Htû̌sò̌htò̌ 84 - Kawyaw RC

Sò̌yṳ subusaba dě Cǒmara ata̤lṳhtò̌hokû

Kǒri akhlialè toǒ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě tobǎ sò̌po̤ wo̤wǒ̤ ta pwa̤dǒ ta̤dǒta̤ǔ a dǒ ta̤ǔta̤po̤ htě apli̤ǒnu toǒ.

¹ Kǒ Cǒmara tûjûpwa̤ htě a pǒ ta̤ lǒ̤꤮ bò, ta̤lṳhtò̌ho htě na ǒǐnu awî̤awǒ mè̤mè̤̌.

² He sò̌yṳ subusaba mè̤mè̤̌ dě Cǒmara tûjûpwa̤ la̤ǒgûla̤ akû bǎo, he sò̌phlǒmo̤ mè̤mè̤̌. Hena̤ sapwa̤ ta hesò̌phlǒ sama glè sò̌le̤sò̌lò̤ sò̌po̤htò̌ Cǒmaradû̌ htě ahtûpwa̤nu tapwa̤.

³ Kǒ Cǒmara tûjûpwa̤ htě a pǒ ta̤ lǒ̤꤮ bò, hekhwǐ, hecǒmaradû̌, htû̌pwa̤phû̌ toǒ dě a kè̌lǎǒ agûla̤. Htû̌li̤cò̌ toǒ dě a ma̤ tû̌ api̤ ta aphû̌ toǒ aya bǎ nata̤lṳhtò̌wa̤ toǒ akòshî̌.

⁴ Kòyò ǒ dě nata̤lṳhtò̌hokû toǒnu, a nî̤bǎ ta̤howi̤. Asî sò̌po̤htû̌sò̌ǐ na pṳ̂̌꤮ taplǎ.

⁵ Kòyò htě aphî̌khû̌phî̌ǎ dě naǒ toǒnu na howi̤homò̤ asî. Asî sò̌phlosho hǎhtò̌ cû̌htò̌ subusaba kû̌ na dě Sǐokholokhû̌.

⁶ Bǎ asî cû̌nṳ Bakha galo̤to̤khwekû akhanu, shi htǎpo̤bò dě hǎla̤. Bǎ khwè̌julò̤ sakhû̌lû̌꤮ akhanu, a julò̤bebò galo̤to̤kû, shikoǒphû̌ toǒ ǒhtò̌.

⁷ Bǎ asî cû̌ akhanu, asîkhû̌ǎ shohtò̌ ta shohtò̌. Asî pṳ̂̌꤮ tapwa̤ hèdǔlṳ to̤bò ana̤ bǎ Cǒmaradû̌ htě a pǒǐ lǒ̤꤮ bò Cǒmara ahǔwa̤ toǒnu tapwa̤ alo̤mo̤, bǎ Sǐokholokhû̌nu.

⁸ Kǒ Běcǎ Cǒmara tûjûpwa̤ htě a pǒ ta̤ lǒ̤꤮ bò, gana̤de heta̤kwisabahtǒo nî̌. Kǒ Yǎ̤kò acǒmaradû̌, gana̤depû nî̌.

⁹ Kǒ Cǒmaradû̌, kè̌dû̌ mò̌ nakhwǐ htě pwa̤ma̤kwaǐ pa lò̤ta gòtò̤ htǒo. Kè̌dû̌ mò̌ kòyò htě na wû̌lǎ yǎnu tapwa̤ nî̌.

¹⁰ Ǒ dě nata̤lṳhtò̌hokû ti̤ni̤nu awǒkhlope ta ǒ dě ahǔwa̤ ani̤ tîrî̌. He htû pwǎ pwa̤ǒpo̤ bǎ Cǒmaradû̌ ahǐtakhakûnu amo̤khlope ta he ǒ dě kòyòphû̌mò̤ ahǐdǒkû.

¹¹ Běcǎ Cǒmara tûjûpwa̤ mî̌ alò̤ta lṳmṳ, pwa̤ma̤kwaǐ pa. Cǒmara tûjûpwa̤ gwèbǎǐ pa, a bè̌dû̌bè̌htû pa. Kòyò htě a ma̤toma̤bǎ ta̤ toǒnu, Cǒmaradû̌ sò̌phlǒǒ asî ta̤wî̤ta̤wǒ.

¹² Kǒ Cǒmara tûjûpwa̤ htě a pǒ ta̤ lǒ̤꤮ bò, kòyò lǒ̤꤮ bò htě a yṳǎ na toǒnu a nî̤bǎ ta̤howi̤.