Htû̌sò̌htò̌ 65 - Kawyaw RC

Ta̤htû̌sò̌htò̌ ta ta̤hî̌bwǐhî̌sîrî

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.

¹ Kǒ Cǒmaradû̌, pa ǒsî̌tukǔ, htû̌sò̌ǐ na dě Sǐokholokhû̌. Pa glè ma̤lǒma̤bebò pata̤olò̤nu toǒ.

² Na mî̌ pwa̤ htě a gana̤de kò ta̤kwisabahtò̌. Kòyò pṳ̂̌꤮ tapwa̤ glè hèbò dě naǒ.

³ Pata̤sǔta̤plě pè̤ǎbò pa. Pwǎ̤tadě na bòlû̌kè bǎ pata̤sû̌ta̤plě.

⁴ Kòyò htě na wû̌lǎ asî, na noǒ asî dě nagûla̤cahtǐkû toǒnu, a nî̤bǎ ta̤howi̤. Pa sò̌phlǒmo̤bò tû̌ta ta̤wǒ ǒ dě nahǐ htě nata̤lṳhtò̌ho cahtǐ htǒonutama akû.

⁵ Kǒ Cǒmaradû̌, pwa̤ma̤lû̌htò̌ge pa, na gana̤de pata̤kwisaba. Na ma̤lû̌htò̌ge pa ta ta̤te̤pe̤ sû̌pi̤sò̌pi̤. Kòyò ǒ dě hǎkhû̌ gûla̤ pṳ̂̌꤮ tò̤glò toǒ bǎbǎ, a ǒ to̤ dě shidû̌shite̤we̤ htě a yo̤gutṳ̌ toǒnu bǎbǎ, a kè̌shu nǎla̤ǐ lǒkho tû̌꤮ na.

⁶ Na bǒlò̤ kholo toǒ ta nata̤sîrîpo̤phǎ. Na dǔlṳhtò̌ nata̤sîrîshû̌sho.

⁷ Na ma̤sî̌tukǔkèbò shidû̌shite̤we̤ pi̤ti̤pṳ̂tṳ̂. Na ma̤ǒkǔkèbò shipěpǒdû̌ po̤kookasha. Na ma̤sǔtukǔkèbò khlilèphû̌ ta̤ma̤ pi̤ti̤pṳ̂tṳ̂.

⁸ Kòyò htě a ǒ dě hǎkhû̌běkhû̌ pṳ̂̌꤮ tapwa̤ ǐshabò na ma̤ ta̤cǒklî̌kî̌ya. Kòyò ǒ dě mṳhtò̌ tokho toǒ bǎbǎ, dě mṳlò̤ tokho toǒ bǎbǎ, a sò̌le̤ sò̌po̤htû̌sò̌ǐ na.

⁹ Nakè̌ǐkhwè̌ǐ hǎkhû̌, na nojulò̤ khwè̌. Na ma̤wî̤ma̤wǒ plṳ̂꤮ mè̤mè̤̌ hǎkhû̌. Cǒmaradû̌ ashilo̤dû̌ toǒ lǒbe ta shi. Na ǐ kòyò bǔhudî. Htǒomî̌ ta̤ htě na ma̤wî̤ma̤wǒ bǎ hǎkhû̌ ta kòyòhǎkhû̌phû̌ aya.

¹⁰ Na nojulò̤ lǒbe khwè̌ dě la̤htě pwǎla̤ aya. Na nojucǒ kèpè̌ hǎkhlǒ. Na nojubǔjabò hǎbû. Na howi̤homò̤bòtû̌ hǎkhû̌, na nosǎhtò̌phohtò̌bòtû̌ sǒsǎwû̌pho.

¹¹ Na howi̤ pa akhû̌akhî, pasǒsǎwû̌pho nî̤wǒ. Na cû̌ bǎtètè̌꤮ bǎbǎ, ta̤ pṳ̂̌꤮ tacǎ ǒlǒǒbe lòte̤bǎlòte̤pò̤.

¹² Mi̤ dě lo̤mî̌shǒklakhû̌ sugijiwî̤. Na nosò̌le̤sò̌lò̤ kholo lò̤kèta kòyòhǎkhû̌phû̌ sò̌le̤sò̌lò̤.

¹³ Sophû̌ ta pè̤ toǒ ǒbecû̌bò dě mi̤sukhû̌. Bǔmṳ toǒ ǒbebò dě galo̤to̤kû. Ta̤pṳ̂̌꤮ tacǎ sò̌le̤sò̌lò̤ kaǎgu sò̌po̤htû̌sò̌ǐ.