Htû̌sò̌htò̌ 77 - Kawyaw RC

Cǒmara ǒkû̌ta akòyò bǎ asî shěto̤bǎ ta̤pò̤ta̤sha akha

Asa ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě ta̤sò̌po̤htû̌sò̌ǐ htǒo to̤to̤ mî̌ Jedutu htě a yṳ̂klè̌nè̌klònṳ pwa̤sò̌po̤htû̌sò̌ǐ ta̤nu tapwa̤ aya.

¹ He kwi꤮ gwèbǎǐ mè̤mè̤̌ Cǒmaradû̌ ata̤ma̤jè. He kwi꤮ sabahtò̌ nò yǎ dě a glè gana̤de heta̤kwi.

² Bǎ he shěto̤bǎkè̌shǐbǎ ta ta̤pò̤ta̤sha akhanu, he kè̌lǎ Běcǎ ta̤adû̌. He yṳ̂htò̌ hecǔde, he kwisabahtò̌ na tasa tasa pwǎ̤tadě agaya̤ nǒ hecǔdetò̤. Pwǎ̤tadě amo̤to̤ nǒ hesò̌phlǒ dî̌kî̌꤮ tò̤.

³ Bǎ he gènè̤htò̌to̤ Cǒmaradû̌ akhanu, he kookasha. He gènè̤꤮ gènè̤ awi̤akè̌ dě he sò̌phlǒpî̌ mè̤mè̤̌.

⁴ Na nohǎmoǒnî̤pe he tò̤. Aguagè tûlû̌shû̌ he, he hî̌bǎhǎhtò̌bò̌pe tò̤.

⁵ He gènè̤htò̌to̤ mṳni̤mṳsa htě atûlû̌hto toǒ, he gènè̤to̤bǎ něla dě꤮ awǐnu toǒ.

⁶ He hî̌lò̤ hena̤ ta, “Lṳmṳkhǐkha he glè gènè̤htò̌nṳ heta̤sò̌po̤. “He glè gènè̤ te̤te̤mǎmǎ ǐ yǎ.

⁷ “Mî̌ Běcǎ ta̤adû̌ glè wîkè pa tûjûpwa̤ ya? “Mî̌ a dǔlṳpe ata̤mo̤ǐ ta pa dǐplǎ꤮ tò̤ ya?

⁸ “Ata̤mo̤ǐ htě ahǎbòjò tò̤ htǒonu a gutṳkè tûjûpwa̤ ya? “Ata̤olò̤ mî̌ a pî̌gutṳkè ya?

⁹ “Cǒmaradû̌ htǒo a tobǎ gwèbǎǐ kònu mî̌ a shope̤kèbò hǒ ya? “Asò̌phlǒdû̌ tûlû̌꤮ shû̌ dě a gwèbǎǐpe tò̤ ya?”

¹⁰ Htodě he hî̌ ta, “Cǒmara htě adû̌ahtûkhlo kò htǒotapwa̤ ma̤jè bǎ he ta acǔde dě asîrîshû̌sho htǒo to he hî̌ htǒonu, a bǎpò̤bǎshakhlo he.”

¹¹ He glè gènè̤htò̌to̤ Cǒmara tûjûpwa̤ ata̤ma̤nu toǒ. He glè gènè̤htò̌bǎ nata̤ma̤ cǒklî̌kî̌ya dě awǐnu toǒ.

¹² Na ma̤ kwè̌꤮ hî̌tènu he glè gènè̤ te̤mǎǐbò. He glè gènè̤bò nata̤ma̤ htě apo̤phǎshû̌shonu toǒ.

¹³ Kǒ Cǒmaradû̌, na ma̤ nakòyò toǒ hî̌tètè̌꤮ bǎbǎ, atoawǒbò. Cǒmara htě adû̌ lò̤ta pacǒmaranu aǒ dǐpwǎ̤꤮ tò̤.

¹⁴ Na mî̌ Cǒmara htě a ma̤ ta̤cǒklî̌kî̌ya. Na dǔlṳ tû̌ nata̤sîrîshû̌sho dě khlilèphû̌ toǒ akla.

¹⁵ Nakòyò htě a mî̌ Yǎ̤kò ta Jǒjè akhlialè sîtoǒnu, na htè̌genṳ asî ta nacǔde htě a sîrîpo̤phǎ.

¹⁶ Kǒ Cǒmaradû̌, bǎ shi toǒ kè̌shǐ na akhanu, a ǐshabò nala̤. Shidû̌shite̤we̤ toǒ guyṳgònò̤ lò̤to̤ dě akòdǎ.

¹⁷ Khwè̌judû̌ shilo̤shikho hè. Kǒwǒshibo dě mǒla̤. Tî̌lî̌bo pṳ̂̌꤮ tò̤glò.

¹⁸ Na notî̌lî̌lò̤ mǒgomǒyi̤htǒo a pi̤ti̤pṳ̂tṳ̂ dě phopiwidû̌ kla. Tî̌lî̌bo dě a lîrakhabò hǎkhû̌. Hǎkhû̌ ǐsha gònò̤gèglè, guyṳbò.

¹⁹ Na cû̌phlǔbò̌ shidû̌shite̤we̤, na cû̌tûlû̌bò̌ shidû̌shiyo̤. Kòyò kè̌shǐ nǒ nakhǎlǎla̤kha gûla̤ dǐpwǎ̤꤮ tò̤.

²⁰ Napǒnasû̌nṳ nakòyò toǒ lò̤ta sophû̌ htě Mǒ̤jè ta Aro sûcû̌ asînu hǒ.