Htû̌sò̌htò̌ 80 - Kawyaw RC

Ta̤kwisaba ta la̤nî̤bǎ gesǒ shiga aya

Asa ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě tobǎ sò̌po̤ sǒsǒta Asa ata̤sò̌po̤ htě ami̤ ta ta̤wṳ̂dò ata̤phota̤gî ta̤sò̌po̤nu to̤to̤,

¹ Kǒ pwa̤kè̌ǐkhwè̌ǐ Israelkhlilèphû̌, khòsò̌do gana̤de kû̌ pa. Na mî̌ pwa̤sû Jǒjè akhlialè toǒ sǒsǒta kò gèǐ sophû̌mṳ. Na hǎnòò̌lò̤ dě nagògohtahtò̌yî̤khû̌ htě ahtò̌yî̤khlobò ta mǒkhû̌tanaphû̌ dě kò kaǎ nû̌û ta Kherǔbe htǒoakhû̌. Dǔlṳ htò̌mò̌ nata̤lîta̤rakha.

² Dǔlṳhtò̌mò̌ nata̤po̤ta̤phǎ dě Epharekhli, Bejamekhli, Manǎshekhlinu toǒ alo̤mo̤ dě ma̤lû̌htò̌ mò̌ pa nî̌.

³ Kǒ Cǒmaradû̌, ǐgesǒ pashipaga, gwèbǎǐ pa, pě꤮ dě pa lû̌htò̌.

⁴ Kǒ Cǒmara tûjûpwa̤ htě a pǒ ta̤ lǒ̤꤮ bò, na glè̌ sò̌phlǒdû̌ yî̤ to̤ htû̌꤮ mè̤mè̤̌ pata̤kwisaba bò̌khòtè?

⁵ Na noǎ asî ta̤sǎpla̤sǎyṳ. Na noobe asî mi̤sǎshi ta ba.

⁶ Na nosò̌khěbò pa ta shiga htě aǒ te̤we̤phǔ ta pa. Asî luya̤ tukutakǎbò pa.

⁷ Kǒ Cǒmaradû̌ htě a pǒ ta̤ lǒ̤꤮ bò, ǐgesǒ pashipaga, gwèbǎǐ pa, pě꤮ dě pa lû̌htò̌.

⁸ Na kaǎgeǐ nakòyò dě Egyptga lò̤ta na bò̌geǐ sobîphò dě geshǒ yǎ. Na wṳ̂hǎhtò̌kèbò khlilèphû̌hǔwa̤ ǒnǎwǐ bǎ Khanagakûnu toǒ. Na noǒ yǎta nakòyò sǒsǒta na geshǒ sobîmṳ.

⁹ Na ma̤lîma̤plò̌ bǎ asî la̤shǒ sobîmṳ gûla̤. Na noshǒlò̤yî̤ akhò̌wi̤ dě ayṳ̂cû̌bebò sagala̤.

¹⁰ Israelphû̌ mî̌ sobîmṳ htǒo, a yṳ̂cû̌ hǔbǐbò kholodû̌kholohtû sîtoǒ. Aphò toǒ dě a yo̤ǔbǐbò sǒmṳdû̌ sagala̤.

¹¹ Asî yṳ̂cû̌pîshî to̤ bò dě gaku. Asî sahtò̌ ǒ lǒkho bǎ Mèdihtorěnia shidû̌shite̤we̤ to̤dě Yupharětǐ shikhî̌.

¹² Pwǎ̤tadě khònò̤htǒo, na cû̌ma̤lòte̤jabò Israel awe̤ toǒ ma̤tè? Khlilèphû̌hǔwa̤ toǒ hènṳbò we̤kû dě nṳbě ǎhǔbò sobîsǎ.

¹³ Khlilèphû̌hǔwa̤ toǒ sǒsǒ lǒkho ta htǒmi̤, a hènṳ yî̤pwî̌bò asîga. Asǒsǒta ta̤mi̤ta̤mò̤ dě a nṳǎbò asîhǔkla.

¹⁴ Kǒ Cǒmaradû̌ htě a pǒ ta̤ lǒ̤꤮ bò, hèlò̤ mò̌ dě paǒ bǎo, ǒ mǒkhû̌ dě kè̌lò̤ mò̌, kè̌ǐkhwè̌ǐ mò̌ sobîmṳ mî̌ nakòyò htǒo.

¹⁵ Kè̌ǐkhwè̌ǐ mò̌ sobîmṳ mî̌ nakòyò htě na shǒǐtû̌ yǎ htǒo. Ma̤lû̌htò̌ge mò̌ sobîmṳphû̌plǒ htě na nodǒpo̤dǒsho yǎ htǒo.

¹⁶ Pwa̤sò̌khě pa toǒ pe̤kèbò nasobîmṳ, dě a shû̌gèkèbò. Na sǎhtǎ nakòyò toǒ, dě apî̌alṳ̂kèbò.

¹⁷ Khwè̌ǐ ma̤kwaǐ tû̌ kòyò htě na wû̌lǎ yǎ, kòyò htě na ǐshû̌ǐshohtò̌ yǎ ta nayanu htǒotoǒ nî̌.

¹⁸ Na dè ma̤hǐnuhî̌dě pa cû̌tepheyî̤nòkè na tò̤. Ǐshû̌ǐshohtò̌ gesǒ pa. Pa glè subusabahtò̌ na.

¹⁹ Kǒ Běcǎ Cǒmara tûjûpwa̤ htě a pǒ ta̤ lǒ̤꤮ bò, ǐgesǒ pashipaga. Gwèbǎǐ pa, pě꤮ dě pa lû̌htò̌.