Htû̌sò̌htò̌ 8 - Kawyaw RC

Cǒmara ata̤sîrîdû̌sîrîhtû ta kòyòhǎkhû̌phû̌ ata̤mi̤dû̌sǎhtû

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokû tapwa̤ aya. Dě tobǎ sò̌po̤plǒ ta pwa̤dǒ ta̤ǔta̤po̤ mî̌ a dǒ ta̤ǔta̤po̤ htě apli̤ǒnu toǒ.

¹ Kǒ paběcǎ ta̤adû̌, Cǒmara tûjûpwa̤, na mi̤dû̌sǎhtû lṳshilṳgabò hǎkhû̌꤮ tebě. Kò htû̌sò̌ǐ nata̤sîrîdû̌sîrîhtûhtǒo alṳhtò̌to̤ dě mǒkhû̌.

² Ma̤pûhǐ pwa̤sò̌khě na ta pwa̤ma̤ geshǔ na ta ali̤ toǒ ǒsî̌tukǔkè ayanu, na glè nohtû̌sò̌ǐ nakhû̌naǎ ta phijaû̌phû̌ sîtoǒ ta phijaû̌phû̌ htě a onû̌penu toǒ.

³ Bǎ he kè̌htò̌ mǒla̤ htě na bǒ yǎta nacǔde, dě he kè̌shǐ la ta shǎ htě na tîwî̌ bè̌ǒto tû̌ asî agûla̤ ta agûla̤nu toǒ akha,

⁴ Na cû̌ shope̤nǎ pè̤pe kòyòhǎkhû̌phû̌ toǒtò̤ děmî̌, asî mî̌ kòyò hî̌tè toǒ tètè? Asî mî̌ kòyò htě a bǎ sikèpwǎ pě toǒ, na cû̌ kè̌ǐkhwè̌ǐ asî pwî̌꤮ htǒo ma̤tè?

⁵ Na ǐ kòyòhǎkhû̌phû̌ ta̤shû̌ta̤sho htě ajakhlo ta nana̤ tîkî̌phû̌. Pwǎtadě na ǐ asî ta̤sîrîdû̌sîrîhtû.

⁶ Na nopǒǐbò yǎta nabǒlò̤nu toǒ. Na bè̌lò̤bò ta̤pṳ̂̌꤮ tacǎ dě akhò̌lopo̤la̤.

⁷ Sophû̌, pṳ̂pa̤na̤ ta ta̤mi̤ta̤mò̤ lǒ̤꤮ bò htě aplò̤ bǎbǎ,

⁸ Htû̌phû̌ yṳphû̌ dě mǒla̤ bǎbǎ, tò̤phû̌ ǒ dě shidû̌te̤we̤kû bǎbǎ, bò꤮ na bǒlò̤ yǎ dě a yò̤cû̌ shidû̌shite̤we̤kûnu toǒ bǎbǎ, na nopǒǐbò yǎta a.

⁹ Kǒ paběcǎ ta̤adû̌, Cǒmara tûjûpwa̤, na mi̤dû̌sǎhtû lṳshilṳgabò hǎkhû̌꤮ tebě.