Htû̌sò̌htò̌ 74 - Kawyaw RC

Ta̤kwisaba ta pwa̤ma̤jè glè lû̌htò̌ aya

Htǒomî̌ Asa ata̤sò̌po̤ dě Ebrephû̌yo̤nu, a kaǎ ta̤sò̌po̤ htǒo ta Masakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ.

¹ Kǒ Cǒmaradû̌, na cû̌ wîkè pa tûjûpwa̤ ma̤tè? Na cû̌ sò̌phlǒdû̌gûhî nasophû̌ prṳ̂ho htě na gèǐ htǒotoǒ mî̌ a ma̤tè?

² Gènè̤htò̌nṳ nakòyò htě na htè̌ge asî dě꤮ wǐkhanu ta nakhlilèphû̌ htě na pwî̤ge asî dě a glè htûbò nakòyònu. Htohǒtò̤ gènè̤htò̌nṳpo̤ Ye̤rǔshèlèwî̤ ǒ dě Sǐokholokhû̌ htě na ǒ ǐyǎ htǒonutò̤glò.

³ Hèlèkè̌mò̌ kò ma̤lòte̤japî̌bò htǒo. Pwa̤sò̌khě pa toǒ ma̤pî̌ma̤lṳ̂kèbò lǒ̤꤮ bò ta̤ ǒ dě ta̤cahtǐ gûla̤ akûnu toǒ.

⁴ Pwa̤sò̌khě na toǒ ma̤pè̤ ta̤ dě yi̤kǒhtò̌ na ta̤lṳhtò̌hokû. Asî shǒhtò̌ akhû̌pa̤la̤ bǎnu pwǐ ta̤ma̤pè̤ anò̌dò tacǎ.

Ta̤kwisaba ta khlilèphû̌ ta̤lû̌htò̌ge aya

⁵ Asî hèdelòte̤jabò ta̤kî̌ta̤kû̌ lò̤kèta kòyò gûga sǒ dě mi̤kla.

⁶ Sǒbě htě kò htǎwî̤ nû̌û toǒnu, asî po̤lòte̤jakèbò nû̌ûta kû ta khî̌po̤.

⁷ Asî shû̌gèkèbò nata̤cahtǐ agûla̤. Asî ma̤bǐaǒ phû̌mò̤shî̌htobò kò nala̤ǒ gûla̤.

⁸ Asî hî̌ ta, pa ma̤pî̌kèbò asî pṳ̂̌꤮ tapwa̤ hò̌꤮. Asî shû̌gèkèbò lǒ̤꤮ bò gûla̤ htě kò la̤subusabahtò̌ Cǒmaranu toǒ.

⁹ Pa kè̌shǐ nata̤ma̤cǒklî̌kî̌ya dǐcǎ꤮ tò̤. Pwa̤po̤ ǒpe dǐpwǎ̤꤮ tò̤tò̤. Akhîakha yî̤ pwî̌tè pěnu kò sî̌ya dǐpwǎ̤ tò̤tò̤.

¹⁰ Kǒ Cǒmaradû̌, pwa̤sò̌khě na toǒ luya̤po̤ na pwî̌tè pě? A pi̤jishǐcǒ nami̤ tûjûpwa̤ pě ya?

¹¹ Na cû̌dò̌tûlû̌ ma̤tè? Hèma̤jè mò̌ pa, ma̤pî̌ma̤lṳ̂bòmò̌ asî.

¹² Kǒ Cǒmaradû̌, he sî̌yahto ta na mî̌ pakhwǐ děwǐkhape. Na ma̤lû̌htò̌ sala̤ pa dě pagakû bǎo.

¹³ Na ma̤ phò̌pa̤kè shidû̌shite̤we̤ ta nata̤sîrîpo̤phǎ. Na po̤phò̌kè wṳ̂sapo̤pṳdû̌ ǒ dě shidû̌shite̤we̤kûnu tobo ahǐkǒ toǒ.

¹⁴ Na demǔdeplěkè ta̤phû̌ta̤li̤ ǒ dě shikla htě kò kaǎ nû̌û ta Lawǐta htǒotodo ahǐkǒ toǒ. Na bǔǎkè yǎta ta̤mi̤ta̤mò̤ ǒ dě lo̤mî̌shǒkla.

¹⁵ Na nohtǎhtò̌ shihtǎpo̤ toǒ, na nodû̌hè shilo̤ toǒ. Na nosǔkhwekè shikhî̌ toǒ.

¹⁶ Na nohtûhtò̌ lṳmṳkhǐ ta lṳmṳsha. Na bè̌lò̤tû̌ lṳmṳ ta la dě agûla̤ ta agûla̤.

¹⁷ Dě hǎkhû̌ na bè̌tobè̌bǎbò tû̌ ta̤pṳ̂̌tacǎ agûla̤ ta agûla̤. Na nohtûhtò̌ gagûkha ta gawo̤kha.

¹⁸ Kǒ Cǒmara tûjûpwa̤, pwa̤sò̌khě na htǒotoǒ luya̤bò na pwî̌꤮ tènu, gènè̤htò̌nṳ tû̌ pě nî̌. Kòyò kòyònòdû̌ pi̤jishǐcǒbò nami̤ pwî̌꤮ tènu, gènè̤htò̌to̤ tû̌.

¹⁹ Ǐkè pûma̤ htû̌li̤cò̌ mî̌ nakòyò toǒ asò̌phlǒhtûpwa̤ ta ta̤mi̤ta̤mò̤ ma̤. Shope̤kè pûma̤ nakòyò htě a khòbǎ ta̤shuphǔshèwènu toǒ asò̌phlǒhtûpwa̤ dî̌kî̌꤮ ma̤.

²⁰ Hǎkhû̌ htě akhǐalo̤ gûla̤nu toǒ, a ǒlǒǒbebò ta ta̤ma̤nûma̤cě akhû̌akhî, gènè̤htò̌nṳ nata̤wṳ̂dò.

²¹ No htûhtò̌ pûma̤ ta̤sòwò̤ ta kò ma̤jîma̤jû nû̌ûnu toǒ ayama̤. No htû̌sò̌ǐ nami̤ ta kòyò htě kòpè̤ǎpè̤o nû̌û, kòyò shodo pwa̤ma̤jènu toǒ.

²² Kǒ Cǒmaradû̌ ma̤kwaǐ mò̌ nana̤, gènè̤htò̌nṳ mò̌ kòyòǒò̌phuhtònu toǒ hî̌phû̌mò̤shî̌hto na ti̤nǐ̤ mṳhǎ htǒonu.

²³ Pwa̤sò̌khě na dě a sò̌phlǒdû̌ na, a yi̤kǒyi̤hta na toǒnu, shope̤kè asî ma̤. Pṳ̂̌plǎplǎ asî hèma̤ pi̤ti̤pṳ̂tṳ̂ ma̤tukutakǎ na toǒnu, shope̤kè pûma̤ma̤.