Htû̌sò̌htò̌ 7 - Kawyaw RC

Kwicabahtò̌ ta kòyòcǒkòyòtè̤ toǒ aya

Khwǐdǎ̤wi̤ sò̌po̤ Bejamekhli Kǔshǎ awi̤akè̌ dě a sò̌po̤kwihtò̌ Cǒmara tûjûpwa̤.

¹ Kǒ Cǒmara tûjûpwa̤, hecǒmaradû̌ he hèǒtûdû dě naǒ hǒ. Ma̤lû̌htò̌ge he ta kòyò lǒ̤꤮ bò htě a lṳ̂pṳ̂ he, sò̌yṳ ma̤pò̤ma̤sha he htǒo.

² Dè mè̤tò̤ hî̌mî̌, asî htěmǔhtěpwî̌bò he pwǐ sî̌ò̌ ěmǔěpwî̌ kònu pě. A ěmǔěpwî̌bò he pě. Kò ma̤lû̌htò̌jò he pě dǐpwǎ̤꤮ tò̤.

³ Kǒ Cǒmara tûjûpwa̤, hecǒmaradû̌, he ma̤sǔnǒ kò dǐpwǎ̤꤮ tò̤.

⁴ He shaǎma̤si nǒ hesû̌hekho tò̤. Bǎ pwa̤sò̌khě he ma̤sǔ he dǐcǎ꤮ tò̤ akha, he cû̌phî̌sigwi nǒ asîta̤ dǐkhò̌꤮ tò̤tò̤.

⁵ He dè ma̤ hǐnu hî̌dě nolṳ̂kè he ta pwa̤sò̌khě he, nolṳ̂pṳ̂kètû̌ yǎta he. Noyî̤mǔyî̤pwî̌kè tû̌ hesò̌phlǒhtûpwa̤ htǒo ta a dě hǎkhû̌bǎo, nobè̌lò̤kè hena̤klûhtǒo dě lo̤hǎklanu.

⁶ Kǒ Cǒmara tûjûpwa̤, ma̤mò̌, sò̌phlǒdû̌mò̌, shěshǔmò̌ pwa̤sò̌khě he htě a sò̌phlǒdû̌ gûhî he htǒo. Pwǐ na mǎnǎhto nayo̤nu ma̤mò̌ bǎ he, cèròmò̌ ta̤ tò̤ya.

⁷ Nohèǒplǒ te̤we̤bòmò̌ kòyòprṳ̂ho dě na kòshî̌. Hǎnòò̌lò̤ dě mǒkhû̌ nakhû̌glûhta akhû̌nu, dě pǒǐbòmò̌ asî.

⁸ Cǒmara tûjûpwa̤ cèròtocèròbǎ khlilèphû̌ toǒ. Kǒ Cǒmara tûjûpwa̤, ta̤dû̌ta̤yǒ aběcǎ, hecǒhetè̤, heta̤sǔ ǒ tò̤ akhû̌akhî, khòmò̌ nasò̌ ta hetokho.

⁹ Kǒ Cǒmaradû̌ htě acǒatè̤, pwa̤sèlè kòta̤gènè̤, sî̌yabò kòsò̌phlǒ ata̤sò̌yṳ, khòsò̌do noǒkǔkè kòyò phû̌mò̤ htě a ma̤ ta̤phû̌mò̤nu toǒ. Kè̌khwè̌ma̤kwaǐ kòyò htě acǒatè̤nu.

¹⁰ Cǒmaradû̌ mî̌ pwa̤ma̤kwaǐ he sǒsǒta gòtò̤ tabǎ. A ma̤lû̌htò̌ge kòyòcǒkòyòtè̤.

¹¹ Cǒmaradû̌ mî̌ pwa̤cèròtocèròbǎ ta̤. A sò̌phlǒdû̌ mè̤mè̤̌ kòyòsò̌phlǒ phû̌mò̤shî̌htonu toǒ pṳ̂̌꤮ ti̤ni̤.

¹² Asî dè yò̤lò̤gesǒ lǒkho asò̌ tò̤mî̌, Cǒmaradû̌ wṳ̂htò anò̌she, wo̤htò̌nǎ akhlǐ pě.

¹³ A tîwî̌tòwònǎ ata̤wè̌ta̤htò htě a ma̤sijò kò, wo̤htò̌nǎ amî̌pla̤ htě a ma̤hǎmǎjò kò.

¹⁴ Kè̌mò̌, kòyòjî ta̤pwa̤nu alò̤ta mamǔ mo̤dohtò̌ǐ ta̤phû̌mò̤shî̌hto, phudû̌htò̌ǐ ta̤pò̤ta̤sha, phû̌ǒlò̤ǐ ta̤lòhǎlòho htǒotoǒ.

¹⁵ A pholò̤yo̤ hǎkû ta kò lòte̤ aya pwǎtadě a lòte̤ gesǒtû̌.

¹⁶ Ta̤phû̌mò̤shî̌hto htě a shokhû̌ye̤yo̤ kò toǒnu a bǎgesǒtû̌ nû̌ûta ana̤. A ma̤jîma̤jû kò toǒ lòte̤bǎgesǒtû̌ nû̌û khû̌dakhû̌.

¹⁷ Cǒmara tûjûpwa̤ cèròcǒ cèròtè̤ ta̤ akhû̌akhî, he hî̌bwǐhî̌sîrîhtò̌ yǎ, sò̌po̤ htû̌sò̌ǐ yǎta adû̌ayǒ htǒota̤pwa̤ ami̤ pě.