Htû̌sò̌htò̌ 78 - Kawyaw RC

Cǒmara ta akòyò toǒ awi̤akè̌

Htǒomî̌ Asa ata̤sò̌po̤ dě Ebrephû̌yo̤nu, a kaǎ ta̤sò̌po̤ htǒo ta Masakǐlè ta̤sò̌po̤ dě htǒoto̤to̤ mî̌ a ǐ kòyò ta̤sî̌yaphlǔ.

¹ Kǒ hekòyò sî, he sû̌ǐtòwòǐ kwè̌꤮ sî titènu, dò̌ lǒkho sînò̌ku. Gana̤de lǒkho hehî̌bǎ sîhtǒo.

² He glè hî̌bǎ kò ta yo̤sǎkhěkhǒ toǒ. He glè pwe̤ǐlṳ bǎ sî ta ta̤ htě kò bè̌hǔ dě꤮ wǐnukha toǒ.

³ Ta̤ htǒtoǒnu, pa gana̤de sî̌yabǎ htohǒ. Paphiphu dě꤮ wǐkha toǒ pwe̤ǐlṳhto bǎ pa hǒ.

⁴ Ta̤wi̤ta̤kè̌htǒo pa glè bè̌hǔkè bǎ paphû̌pali̤ tò̤. Pa pwe̤ǐlṳ bǎ phû̌li̤ anǒtuhtu pě toǒ ta Cǒmara tûjûpwa̤ ma̤hto ta̤sîrîdû̌sîrîhtû, ata̤sîrîpo̤phǎ, ata̤ma̤cǒklî̌kî̌yanu toǒ awi̤akè̌ pě.

⁵ Cǒmara tûjûpwa̤ ǐlò̤ ta̤sû̌ta̤tòwò ta Yǎ̤kò aphû̌ali̤. A ǐǒhtò̌nṳ ata̤sû̌ta̤tòwò ta Israel akhlialè.

⁶ Ma̤pûhǐ phû̌ dě anǒkò pě tuhtu, li̤ dě anǒkò pě tûjû sî̌yadǒ ayanu, htohǒtò̤ asî pwe̤ǐlò̤ tṳtṳ bǎ aphû̌ali̤ alṳ̂ala̤ sîtoǒ ayanu, Cǒmara mǎnǎ paphiphu sîtoǒ ayo̤ ta asî glè sû̌ǐlò̤ tṳtṳ bǎ aphû̌ali̤.

⁷ Ma̤hǐnu pě꤮ mî̌ aphû̌ali̤ yṳǎnǎla̤ǐ kû̌tû̌ Cǒmaradû̌. Asî glè shope̤kè Cǒmara ma̤hto ta̤cǒklî̌kî̌yanu toǒ tò̤, a glè jûle̤phî̌yo̤ gûma̤bòtû̌ ta̤mǎlò̤.

⁸ Pědě asî glè sǒsǒpe nǒ aphiaphu děwǐkha toǒ tò̤. Asî aphiphu mî̌ ahǐkǒshò̌, a htè̌shǔma̤shǔ Cǒmara. Asîsò̌phlǒ cǒtè̤kû̌ nǒ Cǒmara tò̤. Asî yo̤ cǒtè̤kû̌ nû̌û tò̤tò̤.

⁹ Epharekhlinu akhlǐpla̤ sî ǒ pwǎ̤tadě bǎ ta̤shěta̤pe̤nu ti̤ni̤, asî hǎhtò̌khlè̌tephekèbò.

¹⁰ Asî pṳ̂gleměǐ Cǒmara ata̤wṳ̂dò tò̤. A la̤kè ata̤sû̌ta̤tòwò.

¹¹ A jîkookèbò ta̤ htě Cǒmara ma̤hto bǎ asî ta̤cǒklî̌kî̌ya dě a dǔlṳhto asînu.

¹² A ma̤lṳhto ta̤cǒklî̌kî̌ya dě asî phiphu alo̤mo̤, dě Egyptga, Sǔaga ya̤dakhû̌nu.

¹³ A ma̤phò̌pa̤kè shidû̌shite̤we̤, a nocû̌bò̌kè asî. A nodû̌ǒkǔkèbò shi, a ihtò̌ǒkǔ cî̌htè̌cî̌khobò sǒsǒta dědǎ.

¹⁴ Lṳmṳsha dě a sûcû̌ asî ta poǒlṳ tebě. Lṳmṳkhǐ dě a sûcû̌ asî ta mî̌shǎdû̌ tukǔ.

¹⁵ A po̤phò̌ lo̤dû̌ toǒ dě lo̤mî̌shǒklakhû̌. A ǐokǒ ǐobe asî shi lò̤kèta shihtǎpo̤ shǐhtò̌.

¹⁶ A nodû̌htò̌ shilo̤ toǒ dě lo̤kû. A nodû̌hè shi pwǐ꤮ shikoǒ.

¹⁷ Pwǎ̤tadě asî ma̤sǔ sadape Cǒmaradû̌. Asî hî̌tukutakǎshǔ Cǒmara htě adû̌ahtûkhlo kò htǒotapwa̤ dě lo̤mî̌shǒklakhû̌.

¹⁸ A ma̤kè̌ lǒkho Cǒmara. Shǎǎshǎo htě asî sǎǎsò̌o toǒnu, a kwi sayè̤ lǒkho Cǒmara.

¹⁹ Asî hî̌ takǎ Cǒmaradû̌ dě a hî̌ lǒkho, “Mî̌ Cǒmara ǐǎbò̌ shû̌lě pa shǎǎshǎo bǎ lo̤mî̌shǒklakhû̌ bǎo ya?

²⁰ “A po̤lo̤ dě shi htǎpo̤htò̌ mè̤mè̤̌ lè. “Shiklophû̌ toǒ dû̌hè lǒbe. “Mî̌ a ǐǎbò̌ shû̌lě nò pa la̤ǎla̤o ya? “Mè̤tò̤mî̌ a ǐǎbò̌ shû̌lě nò akòyò ta̤yî̌ ya?”

²¹ Bǎ Cǒmara tûjûpwa̤ gana̤de hǐnu akhanu, a sò̌phlǒdû̌ jòjî̌꤮ tò̤. A sò̌phlǒdû̌ mè̤mè̤̌ Yǎ̤kò akhlialè toǒ dě a nogèkè asî ta mî̌. A sò̌phlǒdû̌ mè̤mè̤̌ Israelkhlilèphû̌.

²² Asî yṳǎ Cǒmaradû̌ tò̤, asî nǎla̤ǐ ata̤ma̤lû̌htò̌ge htě apo̤aphǎ htǒonu tò̤tò̤ akhû̌akhî, a sò̌phlǒdû̌ mè̤mè̤̌.

²³ Pwǎ̤tadě Cǒmara hî̌lò̤ ayo̤ ta poǒlṳ. A nolṳ̂motû̌ mǒkhû̌ takha.

²⁴ Asî la̤ǎ ayanu, a glolòte̤ bǎ mû̌manǎ. A ǐlò̤ shǎǎshǎo dě mǒkhû̌.

²⁵ Asî ǎ mǒkhû̌tanaphû̌ shǎǎ. Sǎǎ pwî̌tè꤮ nu, Cǒmara ǐǎkǒobe.

²⁶ A nosǎhègili̤ dě mṳhtò̌ mǒla̤ tokho. A nosǎhègili̤ dě gamṳhtò̌ ta ata̤sîrîpo̤phǎ.

²⁷ A ǐlò̤ bǎ asî ta̤yî̌ lò̤ta hǎmǔ. A nowi̤hǎte̤ htû̌phû̌ lò̤ta lo̤semě dě shidû̌shite̤we̤htu.

²⁸ A nolòte̤ nû̌û dě asîla̤ǒgûla̤ kǎmakû. A nolòte̤ ǒte̤we̤bò nû̌û asîhǐphû̌ kòshî̌.

²⁹ A ǐlò̤ pwǐ asî sò̌yṳ. Asî ǎkǒobebò.

³⁰ Bǎ asî ǎkǒ hǒtò̤, ǎpepwǎ dě agokû akhanu,

³¹ Cǒmara sò̌phlǒdû̌ asî. A ma̤sikè makhû khû̌ǎshû̌shogutṳ̌. A ma̤hǎmǎkè makhûnějaphû̌ dě Israelkhlilèphû̌ akla.

³² Asî shěto̤bǎ ta̤ma̤ana̤ hǐnu pwǎ̤tadě a ma̤sǔma̤plě sadape. Asî yṳǎ lǒkho Cǒmara ata̤ma̤cǒklî̌kî̌ya tò̤tò̤.

³³ Ma̤hǐnudě a nophǔtǔkè asî mṳni̤. Asî ta̤ǒhtûpwa̤ lǒbe ta ta̤sò̌gònò̤ ǐsha.

³⁴ Bǎ Cǒmara ma̤si kòyò dě asî akla akhanu, a ǒkè toǒ kè̌lǎ lǒkho a. Asî yò̤ala̤, a gû lǒ̤sû̌lǒ̤sò̌ Cǒmarakò.

³⁵ Asî gènè̤htò̌to̤ ta Cǒmaradû̌ mî̌ lo̤dû̌ htě a ma̤kwaǐ asî. A mî̌ Cǒmara htě adû̌ahtûkhlo kò tapwa̤, a htè̌genṳ asî.

³⁶ Pwǎ̤tadě asî hò̌kû tabǎ dě a jîhtû̌sò̌bǐǒ lǒkho Cǒmaradû̌. Aplî̤ tobo dě a hî̌bǎ lòhǎlòho lǒkho nû̌û.

³⁷ Asî ǒměgle ta Cǒmara tò̤. Asî sò̌phlǒcǒtè̤ ta ata̤wṳ̂dò tò̤tò̤.

³⁸ Pwǎ̤tadě, Cǒmara gwèbǎǐpepwǎ asî. A bòlû̌kè asîta̤sǔta̤plě. A ma̤pî̌ma̤lṳ̂kèbò asî tò̤. Taplǎ hto taplǎ akhò ǐtû̌ ata̤sò̌phlǒdû̌. Asò̌phlǒ gûjû gesǒ.

³⁹ Cǒmara gènè̤htò̌to̤ ta asî mî̌ kòyòhǎkhû̌phû̌. Asî ǒhtûpwa̤ teděsǎ asihto htûpwa̤gejò tò̤, asǒsǒta gili̤sǎhè hǎmǎkè.

⁴⁰ Asî ma̤ tukutakǎ sala̤sala̤ Cǒmara dě lo̤mî̌shǒkla. Asî ma̤ sǎpla̤sǎyṳ sala̤sala̤ nû̌û dě lo̤mî̌shǒkla.

⁴¹ Asî ma̤kè̌ lǒkho Cǒmaradû̌ taplǎ hto taplǎ. Asî ma̤sò̌phlǒdû̌ Israel acǒmaradû̌ htě acahtǐ htǒotapwa̤ tuhu hto tuhu.

⁴² A gènè̤htò̌to̤pe Cǒmara ata̤sîrîpo̤phǎ tò̤. A gènè̤to̤bǎpe Cǒmara htè̌ge asî dě pwa̤sò̌khě asînu toǒ acǔdekûnu ti̤ni̤ tò̤tò̤.

⁴³ A ma̤lṳ bǎ asî ta̤cǒklî̌kî̌ya dě Egyptgakû, a ma̤te̤pe̤ sû̌pi̤sò̌pi̤ dě Sǔaga ya̤dakhû̌ pwî̌꤮ htǒonu dě asî gènè̤htò̌to̤pe lǒkho tò̤tò̤.

⁴⁴ Ma̤pûhǐ Egypt shiphû̌gaphû̌ ojòpe pû shi dě asîshilo̤kû tò̤nu, Cǒmara nohtûhtò̌kèbò bǎ asî ta sǐ.

⁴⁵ A plûhè kadǎ aprṳ̂aho, a nohèěbò nû̌ûta asî. A plûhè dî̌phû̌ aprṳ̂aho, a noma̤pî̌ma̤kèbò asî hǔkla.

⁴⁶ A noǎkèbò asîbǔ sîbîsoko toǒ ta cǒsikǐ. A noma̤pî̌kèbò asî kǎgepo̤geǐ sǒsǎwû̌pho toǒ ta dèhta.

⁴⁷ Cǒmara nojulò̤pî̌kèbò asîsobîmṳ ta sèwèji. A nolò̤sikèbò asîdǐshimṳ ta cashi.

⁴⁸ A nojulò̤ sikèbò asîpṳ̂pa̤na̤ ta sèwèji. A notî̌lî̌lò̤ sihǎmǎkèbò asîta̤phû̌ta̤li̤.

⁴⁹ A ǐsî̌ya te̤mǎ asî ta ata̤sò̌phlǒdû̌. Ata̤sò̌phlǒdû̌ sǔshihtû, ata̤sò̌phlǒhtò̌, ta̤sò̌phlǒdû̌gûhî htǒo a hè lò̤kèta tanaphû̌ htě a hèma̤si kòyònu.

⁵⁰ A khòǐ ata̤sò̌phlǒdû̌ tò̤. A sò̌leǐ asîsò̌phlǒhtûpwa̤ tò̤tò̤. A nokè̌shǐ shěto̤bǎ asî ta ta̤shasila̤.

⁵¹ Lǒ̤꤮ bò phû̌makhûwè̤pwa̤ dě Egyptgakû toǒnu bǎbǎ, Hamǎ ahǐphû̌phòphû̌ pṳ̂̌꤮ tṳgumṳ aphû̌makhû wè̤pwa̤ toǒ bǎbǎ, Cǒmara ma̤sikè asî.

⁵² A sûhǎhtò̌genṳ akòyò lò̤ta kò gèǐ sophû̌. A yṳ̂klè̌nè̌klògenṳ asî sǒsǒta sophû̌ tṳmṳ dě lo̤mî̌shǒklakhû̌.

⁵³ A sûge tûdûwǒ asî dě a ǐsha nǒ dǐcǎ꤮ tò̤. Pwa̤sò̌khě asî toǒ lè̌dě shidû̌shite̤we̤ plû̌bǐsikèbò asî.

⁵⁴ A sûge akòyò dě agacahtǐ, kholoklanu ta̤ga htě a ma̤pè̤ nû̌ûta asîrîpo̤phǎ htǒonu.

⁵⁵ A wṳ̂htò̌kè khlilèphû̌ toǒ dě asîlo̤mo̤. A mèpa̤lò̤ bǎ hǎkhû̌ ta Israelkhlilèphû̌ ta asîû̌cata̤bî̌ aya. A noǒ Israel akhlialè bǎ asîhǐnu akû.

⁵⁶ Asî ma̤kè̌ lǒkho Cǒmaradû̌. A ma̤tukutakǎ Cǒmara htě adû̌ahtûkhlo kòyò. A gana̤dejûle̤phî̌yo̤ kû̌ nû̌û ta̤sû̌ta̤tòwò toǒ tò̤.

⁵⁷ Asîsò̌phlǒ tèlè̌khǒkè, a cǒtè̤ kû̌ta ayo̤ tò̤, a sǒsǒta asîphiphu. Alò̤ta pla̤te̤gwe dě kò khǎ yǎ dě a nûnò̤ tò̤.

⁵⁸ Asî ma̤htò̌khǒ Cǒmara ahǔwa̤ toǒ la̤sabahtò̌ ahophû̌ toǒ htě ahtò̌yî̤gutṳ̌ tò̤glò akhû̌akhî, a ma̤ sò̌phlǒdû̌ mè̤mè̤̌ Cǒmaradû̌. Dě asî sabahtò̌ pwa̤yo̤pwa̤gî toǒ akhû̌akhî, a ma̤ sò̌phlǒdû̌ mè̤mè̤̌ nû̌û.

⁵⁹ Bǎ Cǒmara gana̤de asî ma̤ hǐnu akhanu, a sò̌phlǒdû̌ mè̤mè̤̌ asî. A htû̌tiwǐ cû̌phlǔkè Israelphû̌ toǒ.

⁶⁰ A wîkè ahǐphû̌dû̌cahtǐ Shǐlowî̤ dě a ma̤htò̌nṳ ala̤ǒ bǎ kòyòhǎkhû̌phû̌ aklanu tama.

⁶¹ A plûphî̌cû̌kè ta̤wṳ̂dò tǒcahtǐ htě asîrîpo̤phǎ htǒo ta pwa̤sò̌khě asînu toǒ. A ǐcû̌kè asîrîdû̌sîrîhtû dě asî acǔdekû.

⁶² A sò̌phlǒdû̌ tûlû̌shû̌ akòyò. A ǐlò̤ akòyòtoǒ dě pwa̤sò̌khě asî toǒ acǔdekû dě a glè ma̤sikè asî ta nò̌she.

⁶³ Makhûphû̌sǎ toǒ sikèbò dě ta̤shěta̤pe̤kû akhû̌akhî, mamǔphû̌sǎ la̤phî̌ awṳ̂ ǒpe dǐpwǎ̤꤮ tò̤.

⁶⁴ Kò shusikèbò pwa̤lṳhtò̌ta̤ ta nò̌she. Mamǔǒkhwè̌ hǎwobò̌pe tò̤.

⁶⁵ Khònò̤dě, Běcǎ ta̤adû̌ hèma̤jèsǒ asî lò̤kèta a hǎmoǒ shope̤ awǐkha dě a shî̌nǎsǒnu hǒ. A lò̤ta kliphû̌ tapwa̤ omṳ hǎmǎ shisî̌pwa̤ dě pe̤ihtǒsumṳnu hǒ.

⁶⁶ A wṳ̂hǎhtò̌gekè pwa̤sò̌khě nû̌û toǒ. A ma̤sòwò̤kè asî tûjûpwa̤.

⁶⁷ A htû̌tiwǐ cû̌khǒkè Jǒjè akhlialè. A wû̌lǎhtò̌to̤ Ephare akhlilè tò̤tò̤.

⁶⁸ A cû̌wû̌htò̌ lè̌ dě Yṳ̌da̤khwǐ ta Sǐokholo htě a mo̤ǐ htǒonu tama.

⁶⁹ A ma̤htò̌nṳ agûla̤ cahtǐ htě asǒsǒta ahǐ dě mǒkhû̌. Ata̤lṳhtò̌ho htǒo a měgletònò sǒsǒta hǎkhû̌ htě a bǒlò̤nṳ tûjûpwa̤ talakhǎ htǒonu.

⁷⁰ A wû̌lǎhtò̌nṳ apwa̤ma̤ta̤phû̌ Dǎwi̤. A kaǎhǎhtò̌ nû̌û dě sophû̌ la̤ǎshǎ gûla̤.

⁷¹ A kaǎ nû̌û ta a glè gèǐ sophû̌ aya. A nokè̌ǐkhwè̌ǐ nû̌û ta Yǎ̤kò akhlialè, Israelphû̌ htě amî̌ Cǒmara akòyò.

⁷² Khwǐdǎ̤wi̤ kè̌ǐkhwè̌ǐ asî ta ta̤sò̌phlǒcǒsò̌phlǒtè̤. A sûcû̌ asî ta ta̤sî̌ta̤jò.