Htû̌sò̌htò̌ 76 - Kawyaw RC

Cǒmara mî̌ pwa̤ma̤pè̤ta̤

Asa ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Bǎ sò̌po̤ ta̤sò̌po̤ htǒoakhanu, bǎ dǒ nû̌û ta ta̤dǒta̤ǔ dě apli̤ǒ toǒ.

¹ Kòyò ǒ dě Yṳ̌dagakû toǒ sî̌ya lǒkho Cǒmaradû̌. Israelgaphû̌ toǒ bè̌dubè̌na̤ mè̤mè̤̌ nû̌ûmi̤.

² Ahǐ ǒ dě Ye̤rǔshèlèwî̤. Agûla̤ ǒ dě Sǐokholokhû̌.

³ A yǒgakèbò pwa̤sò̌khě toǒ amî̌pla̤ bǎnu tò̤glò. A degakèbò asîgòtò̤, nò̌she ta ta̤wè̌ta̤htò.

⁴ Kǒ Cǒmaradû̌, naǒ dě nala̤ma̤pè̤ pwa̤sò̌khě na akholokhû̌ dě na hèlò̤nu pa kè̌shǐ mè̤mè̤̌ ta nata̤sîrîpo̤phǎ, nata̤sîrîdû̌sîrîhtû.

⁵ Asîkliphû̌ dě akhuaha toǒ, kò phî̌sigwikèbò asî ta̤kî̌ta̤kû̌, a sikèbò hǒ. Asîta̤shû̌ta̤sho, ta̤cǒta̤tè̤ toǒ noǎjòpe dǐcǎ꤮ tò̤.

⁶ Kǒ Yǎ̤kò acǒmara, bǎ na sǎhtǎ akhanu, pwa̤dò̌ tîsî̌ ta atîsî̌ toǒ lòkhǔsibò.

⁷ Kǒ Cǒmaradû̌, kò bǎ ǐsha pwǎ pǒ̤꤮ na. Bǎ na sò̌phlǒdû̌ akhanu, kò ihtǒkhòbò̌ dě nalo̤mo̤ dǐpwǎ̤꤮ tò̤.

⁸ Bǎ na ǒ dě mǒkhû̌ hî̌lò̤ ta glè cèrò akhanu, kòyò ǒ dě hǎkhû̌ bǎotoǒ ǐsha, pwǎpwǎ a ǒbò.

⁹ Bǎ na sahtò̌ cèrò hǐnu akhanu, na ma̤lû̌htò̌ge kòyò lǒ̤꤮ bò htě kò ma̤jîma̤jû nû̌û bǎ hǎkhû̌ bǎonu toǒ.

¹⁰ Na sò̌phlǒdû̌ kòyòhǎkhû̌phû̌ htǒotoǒnu, a tǐ̤꤮ ma̤htûhtò̌ wǒpo̤ bǎ kò la̤htû̌sò̌ǐ. Kòyò htě a ǒhtûpwa̤ lû̌kè dě ta̤shěta̤pe̤ akûnu toǒ subusabahtò̌ na dě napwèdû̌pwèhtû pě.

¹¹ Olò̤ nayo̤ toǒ ta Cǒmara tûjûpwa̤, nacǒmaradû̌ htǒonu dě ma̤lǒma̤be yǎ. Lǒ̤꤮ bò kòyò ǒ te̤we̤lṳ̂bònû̌ûnu toǒ nophî̌hèbò asî sû dě Cǒmara aǒ, Cǒmara dě kò tobǎ ǐsha ala̤ mî̌ pǒ̤꤮ pwǎ a.

¹² Cǒmara bè̌lò̤phǔkèbò Khwǐ ta Khwǐphû̌ ata̤phî̌dû̌phî̌htû ana̤. Khwǐ bǎ hǎkhû̌ htǒotoǒ ǐshabò nû̌ûla̤.