Htû̌sò̌htò̌ 71 - Kawyaw RC

Kwihtò̌ Cǒmara ata̤ma̤kwaǐ aya

¹ Kǒ Cǒmara tûjûpwa̤, he hèǒtûdû dě na ǒ. Noma̤ sòwò̤ pûma̤ he ta kò dî̌kî̌꤮ ma̤ nî̌.

² Nacǒnatè̤ akhû̌akhî, ma̤lû̌htò̌ge mò̌ he. Gana̤de heta̤kwigwèbǎǐ na, ma̤lû̌htò̌ge mò̌ he.

³ Htû bǎ he lo̤dû̌ la̤ǒtûdû ta hela̤cû̌ǒtûdû pṳ̂̌꤮ taplǎ. Hî̌lò̤ mò̌ nayo̤ ta na glè ma̤lû̌htò̌ge he. Na mî̌ helo̤dû̌ la̤ǒtûdû, hewî̤we̤dû̌ htě atònò.

⁴ Kǒ he Cǒmaradû̌, ma̤lû̌htò̌ge mò̌ he dě kòyòjî kòyòjû, kòyòphû̌mò̤, kòyòma̤jîma̤jû he htǒotoǒ acǔdekû.

⁵ Kǒ Běcǎ ta̤adû̌ htě a pǒ ta̤ lǒ̤꤮ bò he kè̌shuǐ pwǎpǒ̤꤮ na. Kǒ Cǒmara tûjûpwa̤, he yṳǎnǎla̤ǐ na dě he phijaû̌khape.

⁶ He nǎla̤ǐ na dě he ǒlò̤khû̌lû̌꤮ akhape. Na mî̌ pwa̤phî̌htò̌ he dě hemo̤phukû. He htû̌sò̌ǐ na pṳ̂̌꤮ taplǎ.

⁷ Na mî̌ he la̤ǒtûdû atònò akhû̌akhî, he htûplṳ̂ bǎ kò la̤kè̌mò̌mṳ.

⁸ Pṳ̂̌ plǎplǎ꤮ he htû̌sò̌ǐ na. He pwe̤ǐlṳnṳ nata̤sîrîdû̌sîrîhtû ti̤nǐ̤ mṳhǎ.

⁹ Htû̌꤮ he mo̤pwa̤ akha pě, wṳ̂kè pûma̤ he ma̤. Htû̌꤮ hekhû̌heǎ hǎbò akha pě, wîkè pûma̤ he ma̤.

¹⁰ Pwa̤sò̌khě he toǒ hî̌bǎ tukutakǎbò he. Kòyò htě a shokhû̌ye̤yo̤ he toǒnu, a ǒhtuhî̌bǎplǒ hǔsè̌bò nû̌û.

¹¹ Asî hî̌ lǒkho ta, Cǒmaradû̌ wîkè yǎ. Pwa̤ma̤jè nû̌û ǒpe dǐpwǎ̤꤮ tò̤ akhû̌akhî, pa cû̌ lṳ̂pṳ̂ yǎ hò̌꤮.

¹² Kǒ Cǒmaradû̌, ǒtepheyî̤ pûma̤ ta he ma̤. Kǒ he Cǒmaradû̌, khòsò̌do hèma̤jè phwèmò̌ he.

¹³ Nolò̤jûkè, nopî̌kèbò kòyò htě a kè̌lǎbè̌ he ta̤sǔnu toǒ. Nosòwò̤ mi̤sǎpî̌kè kòyò htě a kè̌lǎma̤pò̤ma̤sha henu toǒ.

¹⁴ Hedě, he kè̌shuǐ tû̌ pwǎpǒ̤꤮ dě na ǒ. He glè htû̌sò̌ǐ hto htû̌sò̌ǐ sǒsǒ na.

¹⁵ Nata̤cǒta̤tè̤ awi̤akè̌ ta nata̤ma̤lû̌htò̌ge awi̤akè̌ htǒonu, he sî̌yahtû tò̤ pwǎ̤ta he glè pwe̤ǐ dǒhtû̌ǐlṳ bǎ kò ti̤nǐ̤ mṳhǎ.

¹⁶ He hèpwe̤ǐlṳ tû̌ta Běcǎ ta̤adû̌ ata̤ma̤ htě asîrîpo̤phǎ. He pwe̤ǐlṳ bǎ pwǎpǒ̤ kò ta nata̤cǒta̤tè̤ pě.

¹⁷ Kǒ Cǒmaradû̌ na sû̌ǐtòwòǐ he dě he phijaû̌khape. He pwe̤ǐlṳ nata̤ma̤ cǒklî̌kî̌ya toǒ tǒ̤lò̤꤮ khònò̤.

¹⁸ Kǒ Cǒmaradû̌, htû̌꤮ he mo̤pwa̤ khǔlṳbû pě hǐnudě wîkè pûma̤ he ma̤ nî̌. Nopwe̤ǐlṳ he ta hephû̌heli̤ sîtoǒ ta nasîrîpo̤phǎ. Nopwe̤ǐlṳ he ta kòyò ǒhtûpwa̤ anǒkò tuhtu toǒ ta na ma̤ ta̤sîrîpo̤phǎ awi̤akè̌ pě nî̌.

¹⁹ Kǒ Cǒmaradû̌, nata̤cǒta̤tè̤nu, a htò̌to̤ dě mǒla̤. Na ma̤ ta̤nu acǒklî̌kî̌ya mè̤mè̤̌. Pwa̤ htě alò̤ta nanu aǒ dǐpwǎ̤꤮ tò̤.

²⁰ Na ǐkè̌shǐ he ta ta̤pò̤ta̤sha ta̤shuphǔshèwè pwǎ̤ta na ǐ shû̌htò̌shohtò̌ gesǒ he. Bǎ he glè̌ phǔ si tînî̌ akhanu, na ma̤ htûpwa̤ gesǒ he.

²¹ Na bè̌htò̌yî̤khlo hesîrîshû̌sho, na ma̤mo̤htò̌ gesǒ hesò̌phlǒ.

²² Kǒ hecǒmaradû̌, na cǒtè̤ ta nayo̤ akhû̌akhî, he dǒ tǐte̤gwedû̌, he htû̌sò̌ǐ na. Kǒ Israelkhlilèphû̌ acǒmara htě acahtǐ, he dǒ tǐte̤gwephû̌, he sò̌po̤ htû̌sò̌ǐ na.

²³ He sò̌le̤sò̌lò̤ yi̤kǒ sò̌po̤ htû̌sò̌ǐ na. Bǎ na ma̤lû̌htò̌ge he akhanu, he glè htû̌sò̌ǐ na.

²⁴ Na ma̤ ta̤cǒta̤tè̤nu he glè pwe̤ǐlṳ ti̤nǐ̤ mṳhǎ. Nosòwò̤ mi̤sǎpî̌kè kòyò htě a kè̌lǎ ma̤pò̤ma̤sha henu toǒ.