Htû̌sò̌htò̌ 79 - Kawyaw RC

Ta̤kwisaba ta ta̤ma̤lû̌htò̌ge khlilèphû̌ aya

Asa ata̤sò̌po̤ htû̌sò̌ǐ.

¹ Kǒ Cǒmaradû̌, pwa̤sò̌khě pa khlilèphû̌hǔwa̤ toǒ hènṳ shěpè̤kèbò shiga htě na ǐ pa htǒohǒ. Asî hèma̤lòte̤ja phû̌mò̤shî̌htobò nata̤lṳhtò̌hocahtǐ htǒohǒ. Asî ma̤pò̌ma̤shîkèbò Yerǔshèlèwî̤ htǒohǒ.

² Asî bǔǎkèbò napwa̤ma̤ta̤phû̌ toǒ alṳto̤ ta htû̌phû̌ dě mǒla̤. Asî bǔǎkèbò nakòyòcǒtè̤ ta yo̤ toǒ ayî̌ ta ta̤mi̤ta̤mò̤.

³ Asî ma̤si nakòyò dě asǐ dû̌hè te̤we̤lṳ̂bò bǎ Yerǔshèlèwî̤ kòshî̌ lò̤ta shi. Pwa̤ lǔlò̤ lṳto̤ toǒnu, a ǒkèpe dǐpwǎ̤꤮ tò̤.

⁴ Khlilèphû̌ htě aǒ te̤we̤ ta panu toǒ a hî̌jîhî̌jû, luya̤, pi̤jishǐcǒbò pa.

⁵ Kǒ Cǒmara tûjûpwa̤, na glè̌ sò̌phlǒdû̌ yî̤ pa to̤ htû̌꤮ bò̌khòtè pě? Mî̌ tûjûpwa̤ pěya? Na glè̌ khû̌khwè, sò̌phlǒdû̌gûhî yî̤ pa sǒsǒta mî̌gènu to̤ htû̌꤮ bò̌khòtè pě?

⁶ Sò̌phlǒdû̌ sǔshihtûmò̌ khlilèphû̌hǔwa̤ htě a sî̌ya na tò̤nu toǒ. Sò̌phlǒdû̌gûhîmò̌ shigahǔwa̤ htě a saba kû̌ na tò̤nu toǒ.

⁷ Asî ma̤sibò nakòyò Israelphû̌ toǒ hǒ. Asî ma̤pî̌ma̤lṳ̂bò pashiga hǒ.

⁸ Paphipaphu dě꤮ awǐnu toǒ ata̤sǔta̤plě akhû̌akhî, nokhòbǎ pûma̤ pa ma̤ nî̌. Pa sò̌phlǒpî̌ sò̌phlǒlṳ̂kèbò hǒ akhû̌akhî, gwèbǎǐ phwèmò̌ pa khònò̤ htǒo nî̌.

⁹ Kǒ Cǒmaradû̌, pwa̤ma̤lû̌htò̌ge pa. Ma̤pûhǐ nami̤ sîrîdû̌sîrîhtû ayanu, ma̤jè pû pa nî̌. Ma̤pûhǐ kò bè̌dubè̌na̤ nami̤ ayanu, ma̤lû̌htò̌ge pû pa, bòlû̌kè pa ta̤sǔta̤plě toǒ nî̌.

¹⁰ Kǒ Cǒmaradû̌, cû̌plûhî̌ pû khlilèphû̌hǔwa̤nu toǒ ta, “Sîcǒmaradû̌ ǒ bǎtè?” Khlilèphû̌hǔwa̤ toǒ sî̌ya ta a ma̤si napwa̤ma̤ta̤phû̌nu toǒ dě na ma̤ geshǔ asî ta li̤nu, ǐkè̌shǐ pa nî̌.

¹¹ Gana̤de pû kòyò ǒ dě apo̤kûnu toǒ ata̤kookasha. Ma̤lû̌htò̌ kòyò htě kò glè̌ cèròsi asînu toǒ ta nasîrîpo̤phǎ.

¹² Kǒ Běcǎ ta̤adû̌, khlilèphû̌hǔwa̤ toǒ hî̌jîhî̌jû na akhû̌akhî, ma̤ geshǔsǒ mò̌ asî ta li̤ susǒtaplǎ.

¹³ Htodě pa mî̌ nakòyò toǒ htě asǒsǒta sophû̌ dě na gèǐ yǎ la̤ǎshǎkhû̌. Pa glè hî̌bwǐhî̌sîrîhtò̌ na tûjûpwa̤ talakhǎ. Pa htû̌sò̌ǐ na tuhtu hto tuhtu pě.