Htû̌sò̌htò̌ 46 - Kawyaw RC

Cǒmaradû̌ mî̌ hela̤ǒhǔ

Kǒri akhlialè toǒ ata̤sò̌po̤ htû̌sò̌ǐ. Dě ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Dě bǎ sò̌po̤ sǒsǒta ta̤sò̌po̤ htě ami̤ ta Alamonu to̤to̤.

¹ Cǒmaradû̌ mî̌ pala̤ǒhǔ, pakhû̌paǎ. Bǎ pa shěto̤bǎ ta̤pò̤ta̤sha, a tîwî̌tòwònǎ dě a glè ma̤jè pa pṳ̂̌꤮ taplǎ.

² Hǐnuakhû̌akhî, hǎkhû̌ lòte̤jakè bǎbǎ, kholodû̌kholohtû nûta̤pa̤ lòte̤kè dě shidû̌shite̤we̤kû bǎbǎ, pa ǐsha dǐcǎ꤮ tò̤.

³ Shidû̌shite̤we̤ pěpǒ pi̤ti̤pṳ̂tṳ̂ te̤we̤toso bǎbǎ, kholo guyṳkosǒ pe̤htò̌bò bǎbǎ, pa ǐsha dǐcǎ꤮ tò̤.

⁴ Shikhî̌ ǒ tobo dě aphû̌phò toǒ dû̌hè ma̤sò̌le̤sò̌lò̤ kòyò ǒ bǎ Cǒmaradû̌ awî̤kûnu toǒ. Gûla̤ htǒomî̌ gûla̤ acahtǐ, Cǒmara htě adû̌ahtûkhlo kò la̤ǒ agûla̤.

⁵ Cǒmaradû̌ ǒ bǎ wî̤kûnu dě, kò ma̤lòte̤jajòkè wî̤htǒo tò̤. Cǒmaradû̌ glè ma̤jè nû̌û bǎ lṳmṳlîwosò꤮ akhanu.

⁶ Khlilèphû̌toǒ ma̤ pi̤ti̤pṳ̂tṳ̂bò, ashiaga toǒ lòte̤jakèbò. Bǎ Cǒmara yi̤kǒ akhanu, hǎkhû̌ bǔjalòte̤bò.

⁷ Cǒmara tûjûpwa̤ htě a pǒ ta̤ lǒ̤꤮ bò htǒotapwa̤ ǒhtukû̌ ta pa. Yǎ̤kò acǒmaradû̌ htǒomî̌ pala̤ǒhǔ agûla̤.

⁸ Hèkè̌mò̌, Cǒmara tûjûpwa̤ ata̤ma̤ htǒo, hèkè̌mò̌, ata̤shû̌ta̤sho cèrò ma̤pî̌kè ta̤ htǒo.

⁹ A ma̤ ǒkǔkèbò ta̤shěta̤pe̤ hǎkhû̌ tebě. A yǒgakèbò khlǐ, a gala̤gakèbò khlǐpla̤, a shû̌gèkèbò gòtò̤.

¹⁰ A hî̌ ta, “Pwǎpwǎ꤮ ǒ lǒkho, sî̌ya lǒkho ta he mî̌ Cǒmaradû̌. “Khlilèphû̌ toǒ htû̌sò̌ǐ lǒkho he pě, hǎkhû̌phû̌ toǒ htû̌sò̌ǐ lǒkho he pěpě.”

¹¹ Cǒmara tûjûpwa̤ htě a pǒ ta̤ lǒ̤꤮ bò htǒotapwa̤ ǒhtukû̌ ta pa, Yǎ̤kò acǒmaradû̌ htǒomî̌ pwa̤la̤ǒhǔ agûla̤.