Htû̌sò̌htò̌ 62 - Kawyaw RC

Yṳǎ Cǒmara ata̤ma̤kwaǐ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě ta̤sò̌po̤htû̌sò̌ǐ htǒo to̤to̤ mî̌ Jedutu htě a yṳ̂klè̌nè̌klò ǐ pwa̤sò̌po̤htû̌sò̌ǐ ta̤nu tapwa̤ aya.

¹ He khòsò̌do ǒpo̤ kè̌shuǐ tû̌꤮ dě Cǒmaradû̌ aǒ. Ta̤ma̤lû̌htò̌ge he ǒ dě aǒ hè.

² Pwa̤ htě a htû helo̤dû̌ ta pwa̤ma̤lû̌htò̌ge he mî̌ tû̌꤮ a. A mî̌ pwa̤ma̤kwaǐ he, he lò̤jûjòpe dî̌kî̌꤮ tò̤.

³ Sî lǒ̤꤮ bò htǒo, sî glè shěyî̤ he pwî̌tè? He mî̌ pwa̤khû̌ǎyṳ̂̌lò̤ sǒsǒta we̤dědǎ htě alòte̤ja, sî glè shěpe he ya?

⁴ Asî ma̤wǒnǎ ta bè̌lòte̤kè he dě ta̤bè̌dubè̌na̤ agûla̤htò̌yî̤gutṳ̌. Asî mo̤ǐ ta̤ lòhǎlòho toǒ. Asî howi̤homò̤ kò ta khû̌phě, asî ǐsho kò dě asò̌phlǒkû.

⁵ He sò̌phlǒhtû ǒpo̤ kè̌shuǐ tû̌꤮ pwǎ Cǒmaradû̌ aǒ. Heta̤kè̌shuǐ ǒ dě nû̌ûǒ hè.

⁶ Pwa̤ htě a htû helo̤dû̌, pwa̤ma̤lû̌htò̌ge he mî̌ tû̌꤮ a. A mî̌ pwa̤ma̤kwaǐ he, he lò̤jûjòpe tò̤.

⁷ Cǒmara mî̌ pwa̤ htě a ma̤lû̌htò̌ge he, a ǐ he ta̤bè̌dubè̌na̤. A mî̌ helo̤dû̌ htě ashû̌asho, hela̤ǒtûdûbǐ gûla̤.

⁸ Kǒ kòyòhǎkhû̌phû̌ sî, Cǒmaradû̌ mî̌ pwa̤la̤ǒtûdûbǐ agûla̤ hǒ, yṳǎ Cǒmaradû̌ pṳ̂̌꤮ taplǎ. Pwe̤ǐlṳbò yǎta sîta̤pò̤ta̤sha lǒ̤꤮ bò.

⁹ Kòyòhǎkhû̌phû̌ sǒsǒpwǎta ta̤sǎnṳsǎhtò̌ taplǎ. Kòyò dû̌yò̤ bǎbǎ, kòyò shèwè bǎbǎ, a nòdû̌ sǒsǒ꤮ bònû̌û. Dè jèkè̌ asî ta cò̌cû̌lǎ hî̌mî̌, a phidè̌shè̌꤮ pwǎ. Asî lǒ̤꤮ bò mî̌ a alò̤pwǎ ta ta̤sǎnṳsǎhtò̌ taplǎ.

¹⁰ Yṳǎnǎla̤ǐ pûma̤ ta̤ma̤jîma̤jû kò ma̤. Phî̌htò̌yî̤ pûma̤ sîna̤ ta ta̤kî̌ta̤kû̌ htě sî phî̌sigwiǎ kònu toǒ ma̤. Sǔsǔ na ta̤dû̌yò̤htò̌sa ǒdû̌htò̌ bǎbǎ, nǎla̤ǐ pûma̤ ta̤hǐnu toǒ ma̤.

¹¹ Cǒmaradû̌ hî̌phlote̤mǎ ayo̤ dě he gana̤de plṳ̂꤮ mè̤mè̤̌ ta Cǒmaradû̌ mî̌ a po̤phǎshû̌sho.

¹² Htohǒtò̤ kǒ Běcǎ ta̤adû̌, nata̤mo̤ǐ mî̌ ta̤mo̤ǐ htě ahǎbòjò tò̤. Pwǐ꤮ asî ma̤hto ta̤nu, na glè ǐ mè̤mè̤̌ kò pṳ̂̌꤮ tapwa̤ ata̤ma̤nî̤khû̌kǎ.