Htû̌sò̌htò̌ 55 - Kawyaw RC

Kòyò htě akhobǒsû̌ shaǎmi̤shaǎga nû̌ûnu tapwa̤ ata̤kwisaba

Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya. Khwǐdǎ̤wi̤ ata̤sò̌po̤ htǒoto̤to̤ mî̌ Ebrephû̌yo̤nu, a kaǎ nû̌û ta Masakǐlè ta̤sò̌po̤, dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ. Dě bǎ sò̌po̤ sǒsǒta Mahalasa ta̤sò̌po̤.

¹ Kǒ Cǒmaradû̌, gana̤de he ta̤kwisaba. Dò̌tûklû̌kè pûma̤ he ta̤kwigwèbǎhtò̌ nahtǒo ma̤.

^2-3 Gana̤de dě hî̌geshǔsǒ mò̌ he. Pwa̤sò̌khě he toǒ hî̌bò he, kòyòphû̌mò̤ ma̤jîma̤jûbò he akhû̌akhî, he sò̌phlǒpî̌, aguagè mè̤mè̤̌ he. Asî bè̌htò̌bò ta̤shuphǔshèwè dě helo̤. Asî sò̌phlǒdû̌ he dě a sò̌khěkhû̌khwèbò he.

⁴ Hesò̌phlǒ pè̤tè̤ gònò̤gèglè. Ta̤sita̤hǎmǎ hèto he, he ǐsha phoshû̌phogî.

⁵ Ta̤ǐsha ta ta̤gònò̤gèglè ǒte̤we̤bǐbò he. Ta̤sò̌gònò̤ ǐsha glè̌ ma̤pè̤bò he.

⁶ He hî̌ ta, “He sò̌yṳ děge ǒkû̌ pwǐ htû̌li̤cò̌. “He wi̤cû̌ dě ayî̤, cû̌ǒkǔ pě teděsǎ.

⁷ “He glè wi̤cû̌ yî̤. “He glè cû̌ǒ dě lo̤mî̌shǒklakhû̌.

⁸ “Ma̤pûhǐ he lû̌htò̌ ta gili̤shû̌, gili̤sǎplǎwi̤ ayanu, he glè khlè̌cû̌kè̌lǎ phwè hegûla̤ la̤ǒtûdûbǐnu tò̤glò.”

⁹ Kǒ Běcǎ ta̤adû̌, ma̤shû̌shishû̌shǎ, ma̤sò̌phlǒpî̌kèbò kòyòlǒplò̤ htǒotoǒ ata̤hî̌bǎ. He kè̌shǐ ta̤phlěpo̤nû̌û ta ta̤to̤klî̌ dě wî̤dû̌kû.

¹⁰ Lṳmṳkhǐkhǐ lṳmṳshasha, asî htò̌lè te̤we̤ lǒkho dě wî̤we̤dû̌khû̌. Ta̤phû̌mò̤shî̌hto ta ta̤pò̤ta̤sha toǒ ǒbò bǎ wî̤dû̌kû.

¹¹ Ta̤pî̌ta̤lṳ̂ ǒhtò̌bò bǎ wî̤dû̌kû. Ta̤ma̤nûma̤cě ta ta̤lǒǎplò̤ǎ ǒbe tî̌pî̌꤮ bò bǎ klè̌dakû.

¹² Pwa̤hî̌phû̌mò̤ he mî̌ pwa̤sò̌khě he mè̤tò̤, a dè mè̤ pwa̤sò̌khě hî̌mî̌, he khòsò̌dobò̌. Pwa̤ ma̤khǒma̤wa̤ he mî̌ hekhuwè mè̤tò̤, hekhuwè dè hî̌mî̌, he khlè̌ǒhǔbò̌.

¹³ Kòyònu tapwa̤ mî̌ na hǒ, namî̌ asǒsǒta he. Na cû̌htukhahtu kû̌ta he, hekhobǒsû̌ htě amo̤ǐkhlonu tapwa̤ hǒ.

¹⁴ Pa bǒsû̌khǎkho mo̤ǐwǒ mè̤mè̤̌ nû̌û tapwa̤ ta tapwa̤. Pa cû̌sabahtu kû̌ta kòyòprṳ̂ho dě Cǒmaradû̌ ahǐkû.

¹⁵ Ta̤phû̌mò̤shî̌hto ǒ dě pwa̤sò̌khě he toǒ ahǐphòdǒkû, asîsò̌phlǒkû akhû̌akhî, noma̤pî̌ma̤lṳ̂bò tû̌ asî ta ta̤si. Nolòte̤ samṳkèbò tû̌ asî dě lṳnǎkhwǎdo.

¹⁶ Pwǎ̤tadě he kwigwèbǎǐ Cǒmaradû̌. Dě Cǒmara tûjûpwa̤ ma̤lû̌htò̌ge he.

¹⁷ He kookasha kwigwèbǎǐ yǎ lṳmṳlîlî, lṳmṳshasha, lṳmṳhǎhǎ dě a glè gana̤de heta̤kwi.

¹⁸ Kòyò saprṳ̂ hèshě takǎ lǒkho he pwǎ̤tadě a glè ma̤lû̌htò̌ge he dě ta̤shěta̤pe̤ akû, he bǎshabǎhtò nǒ dǐcǎ꤮ tò̤.

¹⁹ Asî htû̌lè̌ kû̌ ata̤ǒhtûpwa̤ tò̤. Asî ǐsha Cǒmaradû̌ ala̤ tò̤tò̤. Hǐnuakhû̌akhî, Cǒmara htě a pǒ ta̤ tûjûpwa̤ htǒotapwa̤ glè gana̤de heta̤kwi. Dě a glè nolò̤jûkèbò asî.

²⁰ Hekhomo̤ǐ htǒo a cû̌shě akhobǒsû̌. A cǒtè̤ ta ata̤wṳ̂dò tò̤.

²¹ Ata̤hî̌bǎnu a bǒplîkhlo ta ta̤bè̌ pwǎ̤tadě ta̤sò̌khěkhû̌khwè toǒnu a ǒ dě asîsò̌phlǒkû. Ata̤hî̌bǎnu a bǒplîkhlo ta htǒsû̌ pwǎ̤tadě a htò lò̤kèta nò̌she htòrè̌hè̌.

²² Dò̌htò̌bò nata̤bǐta̤ò̌ toǒ dě Cǒmara tûjûpwa̤ alo̤nu. A kè̌ǐkhwè̌ǐ tû̌ta na. A nolò̤jûkè kòyòcǒkòyòtè̤ dǐkhò̌꤮ tò̤.

²³ Kǒ Cǒmaradû̌, pwa̤ma̤si kòyò ta pwa̤lòhǎlòho toǒnu na ma̤phǔtǔkè asî mṳni̤mṳsa takama. Na glè nolòte̤bò kòyòkhuphû̌mò̤ dě ta̤pî̌ta̤lṳ̂ ahǎkûyo̤ akû. He dě he yṳǎ tû̌꤮ pwǎ na.