dě pagakû.

¹³ Ta̤cǒta̤tè̤ cû̌wǐ dě Cǒmara tûjûpwa̤ alo̤mo̤ pwǐ pwa̤sûta̤wi̤ta̤kè̌ tapwa̤nu pě. A tîwî̌tòwònǎwǐ bǎ nû̌û klè̌la̤hè aya pě.