Htû̌sò̌htò̌ 83 - Kawyaw RC

Ta̤kwisaba ta pwa̤sò̌khě Israelphû̌ toǒ bǎ lò̤jûkè aya

Asa ata̤sò̌po̤ htû̌sò̌ǐ.

¹ Kǒ Cǒmaradû̌, cî̌cî̌ ǒ pûma̤, jîkoo pûma̤. Kǒ Cǒmaradû̌, hǔhǔ꤮ ǒ pûma̤ nî̌.

² Kè̌mò̌, pwa̤sò̌khě na toǒ ma̤ pi̤ti̤pṳ̂tṳ̂bò hǒ. Kòyò htě a sò̌khěkhû̌khwè nanu toǒ a shěshǔ lǒkho na hǒ.

³ Asî tîwî̌hǔsè̌ ta̤ dě a glè hèshě lǒkho nakòyò toǒ. Asî gènè̤ ma̤phû̌mò̤ lǒkho kòyò htě na ma̤kwaǐ toǒ.

⁴ Asî hî̌ lǒkho ta, Cû̌꤮, ma̤pûhǐ kò shope̤nǎkèbò Israelkhlilèphû̌ tûjû꤮ pwa̤, pa cû̌ma̤pî̌ma̤lṳ̂kèbò asî khlilèphû̌ hò̌꤮.

⁵ Asî sò̌phlǒnî̤dû plǒnûû̌ dě asî ta̤gènè̤hǔ gènè̤sè̌ htǒoakû. Asîsò̌phlǒ toplǒnû̌û dě a glè shěshǔ lǒkho na.

⁶ A ǒpe kwè̌꤮ khlilètitè hî̌dě, Edogaphû̌ ta Ishumelǎkhlilèphû̌, Mò̌bǎgaphû̌, Hakakhlilèphû̌,

⁷ Kebalǎgaphû̌, Amogaphû̌, Amalè̌khlilèphû̌, Phǐlǐsatǐgaphû̌, Turǔwî̤phû̌ sîtoǒ hǒ.

⁸ Ashǔrǎgaphû̌ toǒ mî̌ asò̌phlǒ nî̤dû kû̌dǒ ta asîsî. Asî ma̤jè bǎdǒ Lò̌tǎ akhlialè mî̌ Amophû̌ ta Mò̌bǎphû̌ sîtoǒ.

⁹ Ma̤mò̌ asî pwǐ꤮ na ma̤ Mǐdǐyakhlilèphû̌, Khwǐsisera ta Khwǐjabi dě Kǐsho shilo̤htunu.

¹⁰ Asî sikè dě Edò̌rawî̤nu tò̤glò, asî na̤klû htǒotoǒnu, asoaûkèbò bǎ hǎkhû̌nu.

¹¹ Ma̤mò̌ asîhǐkǒlǒkòdû̌ toǒ pwǐ na ma̤ Khwǐorǐbǎ ta Khwǐsebǎ nunu. Ma̤mò̌ asîkhwǐ aphû̌makhû lǒ̤꤮ bò toǒ pwǐ na ma̤ Khwǐsebǎ ta Khwǐsalamǔnanu.

¹² Pwa̤sò̌khěnu toǒ hî̌ lǒkho ta, “Cǒmaradû̌ aga htǒotoǒnu pa phî̌ yǎta paya hò̌.”

¹³ Kǒ Cǒmaradû̌, nonûcû̌kèbò asî pwǐ phopiwi htocû̌kè phǎmǔ. No nûcû̌kèbò asî pwǐ gili̤sǎ htocû̌kè htǒphî.

¹⁴ Lṳ̂pṳ̂měǐ asî pwǐ mî̌ lěgè gono̤gapwa̤, pwǐ mî̌ gècû̌ kholo toǒ.

¹⁵ Lṳ̂pṳ̂ mò̌ asî ta nagili̤sǎplǎwi̤. Ma̤sò̌gònò̤ ǐsha mò̌ asî ta naphopiwi.

¹⁶ Kǒ Cǒmara tûjûpwa̤, ma̤pûhǐ asî kè̌lǎ htû̌tiwǐ getosǒ ta na ayanu, ma̤sòwò̤sikèmò̌ asî.

¹⁷ No ǐsha sòwò̤kè asî tûjûpwa̤. No sòwò̤sikè asî.

¹⁸ Na ma̤ hǐnu pě꤮ mî̌ asî glè sî̌yahè ta na mî̌ Cǒmara tûjûpwa̤. Asî glè sî̌yabò ta pǒ̤꤮ pwǎ na mî̌ Cǒmara htě adû̌ahtûkhlo kò dě a pǒǐ hǎkhû̌běkhû̌.