Htû̌sò̌htò̌ 73 - Kawyaw RC

Ta̤htû̌sò̌ǐalî̤ subǎ tabǎ Cǒmara ma̤toma̤bǎ ta̤

Asa ata̤sò̌po̤ htû̌sò̌ǐ

¹ Cǒmaradû̌ wǒ꤮ mè̤mè̤̌ dě Israelphû̌ ta kòyò htě a sò̌phlǒ mṳ̂plînu toǒ aya.

² Dě he lè̌dě he glè̌ wî phǔtînî̌kè hecǒmara. Heta̤yṳta̤nǎ glè̌ hǎmǎ phǔtînî̌ lǎ hǒ.

³ Bǎ he kè̌shǐ kòyòjîkòyòphû̌mò̤ ata̤dû̌yò̤htò̌sa akhanu, he sò̌khě kû̌tû̌ kòyòphî̌dû̌phî̌htû ana̤nu toǒ.

⁴ Asî kè̌shǐ shěto̤bǎ kû̌nǒ ta̤pò̤ta̤sha tò̤. Asî khû̌ǎshû̌sho ǒshǔǒmo̤ mè̤mè̤̌.

⁵ Asî shěto̤bǎ kû̌nǒ ta̤pò̤ta̤sha pwǐ kòhǔwa̤nu tò̤. Asî khòbǎ kû̌ ta̤jîta̤jû pwǐ kòhǔwa̤nu tò̤tò̤.

⁶ Hǐnuakhû̌akhî, asî phî̌dû̌phî̌htû ana̤nu a ǒlṳlîphlo lò̤kèta kò kǒle̤ǐ kǒle̤. Asî ata̤ma̤jîma̤jû kònu a ǒlṳlîphlo lò̤kèta kò kûsǒhtò̌ hǐdohǐyò̤.

⁷ Asî ata̤dû̌yò̤htò̌sa toǒnu a ǐhtûhtò̌ asî la̤ma̤sǔma̤plě ta̤. Asîta̤gènè̤ toǒnu còcè̌ ta̤sǔta̤plě.

⁸ Asî pi̤jishǐcǒ kò, a hî̌bǎ còcè̌ ta̤phû̌mò̤shî̌hto. Asî phî̌dû̌phî̌htû ana̤, a ma̤nûma̤cěbò kò.

⁹ A hî̌bǎ pwǐ a pǒǐ mǒkhû̌. A pwe̤ pwǐ hǎkhû̌ dě a htû nû̌ûtanu.

¹⁰ Kǒ꤮ Cǒmara akòyò dě a gûma̤ kû̌bò pwǐ asînu hǒ nǔnǔ꤮.

¹¹ Kòyòphû̌mò̤ sîtoǒ hî̌ ta, “Cǒmara cû̌sî̌yajò pa ma̤ta̤ hî̌tè? “Cǒmara htě adû̌ahtûkhlo kò htǒotapwa̤ mî̌ a cû̌sî̌yajò nò ya?”

¹² Kè̌mò̌ kòyòjîkòyòphû̌mò̤ sîtoǒ ata̤ǒhtûpwa̤ htǒolè. A bǎgubǎgè kû̌ kò dǐcǎ꤮ tò̤. A tǐ̤꤮ dû̌yò̤htò̌ ta dû̌yò̤htò̌.

¹³ He bè̌ mṳ̂plî hesò̌phlǒ pwǎ̤tadě tîkî̌꤮ he nî̤bǎ kû̌ kò ta̤bwǐta̤sîrî toǒ tò̤. He shǔbò hecǔde dě glè dǔlṳ yǎta heta̤sǔ ǒ dǐcǎ꤮ tò̤ pwǎ̤tadě he nî̤bǎ kû̌kò dǐcǎ꤮ tò̤tò̤.

¹⁴ Kǒ Cǒmara, na nokhòjîkhòjû he ti̤nǐ̤ mṳhǎ. Pṳ̂̌wo̤wo̤꤮ na sǎhtǎ he.

¹⁵ He dè hî̌ kû̌ pwǐ asî hî̌nu hî̌dě, asǒsǒta he cǒtè̤pe ta Cǒmara akòyò toǒ tò̤.

¹⁶ Pwǎ̤tadě bǎ he kè̌lǎsî̌yaphlo ta̤htǒotoǒ lǒ̤꤮ bò akhanu, apò̤asha mè̤mè̤ heya.

¹⁷ He hènṳ tû̌mò̌ dě Cǒmara ahocahtǐ akû dě, he sî̌yate̤mǎ hènǒ pwa̤jîphû̌mò̤ toǒ aklè̌ gutṳ.

¹⁸ Na cû̌bè̌ǒ mè̤mè̤̌ asî dě ta̤sò̌gònò̤ ǐsha agûla̤. Na noto̤kè asî ta ta̤pî̌ta̤lṳ̂.

¹⁹ Teděsǎ akû asî pî̌kèbò. Ta̤cèrò htě a sò̌gònò̤ ǐsha ma̤tṳkèbò asî.

²⁰ Kòyòjî phû̌mò̤nu alò̤ta kòyò hǎmoǒmi̤mò̤ dě bǎ lṳmṳlîbû shî̌nǎ hǒ akhanu, a hǎmǎkèbònu pwǎ. Kǒ Běcǎ ta̤adû̌, bǎ na hèma̤jè he akhanu, asî hǎmǎkèbò.

²¹ Děwǐkha bǎ asû̌gûsò̌gè mè̤mè̤̌ hesò̌phlǒ, ashèwè mè̤mè̤̌ hesǔshi akhanu,

²² He pè̌giti̤, he ta̤sî̌ta̤jò ǒkû̌ tò̤. Dě nalo̤mo̤nu he sǒsǒpwǎ ta ta̤phû̌ta̤li̤.

²³ Pwǎ̤tadě pṳ̂̌plǎplǎ he ǒphǔ ta na. Na pṳ̂měǐ hecǔdemû.

²⁴ Na yṳ̂klè̌nè̌klò he ta nata̤sî̌ta̤jò. Nǒkò pěnu, na glè sûcû̌ he dě ta̤bè̌dubè̌na̤ gûla̤ htò̌yî̤.

²⁵ Pwa̤ma̤jè he dě mǒkhû̌ pěnu, aǒ pwǎ pǒ̤꤮ na tapwa̤. Ta̤ htě a ma̤to ta hesò̌phlǒ dě hǎkhû̌bǎo aǒ dǐcǎ꤮ tò̤, aǒ pwǎ pǒ̤꤮ na.

²⁶ Hena̤klûphěyî̌, hesò̌phlǒsǔshi khû̌ǎja gilò̤kèbò. Cǒmaradû̌ mî̌ hesò̌phlǒ akhû̌aǎ. He gènè̤htò̌ pwǎ pǒ̤꤮ a pwǎ.

²⁷ Kǒ Cǒmaradû̌, kòyò htě a ǒyî̤ ta nanu a gupî̌kèbò mè̤mè̤̌. Na ma̤pî̌ma̤lṳ̂kèbò kòyò htě acǒtè̤ ta na tò̤nu toǒ pě.

²⁸ Dě he lè̌dě he ǒphǔ ta Cǒmaradû̌ dě a nî̤bwǐnî̤sîrî mè̤mè̤̌ heya. Běcǎ ta̤adû̌ mî̌ he la̤ǒtûdû. He pwe̤ǐlṳbò bǎ kò ta na ma̤ ta̤cǒklî̌kî̌yanu pě.