Htû̌sò̌htò̌ 63 - Kawyaw RC

Sò̌yṳ ǒphǔ ta Cǒmara

Khwǐdǎ̤wi̤ ata̤sò̌po̤ htû̌sò̌ǐ. Dě a sò̌po̤ bǎ a cû̌ǒ dě Yṳ̌da lo̤mî̌shǒkla akhanu.

¹ Kǒ Cǒmaradû̌, na mî̌ hecǒmara. He sò̌phlosho kè̌lǎ na. He kè̌shuǐ mè̤mè̤̌ na. He sò̌yṳ ǒphǔ ta na lò̤kèta kòyò sò̌yṳ oshi dě lo̤mî̌shǒkla htě shi ǒ dǐmè̌꤮ tò̤nu.

² He kè̌shǐhto nata̤po̤ta̤phǎ ta nata̤sîrîdû̌sîrîhtû. He kè̌shǐ na dě nagûla̤ cahtǐ akû.

³ Na ta̤mo̤ǐ htě ahǎbòjò tò̤ htǒo awǒkhlope ta ta̤ǒhtûpwa̤ akhû̌akhî, he glè htû̌sò̌ǐ na.

⁴ He glè hî̌bwǐsîrî htû̌sò̌ǐ na to̤htû̌ he si. Bǎ he kwisabahtò̌ na akhanu, he glè yṳ̂htò̌ hecǔde.

⁵ A glè sò̌wî̤ǐ he pwǐ꤮ kò ǎkǒobe dîhǎsǐwǐ. He glè sò̌le̤sò̌lò̤ htû̌sò̌ǐ na ta lî̤sò̌po̤htû̌sò̌ǐ.

⁶ Bǎ he ǒ la̤mi̤khû̌ akhanu, he gènè̤htò̌ na. He gènè̤ǐ na tasa akû.

⁷ Na mî̌ pwa̤ma̤jè he akhû̌akhî, he sò̌le̤sò̌lò̤ sò̌po̤htû̌sò̌ǐ na dě na děge ayo̤ǔla̤.

⁸ He phǒměǐ na. Na cǔdemû ma̤jè he.

⁹ Kòyò toǒ kè̌lǎ ma̤si lǒkho he. Asî glè lòte̤kèbòtû̌ dě lṳnǎkhwǎdo.

¹⁰ Asî glè sikèbò ta nò̌she. Asî glè htûbò chyǐmi̤ ashǎ.

¹¹ Cǒmaradû̌ ma̤jè bǎ Khwǐdû̌ akhû̌akhî, a glè sò̌le̤sò̌lò̤. Lǒ̤꤮ bò kòyò htě a bèlò̤ ayo̤ ta Cǒmara ami̤nu toǒ glè htû̌sò̌ǐtû̌ Cǒmara. Kòyò htě a lòhǎlòho toǒnu, pwǎpwǎ꤮ a ǒkèbò pě.