Htû̌sò̌htò̌ 49 - Kawyaw RC

Nǎla̤ǐ pûma̤ ta̤dû̌yò̤htò̌sa ma̤

Kǒri akhlialè toǒ ata̤sò̌po̤ htû̌sò̌ǐ. Dě ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya.

¹ Kǒ khlilèphû̌ lǒ̤꤮ bò toǒ, gana̤de lǒkho. Kòyò ǒ dě hǎkhû̌ lǒ̤꤮ bò toǒ, dò̌ sînò̌ku.

² Kòyò khû̌ǎshû̌sho bǎbǎ, khû̌ǎyû̌lò̤ bǎbǎ, kòyòshèwè bǎbǎ, kòyòdû̌yò̤ bǎbǎ gana̤de lǒkho.

³ He hî̌bǎ yo̤ htě alǒbe ta ta̤sî̌ta̤jò. Hesò̌phlǒ ata̤gènè̤ toǒnu aphloaphǎ.

⁴ He glè to̤ǐphî̌gle pwa̤sî̌jòyo̤. He dǒ tǐtute̤gwe dě he glè pwe̤ǐlṳphlo bǎ kò ta heyo̤khěkhǒ amûasǎ.

⁵ Bǎ ta̤pò̤ta̤sha hèbǎ he akha bǎbǎ, kòyò ta̤sǔta̤plě ǒ toǒ ata̤ma̤jîma̤jû kònu a ǒte̤we̤ he akha bǎbǎ, he cû̌ǐshape ma̤tè?

⁶ Kòyònu toǒ mî̌ kòyò htě a nǎla̤ǐ tû̌ ata̤dû̌yò̤htò̌sa. A htû̌sò̌ǐ tû̌ ata̤dû̌yò̤htò̌sa dû̌꤮ nu toǒ.

⁷ Kòyò htě a htè̌gebò̌ bǎ kòsò̌phlǒhtûpwa̤nu a ǒ dǐpwǎ̤꤮ tò̤. Dě kòyò tapwa̤ sò̌htûpwa̤ ayanu, a ǐbò̌ nǒ Cǒmaradû̌ ale̤apwî̤ tò̤.

⁸ Sò̌htûpwa̤ ale̤apwî̤nu apwî̤dû̌꤮ mè̤mè̤̌, kò htè̌gebò̌ yǎta wû dǐkhò̌꤮ tò̤.

⁹ Ma̤pûhǐ kòyò tapwa̤ ǒhtûpwa̤bò̌ tûjûpwa̤, a gupî̌gusokè tò̤ ayanu, kò htè̌gebò̌ yǎta wû dǐkhò̌꤮ tò̤.

¹⁰ Kò pṳ̂̌꤮ tapwa̤ kè̌shǐ te̤mǎ ta kòyò htě a sî̌jò toǒ mî̌ a si pwǎ. Kòyòkě toǒ bǎbǎ, kòyòpè̌ǒò̌ toǒ bǎbǎ, a bǎ꤮ sinò pwǎ. Asî lǒ̤꤮ bò mî̌ bǎ bè̌kè ata̤dû̌yò̤htò̌sa ta kòhǔwa̤ aya.

¹¹ Asîhǎkhû̌ toǒnu aǒ tû̌ta asîmi̤ toǒ pwǎ̤tadě asî lṳkhû̌ toǒnu mî̌ asîhǐ tûjûpwa̤ talakhǎ. Asî la̤ǒ agûla̤nu a htû asîphû̌li̤ la̤ǒ tûjûpwa̤ talakhǎ.

¹² Kòyò dû̌yò̤htò̌sa tapwǎ̤ mî̌ a ǒyî̤jò bǎ hǎkhû̌ bǎo tûjûpwa̤ tò̤. Asî lò̤ta ta̤phû̌ta̤li̤ dě a sikèbò.

¹³ Kòyòǒò̌ htě a yṳǎ ana̤nu toǒ bǎbǎ, kòyò htě a sò̌phlǒ nî̤dû kû̌ta asînu toǒ bǎbǎ, htû̌꤮ asî klè̌ gutṳ pěmî̌, a htûhtò̌pwǎ hǐnu pěpě.

¹⁴ Lṳnǎkhwǎdo glè ǒpo̤gèǐ asî pwǐ pwa̤gèǐsophû̌, asî bǎ꤮ si sǒsǒbò pwǐ sophû̌. Lṳmṳlîakha kòyòcǒkòyòtè̤ glè pǒǐ asî. Asîna̤klû gulǒgusokèbò lṳnǎkhwǎdo dě a ǒtepheyî̤ ta asîhǐphò.

¹⁵ He lè̌dě Cǒmaradû̌ glè htè̌ge hesò̌phlǒhtûpwa̤ dě lṳnǎkhwǎdo ata̤shû̌ta̤sho acǔdekû, a glè kaǎge he dě aǒ.

¹⁶ Bǎ kòyò tapwa̤pwa̤ dû̌yò̤ dě sǔsǔ ata̤dû̌yò̤htò̌sa toǒ ǒdû̌htò̌ akhanu, sǎpla̤ pûma̤ dǐcǎ꤮ ma̤.

¹⁷ Bǎ a sikè akhanu, a phî̌cû̌nṳjò nǒ dǐcǎ꤮ tò̤. Ata̤dû̌yò̤htò̌sanu a gûcû̌to̤jò kû̌ a dě lṳkhû̌ tò̤.

¹⁸ Bǎ a ǒhtûpwa̤ akha a sò̌phlǒmo̤ mè̤mè̤̌ tû̌ ana̤, kò htû̌sò̌ǐ a pwǎ̤tadě,

¹⁹ A glè si sǒsǒkû̌pwǎ ta amo̤phaphiphusî dě wǐkha, a glè lòte̤to̤kè dě ta̤khǐta̤lo̤ agûla̤ tûjûpwa̤.

²⁰ Kòyò tapwa̤pwa̤ htě a htû̌sò̌ǐ ata̤dû̌yò̤htò̌sa, a asî̌yaphlophǎ kû̌kò tò̤ tapwa̤pwa̤nu, apî̌alṳ̂ sǒsǒta ta̤phû̌ta̤li̤.