Htû̌sò̌htò̌ 68 - Kawyaw RC

Ta̤ma̤pè̤ lî̤sò̌po̤ htû̌sò̌ǐ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokû nutapwa̤ aya.

¹ Kǒ꤮ Cǒmaradû̌, ma̤mò̌, ma̤ nûpò̌nûshîkèbò mò̌ pwa̤sò̌khě na. Nokhlè̌htokhlè̌lò̤kèbòmò̌ nakhuwè.

² No khǔkèbò asî lò̤ta mî̌khǔ cû̌kèbònu. No jûbǔjakèbò asî sǒsǒta mî̌gè jûkè tarǎbonu. Kòyòjîkòyòjû pî̌kèbò tû̌ta dě Cǒmaradû̌ alo̤mo̤ nî̌.

³ Pwǎ̤tadě kòyòcǒkòyòtè̤ sò̌le̤sò̌lò̤ tû̌ta nî̌꤮. Asî mo̤sû̌mo̤sò̌bò tû̌ta dě Cǒmaradû̌ alo̤mo̤ nî̌꤮. Asî ǒcòcè̌꤮ tû̌ta ta̤sò̌le̤sò̌lò̤ nî̌꤮.

⁴ Sò̌po̤htò̌ Cǒmaradû̌, sò̌po̤htû̌sò̌htò̌ yǎ. Htû̌sò̌ǐ pwa̤ htě a htò̌dò̌ poǒlṳ htǒotapwa̤. A mi̤ ta Cǒmara tûjûpwa̤. Hǐnudě sò̌le̤sò̌lò̤ lǒkhomò̌ dě alo̤mo̤ htǒo.

⁵ Cǒmaradû̌ ǒ dě agûla̤ cahtǐ. A mî̌ phû̌ htě shodopha toǒ apha, pwa̤ htě a ma̤kwaǐ mamǔǒkhwè̌.

⁶ Kòyò htě a shodo khonu, Cǒmaradû̌ bè̌ǒ bǎ nû̌û hǐphû̌phòphû̌. A kaǎhtò̌ kòyò lò̤te̤ dě apo̤kû, a ǐ asî gûla̤ dě a pelemo̤. Kòyò htě a shěshǔ Cǒmaranu a bǎ ǒkè dě lo̤mî̌shǒkla gûla̤.

⁷ Kǒ Cǒmaradû̌, bǎ na cû̌wǐ dě nakòyò alo̤mo̤, na sûcû̌ phlǔ asî ta lo̤mî̌shǒklakhû̌ akhanu,

⁸ Hǎkhû̌ guyṳ dě khwè̌ julò̤. A htûhtò̌ hǐnu bǎ na mî̌ Cǒmaradû̌, Israel acǒmaradû̌ hèlò̤ ǒlṳhtò̌ dě Sǐnǎkholonu akha.

⁹ Kǒ Cǒmaradû̌ na nojulò̤ lǒbe khwè̌. Na nosuhtò̌ gesǒ nashigakhwekhû̌ dě na ǐ yǎta nakòyò.

¹⁰ Nakòyò ǒ lǒkho bǎnu. Kǒ꤮ Cǒmaradû̌, nasò̌phlǒ wǒ꤮ mè̤mè̤̌ akhû̌akhî, na kè̌ǐkhwè̌ǐ kòyò htě kò pè̤ǎpè̤o nû̌û.

¹¹ Běcǎ ta̤adû̌ hî̌lò̤ yo̤. Mamǔ pṳ̂̌pwa̤ cû̌lè pwe̤ǐlṳ pîshîcû̌bò ta̤sò̌le̤sò̌lò̤ awi̤akè̌.

¹² Khwǐ ta akliphû̌ toǒ hǎhtò̌khlè̌bò. Mamǔ ǒkè dě hǐ toǒ mèpa̤bò ta̤kî̌ta̤kû̌ htě a phî̌geǐ ta̤shěta̤pe̤ akla.

¹³ Kòyò htě a hǎmoǒlò̤ dě sophû̌po̤kû toǒ aya bǎbǎ, ta̤kî̌ta̤kû̌nu toǒ mî̌ asǒsǒta he htû̌li̤cò̌děge dě kò plubǐ rakha sǒsǒ yǎta wû. Ashû̌nu aplò̌kîtrî̌ lò̤kèta hta.

¹⁴ Bǎ Cǒmara htě apo̤phǎshû̌sho htǒotapwa̤ nonûpò̌pîshî kèbò Khwǐ toǒ akhanu, a lò̤kèta cashilò̤ dě Salamokholokhû̌.

¹⁵ Bashakholo mî̌ adû̌ahtû awî̤꤮ mè̤mè̤̌. Kholo plǔhtò̌ toǒ ǒplṳ̂꤮.

¹⁶ Kǒ Bashakholodû̌ akholokhi sî, ma̤tè̤dě na cû̌kè̌ sò̌khětǒ̤ kholo htě Cǒmaradû̌ wû̌lǎ yǎta ala̤ǒnu tama hî̌tè? Cǒmara tûjûpwa̤ glèǒ bǎnu tûjûpwa̤.

¹⁷ Cǒmaradû̌ alo̤ la̤htò̌shě ta̤shěnu a ǒ asò̌ ta asò̌, asě ta asěkû. Běcǎ ta̤adû̌ ǒ Sǐnǎkhololo̤ dě a hèlò̤, a hènṳ dě agûla̤ cahtǐ akû.

¹⁸ Bǎ na gekihtò̌ dě gûla̤htò̌yî̤ akhanu, na pṳ̂cû̌ǐ pwa̤sò̌khě na dě alò̤jûkè nala̤nu toǒ. Kòyò htě a shěshǔ nanu toǒ bǎbǎ, na nî̤bǎ sû dě asîǒ. Běcǎ Cǒmara tûjûpwa̤ ǒ bǎ gûla̤nu tò̤glò pěpě.

¹⁹ Htû̌sò̌ǐ Běcǎ ta̤adû̌ htě a ò̌bǎ pata̤bǐta̤ò̌ pṳ̂̌ni̤ni̤nu tapwa̤. A mî̌ Cǒmara dě a ma̤lû̌htò̌ge pa.

²⁰ Pa Cǒmara mî̌ Cǒmara htě a ma̤lû̌htò̌ge kòyò. A mî̌ Cǒmara tûjûpwa̤, Běcǎ ta̤adû̌ dě a ma̤lû̌htò̌ge pa ta ta̤si.

²¹ Cǒmaradû̌ glè dephò̌kè mè̤mè̤̌ pwa̤sò̌khě yǎ toǒ ahǐkǒ. A glè demǔkè mè̤mè̤ kòyò htě a ma̤ sayè̤ ta̤sǔnu toǒ ahǐkǒkhwǐ.

²² Běcǎ ta̤adû̌ hî̌ ta, “He glè kaǎge gesǒ pwa̤sò̌khě he ǒ dě Bashaganu toǒ bǎo. “He glè kaǎgesǒ asî ǒ dě shidû̌shite̤we̤ yo̤kû.

²³ “Ma̤hǐnudě na glè phrǒcû̌bò asîsǐ. “Nachyǐ sîtoǒ glè hèlî̌obò asîsǐ.”

²⁴ Kǒ Cǒmaradû̌, kò kè̌shǐbò nakòyòprṳ̂ho sò̌dodo꤮ a cû̌htò̌nṳplǒbò nû̌û htǒonu. Kò kè̌shǐbò hecǒmara htě amî̌ hekhwǐ, cû̌htò̌nṳ dě gûla̤ cahtǐkû.

²⁵ Pwa̤sò̌po̤ta̤ ǒ dě alo̤mo̤, pwa̤dǒ ta̤dǒta̤ǔ ǒ nǒkò, aplǎkû dě mamǔ phû̌sǎ toǒ pla̤hè lǒkho cî̌ca.

²⁶ Asî hî̌ ta, “Sò̌po̤htû̌sò̌ǐ mò̌ Cǒmaradû̌ dě kòyòprṳ̂ho alo̤mo̤ htǒo. “Israel aprṳ̂aho sî, htû̌sò̌ǐ mò̌ Cǒmara tûjûpwa̤.”

²⁷ Bejame mî̌ htě akònò htǒo akhlilè cû̌wǐ dě alo̤mo̤ gutṳ̌. Htodě Yṳ̌da akhlialè ahǐkǒlǒkòdû̌ aprṳ̂aho gûkû̌ nǒkò. Htodě Sabulo ta Natali ahǐkǒlǒkòdû̌ gûge nǒkò.

²⁸ Kǒ꤮ Cǒmaradû̌, nolò̤mò̌ nasîrîpo̤phǎ. Dǔlṳmò̌ nasîrîpo̤phǎ htě a ma̤hto bǎ pa dě awǐkhanu.

²⁹ Khwǐ glè phî̌hènṳ bǎ na sû dě Ye̤rǔshèlèwî̤ nata̤lṳhtò̌hokû.

³⁰ Sǎhtǎ mò̌ Egyptga htě asǒsǒta ta̤mi̤ta̤mò̤ ǒ dě po̤mṳklanu. Sǎhtǎ mò̌ khlilèphû̌ htě asǒsǒta pṳ̂pha prṳ̂ho ǒ dě pṳ̂phû̌ aklanu. Tûrû̌꤮ sǎhtǎ asî to̤htû̌ a shò̌lò̤ asò̌phlǒ, nohè lṳhtò̌ asî ta wûyî̌ ta hta. Ma̤nûpîshîkèbò khlilèphû̌ htě a sò̌yṳshě sò̌yṳpè̤ ta̤.

³¹ Khwǐ akòyòdû̌ glè ǒ dě Egyptga hè. Kǔshǎkhlilèphû̌ glè bè̌dubè̌na̤ Cǒmaradû̌, a glè ǐ nû̌û sû.

³² Kǒ shiga ǒ bǎ hǎkhû̌ bǎotebě sî, sò̌po̤ htû̌sò̌ǐ mò̌ Cǒmaradû̌. Sò̌po̤ htû̌sò̌ǐ mò̌ Běcǎ ta̤adû̌.

³³ Htû̌sò̌ǐ mò̌ Cǒmara htě a dò̌cû̌tûlû̌ mǒla̤ dě aǒ dě꤮ wǐkha tǒ̤꤮ khònò̤nu tapwa̤. A hî̌bǎ pwe̤te̤we̤toso lò̤kèta tî̌lî̌.

³⁴ Pwe̤ǐ dǒhtû̌ǐlṳmò̌ Cǒmaradû̌ asîrîpo̤phǎ. A pǒ ta̤ pwǐ Khwǐ tapwa̤ dě Israelphû̌ akla. Asîrîpo̤phǎ ǒlṳhtò̌ dě mǒla̤.

³⁵ Kǒ Cǒmaradû̌, dě nata̤lṳhtò̌ho cahtǐ akûnu, a gònò̤gèglè ǐsha. Israel acǒmaradû̌ ǐ akòyò toǒ ata̤po̤ta̤phǎ ta atakhû̌ta̤ǎ. Htû̌sò̌ǐ mò̌ Cǒmaradû̌.